புதன், 31 ஆகஸ்ட், 2016

பாடச் சுமை

பாடச் சுமை - (பிரசுரம்  குங்குமம்  வார இதழ் 11/11/16 )
------------------------
தட்டாம்பூச்சி தூக்கிச் செல்லும்
இரையின் சுமை
கால்களில் மட்டுமல்ல
சிறகுகளிலும் இருக்கிறது

 குழந்தைகள் தூக்கிச் செல்லும்
புத்தகச் சுமை
தோள்களில் மட்டுமல்ல
மனங்களிலும் இருக்கிறது

சுவையான பாடங்கள்
சுமையாகிப் போனதென்ன
---------------------------------------நாகேந்திர பாரதி
http://www.nagendrabharathi.com

செவ்வாய், 30 ஆகஸ்ட், 2016

பாடாய்ப் படுத்துற பாட்டு

பாடாய்ப் படுத்துற பாட்டு
----------------------------------------------
ஒவ்வொருத்தருக்கும் ஏதோ ஒரு ஆசை இருக்கிற மாதிரி எனக்கும் பிரபல பாடகர் ஆகணும்கிற ஆசை வந்ததிலே எதுவும் தப்பு இருக்கிறதா எனக்குத் தெரியலீங்க.

பாத்ரூமில் பாடுறப்போ சில சமயம்  என் குரல் யேசுதாஸ் குரல் மாதிரி இருக்கிறதா எனக்குத் தோணும். அந்த நேரத்திலே எங்கிருந்தோ  ரேடியோ எப் எம்மில்  யேசுதாஸ் பாட்டு கேட்டது லேசா ஞாபகம் இருக்கு, அதே மாதிரி சில சமயம் என் குரல் எஸ் பி பி  மாதிரி ஹரிஹரன் மாதிரியெல்லாம் ஒலிக்கும். பின்னணியில்  எப் எம் ரேடியோவில் அவங்க பாடியிருக்கலாம். . அதை பத்தியெல்லாம் எனக்கு கவலை இல்லைங்க. பல அருமையான பாடகர்களோட குரல்கள் கலந்த ஒரு கம்பீரக் குரல் எனக்கு இருக்குன்னு ஒரு தன்னம்பிக்கை எனக்கு வந்திருச்சு.

முழு நேர பாடகரா ஆறதா முடிவு பண்ணிட்டேன். கர்நாடக சங்கீதம் கத்துக்கிட்டா குரல் வளம் இம்ப்ரூவ்  ஆகும்னு சொன்னாங்கயேசுதாஸ், ஹரிஹரன் எல்லாம் அப்படி வந்தவங்க தானாமேசரின்னுட்டு கர்நாடக சங்கீதம் கத்துக்கிட ரெண்டு மூணு இடத்திலே முயற்சி பண்ணினேன். அவங்கள்லாம் அம்பது வயசுக்கு மேலே ஆனவர்களுக்கு எல்லாம் சொல்லிக் கொடுக்கிறது இல்லைன்னு சொல்லிட்டாங்க. நம்மளோட கலைத்தாகத்தை யாரும் புரிஞ்சிக்கிட்ட மாதிரி தெரியலையேன்னு ரெம்ப வருத்தமா இருந்துச்சு.

கடைசியா எங்க வீட்டுக்குப் பக்கத்திலேயே ஒரு வீட்டிலே நேத்து ஒரு போர்டு மாட்டியிருந்துச்சு. ' இங்கே கர்நாடக சங்கீதம் சொல்லிக் கொடுக்கப்படும்'  'ஆஹா. பக்கத்திலேயே வந்தாச்சு, ரெம்ப சவுகரியமாய் போச்சு ' ன்னு உள்ளே நுழைஞ்சேன். ஒரு பாட்டிம்மா இருந்தாங்க. நான் விஷயத்தைச் சொன்னதும்பீஸ் விஷயங்களை ரெம்ப விவரமா சொல்லிட்டு நாளைக்கே வரலாம்னு அவசரமாய்ச் சொன்னாங்க. சரி. யார் சொல்லிக் கொடுக்கிறதுன்னு கேட்டேன். ' 'ஏன் , நானேதான்' ன்னு  சொல்லிட்டு பல் செட்டை எடுத்து மாட்டிக்கிட்டு ஒரு பாட்டு பாடினாங்க. அந்த நடுக்கத்திலும் ஏதோ ஒரு நளினம் இருந்த மாதிரி தோணுச்சு. வேற வழி. நமக்கு சொல்லிக் கொடுக்கிறேன்னு அவங்க சொன்னதே பெருசுன்னு நினைச்சுக்கிட்டேன். இதுக்கு மேலே அவங்க அந்தக் காலத்திலே  பெரிய நாயகியோ சின்ன நாயகியோ அந்தச் சினிமாப் பாடகியோட எல்லாம் கோரஸ் பாடி இருக்காங்களாம். ' மகிழ்ச்சி' ன்னு சொல்லிட்டு மறு நாளே சேர்ந்துட்டேன்.

என்னமோ ' ரி நி ' ஏழு ஸ்வரம் தானேன்னு அலட்சியமாய் போனா , ஒண்ணொண்ணுக்கும் ஏதோ  'ஆதாரம் , மத்தி , ஆகாசம் ' ன்னு மூணு வகை இருக்காம். ஏழு மூணு இருபத்தொண்ணையும் மாத்தி மாத்தி போட்டு ஏகப்பட்ட ராகம் வருமாம்அவங்க பல் செட்டோட கஷ்டப்பட, நான் பல்லோடவே கஷ்டப் பட்டேன்.  'சரி' ன்னு போனவன் 'கமா' போடாமே  சரிகமாவுக்கு புல்  ஸ்டாப் போட்டுட்டு வந்துட்டேன்.

இந்த மெல்லிசை , சினிமாப் பாட்டுதான்  நமக்கு சரிப்பட்டு வரும்னு தோணிச்சு .எம் எஸ் விஸ்வநாதன் இளையராஜா ரஹ்மான் ன்னு ஒவ்வொருத்தர் இசை அமைச்ச பாட்டையும் பிராக்டிஸ்  பண்ண ஆரம்பிச்சேன். அமைதியா ஆரம்பிச்சு இனிமையா மாத்தி, வேகமா பாடி நல்லா பிராக்ட்டிஸ் பண்ணினேன். நண்பர்கள் சொன்னாங்க. ' இந்த டி வி புரோக்கிராமிலே பாட்டுப் போட்டி வைக்கிறாங்க. அதிலே கலந்துக்கிட்டு பாடி பரிசு வாங்கிட்டா சினிமா சான்ஸ் உடனே கிடைச்சிரும்'.

எப்படியோ சான்ஸ் புடிச்சு நுழைஞ்சு மேடைக்கு போயிட்டேங்க. நடுவர்களை பார்த்தேன். பழைய பாடகர்கள் சில பேர் இருந்தாங்க. 'சரி இப்ப இவங்க குரலும் நம்ம குரல் மாதிரிதானே இருக்கு. நம்மளை செலக்ட் பண்ணிருவாங்க.' ன்னு நினைச்சு பாட  ஆரம்பிச்சேன். பாதியிலே நிறுத்திச் சொல்லிட்டாங்க. லகர ளகர ழகரம் வித்தியாசம் இல்லாம பாடுறேனாம்போகச் சொல்லிட்டாங்க. ஏங்க , நான் பாடத்தானே வந்தேன்தமிழ்ப் பேச்சு பேசவா வந்தேன். பல்லிக் கூடத்திலே சாரி பள்ளிக் கூடத்திலே தமில் மறுபடி சாரி தமிழ் வாத்தியார் எவ்வளவோ சொன்னாருங்க. நாக்கை வளைச்சு  பேசச் சொல்லி , விரலை வளைச்சி எழுதச் சொல்லி. ம்ஹூம் வரலீங்கஅப்ப அதை  ஒரு பொருட்டாவே மதிக்கலீங்க. இப்ப பாருங்க. என்னோட வாழ்க்கையின் லட்சியத்துக்கே இடைஞ்சலா வந்திடுச்சு.

சரி, வேற வழியே  இல்லே. பேசாம இங்கிலிஷ் பாட்டு பிராக்ட்டிஸ்  பண்ணி இங்கிலிஷ் பாடகராய் ஆக வேண்டியதுதான் போலிருக்கு. ஆனா அங்கேயும்  எஸ்ஸை எத்தனையோ விதமா உச்சரிக்கிறாங்க. அதுவும் முடியலீங்க. ஒழுங்கா நம்ம தமிழ் ல ள ழ வை உச்சரிக்க  உருப்படியா கத்துக்கிட்டு பெரிய தமிழ் பேச்சாளரா  ஆறதுன்னு முடிவு பண்ணிட்டேன். பார்க்கலாம். 
----------------------------------------------------------நாகேந்திர பாரதி

சனி, 27 ஆகஸ்ட், 2016

போகே மானைத் தேடி

போகே மானைத்  தேடி
------------------------------------
பொன் மானைத்  தேடி அலைஞ்ச காலம் போயி போகே மானைத்  தேடி அலையும் காலம் வந்தாச்சு .

சூப்பர் ஸ்டைலிலே நமக்கு ஒரு இளைய அவதாரத்தை ஏற்படுத்திக்கிட்டு விளையாட்டுக்குள்ளே நுழைஞ்சிருவோம் . ஆரம்பிக்கிறப்போ ரெம்ப ஜோராய்த்தான் நம்ம   மொபைலிலேபக்கத்திலே காண்பிக்கிற   போகே  ஸ்டாப் புக்குள்ளே     போயி  போகே முட்டை, போகே பந்து, போகே லோஷன் எல்லாம் வாங்கிட்டு ரெம்ப சுறுசுறுப்பா  ஆரம்பிப் போம்.

மொபைலைப்  பாத்துக்கிட்டே நடந்து போயி, ரெம்பப் பேரை முட்டிச் சாய்ச்சிட்டு  ' எருமை மாடு' ன்னு திட்டு வாங்கிட்டு  அடுத்த போகே ஸ்டாப், பார்க்கில் போயி ஓரமா நின்னு போகே பந்தைப் போட்டு   ஒரு போகே மானைப் புடிக்கிறதுக்குளேயே காலும், கைவிரலும் வலிக்க ஆரம்பிச்சிடும்.

பரிசாய்க் கிடைக்கிற கேண்டீஸை வச்சிக்கிட்டு பவரையும் லெவலையும் கூட்டிக்கிட்டே   போறதுக்கு எத்தனை இடத்துக்கு போறது . கோயில், சர்ச் , மசூதின்னு எம்மதமும் சம்மதம்னு சுத்திக்கிட்டு திரிவோம்  .

வந்தது தான்  வந்தோம்னு கோயிலுக்கு உள்ளே போயி சாமி கும்பிட்டு வர்றதாலே இப்பல்லாம் கோயில்லே இளைஞர் கூட்டம் அதிகம் ஆயிடுச்சு. நம்மளைத்தாங்க இளைஞர்ன்னு சொல்லிக்கிறோம் . படிக்கிற யாருக்கு நம்ம வயசு தெரிய போகுது. சாமி கும்பிட்டு வந்து முந்தியெல்லாம் செருப்பைத்தான் தேடுவோம். இப்பெல்லாம் மொபைலைத் திறந்து போகே மானைத்தான் தேடுறோம்.

அடுத்த போகே ஸ்டாப் திருமண மண்டபம். அங்கே போனா நம்ம பழைய காதலி புள்ளை குட்டிகளோடு வந்திருப்பா . நம்ம ' எங்கிருந்தாலும் வாழ்க' ன்னு            '  இங்கிருந்தே ஆட்டோகிராப் ' வாழ்த்து வாழ்த்திட்டு அடுத்த போகே மானைப்    பிடிப்போம்.

 அடுத்து பீச்சுக்குப் போனா அவனவன் அஞ்சு லெவல் முடிச்சுட்டு போகே ஜிம்மில்  விளையாடிக்கிட்டு இருப்பான். நாமோ லெவல் மூணிலேயே திணறிக்கிட்டு இருப்போம். அங்கிட்டும் இங்கிட்டும் ஓடிப் போயி ஒரு வழியா  தேவையான பவர் லெவெலோட போகே ஜிம்முக்குள்ளே நுழைவோம்.

 ஏதாவது ஒரு டீமில் சேர்ந்து விளையாடுறப்போ தான் நம்ம டீம் ஆளுங்க ' அவனா நீ' ன்னு நம்மளையும், நம்ம மொபைல் அவதாரத்தையும் மாறி மாறிப் பார்ப்பாங்க.  கொஞ்சம் கஷ்டமாய்த்தான் இருக்கும். அதுக்காக நம்ம சுய ரூபத்தையா அவதாரமா போட முடியும்.  பசங்க பயந்து போயிற மாட்டாங்க ! .

நம்மளும் விடாம கேம் விளையாடி  கிடைச்ச போகே மானையெல்லாம் கோட்டை விட்டுட்டு மறுபடி மானைத் தேடி மச்சான் வர போறான்னு புறப்பட வேண்டியதுதான்.

என்ன. அங்கே இங்கே ஓடிப் போயி உடம்பு இளைச்சது. போகே ஸ்டாப் மாலுக்குள்ளே போயி பர்ஸ் இளைச்சது. இதுதான் இந்த விளையாட்டின் சுக துக்கம்.

மத்தபடி பத்து போகேமானைப் புடிக்கவே  படாத பாடு பட வேண்டியதா இருக்கு. இதுலே நம்ம எப்படி நூத்து அம்பத்தி ஒண்ணு போகே மானைப் பிடிச்சு  போகே டெக்ஸுக்குள்ளே போயி  ஜெயிக்கிறது . சீச்சீ இந்தப் பழம் புளிக்குதுங்க.

--------------------------------------- -------------------நாகேந்திர  பாரதி

செவ்வாய், 23 ஆகஸ்ட், 2016

வாட்ஸ் அப் உலகம்

வாட்ஸ் அப் உலகம்
-------------------------------
இந்த வாட்ஸ் அப் குரூப்பிலே குட் மார்னிங்க் , குட் நைட்  ன்னு கூகிளிலே சுட்ட ஏதோ ஒரு பொன் மொழியோ வெள்ளி மொழியோட     நிறுத்திக்கிறவங்க பரவாயில்லைங்க. ஆனா இந்த கருத்து  சிகாமணிகள் சில பேரு இருக்காங்க பாருங்க. இவங்க படுத்துற பாடு தாங்க முடியலீங்க.

அந்தக் கால அறிஞர்கள் முதல் இந்தக் கால நடிகர்கள் வரை என்ன சொல்லியிருக்காங்கன்னு அதே கூகிள் கடவுள் கிட்டே கேட்டு வாங்கி போடுவாங்க பாருங்க. நம்ம போன் ஸ்கிரீனில் கீழே கீழே போய்க்கிட்டே இருக்கும். அதை படிச்சு முடிக்கிறப்போ நம்ம குட் மார்னிங்க் பிரெண்ட் வந்து குட் நைட் கமெண்ட்  போட்டுருவாரு . அவ்வளவு நீளம். அவ்வளவு நேரம் ஆகும் படிச்சு முடிக்க.

இது தவிர ஆடியோ பைல்லுன்னு வேற அப் லோட்  பண்ணுவாங்க . அதை அமுக்கி விட்டா அது இங்கிட்டும் அங்கிட்டும் கால் மணி நேரம் ஓடும். பப்பர் பண்ணுதாம். ஒரு வழியா முடிச்சு நம்ம நண்பரோட டப்ஸ் மாஸ் பேச்சோ பாட்டோ  ஒரு அரை மணி நேரம் ஓடும். கேட்கணும். வேற வழி. நண்பேண்டா .

இவங்க பரவாயில்லைங்க. சில சுய பிரதாப சரித்திரங்கள்  இருக்கே . அப்பப்பா .இவங்க டூர் போனது, கோயிலுக்குப் போனது, கல்யாணத்துக்குப் போனது, கருமாதிக்குப் போனது ன்னு  ஒரே போட்டோவாய்ப் போட்டு தாளிச்சிருப்பாங்க. அது பாட்டுக்கு ஒண்ணு மாத்தி ஒண்ணு வந்து விழுந்துக்கிட்டே இருக்கும். கொஞ்சம் பொறுமையா காத்திருக்கணும். எல்லாம் ஓபன் ஆறதுக்கு.

அடேய். செத்துப் போன பெரியவர் கூட எல்லாம செல்பீ  எடுத்து போடறது. . இது தவிர அவரைப் பற்றிய குறிப்புகள். நல்லது கெட்டது எல்லாமே. மனுஷன் போயி சேந்துட்டாரு . இப்பப் போயி அவரு பண்ணது இது  சரியில்லே  அது சரியில்லே ன்னு . மனுஷன் செத்தாக் கூட விட மாட்டீங்களா உங்க ஆராய்ச்சியை .

இது தவிர அரசியல், சினிமான்னு சில பேரு ஒரே அடிதடிப் பேச்சு. இதுக்கு நடுவிலே யாரோ ஒரு புண்ணியவான் சமயப் பெரியவர் ஒருத்தரு பொன் மொழியை எடுத்து விட்டுருப்பாருஅது இந்த சண்டைப் பேச்சுக்கு நடுவிலே கிடந்து தத்தளிக்கும்.

நம்ம பிரயாணம் பண்ணுறப்போ தெரியாம இந்த குரூப்புகளிலே நுழைஞ்சு படிக்க பாக்க கேக்க ஆரம்பிச்சுட்டோம்னு வச்சுக்குங்க. அவ்வளவுதான். நம்ம இன்டர்நெட் பேலன்ஸ் காலியாகி சார்ஜும் போயி அவசர போன் கூட பண்ண முடியாம , வீட்டுக்குப் போயி மனைவி கிட்டே ' எத்தனை தடவை   போன் பண்ணுறது . தொடர்பு எல்லையைத் தாண்டி அப்படி என்ன தொடர்புலே இருந்தீங்க ' ன்னு பேச்சு வாங்க வேண்டியிருக்கும்.

அது சரி, இவ்வளவு சிரமம் இருக்குதுல்லே  அப்புறம் ஏன் இந்த வாட்ஸ் அப் குரூப்பிலே இருக்கணும்னு கேக்கறீங்களா. அப்பப்போ நம்மளும் ஆடியோ வீடியோ, இமேஜ் ன்னு போட்டுட்டு நண்பர்கள் கமெண்ட்டுக்கு காத்துக் கிடக்கிறோம்லே. அதுக்குதான்.

---------------------------------------------------------------நாகேந்திர பாரதி

வெள்ளி, 12 ஆகஸ்ட், 2016

ஆராரோ ஆரிரரோ

ஆராரோ ஆரிரரோ
----------------------------------
கண்ணைக் கசக்கும் குழந்தைக்கு
தூக்கம் வருவது தெரிகிறதாம்

பாட்டுப் பாடி தூங்க வைத்தால்
இரைச்சல் போலே இருக்கிறதாம்

தட்டிக் கொடுத்து தூங்க வைத்தால்
அடிப்பது போலே இருக்கிறதாம்

செல்லம் கொஞ்சித் தூங்க வைத்தால்
பயமுறுத்துவது போலே இருக்கிறதாம்

அலுத்துப் போன குழந்தை தானே
அரை மணி நேரத்தில் தூங்கியதாம்
------------------------------------------------நாகேந்திர பாரதி
http://www.nagendrabharathi.com