மாதம் ஒருமுறை

மாதம் ஒருமுறை
--------------------------------
வீட்டுப் பெரியவர்களுடன்
சிரித்துப் பேசிக்கொண்டு

கணவனும் மனைவியும்
முகங்களைப் பார்த்துக்கொண்டு

பிள்ளைச் செல்வங்களுடன்
ஆட்டமும் பாட்டமுமாய்

தொலைக்காட்சி கணினியின்
தொந்தரவு இல்லாமல்

மாதம் ஒருமுறை
மின்விடுப்பு தினத்தன்று
----------------------------------------------நாகேந்திர பாரதி

நூலகர் மறைவு

நூலகர் மறைவு
------------------------------------
இரங்கல் சுவரொட்டியில்
சிரித்துக் கொண்டிருந்தார்
முந்தா நாள் பார்த்த போது
புத்தக வாசனையை
அனுபவித்த படி
அடுக்கிக் கொண்டிருந்தார்
திருப்பித் தராதவர்களை
திட்டிக் கொண்டிருந்தார்
இறைவனுக்கும் புத்தகம்
இரவலாய்க் கொடுத்தாரோ
-----------------------------------------நாகேந்திர பாரதி

காலக் கணக்கு

காலக் கணக்கு
------------------------------
மழையும் வெயிலும்
பகலும் இரவும்
மாறும் சேரும்
மலரும் உலரும்
உறவும் பிரிவும்
உணர்வும் தளர்வும்
வரும் போகும்
வாழ்வும் தாழ்வும்
காலக் கணக்கு
கழிக்கும் கூட்டும்
-------------------------------------நாகேந்திர பாரதி

பொம்மை உலகம்

பொம்மை உலகம்
-----------------------------------
குழந்தையின் உலகத்தில்
நாமெல்லாம் பொம்மைகளே
குளிக்க வைக்க ஒரு பொம்மை
சோறு ஊட்ட ஒரு பொம்மை
சேர்ந்து ஆட ஒரு பொம்மை
வெளியில் போக ஒரு பொம்மை
பாட்டுப் பாட ஒரு பொம்மை
தூங்க வைக்க ஒரு பொம்மை
பொம்மைகள் விட்டுப்போனால்
பிடிக்காது குழந்தைக்கு
---------------------------------------நாகேந்திர பாரதி

புத்தக அலமாரி

புத்தக அலமாரி
------------------------------
விரும்புகின்ற புத்தகத்தை
விலை கொடுத்து வாங்கும்
படிப்பதற்கு நேரமின்றி
படுக்கையிலே தூங்கும்
பார்க்கின்ற போதெல்லாம்
படபடத்து ஏங்கும்
வீடு மாற்றும் போதினிலே
வீசைக்கு விற்கும்
அடுத்த வீட்டினிலும்
அலமாரி நிரம்பும்
-------------------------------------நாகேந்திர பாரதி

காதல் இயற்கை

காதல் இயற்கை
-----------------------------------
வார்த்தைகள் இன்றி
வாய் பேசி வைக்கும்
சத்தங்கள் இன்றி
செவி கேட்டு வைக்கும்
வெளிச்சமே இன்றி
கண் பார்த்து வைக்கும்
தொடுதலே இன்றி
உடல் புரிந்து வைக்கும்
இயற்கையை மாற்றும்
இன்பமே காதல்
-------------------------நாகேந்திர பாரதி

உயர்ந்த காதல்

உயர்ந்த காதல்
---------------------------------
உடலைத் தாண்டிய
மயக்கங்கள் உண்டு
உணர்வில் ஊறிய
உள்ளங்கள் உண்டு
இரவைத் தாண்டிய
ஏக்கங்கள் உண்டு
உறவில் சிறந்த
உணர்ச்சிகள் உண்டு
உலகில் உயர்ந்த
காதலில் உண்டு
-----------------------------நாகேந்திர பாரதி

நல்லோர் நூல்

நல்லோர் நூல்
-------------------------
ஊருக்கு ஏற்றாற்போல்
உடைகளை மாற்றிக்கொண்டு
ஆளுக்கு ஏற்றாற்போல்
அரட்டையை அடித்துக்கொண்டு
பொய்யான சிரிப்புகளை
பொலபொலென்று உதிர்த்துக்கொண்டு
நடமாடும் மனிதர்களின்
தோலுரித்துக் காட்டுதற்கு
நமக்கென்றும் துணையுண்டு
நல்லோரின் நூல்கள்
----------------------------------நாகேந்திர பாரதி

உழைப்பின் உயர்வு

உழைப்பின் உயர்வு
--------------------------------
சுத்தமான உறவும்
சுற்றுப்புற நட்பும்
குடிசையில் பிறந்தவரை
கோபுரத்தில் ஏற்றி வைக்கும்

பரம்பரையைச் சொல்லிக்கொண்டு
பரிகசித்துத் திரிபவர்
மாளிகையில் பிறந்தாலும்
மண்சட்டி ஏந்த வைக்கும்

பிறப்பில் உயர்வில்லை
பேருழைப்பே உயர்வு தரும்
--------------------------------------நாகேந்திர பாரதி

குழந்தை உண(ர்)வு

குழந்தை உண(ர்)வு
------------------------------
அரிசி, கடலை
பாசிப் பயறு
கம்பு, கேப்பை
ஜவ்வரிசி
பார்லி, பாதாம்
முந்திரிப் பருப்பு
பாத்துப் பாத்து
சேத்து எடுத்து
அரைச்சுக் கலக்கி
ஆக்கிக் கொடுத்து
சத்து உணவுன்னு
சாப்பிடச் சொன்னா
முறைச்சுப் பாத்திட்டு
முழுங்கி வைக்கும்
--------------------------------------------நாகேந்திர பாரதி