புதன், 25 செப்டம்பர், 2019

வாய்ச் சொல் வீணர்கள் - கவிதை

வாய்ச் சொல் வீணர்கள்
--------------------------------------
பட்டம் பெறுவதற்கும்
பணத்தை நம்பி விட்டு

உடனே வேலைக்கும்
கையூட்டுக் கொடுத்து விட்டு

தொழிலுக்கு கூலியினை
கறுப்பிலும் வாங்கி விட்டு

ஓட்டுச் சீட்டினையும்
பண்ட மாற்றம் செய்து விட்டு

உண்டியலில் போட்ட வுடன்
புனிதர் ஆகி விட்டு

நாட்டில் ஊழலென்று
நாகிழியப்  பேசிடுவார்
--------------------------------------------------நாகேந்திர பாரதி
Humor in Business - Poetry Book

சனி, 31 ஆகஸ்ட், 2019

விளையாட்டுப் பாதைகள் - கவிதை

விளையாட்டுப் பாதைகள் - கவிதை
----------------------------------------------------------
வளைந்தும் நெளிந்தும்
குறுக்கும் நெடுக்குமாய்
எத்தனை பாதைகள்
கிராமத்துக் குடிசைகளின்
இடைவெளி வழியே

ஓடிப் பிடிக்கவும்
ஒளிந்து பிடிக்கவும்
கற்றுக் கொடுத்த
வாழ்க்கைப் பயணத்தின்
விளையாட்டுப் பாதைகள்
-----------------------------------------------நாகேந்திர பாரதி
Humor in Business - Poetry Book

வியாழன், 29 ஆகஸ்ட், 2019

வாசம் ஆனவர்கள் - கவிதை

வாசம் ஆனவர்கள் - கவிதை
------------------------------------------------
வயக்காட்டு  வாசத்தில்
பாட்டனார் ஞாபகம்

கோயில்  வாசத்தில்
தாத்தாவின் ஞாபகம்

குழம்பு  வாசத்தில்
அம்மாச்சி ஞாபகம்

புத்தக வாசத்தில்
அப்பத்தா  ஞாபகம்

வாசத்தில் இருந்து
வாசம் செய்பவர்கள்
------------------------------------நாகேந்திர பாரதி
Humor in Business - Poetry Book

புதன், 28 ஆகஸ்ட், 2019

சும்மா இருத்தல் - கவிதை

சும்மா இருத்தல் - கவிதை
------------------------------------------
சும்மா இருக்கலாம்
என்று நினைத்தால்
சும்மா இருக்க முடிவதில்லை

சும்மா இருக்கலாம்
என்ற நினைப்பே
சும்மா இருக்க விடுவதில்லை

சும்மா இல்லாமல் 
சும்மா இருந்தால்
சும்மா இருக்க 
முடியுமோ  என்னமோ
-----------------------------------------------------நாகேந்திர பாரதி
Humor in Business - Poetry Book

திங்கள், 17 ஜூன், 2019

கவிதை இதழ்கள் - கவிதை

கவிதை இதழ்கள் - கவிதை
--------------------------------------------
காதல் தடவிய
கவிதை கேட்டாள்

இதழைத் தடவி
இதுதான் என்றான்

பொய்க் கோபத்தில்
உதட்டைச்  சுழித்தாள்

புதிய  கவிதையைப்
பூத்துச் சிரித்தாள்

உதட்டுக்குள் கவிதையை
ஒளித்து வைத்திருப்பவள்
--------------------------------------------நாகேந்திர பாரதி
Humor in Business - Poetry Book

புதன், 5 ஜூன், 2019

கானல் காட்சி - கவிதை

கானல்  காட்சி - கவிதை
--------------------------------------
புத்தகப் பையும்
வகுப்பறைச் சப்தமும்

கோயில்  குளமும்
திருவிழாக் கூட்டமும்

கண்மாய்க் கரையும்
வயக்காட்டு வரப்பும்

புழுதிக் காற்றாய்
பறக்கும் பொழுது

கானல் நீராய்க்
கரையும் காட்சி
----------------------------------நாகேந்திர பாரதி
Humor in Business - Poetry Book

திங்கள், 15 ஏப்ரல், 2019

ஐம்பூத ஓட்டு

ஐம்பூத ஓட்டு
-----------------------
நிலத்துக்குக் கேடு வராத்
திட்டங்களைத் தீட்டு

நீருக்கு அலையாத
நிலைமையினைக் காட்டு

நெருப்புக்கு இரையாக
ஊழலினை வாட்டு

காற்றுக்கு மாசு வராத்
தொழில்களையே கூட்டு

விண்ணுக்கு நிகராக
நம் வாழ்வை  நாட்டு

ஐம்பூதம் காப்போர்க்கே
அளித்திடுவோம் ஓட்டு
--------------------------------------நாகேந்திர பாரதி
Humor in Business - Poetry Book

ஞாயிறு, 10 மார்ச், 2019

விதை முதல் வேர் வரை

விதை முதல் வேர் வரை
-------------------------------------------
கற்பனை விதை விழுந்தால்
கவிதை முளைத்து வரும்

கருத்து குருத்து விட்டால்
கவிதைச் செடி வளரும்

இலையாகிப் பூவாகிக்
கவிதை மணம் வீசும்

காயாகிக் கனியாகிக்
கவிதை பழுத்து வரும்

வேராகி விழுதாகிக்
கவிதை நிலைத்திருக்கும்
-----------------------------------நாகேந்திர பாரதி
Humor in Business - Poetry Book

செவ்வாய், 5 மார்ச், 2019

இறைவன் பெருமை

இறைவன் பெருமை
-----------------------------------
சிற்பங்களை பார்க்க நடந்த
கால்வலி இவ்வளவு

சிற்பங்களை செதுக்கிச் செய்த
கைவலி எவ்வளவு

கட்டுமர உல்லாசப் பயணத்தில்
பயம் இவ்வளவு

கட்டுமர வாழ்க்கைப் பயணத்தில்
பாரம் எவ்வளவு

செடியைப் பூவைப் பார்த்த
மகிழ்ச்சி இவ்வளவு

அன்பை ஊற்றி வளர்த்த
உழைப்பு  எவ்வளவு

இயற்கையும் செயற்கையும் கலந்த
திறமை இவ்வளவு

எல்லாம்  படைத்த இறைவன்
பெருமை எவ்வளவு
-------------------------------------------நாகேந்திர பாரதி
Humor in Business - Poetry Book



வெள்ளி, 1 மார்ச், 2019

சைக்கிள் ஓட்டம்

சைக்கிள் ஓட்டம்
-----------------------------------
வாடகைக்கு விடுவதற்கென்றே
ஒரு ஓட்டை சைக்கிள்

உடைந்த ஸ்டாண்டோடு
சுவரோரம் ஒய்யாரமாய்

அமுக்கிப் பார்த்தாலும்
அடிக்காத பெல்லோடும்

அடிக்கடி கழலும்
பிசுபிசுத்த  செயினோடும்

சைக்கிள் ஓட்டக்
கற்றுக் கொண்டதை விட

சைக்கிள் பாகங்களைக் 
கற்றுக் கொண்டதே அதிகம்
----------------------------------------நாகேந்திர பாரதி
Humor in Business - Poetry Book

புதன், 27 பிப்ரவரி, 2019

இருந்தும் இல்லை

இருந்தும் இல்லை
---------------------------------
முடி வெட்டிட்டு வந்த
முக்குக் கடை இருக்கு

முங்கிக் குளிச்சு வந்த
கண்மாயும் இருக்கு

சுத்தி சுத்தி வந்த
கோயிலும் இருக்கு

சும்மா படுத்திருந்த
திண்ணையும் இருக்கு

எல்லாம் இருக்கு
அவர் மட்டும் இல்லை
--------------------------------------------நாகேந்திர பாரதி
Humor in Business - Poetry Book

செவ்வாய், 26 பிப்ரவரி, 2019

நரம்புகளின் நாட்டியம்

நரம்புகளின் நாட்டியம்
------------------------------------------
இதயத்தின் நரம்புகளில்
இன்னிசை ஓட்டம்

மூளையின் நரம்புகளில்
முக்கியக் குறிப்புகள்

கைகளின் நரம்புகளில்
கவிதையின் ஊற்று

கால்களின் நரம்புகளில்
நெருங்கிடும் வேகம்

அவளை பார்த்தவுடன்
நரம்புகளின் நாட்டியம்
-------------------------------------நாகேந்திர பாரதி
Humor in Business - Poetry Book

வியாழன், 7 பிப்ரவரி, 2019

புலரும் பொழுது

புலரும் பொழுது
-------------------------------
இரவெல்லாம் தூக்கம் வராக் காரணத்தால்
ஏங்கிப் போய்க் கொக்கரிக்கும் கிழட்டுச் சேவல்
உறவாடித் தென்றலிட்ட முத்தத்தின்
பனிச்சாறைப் பார்த்தேங்கும் பசுஞ்   செடிகள்

அடங்கிவிட்ட அலைக்கூட்ட மேகங்கள்
ஆகாயக் கடலினிலே அமைதிக் காட்சி
அவசரமாய் மரத்தை விட்டு பறவைக் கூட்டம்
அணிவகுப்பை நடத்துகின்ற ஆர்ப்பாட்டம்

எங்கேயோ செல்லுகின்ற ரயிலின் ஓசை
பிரிந்தவளின் நினைவுக்குச்  சுருதி கூட்டும்
பால்கார மணியோசைச்   சப்தம் வந்து
பாதியிலே நினைவுகளை அறுத்துப் போடும்
-----------------------------------------------------------------நாகேந்திர பாரதி
Humor in Business - Poetry Book

புதன், 30 ஜனவரி, 2019

இடைவெளி உலகம்

இடைவெளி உலகம்
---------------------------------------
இரைச்சலுக்கும் அமைதிக்கும்
இடையிலே உலகம்

இருட்டுக்கும் வெளிச்சத்துக்கும்
இடையிலே உலகம்

இன்பத்திற்கும் துன்பத்திற்கும்
இடையிலே உலகம்

இழுமூச்சுக்கும் விடுமூச்சுக்கும்
இடையிலே உலகம்

இடைவெளியில் இருக்கிறது
இறைவனின் உலகம்
------------------------------------------நாகேந்திர பாரதி
Humor in Business - Poetry Book

வெள்ளி, 18 ஜனவரி, 2019

காலச் சுவடுகள்

காலச் சுவடுகள்
----------------------------
சில முகங்கள் - எப்போதோ
பார்த்தவை போல இருக்கலாம்

சில குரல்கள் - எப்போதோ
கேட்டவை போல இருக்கலாம்

சில பாதைகள் - எப்போதோ
கடந்தவை போல இருக்கலாம்

சில நிகழ்வுகள் - எப்போதோ
நடந்தவை போல இருக்கலாம்

காலச் சுவடுகள் - எப்போதும்
கலைந்து  போகாமல் இருக்கலாம்

----------------------------------------------நாகேந்திர பாரதி
Humor in Business - Poetry Book

வியாழன், 17 ஜனவரி, 2019

கண்ணீர்ப் பொங்கல்

கண்ணீர்ப் பொங்கல்
------------------------------------
கரும்புத் தோட்டம்
கடலிலே கரைஞ்சாச்சு

நெல்லு வயலெல்லாம்
பதராய்ப் பறந்தாச்சு

மீதிக் காடெல்லாம்
மேல் ரோடாய் மாறியாச்சு

ரேஷன் அரிசியும்
பருப்பும்  வந்தாச்சு

கிராமத்துப் பொங்கல்
கண்ணீரில் பொங்கியாச்சு
-------------------------------------நாகேந்திர பாரதி
Humor in Business - Poetry Book