'வலிக்குதா' - சிறு கதை
-------------
பல்லாயிரம் ஆண்டுகளுக்குப் பின் செயற்கை அறிவின் (AI ) ஆக்கிரமிப்பால் உலகம் மாறிவிட்ட நேரம் அது . பல ஆயிரம் ஆண்டுகளில் படிப்படியாக மரபணு அமைப்பை மாற்றியமைக்கும் மரபணு பொறியியல் ( genetic enginnering ) துறைக்குள் செயற்கை அறிவு நுழைந்து அது மனிதர்களின் உள்ளும் ஊடுருவி செயற்கை அறிவின் வேகமும் திறமையும் அவர்களுக்குள் தங்கி மனிதர்களின் இயற்கை அறிவை மாற்றி சஞ்சித (இறந்த கால வினை ) , பிராரப்த ( நிகழ் கால வினை ) பதிவுகள் படிப்படியாக மாறி ஆகாமியத்தில் ( எதிர் கால வினை ) செயற்கை அறிவு ஐக்கியமான நேரம் .
அப்போதும் பாசம் இருந்தது, காதல் இருந்தது, குடும்பம் இருந்தது , குழந்தைகள் இருந்தனர், சண்டை இருந்தது, சமாதானம் இருந்தது. ஆனால் எல்லாவற்றிலும் ஒரு செயற்கைத் தன்மை. இருந்தும் அத்தனையிலும் வேகமும் திறமையும் கலந்த ஒரு விறுவிறுப்பும் இருந்தது., இதற்குள் மாட்டிக்கொள்ளாமல் இருந்த சில பழங்குடி இனங்களும் பல நாடுகளின் காடுகளின் பள்ளத்தாக்குகளில் பழைய இயற்கை அறிவோடு இருந்தன. பொதிகை மலைப் பள்ளத்தாக்கும் அவற்றில் ஒன்று
தனது விண்வெளிப்பயணத்தில் இருந்து திரும்பிக் கொண்டிருந்த அந்த செயற்கை உலக இளைஞனின் பயணத் தட்டு ஒன்று தடம் மாறி அந்தப் பொதிகை மலைப் பள்ளத்தாக்கில் இறங்கி உயிருக்குப் போராடிக்கொண்டிருந்த அவனைக் காப்பாற்றியவள் அந்தப் பழங்குடிப் பெண். அவர்கள் குடிசையில் அவனுக்கு மூலிகை மருத்துவம் மூலம் உயிர் கொடுக்க முயன்று கொண்டு இருந்தாள் .
அவளின் தொடுதலின் உணர்வுகள், அவனுக்குள் மறைந்து கிடந்த பழைய நேற்றைய வினை , இன்றைய வினைப் பதிவுகளைக் கிளப்பி , எதிர்கால வினைப் பதிவுகளில் ஒரு இனம் புரியா இன்பத்தைக் கொண்டு வந்தன.
சிறிது நாட்களில் கண் திறந்த அவனிடம் கேட்டாள் ' வலிக்குதா ' .
அந்த ஒரு வார்த்தையில் , அந்த உணர்வில் இருந்த தாயின் பாசமும், காதலியின் காதலும் கலந்து ஒரு இன்ப அன்பின் இயற்கை அவனுக்குப் புதுமையாக இருந்தது. செயற்கை அறிவின் அடிப்படையான அந்த இயற்கை அறிவின் ஆழமும், அகலமும், உயரமும் அந்தப் பள்ளத்தாக்கு உலகில் இருந்த அந்த பழங்குடிப் பெண்ணின் அந்த ஒரு வார்த்தையில் கலந்து எதிரொலித்து அந்தப் பள்ளத்தாக்கு எங்கும் எதிரொலித்தது.
அந்த அன்பு ஒலி வெள்ளத்தின் உணர்வில் மூழ்கித் தட்டுத் தடுமாறினான் . தன் முன்னால் இருந்த அந்த இயற்கை அழகின் வேகம் அவனைத் தாக்கி மோகத்தில் தள்ளியது. அதில் மயங்கி சட்டென்று அவளைக் கட்டி இறுக்கினான். அந்த மென்மையும் குழைவும் அவனுக்குப் புதிது . அவனின் வேகமும் , அந்த செயற்கை அறிவின் திறமையும் விறுவிறுப்பும் கலந்த கட்டிப் பிடித்தலும் , அவளுக்குப் புதுமையாக இருந்தது. இன்பமாக இருந்தது .
இயற்கையில் மயங்கிய செயற்கை உணர்வும் , செயற்கையில் மயங்கிய இயற்கை உணர்வும் இணையும் நேரம் . ஜீன்களுக்குள் கலந்து இருந்த இரண்டு வெவ்வேறு கால வினைப்பதிவுகள் ,சஞ்சித , பிராரப்த கர்மங்கள் இணைந்து புதிய ஆகாமியக் கர்மப் பதிவுகளாக , புதிய பிறவியாக அங்கே ஆரம்பம் ஆகும் நேரம் . பொதிகை மலை உச்சியிலே புறப்பட்டது புதிய தென்றல் ஒன்று .
------------நாகேந்திர பாரதி
My Poems/Stories/Articles in Tamil and English
கருத்துகள் இல்லை:
கருத்துரையிடுக