வியாழன், 19 அக்டோபர், 2017

குழந்தையின் பந்து

குழந்தையின் பந்து
----------------------------------
இங்கிருந்து அங்கும்
அங்கிருந்து இங்கும்

உள்ளிருந்து வெளியேயும்
வெளியிருந்து உள்ளேயும்

உருண்டும் புரண்டும்
களைத்துப் போய்

படுத்துக் கிடக்கிறது
அந்தப் பந்து

உறங்கும் குழந்தையின்
உள்ளங்கை ஓரத்தில்
-----------------------------------நாகேந்திர பாரதி
  http://www.nagendrabharathi.com

புதன், 18 அக்டோபர், 2017

பிரிவும் முடிவும்

பிரிவும் முடிவும்
-----------------------------
பிரிந்து போவது என்பது
முடிந்து போவதல்ல

கண்கள் பார்க்காத
தூரத்தில் இருந்தாலும்

காதுகள் கேட்காத
தூரத்தில் இருந்தாலும்

கைகள் தொடாத
தூரத்தில் இருந்தாலும்

உதடுகள் ஒட்டாத
தூரத்தில் இருந்தாலும்

எண்ணங்கள் எப்போதும்
அருகிலேயே இருப்பதால்

பிரிந்து போவது என்பது
முடிந்து போவதல்ல
----------------------------------------------நாகேந்திர பாரதி
http://www.nagendrabharathi.com 

திங்கள், 16 அக்டோபர், 2017

ஆதார் அட்டை

ஆதார் அட்டை 
-------------------------
ரேஷன் அட்டையோடு இணைப்போமென்று
தெரியாது

வாக்காளர் அட்டையோடு இணைப்போமென்று
தெரியாது

பான் அட்டையோடு இணைப்போமென்று
தெரியாது

மொபைல் அட்டையோடு இணைப்போமென்று
தெரியாது

டிரைவிங் அட்டையோடு இணைப்போமென்று
தெரியாது

தெரிந்து இருந்தால் போட்டோவில்
சிரித்திருக்கலாம்

---------------------------------------------நாகேந்திர பாரதி
http://www.nagendrabharathi.com

ஞாயிறு, 8 அக்டோபர், 2017

முதலும் முடிவும்

முதலும் முடிவும்
-------------------------------
செடிக்குள் விதை நீ
விதைக்குள் செடி நீ

உடலுக்குள் உயிர் நீ
உயிருக்குள் உடல் நீ

உள்ளத்தில் எண்ணம் நீ
எண்ணத்தில் உள்ளம் நீ

இன்பத்தில் துன்பம் நீ
துன்பத்தில் இன்பம் நீ

முதலுக்குள் முடிவு நீ
முடிவுக்குள் முதலும் நீயே
--------------------------------------நாகேந்திர   பாரதி
http://www.nagendrabharathi.com 

சனி, 30 செப்டம்பர், 2017

இயற்கைக் கல்வி

இயற்கைக் கல்வி
---------------------------------
பேசிப் பழகுவது
இயலாம் கல்வி

பாடிப் பழகுவது
இசையாம் கல்வி

ஆடிப் பழகுவது
கூத்தாம் கல்வி

இயலிசை நாடகம்
இயற்கைக் கல்வி

மதிப்பெண் தேடும்
மனப்பாடக் கல்வி
------------------------------நாகேந்திர பாரதி
http://www.nagendrabharathi.com 

புதன், 13 செப்டம்பர், 2017

காலம் கடந்த கவிதை

காலம் கடந்த கவிதை
---------------------------------------
கடந்த கால நினைவும்
நிகழ் கால நடப்பும்
எதிர் கால ஏக்கமும்

எண்ணத்தின்  வழியாக
எழுத்தில் இறங்கும் போது
காலங்கள் மாறி விடும்

பார்த்ததும் படித்ததும்
பட்டதும் உணர்ந்து

வருகின்ற வார்த்தைகளில்
வடித்துவிட்டுப் போய் விடலாம்

காலமும் கருத்தும்
படிப்பவர்  அனுபவம்
--------------------------------------------நாகேந்திர பாரதி
http://www.nagendrabharathi.com

செவ்வாய், 5 செப்டம்பர், 2017

வலித் துணை

வலித் துணை
------------------------
வளர்கின்ற பருவத்தில்
வருகின்ற வலிகட்கு
பெற்றோர் துணை

அலுவலக வேலைகளில்
ஆகின்ற வலிகட்கு
நண்பர் துணை

குடும்பச் சுமைகளிலே
கூடுகின்ற வலிகட்கு
இணையே துணை

உற்றோர்கள் மறைவினால்
உண்டாகும் வலிகட்கு
சுற்றம் துணை

வயதான பின்னாலே
வாட்டுகின்ற வலிகட்கு
தானே துணை
------------------------------------நாகேந்திர பாரதி
http://www.nagendrabharathi.com

வாழ்க்கைப் பயணம்

வாழ்க்கைப் பயணம்
-------------------------------------
அந்தக் கிராமத்தில் இருந்து
பள்ளிக்கூட ஊருக்கு
கருவக் காட்டு வழி
நடைப் பயணம்

தூக்குச் சட்டியோடும்
தொங்கு பையோடும்
போய் வந்து முடிந்தது
பள்ளிப் பயணம்

மாட்டு வண்டியோடு சிலர்
மண்ணு லாரியோடு சிலர்
கட்சிக் கொடியோடு பலர்
வாழ்க்கைப் பயணம்
----------------------------------நாகேந்திர பாரதி
http://www.nagendrabharathi.com 

திங்கள், 4 செப்டம்பர், 2017

இடப் பெயர்ச்சி

இடப் பெயர்ச்சி
-----------------------------
செவ்வாய்க் கிழமை காணோம்
வெள்ளிக்கிழமையும்  காணோம்

கோயில் வாசலில்
படுத்துக் கிடக்கும்
பிச்சைக்காரனைக் காணோம்

ஞாயிற்றுக்கிழமை பார்த்தோம்
டாஸ்மாக் வாசலில்
படுத்துக் கிடந்தான்

கூட்டம் சேருமிடத்திற்கு
இடப் பெயர்ச்சி
------------------------------------நாகேந்திர பாரதி
http://www.nagendrabharathi.com 

ஞாயிறு, 3 செப்டம்பர், 2017

தேநீர் நேரம்

தேநீர் நேரம்
-----------------------
தேநீர் கோப்பையைப் பார்க்கிறோம்
பாதிக் கோப்பைதான் தேநீர்
எப்போது குடித்தோம்

மறுபடியும் பார்க்கிறோம்
கோப்பை காலியாக இருக்கிறது
என்ன நடக்கிறது

அடியில் சில துளிகள் மட்டும்
மெதுவாக வாயில் கவிழ்க்கிறோம்

அந்த ருசி நாக்கில்
அந்த வாசம் மூக்கில்

நாமேதான் குடித்திருக்கிறோம்
இந்த தேநீர் நேரங்களே இப்படித்தான்
-----------------------------------------------------நாகேந்திர பாரதி
http://www.nagendrabharathi.com 

வெள்ளி, 1 செப்டம்பர், 2017

வானம் வறக்குமேல் ..

வானம் வறக்குமேல் ..
-----------------------------------
ஊடு பயிரோடு
நெல்லும் வளர்ந்தது

ஆடு மாடோடு
வாழ்க்கை நடந்தது

படப்பு கட்டும்போது
பயறும் கடலையும்

கருப்பு சாமிக்கு
ஒயிலும் படையலும்

காணாமல் போனது
எல்லாமே இப்போது
-----------------------------------நாகேந்திர பாரதி
http://www.nagendrabharathi.com

பிரிவோம் சந்திப்போம்

பிரிவோம் சந்திப்போம்
-----------------------------------------
மறுபடியும் சந்திக்கிறோம்
எதைப் பற்றிப் பேசுவது

ரெயிலில் நடந்ததையா
தெருவில் நடந்ததையா

பார்த்துப் போனதையா
பாராமல் போனதையா

எதையுமே பேசாமல்
மறுபடியும் பிரிகிறோம்

மறுபடியும் சந்திப்போம்
பேசாமல் பிரிவதற்கு
-------------------------------நாகேந்திர பாரதி
http://www.nagendrabharathi.com

புதன், 30 ஆகஸ்ட், 2017

தெப்பக் குளம்

தெப்பக் குளம்
----------------------------
மூழ்கும் களிமண் பிள்ளையாரின்
வயிற்றுக் காசை
சுரண்டி எடுப்பதைப்
பார்த்திருக்கிறோம்

நடுக்குளச் சகதியில்
கால் மாட்டிக் கத்தியதைப்
பார்த்திருக்கிறோம்

மண்டபத்தில் இருந்து
பயத்தோடு குதித்ததைப்
பார்த்திருக்கிறோம்

தெப்பம் ஓடி மட்டும்
பார்த்ததில்லை
அந்தத்  தெப்பக்குளத்தில்
--------------------------------நாகேந்திர பாரதி
http://www.nagendrabharathi.com 

காலைப் பொழுது

காலைப் பொழுது
----------------------------
சூரிய ஒளியோடு
விளையாடும் மேகங்கள்

காற்றுக்கு ஏற்றபடி
ஆடுகின்ற இலைகள்

ஊர்திகளுக்கு உள்ளேயும்
வெளியேயும் மனிதர்கள்

எங்கோ போய்க்கொண்டு
எதையோ நினைத்துக்கொண்டு

ஆடுகின்ற ஓடுகின்ற
அத்தனையும் பார்த்தபடி

நடந்து கொண்டிருக்கும்
காலைப் பொழுது

மாலை வரும் இரவு வரும்
மறுபடியும் காலை வரும்
------------------------------------நாகேந்திர பாரதி
http://www.nagendrabharathi.com 

திங்கள், 28 ஆகஸ்ட், 2017

ரயில் பயணங்கள்

ரயில் பயணங்கள்
-----------------------------------
அதே ரயில் தான்
அதே ஊர்கள் தான்

அதே கம்பங்கள் தான்
அதே ஓட்டம் தான்

வேறொரு நாளில்
வேறொரு கூட்டத்தோடு

வேறொரு மனத்தோடு
வேறொரு பயணம்

ஒவ்வொரு பயணமும்
ஒவ்வொரு விதமாய்
---------------------------------நாகேந்திர  பாரதி
 http://www.nagendrabharathi.com 

வாழ்க்கைப் பாடம்

வாழ்க்கைப் பாடம்
----------------------------------
அன்பால் முடியுமென்றும்
அறிவால் முடியாதென்றும்

உறவால் முடியுமென்றும்
பிரிவால் முடியாதென்றும்

நலத்தால் முடியுமென்றும்
வளத்தால் முடியாதென்றும்

உளத்தால் முடியுமென்றும்
உடலால் முடியாதென்றும்

உணரும் நேரம்
உண்மை நேரம்
---------------------------------------நாகேந்திர பாரதி
http://www.nagendrabharathi.com 

புதன், 23 ஆகஸ்ட், 2017

வயசுக் கோளாறு

வயசுக் கோளாறு
----------------------------------
மேல் மூச்சு வாங்கும்
மேனியெங்கும் வேர்க்கும்

புரண்டபடி கிடக்கும்
புதுநினைவில் தவிக்கும்

எடுத்தெறிந்து பேசும்
ஏக்கமாகப் பார்க்கும்

காதலுக்கும் முதுமைக்கும்
காரணமாய் இருக்கின்ற

வயசுக் கோளாறு
இருபதிலும் அறுபதிலும்
-----------------------------------நாகேந்திர பாரதி
http://www.nagendrabharathi.com 

செவ்வாய், 25 ஜூலை, 2017

பிக் பாஸ் புரணி - நகைச்சுவைக் கட்டுரை

பிக் பாஸ் புரணி - நகைச்சுவைக் கட்டுரை
----------------------------
இந்த பிக்பாஸ் ப்ரோக்ராம்  பாக்க ஆரம்பிச்சப்புறம் வீட்டிலே பெரிய பிரச்சினையா இருக்குங்க. நம்ம பாட்டுக்கு நிதானமா ஒன்பது மணிக்கு மேலே எந்திரிச்சிட்டு இருந்தோம். இப்ப என்னடான்னா எட்டு மணிக்கே ஏதோ 'ஜிங்கு ஜக்கா, ஜங்கு ஜிக்கா ;' ன்னு ஏதோ ஒரு பாட்டை எட்டு மணிக்கெல்லாம் போட்டு அலற வச்சிடுறாங்க. நம்ம எந்திரிச்சு ஆடணுமாம். ஒவ்வொரு நாளையும் உற்சாகமா ஆரம்பிக்கணுமாம். நானும் எந்திருச்சு ஆடிப் பார்த்தேன். இடுப்பு புடிச்சுக்கிட்டது தான் மிச்சம். அடுத்த நாள்லே இருந்து பத்து மணிக்கு எந்திரிக்கிறதே  கஷ்டமா ஆயிடுச்சு .

அப்புறம் இந்த சமையல் வேலை இருக்கு பாருங்க. 'சினேகன் இருக்கார் பாருங்க. எவ்வளவு அருமையா சமைக்கிறாரு. இதுக்காகவே அவரை யாரும் எலிமினேட் பண்ணுறது இல்லே. திருப்பி திருப்பி லீடரா ஆக்கிறாங்க. நீங்களும் சமையல் பண்ணிப் பாருங்க' ன்னு சொல்றாங்க. நான் சமைக்க ரெடி. இவங்க சாப்பிட ரெடியா. அப்புறம் சாப்பிட்டு வயித்து வலி அது இதுன்னு சொல்லக் கூடாது. ஆமா .

முந்தியெல்லாம் நம்ம சொந்தக்காரங்க நண்பர்கள் புரணிகள் தான் வீட்டிலே ஓடிக்கிட்டு இருக்கும். இப்ப ஒரு நல்லது நடந்திருக்கு. அதையெல்லாம் மறந்திட்டு  ஜூலி, காயத்ரி, ஓவியா , ஆரவ், சக்தி புரணி தான் வீட்டிலே நாள் புல்லா    ஓடிக்கிட்டு இருக்கு. அடுத்த வாரம் யாரு எலிமினேட் ஆவாங்கன்னு பெரிய சர்ச்சையே நடந்துக்கிட்டு இருக்கு. இதை வச்சு ஒரு பெரிய சூதாட்டமே நடக்கும் போலிருக்கு. கிரிக்கெட் சூதாட்டத்தை விட பிக் பாஸ் சூதாட்டம் பெருசா நடக்கும்னு தோணுது.


நைட் போடுறதையே திருப்பி காலையிலே மதியம்னு போடுறதாலே மக்கள் வேற சேனல் எதுவும் பார்க்க முடியிறது இல்லே. திருப்பி திருப்பி பார்க்கறப்போ புரணிகள் எல்லாம் இன்னும் நல்லா புரியறதுமத்த சீரியல் பார்த்து அழறதை விட இதை பார்த்து புரணி பேசறது ரெம்ப இன்டர்ஸ்டிங் ஆக இருக்கு .எல்லா டீவிகளிலும்  பிக் பாஸ் மாதிரி சூப்பர் பாஸ் , கிரேட் பாஸ் ன்னு ப்ரோக்ராம் போட்டாதான் மக்கள் கவனத்தைத் திருப்ப முடியும் . கமல் மாதிரி,  ரஜினி, அஜித், விஜய், சூர்யா ன்னு கூப்பிட்டு தொகுத்து வழங்கச் சொல்லலாம். சீரியல் ஆக்டர்கள் எல்லாம் இது மாதிரி வீட்டுக்குள் வந்துடலாம்.

உள்ளே இருந்தா படுத்துகிட்டு  உக்கார்ந்துக்கிட்டு  புரணி  பேசணும் ; வெளியே வந்தா சாப்பிட்டுக்கிட்டு  , நடந்துக்கிட்டு புரணி பேசணும். பிக் பாஸ் கூப்பிட்டா அடக்க ஒடுக்கமா போய் உக்கார்ந்து  எஸ் பாஸ், ஓகே பாஸ் சொல்லணும். அப்புறம் வந்து பிக் பாஸ் பத்தியே புரணி பேசணும். அவ்வளவுதானே. இதை பத்தி விலா வாரியா மீம்ஸ் போட்டு கலாய்க்கத்தான் சோசியல் மீடியா இருக்கே. அப்புறம் என்ன கவலை .

என்ன ஒண்ணு. அப்பப்போ வையாபுரி மாதிரி ஒவ்வொருத்தரா கேமரா முன்னாடி வந்து கண்ணைக் கசக்கிட்டு நிக்கறதை பாக்குறப்போ தான் கொஞ்சம் கஷ்டமா இருக்கு. அம்மா, அப்பா, தாத்தா , பாட்டி , சித்தி, தங்கச்சின்னு இல்லாமே தெரியாதவங்க கூட சேர்ந்து இருக்கிறது கஷ்டம் தாங்க.

 சரி, அதை விடுங்க. நாம இந்த ப்ரோக்ராம் ரெகுலரா பார்த்து இந்த பிக் பாஸ் புரணியிலே நம்ம வீட்டிலே கலந்துக்கலேன்னா, நம்ம ஒய்ப் , புள்ளைங்க , அம்மா  அப்பா தாத்தா பாட்டிகளே நம்மளை எலிமினேஷன் லிஸ்டில் நாமினேட் பண்ணிடுவாங்க. மத்தியானம், மூணாவது தடவையா போயி பார்த்துக்கிட்டு ராயிஷா மாதிரி 'எஸ் , புரியுது  கரெக்ட்' ன்னு   கமெண்ட் குடுக்க ஆரம்பிச்சாச்சுங்க.
------------------------------------------------------------------------நாகேந்திர பாரதி

புதன், 19 ஜூலை, 2017

மாலு.. மாலு.. மாலு ..- நகைச்சுவைக் கட்டுரை

மாலு.. மாலு.. மாலு ..- நகைச்சுவைக் கட்டுரை
--------------------------------------------------------------------------------------------------------------
கிராமத்திலே, திருவிழா சமயம், கோயிலைச் சுத்தி திடீர் புடவைக் கடை, திடீர் வளையல் கடை, திடீர் திண்பண்டக் கடைன்னு ஏகப் பட்ட கடைகள் முளைச்சு  ஒரு பத்து நாட்கள் ஒரே கலகலப்பாய் இருக்கும்.
அது மாதிரி ஆனா நிரந்தரமா இன்டர்நேஷனல் கடைகள் எல்லாம் ஒரே இடத்திலே ரெண்டு மூணு மாடிகளிலே சேர்ந்தாப்பலே இருக்கிறது தான் இந்த நகரத்து மால்னு சொன்னாங்க. என்ன ஒண்ணு. கிராமத்து திருவிழாவில் வியாபாரம் நடக்கும். இந்த நகரத்து மால்லே எல்லாம் சும்மா பாத்துட்டு போய்கிட்டே இருப்பாங்கன்னு சொன்னாங்க.
சரி, நம்மளும் தான் போய் பார்த்துட்டு வரலாம்னு போனேங்க.உண்மைதாங்க. ஒரு காபி இருநூறு ரூபாய்ன்னா  எவன் வாங்குவான். ஒரு நாள் மூணு வேளை சாப்பாடே அதிலே முடிச்சுடலாமே. என்னங்க. காப்பித்தூளையும் சக்கரையையும் சுடுதண்ணியிலே போட்டுக் கலக்கிறது தானுங்களே காபி.. இதிலே என்னமோ எச்பிரஸோவாம் , லாட்டேயாம், என்னென்னமோ வாய்க்குள்ளேயே நுழையாத    பேரு சொல்றாய்ங்க,. இந்த காபி நம்ம வாய்க்குள்ளே நுழைஞ்சா என்ன ஆகுமோன்னு ஒண்ணும் வாங்கலீங்கோ.
அப்புறம், இந்த ஜவுளிக் கடை, இல்லை இல்லை, ஜவுளி சமுத்திரத்துக்குள்ளே நுழைஞ்சா, அப்பப்பா , நமக்குத் தெரிஞ்சு ஏதோ கருப்பு வெள்ளை, சிவப்பு பச்சை ஊதா ன்னு தான் கலர் இருக்கு. இங்கே என்னடான்னா ஏதோ அட்டாமிக் ப்ளூ வாம். பொட்டானிக் க்ரீனாம். என்னென்னமோ சொல்றாய்ங்க.
அப்புறம் இந்த வீட்டு சாமான் கடை - இல்லை கடல். என்னங்க. ஏதோ வீடுன்னா மிக்ஸி , பேன், கட்டில், ஸ்டவ் போதாதா . இங்கே இருக்கிற சாமான்களை வைக்க  வீடு போதாதே  .சாமான்களை எல்லாம் உள்ளே வச்சிட்டு நாம வெளியே வந்து நிக்க வேண்டியதுதான்.
மேல் மாடியிலே கான்டீன் ஏரியா. இங்கே தான் சனங்க கூட்டம் ஏதோ வாங்கி சாப்பிடுது. அதுவும் என்ன மாதிரி ஐட்டங்கள். எண்ணையில் ஊறிப் போயி கரும் பச்சை, அரக்கு சிவப்பு கலரில் வித விதமான சைஸ், வித விதமான பேரிலே ஏதோ பர்கர் , பிஸ்சா, நூடுல்ஸாம், அப்புறம் ஏன் தெருவுக்கு தெரு அஞ்சாறு கிளினிக்  இருக்காது.
தியேட்டருக்குள் போகணும்னா பாப் கார்ன் வாங்கிட்டு தான் போகணும் போல இருக்கு. அதோட விலை சினிமா டிக்கெட் விலையை விட ரெண்டு மடங்கு.
ஏதோ மாலு மாலுன்னு சொல்றாங்களேன்னு போயி பாத்துட்டு வந்தப்புறம் தான்  நாம ஊரு திருவிழா எப்படா வரும்னு இருக்கு. சீனி சேவு சாப்பிட்டு சிவப்பு குத்தாலத் துண்டு வாங்கிட்டு ஓபன் ஸ்டேஜ் ட்ராமா பாத்துட்டு , ஒயிலாட்டம் ஆடிட்டு வரணும் போல இருக்குங்க .
----------------------------------------------------------------------------நாகேந்திர பாரதி


வியாழன், 13 ஜூலை, 2017

காலக் கடவுள்

காலக் கடவுள்
----------------------------
இளமை என்றும்
முதுமை என்றும்

பிறப்பு என்றும்
இறப்பு என்றும்

இன்பம் என்றும்
துன்பம் என்றும்

காதல் என்றும்
நட்பு என்றும்

கடமை என்றும்
உரிமை என்றும்

நன்மை என்றும்
தீமை என்றும்

உண்மை என்றும்
பொய்மை என்றும்

இயற்கை என்றும்
செயற்கை என்றும்

கிராமம் என்றும்
நகரம் என்றும்

வீடு என்றும்
நாடு என்றும்

இரவு என்றும்
பகல் என்றும்

நேற்று என்றும்
நாளை என்றும்

இன்று என்றும்
இப்போது என்றும்

இரண்டு இரண்டாய்ப்
பிரித்துப் போட்டு

காட்டிச் செல்லும்
காலக் கடவுள்
---------------------------------------நாகேந்திர பாரதி
http://www.nagendrabharathi.com

செவ்வாய், 11 ஜூலை, 2017

காதல் ஊஞ்சல்

காதல்  ஊஞ்சல்
--------------------------------------
ஆல மரக் கிளைகளில்
தொங்கிக் கிடக்கிறது

காற்று மட்டும் வந்து
ஆட்டி விட்டுப் போகிறது

உந்தித் தள்ளிய
ஜோடிக் கால்கள்

மாறு பட்ட  பாதைகளில்
போய் விட்டதை   அறியாது

காத்துக் கிடக்கிறது
காதல்  ஊஞ்சல்
-----------------------------------------நாகேந்திர பாரதி
http://www.nagendrabharathi.com 

வெள்ளி, 9 ஜூன், 2017

பூங்காவா? பார்க்கா? - நகைச்சுவைக் கட்டுரை

பூங்காவா? பார்க்கா? - நகைச்சுவைக் கட்டுரை
-------------------------------------------------------------------------------------------------
புது  வீட்டுக்கு குடி போன அன்று மாலை, பக்கத்து தெரு நண்பர் வந்து 'வாங்க சார் , நம்ம ஏரியா பூங்காவுக்குப் போய் வரலாம்என்று  கூப்பிட்டார் .'ஆஹா, பூங்காவா, மரம் செடி கொடி , பூக்களை ரசிக்கலாம், சிறுவர்கள் சறுக்கு விளையாட்டை பார்க்கலாம், வாக்கிங் கூடப் போகலாம் ' என்று ஆசையோடு அவர் கூடப் போனேன்.

கொஞ்ச தூரம் போனதும், ஒரு வட்ட வடிவப் பொட்டலில், சிமெண்ட்டுப் பெஞ்சுகளில் நாலைந்து பெரியவர்கள் அமர்ந்திருக்க , குச்சிகள் நட்டிருந்த ஒரு கேட்டைத் திறந்து கொண்டு அவர் உள்ளே நுழைந்தார் . நம்மையும் உள்ளே வரச் சொன்னார்.

'சார், ஏதோ பூங்கான்னு சொன்னீங்க, இது யாரோ ஒருத்தரோட பிரைவேட் பிராபர்ட்டி மாதிரி தெரியுதே' ன்னு கேட்டேன். 'என்ன சார் , விளையாடுறீங்களா, இது தான் பூங்கா' என்றார்.

'பூங்கான்னா ஏதாவது மரம் ,செடிகள்லாம் இருக்கும்னு நினைச்சேன்என்றேன். 'அங்கே பாருங்க ' என்று அவர் காட்டிய இடத்தில் நாலைந்து குழிகளில்   குச்சிகள் நடப்பட்டு இருந்தன. ' அது வேப்ப மரம், அது ஆல மரம் , நட்டு ஒரு மாசம் ஆச்சு, கொஞ்ச நாளிலே மரமா வளர்ந்துடும் ' என்றார். 'கொஞ்ச நாளா, கொஞ்ச வருஷமா ' என்று நினைத்துக் கொண்டேன்.

'சிறுவர்கள் விளையாட ஊஞ்சல், சறுக்கு ஒண்ணுமே இல்லையே ' என்றேன். ' அங்கே பாருங்க' என்ற இடத்தில் கொஞ்சம் மணல் குவித்து வைக்கப் பட்டு இருந்தது. அங்கே இரண்டு சிறுவர்கள் ' கிச்சு கிச்சு தாம்பாளம். கியா கியா தாம்பாளம்' என்று மண்ணுக்குள் கை விட்டு விளையாடிக் கொண்டு இருந்தார்கள்
'நம்ம கிராம விளையாட்டுகளை எல்லாம் பசங்க மறந்துடக் கூடாது சார்' என்றபடி பக்கத்தில் இருந்த மொட்டை சிமெண்டு பெஞ்சில் அமரச் சொன்னார். படக்கென்று உடகார்ந்தவன் ' ' என்று அலறியபடி எழுந்தேன். பகலில் சுட்டெரித்த சூரியனின் சூடு அந்த பெஞ்சில் இறங்கி இருந்தது. 'துண்டைப் போட்டு உக்காரணும்' என்றபடி அவர் கொண்டு வந்த துண்டை பெஞ்சு மேல் விரித்து விட்டார்.

அதில் அமர்ந்தபடி சுற்று முற்றும் பார்த்தேன். அந்த பூங்கா (?) வின் உள்ளே போட்டிருந்த ஒரு சிறிய சுற்று வட்டப் பாதையில் நாலைந்து பேர் இடித்துப் பிடித்தபடி போய்க் கொண்டு இருந்தார்கள். ' அவங்க, என்ன சார் பண்றாங்க' என்று கேட்டேன். ' என்ன சார் , இது கூடத் தெரியாதா, வாக்கிங் சார், வாக்கிங் போகிறாங்க , நம்மளும் போகலாமா ' என்று கேட்டார். 'வேணாம், வேணாம், இந்த பெஞ்சே சவுகரியமாக இருக்கு . அங்கே போயி, நடைப் பயிற்சியில் நகர்ந்து சென்று கொண்டு இருக்கும் அந்த நாலு பேர்களைத் தொந்தரவு செய்ய வேண்டாம் ' என்றேன்.

'எப்படி சார் நம்ம ஏரியா பூங்கா' என்று உற்சாகமாய்க் கேட்டவரிடம் சொன்னேன் . இதைப் பூங்கான்னு சொல்லுறது ரெம்பத் தப்புங்க, ஒரு பூ கூட இல்லாத இந்த இந்த இடத்தை வேணும்னா பூவை எடுத்துட்டு  'ங்கா ' ன்னு பாப்பா சொல்லுற மாதிரி சொல்லலாம்.

 இல்லே, ஆங்கிலத்திலே சொல்லுற மாதிரி ' பார்க் 'ன்னு சொல்லலாம். சிமெண்டு    பெஞ்சில் சில பேர் பார்க் ஆயி இருக்காங்க. வட்டப் பாதையில் வாக்கிங் கிற பேர்லே  சில பேர்   பார்க்கிங் ஆயி இருக்காங்க. மண் குவியலில் சிறுவர்கள் கைகள் பார்க் ஆயி இருக்கு .  மரங்களாகும்   ஆசையில் குழிகளில் குச்சிகள்    பார்க்கிங் ஆகியுள்ளன.  பார்க் என்று சொல்லிக் கொள்ளலாம் ' என்றபடி எழுந்தேன் , சரி தானே .
----------------------------------------------------நாகேந்திர   பாரதி