செவ்வாய், 21 மே, 2013

அறிவுப் பல் அவஸ்தை

அறிவுப் பல் அவஸ்தை




---------------------------------------



மரத்துப் போ என்றாலும்



வலி யொன்றும் மறையாது



கடமுடா சத்தம்



காதில் குறையாது



வாயைக் கிழிப்பது போல்



வஸ்துக்கள் வேலை செய்யும்



பக்கத்துப் பல்லெல்லாம்



பார்த்துப் பரபரக்கும்



ரத்தத்தில் முக்குளித்து



சொத்தைப் பல் நஷ்டம்தான்



அறிவு அகங்காரம்



ஆனாலே கஷ்டம்தான்



--------------------------------------நாகேந்திர பாரதி






சனி, 11 மே, 2013

'முடி'யாத கோலம்

'முடி'யாத கோலம்




-----------------------------------



'கோடை வந்தாச்சு



நல்லா குறைச்சிடு'



அப்பா பேச்சுக்கு



கத்திரி ஆடும்



மொட்டைக்குக் கொஞ்சம்



கூட முடி வச்சு



வீட்டுக்கு வந்தால்



அம்மா திட்டுவாள்



'புள்ளைக்கு சளி பிடிக்கும்



இம்புட்டு முடி இருக்கே'



------------------------------நாகேந்திர பாரதி




வியாழன், 9 மே, 2013

கோயில் பிரகாரம்

கோயில் பிரகாரம்




--------------------------------



மண்ணுத் தரையாக



இருந்த போது



வலம் வந்த பக்தர்கள்



சிமெண்ட்டுத் தரையாக



ஆன போது



உட்கார்ந்து பேசி



பளிங்குத் தரையாக



மாறிய பின்பு



படுத்துத் தூங்கினார்கள்



-----------------------------------நாகேந்திர பாரதி






திங்கள், 6 மே, 2013

நீ வந்த போது

நீ வந்த போது




------------------------



மேகப் பொதியில் ஒன்று



மெத்தென மோதியது போல



தூறல் மழைச் சாரல்



தொட்டுத் தடவியது போல



தெக்குத் தென்றல் என்னைத்



தேடி வந்தது போல



முல்லைப் பூவின் வாசம்



மூச்சில் நிறைந்தது போல



பக்கம் நீ வந்து மெல்ல



பட்டு அமர்ந்த போது



----------------------------------நாகேந்திர பாரதி






மறுத்து விட்ட காலம்

மறுத்து விட்ட காலம்




-------------------------------------



விளையாட வாப்பா என்ற போது



விரட்டி அனுப்பினாய்



விளையாட நினைக்கும் போது - பையன்



வேலைக்குச் சென்று விட்டான்



கடைக்குப் போகணுங்க என்ற போது



கத்தி அனுப்பினாய்



கடைக்குப் போக நினைக்கும் போது - மனைவி



கால் வலியில் படுத்து விட்டாள்



பணம் அனுப்புடா என்ற போது



பதுங்கி ஒதுங்கினாய்



பணம் அனுப்ப நினைக்கும் போது - அப்பா



பாடையிலே போய் விட்டார்



காலம் கூப்பிட்ட போது மறுத்தாய் - இப்போது



காலம் உன்னை மறுத்து விட்டது



------------------------------------------நாகேந்திர பாரதி






இப்பவே வாரீகளா

இப்பவே வாரீகளா




----------------------------------



ஒப்படிக்கும் வயலடிக்கும்



ஓடி ஓடி வேலை செஞ்சு



நெல்லடிச்சுக் குமிச்சு வச்ச



நேரமெல்லாம் போயாச்சு



வயக்காட்டுச் சகதியிலே



வழுக்காம குடமிரண்டை



இடுப்பிலேயும் தலையிலேயும்



ஏத்தி வந்து ஓஞ்சாஞ்சு



முந்தா நாள் நடக்கையிலே



முடியாம விழுந்ததிலே



மூச்சு படபடத்து



முன் நாக்கு தள்ளுதடி



இப்பவே வாரீகளா



எழவுக்கு வாரீகளா



---------------------------------------நாகேந்திர பாரதி




ஞாயிறு, 5 மே, 2013

சாலைக்கொரு சோகம்

சாலைக்கொரு சோகம்




-------------------------------------------



மண் ரோடாய் நானிருந்த அந்தக் காலம்



மழையோடு மகிழ்ந்திருந்த சகதிக் கோலம்



சேற்று மண்ணில் மீன் குஞ்சு நீந்தி ஆடும்



சிறு குருவி ஓரத்தில் பாடி ஓடும்



காற்று வர மண் பறந்து விளையாடும்



காலத்தில் செடிகளிலே பூக்கள் ஆடும்



ஓரத்தில் வளர்ந்திருக்கும் புற் செடியும்



ஒத்தாசைப் பேச்சுக்கு உடன் பாடும்



இப்போது சிமெண்டாகி இறுகும் தேகம்



விறைப்பான சாலையிலே உங்கள் வேகம்



--------------------------------------------------நாகேந்திர பாரதி





வெள்ளி, 3 மே, 2013

'செல்'லத் தொல்லை

'செல்'லத் தொல்லை




-----------------------------------



காலை எழுந்தவுடன் செல்லு - பின்பு



காதில் ஒட்டிக் கொள்ளும் செல்லு



மாலை முழுது மந்த செல்லு - என்று



வழக்கப் படுத்திக் கொண்ட செல்லு



செய்தி அனுப்புறதும் செல்லு - சினிமா



படத்தை அனுப்புறதும் செல்லு



கைதி ஆக்கிப் புட்ட செல்லு - சின்ன



கம்ப்யூட்டர் ஆகிப் போன செல்லு



மாசம் முழுக்க அந்த செல்லு - மாசக்



கடைசி 'காய்ச்சு'மந்த பில்லு



----------------------------------------நாகேந்திர பாரதி






வியாழன், 2 மே, 2013

ஒத்தையடிப் பாதை

ஒத்தையடிப் பாதை




-----------------------------------



ஓராயிரம் கால்களின்



ஒற்றுமை அடையாளம்



கால்கள் பின்னிய



காட்டுக் கயிறு



நெளிந்து கிடக்கும்



நீளப் பாம்பு



தார் ரோட்டின்



தகப்பன் சாமி



தேய்ந்து வளரும்



வாழ்க்கைப் பாதை



-------------------------------நாகேந்திர பாரதி