வெள்ளி, 9 ஜூன், 2017

பூங்காவா? பார்க்கா? - நகைச்சுவைக் கட்டுரை

பூங்காவா? பார்க்கா? - நகைச்சுவைக் கட்டுரை
-------------------------------------------------------------------------------------------------
புது  வீட்டுக்கு குடி போன அன்று மாலை, பக்கத்து தெரு நண்பர் வந்து 'வாங்க சார் , நம்ம ஏரியா பூங்காவுக்குப் போய் வரலாம்என்று  கூப்பிட்டார் .'ஆஹா, பூங்காவா, மரம் செடி கொடி , பூக்களை ரசிக்கலாம், சிறுவர்கள் சறுக்கு விளையாட்டை பார்க்கலாம், வாக்கிங் கூடப் போகலாம் ' என்று ஆசையோடு அவர் கூடப் போனேன்.

கொஞ்ச தூரம் போனதும், ஒரு வட்ட வடிவப் பொட்டலில், சிமெண்ட்டுப் பெஞ்சுகளில் நாலைந்து பெரியவர்கள் அமர்ந்திருக்க , குச்சிகள் நட்டிருந்த ஒரு கேட்டைத் திறந்து கொண்டு அவர் உள்ளே நுழைந்தார் . நம்மையும் உள்ளே வரச் சொன்னார்.

'சார், ஏதோ பூங்கான்னு சொன்னீங்க, இது யாரோ ஒருத்தரோட பிரைவேட் பிராபர்ட்டி மாதிரி தெரியுதே' ன்னு கேட்டேன். 'என்ன சார் , விளையாடுறீங்களா, இது தான் பூங்கா' என்றார்.

'பூங்கான்னா ஏதாவது மரம் ,செடிகள்லாம் இருக்கும்னு நினைச்சேன்என்றேன். 'அங்கே பாருங்க ' என்று அவர் காட்டிய இடத்தில் நாலைந்து குழிகளில்   குச்சிகள் நடப்பட்டு இருந்தன. ' அது வேப்ப மரம், அது ஆல மரம் , நட்டு ஒரு மாசம் ஆச்சு, கொஞ்ச நாளிலே மரமா வளர்ந்துடும் ' என்றார். 'கொஞ்ச நாளா, கொஞ்ச வருஷமா ' என்று நினைத்துக் கொண்டேன்.

'சிறுவர்கள் விளையாட ஊஞ்சல், சறுக்கு ஒண்ணுமே இல்லையே ' என்றேன். ' அங்கே பாருங்க' என்ற இடத்தில் கொஞ்சம் மணல் குவித்து வைக்கப் பட்டு இருந்தது. அங்கே இரண்டு சிறுவர்கள் ' கிச்சு கிச்சு தாம்பாளம். கியா கியா தாம்பாளம்' என்று மண்ணுக்குள் கை விட்டு விளையாடிக் கொண்டு இருந்தார்கள்
'நம்ம கிராம விளையாட்டுகளை எல்லாம் பசங்க மறந்துடக் கூடாது சார்' என்றபடி பக்கத்தில் இருந்த மொட்டை சிமெண்டு பெஞ்சில் அமரச் சொன்னார். படக்கென்று உடகார்ந்தவன் ' ' என்று அலறியபடி எழுந்தேன். பகலில் சுட்டெரித்த சூரியனின் சூடு அந்த பெஞ்சில் இறங்கி இருந்தது. 'துண்டைப் போட்டு உக்காரணும்' என்றபடி அவர் கொண்டு வந்த துண்டை பெஞ்சு மேல் விரித்து விட்டார்.

அதில் அமர்ந்தபடி சுற்று முற்றும் பார்த்தேன். அந்த பூங்கா (?) வின் உள்ளே போட்டிருந்த ஒரு சிறிய சுற்று வட்டப் பாதையில் நாலைந்து பேர் இடித்துப் பிடித்தபடி போய்க் கொண்டு இருந்தார்கள். ' அவங்க, என்ன சார் பண்றாங்க' என்று கேட்டேன். ' என்ன சார் , இது கூடத் தெரியாதா, வாக்கிங் சார், வாக்கிங் போகிறாங்க , நம்மளும் போகலாமா ' என்று கேட்டார். 'வேணாம், வேணாம், இந்த பெஞ்சே சவுகரியமாக இருக்கு . அங்கே போயி, நடைப் பயிற்சியில் நகர்ந்து சென்று கொண்டு இருக்கும் அந்த நாலு பேர்களைத் தொந்தரவு செய்ய வேண்டாம் ' என்றேன்.

'எப்படி சார் நம்ம ஏரியா பூங்கா' என்று உற்சாகமாய்க் கேட்டவரிடம் சொன்னேன் . இதைப் பூங்கான்னு சொல்லுறது ரெம்பத் தப்புங்க, ஒரு பூ கூட இல்லாத இந்த இந்த இடத்தை வேணும்னா பூவை எடுத்துட்டு  'ங்கா ' ன்னு பாப்பா சொல்லுற மாதிரி சொல்லலாம்.

 இல்லே, ஆங்கிலத்திலே சொல்லுற மாதிரி ' பார்க் 'ன்னு சொல்லலாம். சிமெண்டு    பெஞ்சில் சில பேர் பார்க் ஆயி இருக்காங்க. வட்டப் பாதையில் வாக்கிங் கிற பேர்லே  சில பேர்   பார்க்கிங் ஆயி இருக்காங்க. மண் குவியலில் சிறுவர்கள் கைகள் பார்க் ஆயி இருக்கு .  மரங்களாகும்   ஆசையில் குழிகளில் குச்சிகள்    பார்க்கிங் ஆகியுள்ளன.  பார்க் என்று சொல்லிக் கொள்ளலாம் ' என்றபடி எழுந்தேன் , சரி தானே .
----------------------------------------------------நாகேந்திர   பாரதி

வியாழன், 8 ஜூன், 2017

ஓடும் மேகங்கள்

ஓடும் மேகங்கள்
----------------------------
ஓடும் மேகங்களாய்
உறவும் நட்பும்

காணாமல் போகின்ற
காட்சி வடிவங்கள்

நேற்று பார்த்ததை
இன்று காணோம்

இன்று பார்ப்பது
நாளை எங்கே

வருவதும் போவதுமாய்
வானத்தில் வாழ்க்கை
-------------------------------------நாகேந்திர பாரதி
http://www.nagendrabharathi.com

செவ்வாய், 6 ஜூன், 2017

மழைக் குறும்பு

மழைக் குறும்பு
-------------------------
காத்தும் தூறலுமாய்க்
காட்டி  விட்டு

காணாமல் போகின்ற
மழையின் குறும்பில்

காதல் பேசுவாளென்று
காத்துக் கிடப்பவனுக்கு

முகத்தைக் காட்டி விட்டு
முந்திப் போகின்ற

சிறுக்கி  குறும்பின்
சாயல் தெரிகிறது
--------------------------------------நாகேந்திர பாரதி
http://www.nagendrabharathi.com 

புதன், 31 மே, 2017

சைக்கிள் சாகசம்

சைக்கிள் சாகசம்
------------------------------
இரவும் பகலும்
தொடர் ஓட்டம்

பள்ளி மைதானத்தில்
எப்போதும் கூட்டம்

தலையில் கரகமும்
கைகளில் தீப்பந்தமுமாய்

கடைசி நாளில்
சிறப்பு நிகழ்ச்சிகள்

எங்கே போனார்
சைக்கிள் ஓட்டி
------------------------------நாகேந்திர பாரதி
http://www.nagendrabharathi.com 

திங்கள், 29 மே, 2017

விளையாட்டு வாழ்க்கை

விளையாட்டு வாழ்க்கை
--------------------------------------------
ஓடிப் பிடிப்பதும்
ஒளிந்து பிடிப்பதும்

பந்து விளையாட்டும்
குண்டு விளையாட்டும்

விளையாட்டு வாழ்க்கையாய்
இருந்த போதிலே

படிப்பென்ற ஒன்று
குறுக்கே வந்தது

வாழ்க்கை விளையாட்டின்
முதலாம் பாகமாய்
-----------------------------------நாகேந்திர பாரதி
http://www.nagendrabharathi.com  

செவ்வாய், 16 மே, 2017

தூங்கும் குழந்தை

தூங்கும் குழந்தை
-----------------------------
பாட்டுப் பாடினாலும்
தூங்காது

ஆட்டம் போட்டாலும்
தூங்காது

கதை சொன்னாலும்
தூங்காது

எப்படியோ திடீரெனத்
தூங்கியது

சீக்கிரம் தூங்கி விட்டதே
என்றி ருந்தது
-----------------------------நாகேந்திர பாரதி
http://www.nagendrabharathi.com 

சனி, 13 மே, 2017

உணர்ச்சிக் கோடுகள்

உணர்ச்சிக் கோடுகள்
----------------------------------
ஓவியத்தின் கோடுகள்
உண்டாக்கும் கற்பனையில்
உருவாகும் உணர்ச்சிகட்கு
பார்ப்பவர்கள் பாதிப் பொறுப்பு

கவிதையின் கோடுகள்
உண்டாக்கும் கற்பனையில்
உருவாகும் உணர்ச்சிகட்கு
படிப்பவர்கள் முழுப் பொறுப்பு

ஓவியத்தின் கோடுகள்
கட்டம் கட்டி விடும்

கவிதையின் கோடுகளோ
காற்றில் பறக்க விடும்
------------------------------------நாகேந்திர பாரதி
http://www.nagendrabharathi.com

புதன், 10 மே, 2017

அல்லிக் குளம்

அல்லிக் குளம்
------------------------
மல்லிகை மலர்களும்
நெல்லியின் புளிப்பும்
சுற்றிலும் மணக்க

கோயிலின் மணியும்
குடங்களின் ஓசையும்
சுற்றிலும் ஒலிக்க

அல்லிக் குளமாய்க் கிடந்தது
ஒரு நாள் அழிந்தது

அயிரையும் விறாலுமாய்
ஊர் முழுக்க மீன் வாசம்

மல்லிக்கும் அல்லிக்கும்
மறு  மழை வேண்டும்
-------------------------------நாகேந்திர பாரதி
http://www.nagendrabharathi.com

வெள்ளி, 5 மே, 2017

சுடும் சொற்கள்

சுடும் சொற்கள்
------------------------
சன்னலும் சுடுது
சட்டையும் சுடுது

தண்ணியும் சுடுது
தரையும் சுடுது

உள்ளேயும் சுடுது
வெளியேயும் சுடுது

இப்படி வேகிற
எங்களைப் பாத்து

ஆபீஸ் விட்டு வந்து
அலுத்துக் கிட்டாங்க

'ஏ சி  ரிப்பேராம்
காத்து குளிரலையாம் '  
------------------------------------நாகேந்திர பாரதி
http://www.nagendrabharathi.com 

வியாழன், 4 மே, 2017

பறவைப் பதற்றம்

பறவைப் பதற்றம்
----------------------------
தத்தித் தத்தி வந்து
தண்ணீர் குடிக்கும்

பக்கத்துப் பருக்கைகளை
பற்றுவதிலும் கவனம்

கொத்தும் மூக்கிலும்
குடிக்கும் வாயிலும்  பதற்றம்

எங்கோ கேட்கின்ற
வெடிச் சத்தத்திற்கு

இங்கே இருந்தபடி
சிறகை விரித்து விடும்
-------------------------------------நாகேந்திர பாரதி
http://www.nagendrabharathi.com 

ஞாயிறு, 30 ஏப்ரல், 2017

காதல் முகம்

காதல் முகம்
-----------------------
கண்களை மட்டும்
பார்த்தால் போதும்
காதல் எண்ணம் பிறந்து விடும்

மூக்கினை மட்டும்
பார்த்தால் போதும்
முன் கோபங்கள் புரிந்து விடும்

இதழ்களை மட்டும்
பார்த்தால் போதும்
இரவும் பகலும் பறந்து விடும்

முழுதாய் முகத்தைப்
பார்த்து விட்டாலோ
மொத்த உலகும் மறந்து விடும்
------------------------------------நாகேந்திர பாரதி
http://www.nagendrabharathi.com 

சனி, 29 ஏப்ரல், 2017

தெரிந்ததும் தெரியாததும்

தெரிந்ததும் தெரியாததும்
------------------------------------------
அக்கினி வெயிலில்
வேர்வை ஆறோடு

வேதனை முகத்தோடு
வெற்றுப் பார்வையோடு

மஞ்சப் பையோடு
மந்த நடையோடு

போகிறவர் கதை
என்னவாக இருக்கும்

தெரிந்தால் மட்டும்
என்ன செய்யப் போகிறோம்
-------------------------------------நாகேந்திரபாரதி
http://www.nagendrabharathi.com

புதன், 26 ஏப்ரல், 2017

அடுப்படிப் பரிணாமம்

அடுப்படிப் பரிணாமம்
------------------------------------
ஏதோதோ இயந்திரங்கள்
ஏராளமாய் வந்த பின்னே

ஏற்றுவதும் இறக்குவதும்
எடுப்பதும் வைப்பதுமாய்

மாவாட்டும் செயலிலும்
கறியாக்கும் செயலிலும்

சோறாக்கும் செயலிலும்
சுத்தமாக்கும் செயலிலும்

அடுப்படியின் வேலைகளில்
பரிணாம வளர்ச்சி
----------------------------------நாகேந்திர பாரதி
http://www.nagendrabharathi.com 

செவ்வாய், 25 ஏப்ரல், 2017

காதல் வேண்டுதல்

காதல் வேண்டுதல்
-----------------------------------
திருப்பதி சென்று
மொட்டை அடிப்பதாயும்

திருவேற்காடு போய்
தீக்குழி இறங்குவதாயும்

திருத்தணி செல்ல
காவடி எடுப்பதாயும்

தன்னோட தலைவலிக்காய்
வேண்டிக் கொண்டாள்

கணவனை வைத்து
காதல் மனைவி
----------------------------------நாகேந்திர பாரதி
http://www.nagendrabharathi.com 

வெள்ளி, 21 ஏப்ரல், 2017

பைபாஸ் பயணம்

பைபாஸ் பயணம்
----------------------------
கதிரறுப்புப் பாட்டு
காத்தில் வரக் காணோம்

நெல்லுதிர்த்த தூசி
காத்தில் வரக் காணோம்

வைக்கோலோட வாசம்
காத்தில் வரக் காணோம்

மாட்டுவண்டி மணியும்
காத்தில் வரக் காணோம்

பைபாஸுப் பயணத்தில்
பழசு எல்லாம் காணோம்
-------------------------------------நாகேந்திர பாரதி
http://www.nagendrabharathi.com 

ஞாயிறு, 16 ஏப்ரல், 2017

உலக அமைதி

உலக அமைதி
------------------------
உலகப் போர்களின்
உண்மை மறந்ததால்

ஆதிக்க நாடுகள்
ஆயுதம் குவிக்கும்

அண்டை நாடுகள்
அஞ்சித் தவிக்கும்

பயத்தின் அமைதியோ
பதுங்கிப் பாயும்

அன்பின் அமைதியே
அகிலம் ஆளும்
------------------------------நாகேந்திர பாரதி
http://www.nagendrabharathi.com

சனி, 15 ஏப்ரல், 2017

சாமி மரம்

சாமி மரம்
-----------------------------
அரச மரத்துக்கு
பிள்ளையார் சாமி

வேப்ப மரத்துக்கு
அம்மன் சாமி

புளிய மரத்துக்கு
கருப்ப சாமி

ஒவ்வொரு மரத்துக்கும்
சாமியைக் காவல் வைத்தும்

மரத்தை வெட்டுவதை
விடாத மக்கள்
---------------------------------நாகேந்திர பாரதி
 http://www.nagendrabharathi.com

ஞாயிறு, 9 ஏப்ரல், 2017

‘இதயமே, ஓ, இதயமே’- நகைச்சுவைக் கட்டுரை

‘இதயமே, ஓ, இதயமே’- நகைச்சுவைக்   கட்டுரை
-----------------------------------------
தலைப்பைப் பாத்ததும் அந்தக் கால முரளி படம் மாதிரி  காதல் கட்டுரைன்னு நினைச்சுராதீங்க. இந்தக் கால இதயம் பத்திய கட்டுரை தாங்க.

கொஞ்ச நாளா மாடிப்  படி  ஏறுறப்போ தொண்டைக்குள் கீழே ஏதோ ஒரு மாதிரி சிரமமா இருந்துச்சுங்க, களைப்பா இருந்துச்சு. ஆஞ்சியோகிராம் பண்ண  சொன்னாங்க. டெலிகிராம் நிறுத்தினப் பிறகு இது  ஏதோ புது கம்யூனிகேஷன் போலிருக்கு. தகவல் அனுப்பினா பதில் வரும்னு நினைச்சு  போஸ்ட் ஆபீஸ் போனா  அவங்க  ஆஸ்பத்திரி போகச் சொன்னாங்க.

அங்கே போனா அவங்க நம்மளை படுக்கப்  போட்டு , ஏதோ பாதி கொண்டை ஊசி மாதிரி  மணிக்கட்டு  நரம்பில் குத்தி அது வழியா என்னமோ இதய நரம்புகளில் இறக்கி போட்டோ எடுத்து காமிச்சாங்க. இதயத்திலே அஞ்சு அடைப்பு இருக்காம். அந்தக் காலத்திலே நம்ம ஏழெட்டுப்     பொண்ணுங்களை லவ் பண்ணி இருக்கோமேஅஞ்சு தான் இருக்கான்னு சந்தேகமாக்   கேட்டா இது காதல் அடைப்பு இல்லையாம். இதய ரத்த நாளங்களில்  அடைப்பாம் .

நம்ம நண்பர்கள் ஒண்ணு ரெண்டு  பேருக்கு ஒரு அடைப்பு இருந்து ஆபரேஷன் பண்ணிய   ஞாபகம்  வந்துச்சு. நமக்கு அஞ்சு இருக்கிறதிலே ஒரு நிமிஷம் பெருமையா இருந்தாலும் ஆஹா ஆபத்துன்னு அப்புறம் தான் உறைச்சது.

அதிலேயும் மூணு அடைப்பு, எழுபது, எண்பது, தொண்ணுறு  பெர்ஸண்டாம். பள்ளிக்கூடத்தில் கிடைக்காத பெர்ஸன்டேஜ் இங்கே கிடைச்சதை எண்ணி சந்தோசப்   படுறதா . வருத்தப்  படுறதா  . அப்புறம் 'ஆபரேஷன் பண்ணுறதா ஸ்டென்ட்  வைக்கிறதா ன்னு  ' கண்ணகியா , மாதவியா ' ன்னு ஒரு பட்டி மன்றம்கடைசியிலே ஸ்டென்ட் வைக்கிறதுன்னு முடிவாச்சு .

நமக்கு ஸ்டென்டுன்ன உடனே அந்தக் காலத்திலே டூரிங் டாக்கீஸ் இல்  பார்த்த எம் ஜி ஆர் ஸ்டெண்டு தான் ஞாபகம் வரது. ஸ்டெண்டு வைக்க ஸ்டெண்டு மாஸ்டர் ஷ்யாம் சுந்தர் வருவாரோன்னு தோணுச்சு. அப்புறம் சொன்னாங்க. இது வேறயாம். வலை மாதிரி ஏதோ ஒண்ணை உள்ளே நுழைச்சு இதய நாளத்தை நிமித்தி இதை வச்சுருவாங்களாம்அடைப்பு சரியாகி ரத்த ஓட்டம் நல்லா ஆயிருமாம்.

சரின்னு போயி 'கேத்தோ லேப்' பிலே போயி படுத்தா ஒரு மணி நேரத்திலே மூணு அடைப்பிலேயும் ஸ்டென்ட் வச்சாச்சு. நடுவிலே அப்பப்போ ஏதோ 'டப்' 'டப்' புன்னு பலூன் வெடிக்கிற மாதிரி சத்தம் கேட்டுச்சு . அப்புறம் சொன்னாங்க. கை நரம்பு வழியா ஊசி வழி சின்ன வயர் நுழைச்சு இதய நரம்பு வரை போயி அதுக்கு  மேலே பலூன் நுழைச்சு அதை வெடிக்க வச்சு , அதுக்கு மேலே ஸ்டென்ட் வச்சு செட் பண்ணியாச்சாம். பலூன் கொஞ்சம் ஜாஸ்தி ஆச்சாம்.

நினைச்சுக்கிட்டேன். 'முன்னாலே சொல்லியிருந்தா பேரன் பேத்திக்கிட்டே இருந்து  கொஞ்சம் பலூன் வாங்கிக் கொண்டாந்து கொடுத்திருக்கலாமே ன்னு.' சொல்லலே. 'அது வேற பலூன் , இது வேற பலூன்' ன்னு வடிவேலு மாதிரி மனசுக்குள்ளே சொல்லிக்கிட்டு வாயை அடக்கிக்கிட்டேன் .

அப்புறம் என்னங்க. சி யு விலே ஒரு ராத்திரி . ரெண்டு கைகளிலேயும் நரம்புகளில் ஊசி மாட்டி விட்டு  மருந்து ஏறுது . திரவம் ஏறுது. அப்புறம் ஏதோ கருவிகள் மூலமா, ஆக்சிஜென் , மூச்சு, இதயத்துடிப்பு எல்லாம் நம்பர் நம்பரா தெரியுது. இந்த நேரம் பார்த்துதான் நமக்கு உச்சந் தலையிலே அரிக்குது. சிஸ்டர் கிட்டே சொல்லலாமான்னு பார்த்தா , அவங்களும் ரெம்ப பிசியா இங்கிட்டும் அங்கிட்டும் ஓடிக்கிட்டே டாக்டர் கிட்ட என்னென்னமோ நம்பர்களை சொல்லிக்கிட்டு இருக்காங்க. டாக்டரும் நோட் பண்ணிக்கிறாங்க.

 நம்ம கிட்ட வந்து ஏதோ கேட்கிறாங்க. நம்மளும் தலையாட்டுறோம். சிஸ்டர் சொல்லுறாங்க.  20 , 99 , 85  ன்னுஏதோ குறியீடுகள். நம்மளும் சும்மா ‘253’  சொல்லலாம்னு தோணுது. வாயை அடக்கிக் கிட்டேன் . எதுக்கு வம்பு. இந்த நம்பர் எதுக்கு குறியீடுன்னு கேட்டா என்ன சொல்றது.

மறு நாள் வார்டு  ரூமுக்கு மாத்தியாச்சு. காலை , மதியம், இரவு, சாப்பாட்டுக்கு முன்பு, சாப்பிட்டு பின்பு ன்னு மூணு வேளை  சாப்பாடு, ஆறு வேளை  மாத்திரைன்னு மூணு நாள் ஓடிச்சு.   அப்புறம் டயட்டீஷியன் வந்து இதய , சர்க்கரை நோயாளிகளுக்கு உரிய உணவு விவரம் சொல்றாங்க. ஆப்பிளாம். பாதாமாம். ஜூஸாம். சூப்பாம். காசு ? டெஸ்ட், ஆபரேஷன், சாப்பாடு எல்லாமே காசு தானே . சரி நமக்குபையன், பொண்ணு பார்த்துக்கிறாங்க. நாட்டிலே எவ்வளவு ஏழைகள். அவர்களோட உடல் நலத்திலே எவ்வளவு பிரச்சினைகள். எல்லாம் அரசாங்கம் தான் பாத்துக்கணும், சரிதானே.

சரி விடுங்க. நம்ம பிரச்சினையை நம்ம பாப்போம். நாட்டுப் பிரச்சினையை நல்ல தலைவர்கள்(!) பாத்துக்கிருவாங்கவீட்டுக்கு வந்தாச்சு. நண்பர்கள் உறவினர்கள் வருகை. நலம் விசாரிப்புஅவங்க, வேற படிப்பு படிச்சு, வேற வேலை பாக்கிறதாத் தான் இது வரை நினைச்சுக்கிட்டு இருந்தோம். இப்போ   தான் தெரியுது அவங்க ஒவ்வொருவரும் உள்ளுக்குள்ளே டாக்டருன்னுஹார்ட் பத்தியும்   ஸ்டென்ட் பத்தியும் எவ்வளவு விஷயம் தெரிஞ்சு வச்சிருக்காங்க. கூகிள் ஆண்டவரே இவங்க கிட்டே வந்து கேட்கலாம் போலிருக்கு.   என்ன ஒண்ணு, ஒரே மாதிரி சொல்லாம ஒவ்வொருத்தரும் ஒவ்வொரு மாதிரி சொல்றாங்க.

சிலர் 'தும்மக் கூடாது. இருமக் கூடாதுங்' க்கிறாங்க. ஏங்க இதெல்லாம் நம்ம கையிலே- இல்லையில்லை- நம்ம மூக்கிலேயாங்க இருக்கு . அது பாட்டுக்கு வர்றது. அடக்க முடியுமா . சரி , அப்படியே மூக்கு வழி வந்துட்டாலும், அந்த 'ஸ்டென்ட் ' எப்படித்தான் இருக்குன்னு நம்மளும் பாத்துக்கிடலாம் இல்லையா .சில பேர் ஒரு மாதம் கழித்து ' ஸ்விம்மிங்' கே   போகலாம்னு சொல்றாங்க. அது சரி, அதுக்கு நம்ம முதல்லே 'ஸ்விம்மிங்' கத்துக்கணுமே. இவங்க கத்து தருவார்களா .

என்னமோ போங்க. ஒவ்வொருத்தரும் ஒவ்வொரு மாதிரி சொல்றாங்க. பேசாம டாக்டர் கிட்டேயே போயி கேட்டுரலாம்னு அவர் முன்னாலே போய் உக்காந்தா அவர் சொல்லுறதுக்கு எல்லாம் ' எஸ் சார்' ஓகே சார் ' ன்னு சொல்லுக்கிட்டு இருக்கோம். நம்ம கேக்க வந்தது எல்லாம் மறந்து போயிடறது. வீட்டுக்கு வந்த பிறகு தான் ஒண்ணொண்ணா ஞாபகம் வரது. டோஸ்ட் மாஸ்டர் மீட்டிங்கில் டேபிள் டாபிக் பேச்சு பேசப் போயி ஒண்ணுமே ஞாபகம் வராம சீட்டிலே வந்து உக்காந்ததும் ஒண்ணொண்ணா ஞாபகம் வருமே , அது மாதிரி.

சரி விடுங்க. பகவான் சொன்ன மாதிரி ' நடந்ததெல்லாம் நல்லதே , நடப்பதும் நல்லதே, நடக்கப் போவதும் நல்லதே ' ன்னு நினைச்சுக்கிட்டு நம்ம பாட்டுக்கு வழக்கம் போல நிதானமா நம்ம வேலைகளைப் பாத்துக்கிட்டு இருக்க வேண்டியதுதான், என்ன நான் சொல்றது .
------------------------------------------------------------------------------நாகேந்திர பாரதி