சனி, 31 டிசம்பர், 2011

குழந்தையும் தெய்வமும்

குழந்தையும் தெய்வமும்
---------------------------------------------------
நம்ம வீட்டுக் குழந்தை
அழுதால் செல்லம்
அடுத்த வீட்டுக் குழந்தை
அழுதால் பிடிவாதம்
நம்ம வீட்டுக் குழந்தை
அடித்தால் கொஞ்சல்
அடுத்த வீட்டுக் குழந்தை
அடித்தால் அதட்டல்
குழந்தையும் தெய்வமும்
குடும்பக் கோயிலுக்குள்
--------------------------------------------நாகேந்திர பாரதி

வியாழன், 29 டிசம்பர், 2011

கொசுக்களின் கொண்டாட்டம்

கொசுக்களின் கொண்டாட்டம்
------------------------------------------------------
கொசு வத்திச் சுருளாம்
கொசு மருந்துத் தெளிப்பானாம்
மின்சார சாதனமாம்
மேனியெங்கும் தைலமாம்
கொசுக் கூட்டக் குடும்பத்தை
கொலை செய்யும் முயற்சிகளாம்
கொசுவுக்கு மருந்தெல்லாம்
பழக்கம் ஆயிடுச்சாம்
கொசுக் கடியும் நமக்கெல்லாம்
பழகிப் போயிடுச்சாம்
----------------------------------------------------நாகேந்திர பாரதி

செவ்வாய், 27 டிசம்பர், 2011

நரைக்காத மீசை

நரைக்காத மீசை
------------------------------------
ஒன்றிரண்டு நரை முடியை
ஓரமாகக் கத்திரித்தோம்
கண்டபடி வந்தபின்பு
கரு மையால் மறைத்து வைத்தோம்
மை கரைந்து போகும் போது
மானாவாரி நிறமாய் ஆச்சு
சுத்தமாக மழித்து விட்டு
சுதந்திரமாய் சுவாசித்தோம்
நரைக்காத மீசையோடு
நாம் இளைஞர் ஆகிப் போனாம்
----------------------------------------------------நாகேந்திர பாரதி

திங்கள், 26 டிசம்பர், 2011

நடக்காத ஆசை

நடக்காத ஆசை
------------------------------
நடைப் பயிற்சிக்கு
ஆசை தான்
குளிர், காற்றில்
குறைந்திருந்தால்
கொசு, செடிகளில்
குறைந்திருந்தால்
கூட்டம், பூங்காவில்
குறைந்திருந்தால்
தூக்கம், கண்களில்
குறைந்திருந்தால்
நடைப் பயிற்சிக்கு
ஆசை தான்
----------------------------------நாகேந்திர பாரதி

ஞாயிறு, 25 டிசம்பர், 2011

இதயமும் இதழ்களும்

இதயமும் இதழ்களும்
--------------------------------------
இரண்டு கண்களில்
இதயமும் இதழ்களும்

ஒன்றில் ஒளிந்திருக்கும்
இதழ்களின் ஈரம்

இன்னொன்றில் மறைந்திருக்கும்
இதயத்தின் சாரம்

இரண்டும் கலந்ததே
இவ்வுலக வாழ்க்கை

இரண்டும் கடந்ததே
அவ்வுலக வாழ்க்கை
--------------------------------------------------நாகேந்திர பாரதி

வியாழன், 22 டிசம்பர், 2011

கருணைக் கொலை

கருணைக் கொலை
----------------------------------
விட்டு விட்டதாம் வேர்
விழுந்து விடுமாம் மரம்
பட்டு விட்டதாம் கிளை
பறந்து விட்டதாம் இலை
ஊர் கூடி ஒன்றாய்
எடுத்து விட்டதாம் முடிவு
கயிறைப் போட்டு இழுக்க
ஒடிந்து விழுந்ததாம் மரம்
பாயில் புரண்டு பார்த்தாள்
நோயில் கிடக்கும் பாட்டி
-----------------------------------------------நாகேந்திர பாரதி

தமிழ் இசை

தமிழ் இசை
----------------------
இசைக்கு மொழி
இல்லைதான்
தமிழ் சேர்ந்தால் இன்பம்
கொள்ளைதான்
அசைக்க முடியா
மனத்தையும்
இசை ஆட்டிப் படைக்கும்
விந்தைதான்
அதில் தமிழும் சேர்ந்தால்
போதைதான்
அர்த்தம் புரிந்து ஆடும்
தலையும் தான்
----------------------------------------------நாகேந்திர பாரதி

செவ்வாய், 20 டிசம்பர், 2011

வீடும் கூடும்

வீடும் கூடும்
-----------------------
மூச்சு முட்டுகையில்
நாக்கு தள்ளுகையில்
வாழ விருப்பமா
சாக விருப்பமா
சோக எண்ணமா
சுதந்திர வண்ணமா
வெந்த உடலுக்கு
மண்ணே வீடு
விட்ட உயிருக்கு
விண்ணே கூடு
---------------------------------------------நாகேந்திர பாரதி

ஞாயிறு, 18 டிசம்பர், 2011

பனை மரப் பலகாரம்

பனை மரப் பலகாரம்
----------------------------------------
பனை ஓலை மடக்கி
பதநீர் குடிக்கலாம்
பனை நுங்கைச் சீவி
கம்பரித்து சுவைக்கலாம்
பனங் காயைச் சுட்டு
சுவைத்து துப்பலாம்
பனங்கிழங்கை அவித்து
கடித்து தின்னலாம்
பருவ காலம் எல்லாம்
பனை மரப் பலகாரம்
-----------------------------------------------நாகேந்திர பாரதி

சனி, 17 டிசம்பர், 2011

தென்றல் ஊதல்

தென்றல் ஊதல்
---------------------------------
ஆண்களும் பெண்களும்
அத்தனை கோடி
அவளை மட்டுமே
ஆர்வமாய்த் தேடி
தாய்மை உணர்ச்சியா
தாங்கும் மலர்ச்சியா
தூய்மை உள்ளமா
தூங்கும் இல்லமா
தேங்கும் காதலா
தென்றல் ஊதலா
-------------------------------------நாகேந்திர பாரதி

ஞாயிறு, 11 டிசம்பர், 2011

சுற்றமும் நட்பும்

சுற்றமும் நட்பும்
-----------------------------
வேலை செய்யும் காலத்தில்
பேசுதற்கு நேரமில்லை
ஓய்வு பெற்ற காலத்தில்
கேட்பதற்கு ஆளில்லை
பெற்றாலும் வளர்த்தாலும்
பெரும் புகழாய் ஆக்கினாலும்
நண்பனாய் சேர்ந்திருந்து
நடந்திருந்து வந்திருந்தால்
இப்போதும் துணையிருக்கும்
எப்போதும் பேச்சிருக்கும்
--------------------------------------------------------நாகேந்திர பாரதி

சனி, 10 டிசம்பர், 2011

ஏழை இல்லம்

ஏழை இல்லம்
----------------------
இடுப்பில் ஒரு பிள்ளை - விரல்
இடுக்கில் ஒரு பிள்ளை
அடுப்பில் ஒரு கண் - பிள்ளை
ஆட்டத்தில் ஒரு கண்
செலவின் மீது மனம் - வந்து
சேருமா இன்று பணம்
கணவன் வரும் ஓசை - அதில்
கவலை, காதல், ஆசை
ஏழை வாழும் இல்லம் - இதில்
இளமை மட்டும் துள்ளும்
----------------------------------------------------நாகேந்திர பாரதி

புதன், 7 டிசம்பர், 2011

காதல் உலகம்

காதல் உலகம்
---------------------------------
ஓரப் பார்வையில்
காதல் ஒளிந்திருக்கும்
உதட்டுச் சுழிப்பில்
உள்ளம் மறைந்திருக்கும்
கோபப் பேச்சில்
குறும்பு கலந்திருக்கும்
குனிந்த நடையில்
கூப்பிடும் குரல் இருக்கும்
காதல் உலகத்தில்
என்னென்னமோ இருக்கும்
-------------------------------------------நாகேந்திர பாரதி

வியாழன், 1 டிசம்பர், 2011

வரவும் செலவும்

வரவும் செலவும்
------------------------------------
முதலா ளிக்கு
வரவு வரணும்
தொழிலா ளிக்கு
செலவு செய்யணும்
செலவு செஞ்சா
வரவு வரும்
வரவு வந்தா
செலவு செய்யலாம்
செலவும் வரவும்
சேர்ந்தே இருக்கும்
-------------------------------------------------நாகேந்திர பாரதி

செவ்வாய், 29 நவம்பர், 2011

வாயும் வயிறும்

வாயும் வயிறும்
-------------------------------
முரட்டு இட்டிலி
பத்து சாப்பிட்டு
மரக்கா தம்ளரில்
காபி குடிச்சிட்டு

சோறும் சாம்பாரும்
வெஞ்சன வகைகளும்
அப்பளம் வடாமும்
தின்னு முடிச்சுட்டு

பழைய சோறு
பெரிய தட்டிலும்
ஊறுகா மிளகா
சின்னத் தட்டிலும்

சேத்துச் சாப்பிட்டு
படுக்கப் போக
வத்திப் போயி
வயிறு கிடக்கும்

ஆடின ஆட்டமும்
ஓடின ஓட்டமும்
பத்துமா வயித்துக்கு
பள்ளிப் பருவத்தில்

-------------------------------நாகேந்திர பாரதி

ஞாயிறு, 27 நவம்பர், 2011

பாட்டி உலகம்

பாட்டி உலகம்
--------------------------------
வீட்டைப் பெருக்கி
துணிகள் துவைத்து
விளக்கு வைத்து
கதைகள் சொல்லி
ஆக்கிப் போட்டுப்
போய்ச் சேர்ந்த பாட்டிக்கு
உள்ளூர் தவிர
அசலூர் தெரியாது
எங்களின் உலகமே
அவளென்றும் தெரியாது
---------------------------------------------------------நாகேந்திர பாரதி

வெள்ளி, 25 நவம்பர், 2011

இன்ப துன்பம்

இன்ப துன்பம்
------------------------
மழைக்குப் பயந்து
மயங்குவதில்லை செடி
மடங்கிக் குளித்தால்தான்
மரமாக மாறலாம்
உளிக்குப் பயந்து
ஓடுவதில்லை பாறை
சிதறித் தெறித் தால்தான்
சிலையாக மாறலாம்
கசக்கிப் பிழிந்தால்தான்
கருப்பு வெளுப்பாகும்
-------------------------------------------------நாகேந்திர பாரதி

கிராமத்து ரோடு

கிராமத்து ரோடு
--------------------------------
எட்டு மணிக்கு ஒரு பஸ்
நாலு மணிக்கு ஒரு பஸ்
புழுதி வாரிப் போகும்
மத்த நேரங்களில்
ஆடு , மாடுகளையும்
சைக்கிள், வண்டிகளையும்
சிறியவர் ஓட்டத்தையும்
பெரியவர் நடையையும்
பார்த்துக் கொண்டு
படுத்துக் கிடக்கும்
கிராமத்து ரோடு
-----------------------------------நாகேந்திர பாரதி

புதன், 23 நவம்பர், 2011

கிராமக் காதல்

கிராமக் காதல்
---------------------------
கண்மாய்க் கரையில்
பார்த்துப் பழகி
கருவக் காட்டில்
தொட்டுத் தொடர்ந்து
அம்மன் கோயிலில்
குங்குமம் இட்டு
அடுத்த ரெயிலைப்
பிடிக்கும் போது
கிராமம் சூழும்
காதல் வீழும்
---------------------------------நாகேந்திர பாரதி

காரண காரியம்

காரண காரியம்
-------------------------------
பார்த்தும் பார்க்காமல் போனதற்கு
காரணம் இருக்கும்
சிரித்தும் சிரிக்காமல் போனதற்கு
காரணம் இருக்கும்
பேசியும் பேசாமல் போனதற்கு
காரணம் இருக்கும்
பைத்தியமாய் நடந்த பகல்களில்
காரணம் இருக்கும்
ஏங்கிக் கிடந்த இரவுகளில்
காரணம் இருக்கும்
--------------------------------------------------நாகேந்திர பாரதி

செவ்வாய், 22 நவம்பர், 2011

கிராமக் கிழவி

கிராமக் கிழவி
------------------------------
நாத்து நட்டதும்
களை எடுத்ததும்
கஞ்சி கடஞ்சதும்
கலயம் சுமந்ததும்
புள்ளை பெத்ததும்
புரண்டு படுத்ததும்
ஓஞ்சு விழுந்ததும்
சாஞ்சு கிடப்பதும்
கண்ணுக்குள் நீராய்
கிராமத்துக் கிழவி
------------------------------------------நாகேந்திர பாரதி

திங்கள், 21 நவம்பர், 2011

கிராமக் கிழவன்

கிராமக் கிழவன்
-----------------------------------
பனைமரம் ஏறியதும்
பதினி காய்ச்சியதும்
வரப்பு வெட்டியதும்
வயலை உழுததும்
அறுத்துப் போட்டதும்
அடித்துத் தூத்தியதும்
வண்டி கட்டியதும்
வரவு பார்த்ததும்
இணைத்துப் பார்த்து
இருமிக் கிடப்பான்
--------------------------------------நாகேந்திர பாரதி

ஞாயிறு, 20 நவம்பர், 2011

மெய்யும் பொய்யும்

மெய்யும் பொய்யும்
------------------------------------------
நானாக இருக்கையில்
நரம்புகள் துடித்திடும்
நானில்லை என்றபின்
நாடிக்குப் புரிந்திடும்
என்னவாய் இருந்ததிது
ஏனிப்படி ஆனது
என்றெல்லாம் கேள்விகள்
எழும்பிடும் போதிலே
மெய்யென்றும் பொய்யென்றும்
மெதுவாகத் தெரிந்திடும்
-------------------------------------------------------------நாகேந்திர பாரதி

சனி, 19 நவம்பர், 2011

மறப்பதும் மன்னிப்பதும்

மறப்பதும் மன்னிப்பதும்
------------------------------------------
மறப்பது மனிதம்
மன்னிப்பது இறைமை

மறப்பதும் மன்னிப்பதும்
மனம் திருந்திய மனிதர்க்கு

நோக்கமே தவறென்றால்
நொண்டிச்சாக்கு துணைஎன்றால்

மறப்பது தப்பு
மன்னிப்பது குற்றம்
--------------------------------------------நாகேந்திர பாரதி

செவ்வாய், 15 நவம்பர், 2011

வைக்காத பெயர்கள்

வைக்காத பெயர்கள்
-------------------------------------
செல்லக் குட்டிம்மா
கண்ணுக் குட்டிம்மா
பஞ்சும்மா பிஞ்சும்மா
செல்லம்மா வெல்லம்மா
கட்டிம்மா குட்டிம்மா
கண்ணும்மா பொண்ணும்மா
வைத்த பேரைச் சொல்லிக்
கூப்பிட்டுக் கொஞ்சாமல்
வாய்க்கு வந்த பேர் சொல்லி
கொஞ்சிடுமாம் தாய்மை
--------------------------------------------நாகேந்திர பாரதி

திங்கள், 14 நவம்பர், 2011

இருட்டுப் பாட்டுக்கள்

இருட்டுப் பாட்டுக்கள்
-----------------------------------------------
பள்ளிக்கூட சந்தோரம்
பயத்தோடு சிகரெட்டு
கடற்கரை படகோரம்
கைமாறும் கரன்சிகள்
ஆட்டோவை நிறுத்தி விட்டு
ஹாப் வாங்கும் அவசரம்
அரிவாளின் வெறியோடு
துரத்தும் கால் வேகம்
இருட்டுப் பாட்டுக்களில்
சமுதாய வெளிப்பாடு
------------------------------------------நாகேந்திர பாரதி

திங்கள், 7 நவம்பர், 2011

நாட்டாமை வார்த்தைகள்

நாட்டாமை வார்த்தைகள்
----------------------------------------------
மனைவியோ கணவனோ
மகனோ மகளோ
தாயோ தந்தையோ
சோதரனோ சோதரியோ
நட்போ சுற்றமோ
நோயில் விழுந்தால்
அடுத்தவர் அருமை
அப்போது புரியும்
அதற்கும் முன்னே
அடுக்கிய வார்த்தைகள்
நடுவில் புகுந்து
நாட்டாமை செய்யும்
-----------------------------------------------நாகேந்திர பாரதி

ஞாயிறு, 6 நவம்பர், 2011

அரைப் பள்ளிக்கூடம்

அரைப் பள்ளிக்கூடம்
--------------------------------------------
அரைப் பள்ளிக்கூடத்தில்
அஞ்சாம் வகுப்பு வரை
வாழ்ந்தது வாழ்க்கை
அதற்குப் பின்னே
வயக்காட்டு வேலையும்
வயதுக்கு வந்ததும்
மாமனை மணந்ததும்
மக்களைப் பெற்றதும்
வயது போனதும்
வதங்கி விழுந்ததும்
வாய்க்கரிசி வாங்கியதும்
வாழ்க்கையா என்ன
----------------------------------------------நாகேந்திர பாரதி

புதன், 26 அக்டோபர், 2011

காது வலியும் தீப ஒளியும்

காது வலியும் தீப ஒளியும்
-------------------------------------------------
ஓலைப் பட்டாசு போய்
உயரே பறக்குது ராக்கெட்டு
வீட்டுப் பட்சணம் போய்
வித வித பலகாரம் கடைகளில்
தியேட்டர் கியூ போய்
டிவியில் சினிமா கியூ
தைத்து வாங்கியது போய்
தயார் உடை அப்போதே
வாழ்த்து அட்டைகள் போய்
விரைவு ஈமெயில்கள்
எண்ணை சிகைக்காய் போய்
எத்தனை ஷாம்பூ வகை
அமைதியான தீப ஒளி போய்
ஆரவார காது வலி
------------------------------------நாகேந்திர பாரதி

ஞாயிறு, 16 அக்டோபர், 2011

பச்சைக் கலர் பை

பச்சைக் கலர் பை
--------------------------------------
அரிசி, பருப்பு,புளி, மிளகாய்
வர்ற போதும் போகும் போதும்
கொடுத்து விட்டும் எடுத்துப் போயும்
இருந்த காலம் மறந்து போயி
பட்டணத்து ரேஷன் கடை
வாசலிலே வதங்கிப் போயி
பழுத்துப் போன உடம்போடு
பச்சைக் கலர் பையோடு
--------------------------------------நாகேந்திர பாரதி

வெள்ளி, 14 அக்டோபர், 2011

வாசமுள்ள வார்த்தைகள்

வாசமுள்ள வார்த்தைகள்
---------------------------------------------------------
வாய்க்காலைப் பத்தியும்
வத்தக் குழம்பைப் பத்தியும்
சேலையைப் பத்தியும்
செம் மண்ணைப் பத்தியும்
கோயிலைப் பத்தியும்
குடிசையைப் பத்தியும்
கதையாவும் கட்டுரையாவும்
கவிதையாவும் எழுதுறப்போ
தூரத்தில் இருந்து
தொடர்புடைய வாசம்
---------------------------------------------------நாகேந்திர பாரதி

வியாழன், 13 அக்டோபர், 2011

முந்தி பிந்தி

முந்தி பிந்தி
-------------------------
சைக்கிளில் போனாலும்
ஸ்கூட்டரில் போனாலும்
ஆட்டோவில் போனாலும்
காரில் போனாலும்
முந்தைய வண்டியை
முந்திப் போகணும்
இடிச்சுப் பிடிச்சு
எகிறிப் போகணும்
பிந்திக் கிளம்பினா
இந்தப் பாடுதான்
--------------------------------------------நாகேந்திர பாரதி

புதன், 12 அக்டோபர், 2011

ஆட்டோ ஸ்டாண்ட் அடையாளம்

ஆட்டோ ஸ்டாண்ட் அடையாளம்
------------------------------------------------------------
பஸ் ஸ்டாப்பில் இறங்கி
பக்கத்து சந்தில் நுழைந்து
வலப்பக்கம் திரும்பினால்
ஆட்டோ ஸ்டாண்ட்
அதிலே இருந்து
அஞ்சாவது வீடுதான்
கட்சிக் கொடி தகராறில்
காணாமல் போனது
ஆட்டோ ஸ்டாண்ட் மட்டுமா
நம்மோட வீடும்தான்
---------------------------------------------------நாகேந்திர பாரதி

திங்கள், 10 அக்டோபர், 2011

வயலும் வாழ்வும்

வயலும் வாழ்வும்
----------------------------------
சகதியும் மலமும் கலந்து
வழுக்கும் வாய்க்கால் வரப்பு
ஊன்றிக் குதித்துத் தாண்டி
கண்மாய்க் கரையை அடைந்தால்
பளபள களிமண்ணோடு
வழுக்கும் கண்மாய் மேடு
துவைத்துக் குளித்துத் திரும்பி
தாண்டி வீட்டை அடைந்து
காலைக் கழுவி முடிக்க
சருவத் தண்ணி அருவாகும்
------------------------------------------------நாகேந்திர பாரதி

திங்கள், 3 அக்டோபர், 2011

பாத்தியில் நாற்று

பாத்தியில் நாற்று
-----------------------------------
தெருவும் திண்ணையும்
முற்றமும் அடுப்படியும்
கோயிலும் குளமும்
சூடமும் சுண்டலும்
வெயிலும் மழையும்
வேர்வையும் சகதியும்
சிரிப்பும் அழுகையும்
பாட்டும் ஆட்டமும்
பத்து வயது வரை
பாத்தியில் நாற்று
-------------------------------------------நாகேந்திர பாரதி

புதன், 28 செப்டம்பர், 2011

மூங்கில் பாய்

மூங்கில் பாய்
---------------------------
மூங்கில் பாயில்
முடங்கிக் கிடக்கும்
மூச்சைத் துறந்து
அடங்கிக் கிடக்கும்
பார்த்தது சிரித்தது
பேசியது பழகியது
தொட்டது துவண்டது
வளர்ந்தது வாழ்ந்தது
எல்லாம் மறந்து
இறந்து கிடக்கும்
--------------------------------------------நாகேந்திர பாரதி

திங்கள், 12 செப்டம்பர், 2011

தாலாட்டும் அதட்டல்

தாலாட்டும் அதட்டல்
-----------------------------------------------
'என்னடா தம்பி
இன்னுமா எந்திரிக்கலை'
உசுப்பும் அப்பத்தாவின்
உரிமைக் குரலில்
அந்தக் காலத் தாலாட்டு
அமுங்கிக் கிடப்பதால்
இழுத்துப் போர்த்திக் கொண்டு
இன்னமும் தூங்குவோம்
---------------------------------------------------நாகேந்திர பாரதி

ஞாயிறு, 11 செப்டம்பர், 2011

விலகலும் பிரிதலும்

விலகலும் பிரிதலும்

---------------------------------------

விலகி இருப்பதும்

பிரிந்து இருப்பதும்

வேறு வேறு

வித்தியாசம் உண்டு

விலகி இருப்பது

உடலும் மனமும்

பிரிந்து இருப்பது

உடல்கள் மட்டுமே

சேரும் நேரம்

நேரும் , ஆறும்

------------------------------நாகேந்திர பாரதி

பாவாடைப் பருவம்

பாவாடைப் பருவம்
-------------------------------------
குளந்தங் கரையும்
குடமும் கூத்துமாய்
பள்ளிக் கூடமும்
பாடமும் பரீட்சையுமாய்
பல்லாங் குழியும்
பாட்டும் சிரிப்புமாய்
பாவாடைப் பருவம்
பறந்து ஓடும்
சேலைப் பருவத்தில்
சிந்தனை மாறும்
---------------------------------நாகேந்திர பாரதி

சனி, 10 செப்டம்பர், 2011

நகர் மனம்

நகர் மனம்
--------------------
ஒவ்வொரு நகருக்கும்
மனமொன்று உண்டு
சென்னைக்கு மெரீனா
கோவைக்கு சிறுவாணி
மதுரைக்கு மல்லிகை
முகவைக்கு வெய்யில்
திருச்சிக்கு காவிரி
தஞ்சைக்கு நஞ்சை
ஒவ்வொரு மனத்துள்ளும்
மணமொன்றும் உண்டு
-------------------------------------நாகேந்திர பாரதி

வெள்ளி, 9 செப்டம்பர், 2011

அழகோ அழகு

அழகோ அழகு
---------------------------
கையைக் கையை ஆட்டி
நடப்பது ஒரு அழகு
காலைக் காலைத் தூக்கி
ஓடுவது ஒரு அழகு
தூக்கச் சொல்லிக் கையைத்
தூக்குவது ஒரு அழகு
ஏக்கத் தோடு பார்த்து
எம்புவது ஒரு அழகு
கோபத் தோடு முடியைப்
பிய்ப்பது ஒரு அழகு
பாசத் தோடு முத்தம்
பொழிவது ஒரு அழகு
----------------------------------------நாகேந்திர பாரதி

திங்கள், 5 செப்டம்பர், 2011

பழைய கண்ணீர்

பழைய கண்ணீர்

-----------------------------------

பழைய ஊரில் நடக்கும் போதும்

பழைய கோயிலைச் சுற்றும் போதும்

பழைய கண்மாயில் குளிக்கும் போதும்

பழைய நண்பர் கூடும் போதும்

பழைய துணையைப் பார்க்கும் போதும்

பழைய பாட்டைக் கேட்கும் போதும்

பழைய சோறு உண்ணும் போதும்

பழைய நினைப்பு வந்து விடும்

பழைய கண்ணீர் தந்து விடும்

----------------------------------------------------நாகேந்திர பாரதி

ஞாயிறு, 28 ஆகஸ்ட், 2011

வாழ்வின் நியதி

வாழ்வின் நியதி
---------------------------
விதையும் மண்ணும்
செடியும் மரமும்
பூக்கும் காய்க்கும்
கனியும் கருகும்
சாயும் ஓர்நாள்
வேகும் மறுநாள்
இயற்கை நீதி
இப்படி இருக்கும்
மனிதர் வாழ்வும்
மரத்தின் நியதி
------------------------------நாகேந்திர பாரதி

சனி, 27 ஆகஸ்ட், 2011

நண்பனும் பகைவனும்

நண்பனும் பகைவனும்
----------------------------------------
ஊழல் என்பவன்
ஒட்டிய நண்பன்
மேலும் கீழும்
இடமும் வலமும்
கிழக்கும் மேற்கும்
வடக்கும் தெற்கும்
ஒட்டிய நண்பனை
உடைப்பது கடினம்
ஊறப் போட்டால்
தூரப் போவான்
ஊறத் தண்ணீர்
உள்ளம் மாற்றம்
-------------------------------------நாகேந்திர பாரதி

சனி, 20 ஆகஸ்ட், 2011

தன்னிலை தெளிவு

தன்னிலை தெளிவு
-------------------------------------
நில்லாத இளமையை
நிலையென்று நினைத்து
வில்லாகி அம்பாகி
விடுபட்டுப் பாய்ந்து
பொல்லாத காதலில்
புதையுண்டு மூழ்கி
சொல்லாலும் செயலாலும்
சுவை கண்டு சோர்ந்து
தள்ளாத வயதினிலே
தன்னிலை தெளியும்
-----------------------------------------நாகேந்திர பாரதி

வெள்ளி, 19 ஆகஸ்ட், 2011

பித்தாக வைத்தவள்

பித்தாக வைத்தவள்
----------------------------------
பார்த்துப் பார்த்து
பார்க்க வைத்தாள்
சிரித்துச் சிரித்து
சிரிக்க வைத்தாள்
பேசிப் பேசி
பேச வைத்தாள்
அழுது அழுது
அழ வைத்தாள்
பிரிந்து மறந்து
பித்தாக வைத்தாள்
------------------------------------------நாகேந்திர பாரதி


வெள்ளி, 12 ஆகஸ்ட், 2011

அதே அவள்தான்

அதே அவள்தான்
---------------------------------
ஏற்றி விட்ட கண்ணாடியோடு
அதே கண்கள்தான்
இறங்கி விட்ட ஓரங்களோடு
அதே இதழ்கள்தான்
எட்டிப் பார்க்கும் நரம்புகளோடு
அதே கைகள்தான்
இளைத்துப் போன விரல்களோடு
அதே கால்கள்தான்
கூடுதலாய் ஒரு கம்பீரத்தோடு
அதே அவள்தான்
----------------------------------------------------------நாகேந்திர பாரதி

ஞாயிறு, 7 ஆகஸ்ட், 2011

இமைப் பொழுது

இமைப் பொழுது
-------------------------------
இமைக்கும் பொழுதே
இளமைப் பொழுது
திறந்து மூடும்
திரும்ப வராது
காதல், கல்யாணம்
குடும்பம், குழந்தை
உடலும் ஓடும்
உலகும் உருளும்
காலம் போகும்
கனவாய் ஆகும்
------------------------------------------------நாகேந்திர பாரதி

பயணத்தின் பாதை

பயணத்தின் பாதை
---------------------------------
எந்திரன் போலே
நடக்கும் பாப்பா
ரெண்டடி நடக்கும்
நிக்கும் பாக்கும்
மூணாம் அடிக்கு
முயற்சி செய்யும்
பச்சக்கென அமர்ந்து
பல்லைக் கடிக்கும்
மறுபடி எழுந்திடும்
முயற்சி தொடர்ந்திடும்
விழுவதும் எழுவதும்
பயணத்தின் பாதை
--------------------------------------------நாகேந்திர பாரதி

தடங்கள்

தடங்கள்
----------------------
கம்மாக்கரைக் களிமண்ணில்
காற்தடம் மாறவில்லை
தூக்கிவந்த நெல்மூட்டைக்
கைத்தடம் மாறவில்லை
முகம் துடைச்சுப் போட்ட
தண்ணித் தடம் மாறவில்லை
திண்ணையிலே உக்காந்த
வேர்வைத்தடம் மாறவில்லை
திடுமென்று சாஞ்ச அய்யா
மூச்சுத் தடம் மாறிப் போச்சே
------------------------------------------------------------நாகேந்திர பாரதி

கேள்வியும் பதிலும்

கேள்வியும் பதிலும்
-----------------------------------
யார் கேட்டது என்ன
என்ன நடந்தது எங்கே
எங்கே போனது எப்போது
எப்போது நடந்தது எவ்வாறு
எவ்வாறு கேட்டது ஏன்
ஏன் போனது யார்
கேள்வியின் கடலில்
மூழ்கும் அறிவு
பதிலின் பரப்பில்
பறக்கும் ஆத்மா
-------------------------------------------நாகேந்திர பாரதி

விந்தை மனிதர்கள்

விந்தை மனிதர்கள்
-------------------------------------
பாவோடும் நூலாக
பசியோடும் வயிறாக
நீரோடும் நிலமாக
வேரோடும் மண்ணாக
ஒலியோடும் காற்றாக
உயிரோடும் உடலாக
உள்ளுக்குள் வெளியாக
ஓடுகின்ற இறைவனை
வெளியிலே தேடுகின்ற
விந்தை மனிதர்கள்
-------------------------------------------நாகேந்திர பாரதி

சனி, 30 ஜூலை, 2011

காதலின் தாய்மை

காதலின் தாய்மை
------------------------------------
காதலின் கண்ணீரில்
கருணை கசியும்
காதலின் சிரிப்பில்
உரிமை ஒலிக்கும்
காதலின் பேச்சில்
கவர்ச்சி தெறிக்கும்
காதலின் கோபத்தில்
காரணம் இருக்கும்
காதலின் தூய்மையில்
தாய்மை விளங்கும்
--------------------------------------------நாகேந்திர பாரதி

ஞாயிறு, 24 ஜூலை, 2011

பூங்கா உலகம்

பூங்கா உலகம்
-------------------------------
ஊஞ்சலும் சறுக்குமாய்
உல்லாசம் ஒரு பக்கம்
பெஞ்சும் பேச்சுமாய்
பெருமூச்சு மறு பக்கம்
வாழ்க்கையின் தொடக்கத்தை
வரவேற்கும் ஆவல்
வாழ்க்கையின் முடிவினில்
வருந்திடும் கேவல்
புதுசும் பழசுமாய்
பூங்கா உலகம்
----------------------------------------------நாகேந்திர பாரதி

மரம் தின்னி மழை

மரம் தின்னி மழை
---------------------------------------
நிழலில் கடை விரித்து
தின்பண்டம் விற்பார்கள்
குச்சியை ஒடித்தெடுத்து
பல் துலக்கிப் போவார்கள்
விழுந்த பழம் திரட்டி
வேப்பெண்ணை எடுப்பார்கள்
வெளியூர் பஸ்களுக்கு
வழிகாட்டி மரமும் அது
அடித்த பேய் மழைக்கு
அதுவெல்லாம் தெரியாது
----------------------------------------------------நாகேந்திர பாரதி

ஞாயிறு, 17 ஜூலை, 2011

இரும்புக் கோடுகள்

இரும்புக் கோடுகள்
-------------------
பார்க்கும் சிரிக்கும்
படுத்துக் கிடக்கும்
பேசும் ஏசும்
பிரிந்தே இருக்கும்
காயும் தேயும்
கருக்கும் வெளுக்கும்
ஓயும் உறங்கும்
உடனே விழிக்கும்
இணைய முடியாத
இரும்புக் கோடுகள்
-------------------------------------------------நாகேந்திர பாரதி

ஞாயிறு, 26 ஜூன், 2011

மழலை மொழி

மழலை   மொழி
---------------------------
'உம்' என்ற சொல்லில்
ஓராயிரம் அர்த்தங்கள்
அழுத்திச் சொன்னால்
அந்தப் பொருள் வேண்டுமாம்
மெதுவாகச் சொன்னால்
தூக்கமாய்   வருகிறதாம்
அழுது சொன்னால்
தூக்கிக் கொள்ள வேண்டுமாம்
சிரித்துச் சொன்னால்
விளையாட்டில் திருப்தியாம்
மழலை மொழியில்
ஆரம்பம் 'உம்' ஒலி
-----------------------------------நாகேந்திர பாரதி


வியாழன், 23 ஜூன், 2011

நூலாம் படையெடுப்பு

நூலாம் படையெடுப்பு
----------------------------------
தரைப் படை கடற் படை
விமானப் படை போலே
வீட்டுக் குள்ளேயும் ஒரு
விநோதப் படையெடுப்பு
கவனிக்காமல் விட்டுவிட்டால்
கண்டவுடன் விரட்டாவிட்டால்
சிலந்திப் பகைவர்கள்
நூலாம் படையெடுப்பார்
வீட்டுக்கு விளக்குமாறு
நாட்டுக்கு வீரப் போரு
-----------------------------------நாகேந்திர பாரதி



செவ்வாய், 21 ஜூன், 2011

நிலத்தியல் மாந்தர்

நிலத்தியல் மாந்தர்
------------------------------
குறிஞ்சி நிலத்தில்
கூடி இருந்து
முல்லை நிலத்தில்
பொறுத்து இருந்து
மருத நிலத்தில்
ஊடி இருந்து
நெய்தல் நிலத்தில்
வருந்தி இருந்து
பாலை நிலத்தில்
பிரிந்து இருந்து
எல்லா நிலத்திலும்
ஏழையாய் இருப்பர்
நிலம் பெயராத
நிலத்தியல்   மாந்தர்
----------------------------------நாகேந்திர பாரதி



திங்கள், 20 ஜூன், 2011

ராகம் தாளம் பாடல்

ராகம் தாளம் பாடல்
-------------------------------
தாம் தூம் என்பது
தந்தையர் தான்
சரி சரி என்பது
தாய்க் குலம் தான்
ஓங்கித் தட்டித்
தவறும் தாளம்
உரத்து எழும்பி
உளறும் ராகம்
பாதிக்கப் படுவது
பாடல்கள் தான்
---------------------------------நாகேந்திர பாரதி


ஞாயிறு, 19 ஜூன், 2011

கருப்பும் வெளுப்பும்

கருப்பும் வெளுப்பும்
-----------------------------
கருப்பு துக்கமென்றும்
வெளுப்பு தூய்மையென்றும்  
வெள்ளைத் தோல்காரன்
விளக்கம் எழுதி வைத்தான்
ஊழல் வாதிகளின்
வெள்ளை வேட்டிகளும்
உண்மை வாதிகளின்
கருப்பு வேட்டிகளும்
அந்த நிறங்களின்
அர்த்தம் மாற்றி வைக்கும்
----------------------------------------நாகேந்திர பாரதி


பதைப்பும் தவிப்பும்

பதைப்பும் தவிப்பும்
-------------------------------
அடுத்த வினாடி
உயிர் இருக்குமா
தவழும் பிள்ளை
வளர்ந்து வாழுமா
அடுத்த வேளைச்
சோறு கிடைக்குமா
மலம் நீர் கழிய
மறைவிடம் கிடைக்குமா
பட்டால் தெரியும்
பதைப்பும் தவிப்பும்
------------------------------------நாகேந்திர பாரதி



சனி, 18 ஜூன், 2011

ரெயில் நிறுத்தம்

ரெயில் நிறுத்தம்
---------------------------
தண்டவாளத் தகராறால்
நடு வழியில் ரெயில் நிறுத்தம்
வேர்க்கடலை, வெள்ளரிக்காய்
காப்பி டீ வியாபாரம்
பக்கத்தூருப் பசங்களுக்கு
விளையாட்டு வேடிக்கை
எல்லாம் சரியாகி
ரெயிலு கிளம்பையிலே
இன்னும் கொஞ்ச நேரம்
இருக்க ஏக்கம் வரும்
அடுத்த முறை தாண்டும் போது
அங்கேயும் மனசு நிக்கும்
----------------------------------------நாகேந்திர பாரதி


வெள்ளி, 17 ஜூன், 2011

பஞ்சாயத்துப் பள்ளிக்கூடம்

பஞ்சாயத்துப் பள்ளிக்கூடம்
-------------------------------------------
பஞ்சாயத்துப் பள்ளியிலே
படிக்கப் போறோம்
காசுபணம் கடன் வாங்கும்
கஷ்டம் வேணாம்
கண்டதையும் படிச்சுப்புட்டு
காய்ச்சல் வேணாம்
தேவையான பாடங்களைத்
தெரிந்து எடுப்போம்
நன்றாகப் படிச்சுப்புட்டு
நம் ஊர் வளர்ப்போம்
-----------------------------------------நாகேந்திர பாரதி

வியாழன், 16 ஜூன், 2011

சமச்சீர் பாடம்

சமச்சீர் பாடம்
--------------------------
பாடத்திட்டம் தெரியாம
பள்ளிக்கூடம் திறந்தாச்சு
பொது அறிவுக்   கேள்விகளும்
புது இடங்கள் சுற்றுலாவும்
இலக்கணப் பாடங்களும்
எண்கணித வாய்ப்பாடும்
இடைப்பட்ட காலத்திற்கு
ஏற்பாடாய்     ஆயிப் போச்சு
எப்பவுமே வச்சுக்கலாம்
இதுவே   சமச்சீர்தான்
------------------------------------நாகேந்திர பாரதி



புதன், 15 ஜூன், 2011

கிராமக் காட்சி

கிராமக் காட்சி
------------------------
கண்மாய்த் தண்ணி
அள்ளும் போதும்
கஞ்சிக் கலயம்
சுமக்கும் போதும்
நாத்தங் காலில்
குனியும் போதும்
கண்ணுக் குள்ளே
வட்டம் போடும்
இலவச டிவி
விளம்பரப் படங்கள்
---------------------------------------நாகேந்திர பாரதி

செவ்வாய், 14 ஜூன், 2011

தலைப்புச் செய்திகள்

தலைப்புச் செய்திகள்
-----------------------------------
ஆஸ்பத்திரியில் சேர்ந்தா
தலைப்புச் செய்தி  
வீட்டுக்குத் திரும்பினா 
ஓரச் செய்தி
உண்ணாவிரதம் இருந்தா
தலைப்புச் செய்தி
பழரசம் அருந்தினா
ஓரச் செய்தி
கெட்டதெல்லாம் கொட்டை எழுத்து   
மத்ததெல்லாம் குட்டி எழுத்து
---------------------------------------------------நாகேந்திர பாரதி


திங்கள், 13 ஜூன், 2011

ஆகாயக் கூரை

ஆகாயக் கூரை --- (கணையாழி -ஆகஸ்ட் - 2011)
--------------------------------------------------------------------
வானப் பரப்பில்
மின்னல் விரிசல்
விரிசல் சத்தம்
இடியாய் ஒலிக்கும்
மேகம் கூடிப்
பூசிப் பார்த்தும்
ஒழுகி வழியும்
மழையின் அருவி
வீட்டுக் கூரை
ஓட்டை வழியே
இறங்கிப்   பானையில்
இசையாய் மாறும்
--------------------------------நாகேந்திர பாரதி


ஞாயிறு, 12 ஜூன், 2011

படிப்பும் ஒரு வேலை

படிப்பும் ஒரு வேலை
--------------------------------------
மூணு மணிக்கே எந்திரிக்கணும்
பத்து வீட்டுக்கு
பால் பாக்கெட்டு போடணும்
முறை வாசல் செய்யணும்
பாத்திரம் தேய்க்கணும்
துணி துவைக்கணும்
ரேஷன் கடை போகணும்
ரெயில் டிக்கெட்டு வாங்கணும்
பள்ளிக் கூடமும் போகணும்
படிப்பு வேலையும் பாக்கணும்
---------------------------------------------------நாகேந்திர பாரதி

சனி, 11 ஜூன், 2011

காதல் மேனன்

காதல் மேனன்
------------------------
கவுதம் மேனன் ஒரு
காதல் மேனன்
'பார்த்த முதல்
நாளில்' மேனன்
'ஒன்றா இரண்டா
ஆசைகள்' மேனன்
'கொல்லாமல் கொன்று
புதைத்த'  மேனன்
கவுதம் மேனன் ஒரு
காதல் மேனன்
-------------------------------------நாகேந்திர பாரதி

மதுரைப் பட்டணம்

மதுரைப் பட்டணம்
--------------------------------
மாட்டுத் தாவணி
தவிட்டுச் சந்தை
யானைக் கல்லு
சிம்மக் கல்லு
சித்திரை, ஆடி
ஆவணி, மாசி
சந்திரா, தினமணி
தேவி, சிந்தாமணி
சொன்னா போதும்
மல்லிகை மணக்கும்
---------------------------------------------நாகேந்திர பாரதி


வியாழன், 9 ஜூன், 2011

ஆசையும் பூஜையும்

ஆசையும் பூஜையும்
--------------------------------
ஆலிலைக் கண்ணன்
கால் விரல் சப்புவான்
மலையைத் தூக்கியே
அனுமார் பறப்பார்
சிவனும் விஷ்ணுவும்
முருகனும் சிரிப்பர்
அவரவர் சாமியிடம்
அவரவர் ஆசைகள்
பூஜையும் முடியும்
பொங்கலும் கிடைக்கும்
------------------------------------நாகேந்திர பாரதி



புதன், 8 ஜூன், 2011

எல்லைக் கோடு

எல்லைக் கோடு
----------------------------
காட்டுக்குள் புகுந்து
கரடி புலியை எல்லாம் 
வேட்டையாடிச் செல்லும்
விஷமத் தனத்தாலே
வெஞ்சினம் கொண்ட
விலங்குக் கூட்டம்
நாட்டுக்குள் புகுந்து
நடமாடத் தொடங்கும்
எல்லையைத் தாண்டினால் 
தொல்லை தானே
------------------------------------------------நாகேந்திர பாரதி



செவ்வாய், 7 ஜூன், 2011

ஓசையும் உள்ளமும்

ஓசையும் உள்ளமும்
-----------------------------------
அகன்று உயர்ந்த
கோபுரம் ஆயினும்
உருண்டு உயர்ந்த
மசூதி ஆயினும்
நீண்டு உயர்ந்த
சர்ச் ஆயினும்
'ஆமென்'னும் 'ஓம்' மும் 
'அல்லாஹ்' ஆயினும்
ஓசையும் ஒன்றே
உள்ளமும் ஒன்றே
-------------------------------------நாகேந்திர பாரதி


திங்கள், 6 ஜூன், 2011

அருவாயிப் போயிரிச்சு

அருவாயிப் போயிரிச்சு

-----------------------------------
பல்லாங்குழி ஆட்டத்தில்
பசுவை அள்ளியதும்
தாயக் கட்டத்தில்
காயைக் குத்தியதும்
பரமபத் ஏணியில்
பாய்ந்து ஏறியதும்
கேரம் போர்டில்
சிகப்பைத் தள்ளியதும்
அப்பத்தா வோட
அருவாயிப் போயிரிச்சு
-------------------------------------------நாகேந்திர பாரதி

வல்லரசு நல்லரசு

வல்லரசு நல்லரசு

-------------------------------
குமரி முதல் இமயம் வரை
எத்தனை நிலங்கள்
வைகை முதல் கங்கை வரை
எத்தனை நதிகள்
தமிழ் முதல் இந்தி வரை
எத்தனை மொழிகள்
இந்து முதல் முஸ்லிம் வரை
எத்தனை மதங்கள்
நிலமும் நதியும்
மொழியும் மதமும்
ஒருமைப்பட்டால் இந்தியா 
வல்லரசு நல்லரசு
---------------------------------------நாகேந்திர பாரதி

ஞாயிறு, 5 ஜூன், 2011

காதல் தொல்லை

காதல் தொல்லை
----------------------------
பார்த்தால் போதுமென்ற
பரிதவிப்பு இருக்கும்

பார்த்த பின்பு
பேசினால் போதுமென்ற
பேதலிப்பு இருக்கும்

பேசிய பின்பு
தொட்டால் போதுமென்ற
துடிப்பு இருக்கும்

தொடரும் எல்லை
காதல் தொல்லை

-------------------------------------நாகேந்திர பாரதி

சனி, 4 ஜூன், 2011

காத்திருந்த காலம்

காத்திருந்த காலம்
---------------------------------
ஊராட்சி வானொலியில்
ஒலிச்சித்திரம்   கேட்பதற்கு
ஊரே திரண்டிருக்கும்
அடுத்த ஊர் டாக்கீஸில்
ஆறு மணிக் காட்சிக்கு
அல்லோல கல்லோலம்
வீடெல்லாம்  டி  வி யாச்சு
சினிமாக்கள் சி டி யாச்சு
காத்திருந்து அனுபவிச்ச
சந்தோஷம் கழிஞ்சாச்சு
------------------------------------------------நாகேந்திர பாரதி




வெள்ளி, 3 ஜூன், 2011

தண்ணீர் வரிசை

தண்ணீர் வரிசை

-----------------------------
குற்றாலம் அருவியிலும்
திற்பரப்பு அருவியிலும்
வரிசையில் நின்று
குளித்து வந்தோம்
கொட்டுற தண்ணியில்

ஊருக்கு வந்ததும் 
ஆளுக்கொரு    குடத்தோடு
வரிசையில் நின்று
பிடித்து  வந்தோம்
குழாய்த்  தண்ணீரை 
--------------------------------------நாகேந்திர  பாரதி 


எப் எம் அலறல்கள்

எப் எம் அலறல்கள்
-----------------------------
எப் எம் சேனலில் 
ஏராள விளம்பரங்கள்
கொடைக்கானல் ஊட்டிக்கு
பிரயாண சலுகையாம்
ஏ சி யூனிட்டுகள்
தள்ளுபடி விலையிலாம்
கோடைக்கு ஏற்ற 
குளிரான அலறல்கள்
குடிசைக்குள் இருந்து
குழந்தையும் அலறும்
------------------------------------ நாகேந்திர பாரதி




காதல் செலவு

காதல் செலவு
--------------------------------
பீச்சு செலவு
என்னோட செலவு
சினிமா செலவு
உன்னோட செலவு
பார்க் செலவு
என்னோட செலவு
பார்ட்டி செலவு
உன்னோட செலவு
என்னோட கல்யாணத்துக்கு
உன்னோட பரிசு செலவு
உன்னோட கல்யாணத்துக்கு
என்னோட பரிசு செலவு
காலம் மாறிப் போச்சு
காதல் செலவாய் ஆச்சு
----------------------------------------நாகேந்திர பாரதி



வியாழன், 2 ஜூன், 2011

அம்மாவும் அப்பாவும்

அம்மாவும்  அப்பாவும்  
--------------------------------------------
அம்மா  வாழ்வது
பெண்ணுக்கும் பிள்ளைக்கும்
அப்பா போனபின்பும்
அம்மாவுக்கு   வாழ்வுண்டு
அப்பா  வாழ்வது
உறவுக்கும்  நட்புக்கும்
அம்மா  போனபின்பு
அப்பாவுக்கு  வாழ்வில்லை
அம்மாவே அப்பாவுக்கு
அப்பாவும் அம்மாவுக்கு
---------------------------------------------------நாகேந்திர பாரதி





புதன், 1 ஜூன், 2011

மதராஸ் மழை

மதராஸ் மழை
--------------------------
புருபுரு வென்ற
இடிச் சத்தத்தோடு
பொலுபொலு வென்று
கொட்டும் மழை
மதராசில் மழையென்றால்
மரங்களுக்கும் ஆச்சரியம்
இலைகளையும் பூக்களையும்
விரித்து வைத்துக் கொண்டு
ஒரு சொட்டு விடாமல்
உறிஞ்சிக் குடிக்கின்றன
-----------------------------------------நாகேந்திர பாரதி



மூக்குச்சளி முந்தானை

மூக்குச்சளி முந்தானை
--------------------------------------
கருவ மரமும்
புளிய மரமும்
காத்தவ  ராயனும்
காமாட்சி அம்மனும்
ஊருணித்  தண்ணியும்
உடைஞ்ச பானையும்
கொண்டு போகும்
குழந்தைப் பிராயத்து
மூக்குச்சளி துடைத்த
முந்தானை அப்பத்தாவிடம்
-------------------------------------நாகேந்திர பாரதி



சொன்னதும் சொல்லாததும்

சொன்னதும் சொல்லாததும்
-------------------------------------------
சொன்ன சொல்லைச்
சொல்லச் சொல்லி
சொன்ன பேச்சைக்
கேக்கச் சொல்லி
சொன்ன வேலை
பாக்கச் சொல்லி
சொன்ன பெண்ணை
மணக்கச் சொல்லி
சொன்ன முதியோர் விடுதிக்கு
சொல்லாமல்  போய்ச் சேர்ந்தார்
----------------------------------------நாகேந்திர பாரதி



செவ்வாய், 31 மே, 2011

புத்தக வாசம்

புத்தக வாசம்

-----------------------
புத்தம்புதுப் புத்தகங்களைப்
புரட்டும்போது ஒரு வாசம்
படிக்கும்போது ஒரு வாசம்
'சிவகாமியின் சபதத்தில்'
நாகநந்தி வரும்போது
விஷம் கலந்த வாசம்
'மிதிலா விலாசில்'
தேவகி வரும்போது
மாக்கோல வாசம்
'குறிஞ்சி மலரில்'
பூரணி வரும்போது
மல்லிகை வாசம்
'இதய வீணையில்'
சுந்தரம்  வரும்போது
சிகரெட் வாசம்
இப்போது   வருகிறது
காஞ்சு போயும்
தீஞ்சு போயும்
எப்போதாவது வருகிறது
நெய்யாய், மலராய்
----------------------------------------------நாகேந்திர பாரதி









தினம் புகையிலை தினம்

தினம் புகையிலை தினம்
-------------------------------------
மொட்டக் கோபுர
தட்ட ஓட்டில் பீடி
கல்லூரி விடுதி
காம்பவுண்டில் சிகரெட்
லண்டன் ஹோட்டல்
கான்பரன்ஸில் சுருட்டு
நேற்றைக்கு நெஞ்செரிச்சல்
இன்றைக்கு மயக்கம்
நாளைக்கு ஆபரேஷன்
நல்லதே நடக்கணும்
------------------------------------நாகேந்திர பாரதி


திங்கள், 30 மே, 2011

வானம் பார்த்த பூமி

வானம் பார்த்த பூமி
----------------------------------
வெதச்ச நெல்லு முளைக்கணும்
முளைச்ச நெல்லு பரியணும்
பரிஞ்ச நெல்லு பழுக்கணும்
பழுத்துக்   காஞ்சு  அறுக்கணும்
அறுத்துத்  தூத்தி
அடிச்சுப் பரப்பி
அரிசி ஆக்க
அன்னை வானம்
கொட்டுறப்போ கொட்டணும்
நிக்கறப்போ நிக்கணும்
----------------------------------------------நாகேந்திர பாரதி





விக்கிலீக்ஸ் ரகசியம்

விக்கிலீக்ஸ் ரகசியம்

-----------------------------------
" என் மாமியார் எமகாதகி"
சொன்னவள் ரோஜா (மருமகள்)
(111111: ரகசியம்)
" என் மருமகள் ராட்சசி"
சொன்னவர் அலமேலு (மாமியார்)
(222222: ரகசியம்)
" காலேஜுக்கு இல்லை, சினிமாவுக்கு போறேன்"
சொன்னவன் ரகு (மகன்)
(333333: ரகசியம் )
"பீச்சுக்கு இல்லை, டாஸ்மாக் போறேன்"
சொன்னவர் சோமு (அப்பா)
(444444: ரகசியம்)
வீக்லியில் வெளிவந்த
விக்கிலீக்ஸ் கேபிள்
----------------------------------------------------------நாகேந்திர பாரதி





ஞாயிறு, 29 மே, 2011

காதற் சுமை

காதற்  சுமை
--------------------- 
காதல் என்பது
அழுக்கு மூட்டையாம்
காதலிப் பவர்கள்
கழுதைக்   கூட்டமாம்
சொன்னவனும் ஒருநாள்
சுமக்க ஆரம்பித்தான்
வெயிலோ மழையோ
வேர்வையோ தண்ணீரோ
ஏற்றிக் கொண்டு
ஏங்கித் திரிகிறான்
---------------------------------நாகேந்திர பாரதி




மதுரைப் பிரியாணி

மதுரைப் பிரியாணி
----------------------------------
சின்னச் சின்னத் துண்டா
சிக்கிக்கிட்டுக் கிடந்தா
அம்சவல்லி பிரியாணி
மொக்க மொக்கத் துண்டா
முட்டிக்கிட்டுக் கிடந்தா
முனியாண்டி பிரியாணி
அரிசி ருசியும்
அரைச்ச ருசியும்
கலந்து மணக்கிற
மதுரை மண் வாசம்
----------------------------------------நாகேந்திர பாரதி

சனி, 28 மே, 2011

சினிமா கேள்விகள்

சினிமா கேள்விகள்
--------------------------------
அழும்போது எம் ஜி ஆர் ஏன்
முகத்தை மூடிக் கொள்கிறார்
சிரிக்கும்போது சிவாஜி ஏன்
கண்களை உருட்டித் தள்ளுகிறார்
பேசும்போது கமல் ஏன்
வார்த்தையைக் கடித்துத் துப்புகிறார்
அடிக்கும்போது ரஜினி ஏன்
வாயைத் திறந்து கொள்கிறார்
அத்தனை கேள்விக்கும் ஒரே பதில்
அவரவர் ஸ்டைல் அப்பூடி
-----------------------------------------நாகேந்திர பாரதி


வெள்ளி, 27 மே, 2011

படம் பார்க்கும் படலம்

படம் பார்க்கும் படலம்
------------------------------------
கியூவிலே நின்னு
டிக்கெட் எடுத்தாலும்
நெட்டிலே க்ளிக்கி
பிரிண்ட் எடுத்தாலும்
பாத்தவன் சொன்னதைக்
கேட்டுப் போனாலும்
பத்திரிகை எழுதினதைப்
படிச்சுப் போனாலும்
பாக்கற படமெல்லாம்
பாடாவதி படம்
பாக்காத படமெல்லாம்
பர்ஸ்ட் கிளாஸ் படம்
----------------------------------நாகேந்திர பாரதி

வியாழன், 26 மே, 2011

சாலை விபத்து

சாலை விபத்து
-------------------------
சாலை விபத்துக்கள்
ஜாஸ்தியாய்ப் போச்சு
உள்ளூர் ரோட்டிலே
உரசிட்டுப் போறாங்க
ஹைவே போனாலும்
கடாசிட்டுப் போறாங்க
கார் வாங்காத
காரணம் இதுதான்
காசு இல்லாத
காரணம் வேற
-----------------------நாகேந்திர பாரதி


புதன், 25 மே, 2011

சக்கரை உபதேசம்

சக்கரை உபதேசம்
----------------------------
வேப்பம்பூ மெல்லணுமாம்   
வெந்தயத்தை முழுங்கணுமாம்  
நாவப் பழக் கொட்டையாம்
பாவக் காய் நல்லதாம் 
அரிசியே  கூடாதாம்
அவ்வளவும்  சக்கரையாம்
சரமாரி உபதேசம்
சகட்டுக்கும் விடுவாங்க
சக்கரை வியாதி வந்தா
தெரியும் சேதி அப்போ
-----------------------------------------நாகேந்திர பாரதி

  

சத்திரத் திண்ணை

சத்திரத் திண்ணை
-----------------------------
இடுப்புக்குடம் இறக்கிவைத்து
இளைப்பாறும் இடம்
வாலிபர்கள் கூட்டம்
வம்பிழுக்கும் இடம்
காலாட்டிக் கொண்டு
கதை பேசும் இடம்
நீட்டிப் படுக்கின்ற
நிம்மதியின்    இடம்
சாமிக்கென நேர்ந்து விட்ட
சத்திரத்து இடம்
--------------------------------நாகேந்திர பாரதி


செவ்வாய், 24 மே, 2011

நாலு கரைக் கண்மாய்

நாலு கரைக் கண்மாய்
-------------------------------------
ஒரு துறைப்   பக்கம்
கால் கழுவ
ஒரு துறைப் பக்கம்
குடம் நிரப்ப
ஒரு துறைப் பக்கம்
பெண்கள் குளிக்க
ஒரு துறைப் பக்கம்
ஆண்கள் குளிக்க
நாலு கரைத் துறை
நல்ல கண்மாய்
-----------------------------------நாகேந்திர பாரதி

திங்கள், 23 மே, 2011

மலரும் மரக்கிளையும்

மலரும் மரக்கிளையும்
---------------------------------------
கருவ மரத் தேன்
அது ஒரு ருசி
வேப்ப மரத் தேன்
வேறு ஒரு ருசி
முருங்கை மரத் தேன்
மூணாவது ருசி
மாறும் ருசி
மலராலா   மரத்தாலா
மாறும் மனிதர்
வீட்டாலா நாட்டாலா
---------------------------------------------நாகேந்திர பாரதி

சினிமா ஜோடிகள்

சினிமா  ஜோடிகள்
------------------------------
பாகவதர், கிட்டப்பா
எம் ஜி ஆர், சிவாஜி
ஜெய்சங்கர், ரவிச்சந்திரன்
முத்துராமன், சிவகுமார்
ரஜினி, கமல்
விஜயகாந்த், சத்யராஜ்
பிரபு, கார்த்திக்
அஜித், விஜய்
சூர்யா, விக்ரம்
ஆர்யா, விஷால்
தனுஷ், சிம்பு
ஜீவா, பரத்  என்று
ரசிகர்கள் சேர்க்கும்
சினிமா ஜோடிகள்
-------------------------------நாகேந்திர பாரதி




ஞாயிறு, 22 மே, 2011

மீசை மேல் ஆசை

மீசை மேல் ஆசை
-------------------------------
அரும்பு மீசை
அய்யனார் மீசை
தாடி மீசை
தனியா மீசை
கருத்த மீசை
நரைத்த மீசை
இருபது வயசிலே
வைக்க ஆசை
அறுபது வயசிலே
எடுக்க ஆசை
-----------------------------நாகேந்திர பாரதி


வெள்ளி, 20 மே, 2011

மறைந்திருக்கும் சுவர்

மறைந்திருக்கும் சுவர்
---------------------------------------
சுவர் இருந்தால்தான்
சித்திரம் வரையலாமாம்
காகிதத்தில் கூட
கண்றாவியாய் வரையலாமே
கண்ணாடி, காற்றாடி
காலண்டர், போஸ்டர்
சுவிட்சு, லைட்டு
புகைப்படம் புண்ணாக்கென்று
மானாவாரி குப்பைக்குள்
மறைந்திருக்கும் சுவர்
--------------------------------------------------நாகேந்திர பாரதி


வியாழன், 19 மே, 2011

பெரிசுகளும் சிறுசுகளும்

பெரிசுகளும் சிறுசுகளும்
---------------------------------------
இந்தக் காலப் பெருசுகளும்
அந்தக் காலச் சிறுசுகள்தான்
அப்பா அம்மாக்களும்
தாத்தா பாட்டிகளும்
ஊட்டி வளர்த்த
ஒண்ணரைச்    சாண்கள்தான்
கூட்டிக் கழித்த
கால ஓட்டம்
கொண்டு போய்விட்ட
குட்டிக் குழந்தைகள் தான்
------------------------------------நாகேந்திர பாரதி



சோம்பல் புரணி

சோம்பல் புரணி
--------------------------
நாதசுர ஓசையும்
மேளச் சத்தமும்
கோயில் மணியும்
குருக்கள் மந்திரமும்
கூடிக் கலந்த
குரலில் இறைவன்
கூப்பிட்டுப் பார்த்தும்
குறையவே குறையாது
சுற்றுப் பிரகார
சோம்பல் புரணி
------------------------------நாகேந்திர பாரதி

புதன், 18 மே, 2011

அரைக் கழுதை வயசு

அரைக் கழுதை வயசு
---------------------------------
முழுக் கழுதை வயசே
முப்பது தானாம்
அம்பது வயசு எப்படி
அரைக் கழுதை வயசாகும்
அலைச்சல், கழுதைக்கு
ஆகு பெயர் ஆயிருச்சா
அம்பதுக்கு மேலே
அலைச்சல் குறையணுமா
உதைக்கிற காலுக்கு
ஓய்வு கொடுக்கணுமா
------------------------------------நாகேந்திர பாரதி


சிக்காத மீன்கள்

சிக்காத மீன்கள்
------------------------
தூண்டிலில்   புழு வைத்து
சுண்டி இழுத்தாலும்
வேட்டியை விரித்து வைத்து
வீசி இழுத்தாலும்
முதுகிலே பை மாட்டி
முங்கி எழுந்தாலும்
படகிலே ஏறிப் போய்
வலையை விரித்தாலும்
சிக்குறது தான் சிக்கும்
சிக்காதது சிரிக்கும்
-------------------------------நாகேந்திர பாரதி




செவ்வாய், 17 மே, 2011

தேடும் உண்மை

தேடும் உண்மை
------------------------------
கனவில் கண்ட
காட்சிகள் எத்தனை
நனவில் கண்ட
நடப்புகள் எத்தனை
உணவும் காற்றும்
வளர்த்த உடலும்
உணர்வும் நினைவும்
வளர்த்த உயிரும்
ஒன்றாய்ச் சேர்ந்து
உண்மை தேடும்
---------------------------------------நாகேந்திர பாரதி

அன்பின் சுருதி

அன்பின் சுருதி
-------------------------
கணவனுக்கு மனைவியும்
மனைவிக்கு கணவனும்
உரிமை இணைப்பு
தாய்க்கு மகனும்
மகனுக்கு தாயும்
கடமை இணைப்பு
உறவுக்கு நட்பும்
நட்புக்கு உறவும்
உதவி இணைப்பு
இணைப்பின் உறுதி
அன்பின் சுருதி
---------------------------------நாகேந்திர பாரதி

சகவாச தோஷம்

சகவாச தோஷம்
---------------------------------
இட்டிலியும் தோசையும்
பீஸ்ஸா, நூடில்ஸ் ஆச்சு
காபி டீயும்
பீரும் ஒயினும் ஆச்சு
மோரும் இளநியும்
கோக், பெப்சி ஆச்சு
வாழையிலை சாப்பாடு
பஃபே    பிளேட்டு ஆச்சு
சகவாச தோஷத்தில்
சாப்பாடும் மாறியாச்சு
------------------------------------------நாகேந்திர பாரதி


திங்கள், 16 மே, 2011

அஞ்சு வருஷ ஆட்சி

அஞ்சு வருஷ ஆட்சி
----------------------------------
காடு மேடெல்லாம்
அலையிறவன் தான்
கண்ட தண்ணியெல்லாம்
குடிக்கிறவன் தான்
நாட்டு நடப்பு
அறிஞ்சவன் தான்
நல்லது கேட்டது
புரிஞ்சவன் தான்
அஞ்சு வருஷ ஆட்சி
அமைக்கிறவன்   தான்
-----------------------------------------நாகேந்திர பாரதி




ஞாயிறு, 15 மே, 2011

தமிழுக்கு வெற்றி

தமிழுக்கு வெற்றி
--------------------------
அரசியலில் தோற்றாலும்
தமிழுக்கு வெற்றி
குடும்பத்தை விட்டு விட்டு
குறளுக்கு வரட்டும்
பராசக்தி தமிழும்
மனோகரா தமிழும்
பட்டிமன்ற தமிழும்
கவியரங்க தமிழும்
மீண்டும் வரட்டும்
மீண்டு வரட்டும்
-------------------------------------------நாகேந்திர பாரதி


கிராம அத்தியாயம்

கிராம அத்தியாயம்
------------------------------
கருவக் காட்டிலே
காத்தாட இருந்திட்டு
கம்மாத்   தண்ணியிலே
கழுவிக்   குளிச்சுட்டு
குத்தாலத் துண்டைக்
கும்மித் துவட்டிட்டு
குளுந்த பழையதை
குடிச்சுப் போட்டுட்டு
வயக்   காட்டுலே
வளைஞ்சு ஒழச்சிட்டு
மிச்சப் பழையதும்
மிளகாயும் கடிச்சுட்டு
வெயிலும் வேலையும்
வேர்வை ஆக்கிட்டு
களப்புப் போக
குளிச்சு முடிச்சுட்டு
மனைவி மக்களை
கொஞ்சிக் கிடந்திட்டு
மீனும் சோறும்
மென்னு தின்னுட்டு
படுத்துப் புரண்டா
பட்டுன்னு தூக்கம்
-------------------------------------நாகேந்திர பாரதி

சனி, 14 மே, 2011

தங்கிலீஷ் ஆனா தமிழ்

தங்கிலீஷ் ஆன  தமிழ்
----------------------------------
கல்லுச் சிலேட்டு
பிளாஸ்டிக் சிலேட்டு ஆகி
கோடு போட்ட நோட்டு
அன்ரூல்டு நோட்டு ஆகி
இங்க்கு    பேனா 
பால் பாயிண்ட் பேனா ஆகி 
உபகரணம் எல்லாம்
உருமாறியது  போல
தமிழும் மாறி
தங்கிலீஷ் ஆனது
------------------------------------நாகேந்திர பாரதி



வியாழன், 12 மே, 2011

நில வரம்

நில வரம்
------------------
தவழும் போது
பார்வையில் நிலம்
நடக்கும் போது
பக்கத்தில் நிலம்
வளரும் போது
வானத்தில் நிலம்
தளரும் போது
தாங்கிடும் நிலம்
முடியும் போது
மூடிடும் நிலம்
-----------------------------நாகேந்திர பாரதி


இளமைப் பருவம்

இளமைப் பருவம்
----------------------------
கள்ளூறும் இளமையின்
கல்லூரிப் பருவம்
உள்ளூறும் காதலை
உணர்கின்ற பருவம்
வில்லூறும் புருவத்தில்  
வேலூறும் விழிகளைச்  
சொல்லூறும்   கவிதையிலே
சுமக்கின்ற பருவம்
பொல்லாத பருவம்
போகின்ற   பருவம்  
-----------------------------------------நாகேந்திர பாரதி




நைட்டிங்கேல் பரம்பரை

நைட்டிங்கேல்   பரம்பரை
-----------------------------------
பிள்ளைகட்கு   மலம் நீரை
பிரியமாய் எடுத்திடுவார்
பெருசுகட்கு எச்சிலையும்
காய்வதற்கு விட்டிடுவார்
வீட்டுக்குள் நடக்கின்ற
வேதனையின் காட்சி இது
சொந்தமில்லை பந்தமில்லை
சம்பளமும் பத்தவில்லை
நைட்டிங்கேல்   வழி வந்த
நர்சுகளின் பரம்பரையோ
பிணிக்கு மருந்தாவார்
பணிக்கு அணியாவார்
-----------------------------------------நாகேந்திர பாரதி

புதன், 11 மே, 2011

மக்கள் எவ்வழி

மக்கள் எவ்வழி
-------------------------
தக்ளியில்   பஞ்சு வைத்து 
தடித் தடியாய் நூல் இழுத்தோம்
கால் பந்தும் கபடியும்
கண்மாயில் ஆடி வந்தோம்
ஊர் கூடி திருவிழாவில்
ஒற்றுமையாய் தேரிழுத்தோம்
காலமது கலைஞ்சாச்சு
கத்தியும் காசும் ஆச்சு
மக்களுக்கு ஏத்த படி
மன்னர்களும் மாறியாச்சு
-----------------------------------------நாகேந்திர பாரதி



தேர்தல் முடிவு

தேர்தல் முடிவு
----------------------------
கலருப்   பெட்டியில் ஓட்டுப் போட்ட
காலம் போயாச்சு
அச்சுக் குத்தி மடிச்சுப் போட்ட
நாளும்  போயாச்சு
பட்டன் அமுக்கி சத்தம் கேட்ட
காலம் வந்தாச்சு
பாது காப்பு படையும் பலமும்
கூட வந்தாச்சு
வாரக் கணக்கு முடிவு மட்டும்
மாசக் கணக்காச்சு
---------------------------------------நாகேந்திர பாரதி





செவ்வாய், 10 மே, 2011

நிற பேதம்

நிற பேதம்
--------------------
பச்சை நிறத்தில்
விவசாயி வர்க்கம்
நீல நிறத்தில்
தொழிலாளி வர்க்கம்
வெள்ளை நிறத்தில்
முதலாளி வர்க்கம்
சிவப்பு நிறத்தில்
புரட்சி வர்க்கம்
கருப்பு நிறத்தில்
கண்ணீர் வர்க்கம்
------------------------------நாகேந்திர பாரதி

வெள்ளி, 6 மே, 2011

அக்கம் பக்கம்

அக்கம் பக்கம்
------------------------
அட்சய திரிதியைக்கு
அட்டிகை ஒரு பக்கம்
ஈயம் பித்தளைக்கு
பேரீச்சை மறு பக்கம்
எலெக்ட்ரிக் குக்கரில்
சோறு  ஒரு பக்கம்
மண்ணுச் சட்டியில்
களி மறு பக்கம்
பக்கம் பக்கமாய்
அக்கம் பக்கம்
--------------------------------நாகேந்திர பாரதி




வியாழன், 5 மே, 2011

இல்லாமல் இல்லை

இல்லாமல்   இல்லை
-----------------------------------
கண்ணீர் இல்லாமல்
காதல் இல்லை
காதல் இல்லாமல்
இளமை இல்லை
இளமை இல்லாமல்
வாழ்க்கை இல்லை
வாழ்க்கை இல்லாமல்
வளர்ச்சி இல்லை
வளர்ச்சி இல்லாமல்
வையம் இல்லை
--------------------------------------நாகேந்திர பாரதி





சேதி சொல்லும் செங்கல்

சேதி சொல்லும் செங்கல்
-------------------------------------
செங்கல்லும் மண்ணும்
சிமெண்டும்   கம்பியும்தான்
சேர்த்து வைத்திருக்கும்
சேதிகள் ஏராளம்
பாப்பாக்கள் பிறப்பு
பாட்டிகள் இறப்பு
அழுகை சிரிப்பு
அச்சம் வெறுப்பு
சுவருக்கும் காதுண்டு
சேமிக்க செங்கல்லுண்டு
-------------------------------------------நாகேந்திர பாரதி

புதன், 4 மே, 2011

நடுவிலே நாம்

நடுவிலே நாம்
--------------------------
எல்லாமே சுயநலம்தான்
இல்லாவிட்டால் இருள் நிலம்தான்
வாழ்க்கையின் நோக்கத்தை
பார்த்தும் பார்க்காமலும்
செய்தும் செய்யாமலும்
தெரிந்தும் தெரியாமலும்
நானும் நீயும் தான்
அவளும் அவனும் தான்
நடுவினில் நாம் நலம்
நாற்புறம் பிறர் நிலம்
-------------------------------நாகேந்திர பாரதி

இயற்கையின் ரகசியம்

இயற்கையின் ரகசியம்
-------------------------------------
மலையின் ரகசியம்
நதிக்குத் தெரியும்
நதியின் ரகசியம்
மண்ணுக்குத் தெரியும்
மண்ணின் ரகசியம்
விதைக்குத் தெரியும்
விதையின் ரகசியம்
விண்ணுக்குத் தெரியும்
விண்ணின் ரகசியம்
உள்ளுக்குள் தெரியும்
-----------------------------------நாகேந்திர பாரதி


வியாழன், 28 ஏப்ரல், 2011

தாத்தாப் பாட்டு

தாத்தாப் பாட்டு
----------------------------
பாப்பாக் களுக்காகப்
படைக்கப் பட்டவர்கள்
தூக்கி வைத்து
தொட்டில் ஆனவர்கள்
தூங்க வைத்து
கட்டில் ஆனவர்கள்
மறந்து போய் விட்ட
மழலை வாழ்க்கையை
பேரன் பேத்தியின்  
பிறப்பில் பார்ப்பவர்கள்  
---------------------------------நாகேந்திர பாரதி

புதன், 27 ஏப்ரல், 2011

காதல் மனைவி

காதல் மனைவி
---------------------------
பூத்திருந்த போதெல்லாம்
புன்னகையை   வரவு வைத்தாள்
காத்திருந்த போதெல்லாம்
கண்ணீரைச்   செலவு வைத்தாள்
ஆர்த்திருந்த இளமையிலே
அச்சத்தை மூடி  வைத்தாள்
பார்த்திருந்த கண்களிலே
பண்பாட்டைப்    பாடி  வைத்தாள்
நேற்றிருந்த  காதலி
இன்றைக்கு மனைவி ஆவாள்
---------------------------------------நாகேந்திர பாரதி




அக்கினி நட்சத்திரம்

அக்கினி நட்சத்திரம் 
---------------------------------
வேர்வையைப் பெருக்கி
வெளியேத்தி வைக்கும்
பார்வையைச் சுருக்கி
பஞ்சடைக்க   வைக்கும்
மோரும் தண்ணியும்
மொண்டு குடிச்சாலும்
ஆறும் கடலும்
அமுங்கிக் குளிச்சாலும்
அதுவாத்தான்  போகணும்
அக்கினி நட்சத்திரம்
------------------------------------------நாகேந்திர பாரதி


பெருசுகள் பலவிதம்

பெருசுகள் பலவிதம்
-----------------------------------
கம்பை அழுத்தி ஊன்டி
கம்மாக் கரையிலே ஒரு பெருசு
விபூதியை அப்பிப் பூசி
வெளுத்த நெத்தியா   ஒரு பெருசு
அருவா மனையிலே மீனை
அழுத்தித் தேக்கிற ஒரு பெருசு
சுண்ணாம்பு வெத்திலை பாக்கை
சொதப்பித் துப்புற ஒரு பெருசு
வேட்டி துண்டோட
சேலை முந்தானையோட
பழைய பெருசுகள் போயாச்சு
பேன்ட் சட்டையோட
சுடிதார் முடிச்சோட
புதிய பெருசுகள் வந்தாச்சு
--------------------------------------நாகேந்திர பாரதி


செவ்வாய், 26 ஏப்ரல், 2011

ஓலை விசிறிகள்

ஓலை விசிறிகள்
--------------------------
பச்சை ஓலையிலே
பனைமட்டை விசிறி
கலர்க்   கலராய்க்  
கட்டி வச்ச விசிறி
காஞ்ச ஓலையிலே
தென்னை மட்டை விசிறி
பிஞ்சு விழுந்தா
பிரம்பாகும் விசிறி
கரண்ட்   போனாலும்
காத்து தரும் விசிறிகள் 
----------------------------நாகேந்திர பாரதி


திங்கள், 25 ஏப்ரல், 2011

கூட்டமோ கூட்டம்

கூட்டமோ கூட்டம்
-----------------------------
அண்ணா ஹசாரேக்கும்
கூட்டம் கூடுது
அடிதடி செய்யவும்
கூட்டம் கூடுது
சாமி பாக்கவும்
கூட்டம் கூடுது
சாராயக் கடையிலும்
கூட்டம் கூடுது
அட்சய திரிதிக்கும்
கூட்டம் கூடுது
ஓட்டுக் காசுக்கும்
கூட்டம் கூடுது
கூடிக் கலையும்
கூட்டமா இல்லை
தலைவன் இல்லாமல்  
அலையும்  கூட்டமா
-------------------------------நாகேந்திர பாரதி


ஞாயிறு, 24 ஏப்ரல், 2011

மின் சோரம் போனது

மின் சோரம் போனது
-----------------------------------
மரச் சட்டங்களும்
மகா சுவிட்சுகளும்
சிமெண்டுக்   கம்பங்களுமாய்   
சேர்ந்த மின்சாரம்
மெலிந்த சுவிட்சுகளும்
ஒளிந்த கம்பிகளுமாய்
பரிணாம வளர்ச்சியில்
பக்குவம் ஆனபின்
சோரம் போனது
சோகம் ஆனது
---------------------------நாகேந்திர பாரதி

சனி, 23 ஏப்ரல், 2011

பேஷன் ஜீன்ஸ்

பேஷன் ஜீன்ஸ்
-----------------------
கல்லில் அடித்துக்
கசக்கிப் பிழியக்
கிழிந்து போகும்
பழைய வேட்டி
சோப்பைப் போட்டு
அமுக்கித் தேய்க்கச்
சாயம் போகும்
புதிய பேண்ட்டு
சாயம் போய்
கிழிந்தே இருக்கும்
துவைக்கக் கூடாத
பேஷன் ஜீன்ஸ்
-------------------------------நாகேந்திர பாரதி

வியாழன், 21 ஏப்ரல், 2011

விடுமுறை விருப்பம்

விடுமுறை   விருப்பம் -  ( பாக்யா - மே 20-26 /2011)
--------------------------------
கிராமத்து அமைதிக்கு
நகரத்தில் ஆர்வம்
நகரத்து வேகத்தில்
கிராமத்தின் நாட்டம்
விடுமுறை நாளில்
விருப்பப் பயணம்
சொல்லாமல் போனதால்
சொந்தங்கள்   பார்த்தது
கிராமத்து, நகரத்து
வீட்டினில்  பூட்டு
----------------------------------நாகேந்திர பாரதி

புதன், 20 ஏப்ரல், 2011

எங்கிருந்தாலும் வாழ்க

எங்கிருந்தாலும் வாழ்க
-------------------------------------
எங்கிருந்தாலும் வாழ்க
என்று சொல்லி மீள்க
பார்த்ததும் சிரித்ததும்
தொட்டதும் துடித்ததும்
படிப்பை மறந்ததும்
வேலையைத் துறந்ததும்
பகலெல்லாம் அலைந்ததும்
இரவெல்லாம் தொலைந்ததும்
இதயத்தில் மூழ்க
எங்கிருந்தாலும் வாழ்க
-----------------------------------நாகேந்திர பாரதி

அன்றும் இன்றும்

அன்றும் இன்றும்
---------------------------------
'சில்' என்ற குரல்
சுசீலாவுக்கு அன்று
'கிண்' என்ற குரல்
டி  எம் எஸ்  க்கு அன்று
பழைய பாடகர்க்கு
பாராட்டு விழாவில்
பாடச் சொல்லிப்
படுத்து கிறார்கள்
அவர்களும் பாடி
அவஸ்தைப் படுகிறார்கள்
-------------------------------நாகேந்திர பாரதி


செவ்வாய், 19 ஏப்ரல், 2011

மழலை மந்திரம்

மழலை மந்திரம்
---------------------------
இறைவனை மறந்து
இருக்கும் மனிதர்க்கு
இயற்கை காட்டும்
இயக்கம் குழந்தை
மற்றவர்  மறந்து
மயங்கும் மனிதர்க்கு
மன்பதை   காட்டும்
மந்திரம் மழலை
மழலையில் மயங்குவோம்
மதலையைப் போற்றுவோம்
---------------------------------------நாகேந்திர பாரதி