வெள்ளி, 31 டிசம்பர், 2010

காதலுக்கு பலியானால்..

காதலுக்கு பலியானால்..   (தினத்தந்தி - 20/02/2011)
-------------------------------------------
சுண்டு விரல் பட்டாலே
சுகம் ஒன்று உண்டாகும்
மந்திரத்தில் கட்டுண்டு
மனம் ஒன்று திண்டாடும்
பார்த்தாலும் சிரித்தாலும்
பைத்தியமாய் ஆகி விடும்
பகலுக்கும் இரவுக்கும்
வித்தியாசம் தெரியாது
பாவம் தான் காதலுக்கு
பலியானால் இப்படித்தான்
----------------------------------------------------------நாகேந்திர பாரதி

சுனாமிச் சுழல்

சுனாமிச்   சுழல்
-------------------------
காலை நேரம்
கடலின் ஓரம்
எங்கும் இரைச்சல்
எவரும் ஓட்டம்
திரும்பு வதற்குள்
திணறும் மூச்சு
குளிரும் நீரும்
தலையைக் குடையும்
இழுத்துச் செல்லும்
இருட்டுக் குகைக்குள்
-----------------------------------நாகேந்திர பாரதி

வியாழன், 30 டிசம்பர், 2010

காதல் வளர்ச்சி

காதல் வளர்ச்சி
------------------------------
பொன்னியின் செல்வனையும்
மிதிலா விலாசையும்
படித்து வளர்ந்த
பழைய காதல்
எம்ஜியார் சினிமாவையும்
ஜெமினி சினிமாவையும்
பார்த்து வளர்ந்த
அடுத்த காதல்
இன்டெர் நெட்டையும்
டிவி சீரியலையும்
மேய்ந்து வளரும்
இன்றைய காதல்
----------------------------------------நாகேந்திர பாரதி

புதன், 29 டிசம்பர், 2010

வாசமும் வேஷமும்

வாசமும்  வேஷமும்
--------------------------------------
தாங்கத்தான் செய்றாங்க
பேரனும் பேத்தியும்
காய்கறி   வாங்கியார
கடைக்குப் போறேன்
குழந்தையைக் கூட்டியார
ஸ்கூலுக்குப்       போறேன்
வெளியே போனாக்க
வீட்டுக்குக் காவல்
விழுந்தேன்னா தெரியும்
வாசமும்   வேஷமும்
---------------------------------------------------நாகேந்திர பாரதி

செவ்வாய், 28 டிசம்பர், 2010

சிரிப்பை விற்றவன்

சிரிப்பை விற்றவன்
------------------------------------
வேர்க் கடலையோடு சேர்த்து
சிரிப்பையும் விற்பவன்
கால் மணி நேரம்
கலகலப் பாக்கி விட்டு
ஓடும் வண்டியில் இருந்து
குதித்து ஓடுவான்
ஒரு வாரமாகக்
காண முடியவில்லை
மறுபடியும் வந்தான்
வேர்க் கடலை மட்டும் விற்க
---------------------------------------------------நாகேந்திர பாரதி

திங்கள், 27 டிசம்பர், 2010

பரட்டைக் கிழவி

பரட்டைக் கிழவி
---------------------------
கஞ்சிக்   கலயம்
தலையில் சுமந்து
பச்சப் புள்ள
இடுப்பில் சுமந்து
களை எடுக்கவும்
கதிர் அறுக்கவும்
கருக்கலில் கிளம்பி
கருத்தபின் திரும்பி
காலம் கழிந்து
கயித்துக் கட்டிலில்
படுத்துக் கிடக்கும்
பரட்டைக் கிழவி
பாக்காமப் போகும்
படிச்ச புள்ள
-----------------------------------------------------நாகேந்திர பாரதி

ஞாயிறு, 26 டிசம்பர், 2010

ஒத்தையடிப் பாதை

ஒத்தையடிப் பாதை
--------------------------------------
பனை மரங்களைப் பார்த்தபடி
அய்யனாரைக் கும்பிட்டபடி
ஓணான்களை விரட்டியபடி
வாய்க்கால்களைத் தாண்டியபடி
மைனாக்களைக் கேட்டபடி
ரெயில்வே ஸ்டேஷனில் இருந்து
ஒத்தையடிப் பாதை வழி
ஒரு மணி நேரத்தில் ஊர்
இப்போதெல்லாம் பஸ்ஸில் ஏறி
கால் மணி நேரத்தில் ஊர்
கனவில் மட்டும் ஒத்தையடிப் பாதை
----------------------------------------------------------------------நாகேந்திர பாரதி

சனி, 25 டிசம்பர், 2010

இரண்டாயிரத்து பதினொன்று

இரண்டாயிரத்து பதினொன்று
------------------------------------------------
ஊழல் இல்லா அரசியல்
உறவு இல்லா துறவு
வன்முறை இல்லா வாலிபம்
வழக்கு இல்லா நீதிமன்றம்
கடமை தவறா அதிகாரம்
கடன் வாங்கா நிர்வாகம்
இடைஞ்சல் இல்லா இயற்கை
என்றும் துணையாய் இறைமை
இத்தனை இன்பம் நன்று
இரண்டாயிரத்து பதினொன்று
------------------------------------------------------நாகேந்திர பாரதி

வெள்ளி, 24 டிசம்பர், 2010

போதைப் பொறி

போதைப் பொறி
---------------------------------
கட்டிங் அடித்து
கண்கள்  கலங்கி
குவார்டர் அடித்து
வாய் குழறி
ஆப் அடித்து
காது ஆப் ஆகி
புல் அடித்து
மூச்சு நின்றது
போதைப்   பொறியில்
மெய் பொய்யானது
-------------------------------------------நாகேந்திர பாரதி

வியாழன், 23 டிசம்பர், 2010

விவசாயி அசதி

விவசாயி அசதி
----------------------------
வாய்க்கால் தண்ணியிலே
காலைக் கழுவிக் கொண்டு
வரப்பு மேட்டிலே
வழுக்காம நடந்து கொண்டு
கூதல் காத்துக்கு
காதைப் பொத்திக் கொண்டு
சாணி மெழுகின
மண்ணுக்   குடிசையிலே
ஓலைப் பாயிலே
உருண்டா தெரியும்
கிராமத்து   வசதி
விவசாயி அசதி
-----------------------------------------------நாகேந்திர பாரதி

காதல் என்பது

காதல் என்பது
--------------------------
ஹார்மோன்கள் செய்வது
யார் சொல்லும் கேட்காது
சொந்த பந்தம் பிடிக்காது
சோறு தண்ணி செல்லாது
பசியும் தூக்கம் பாக்காது
பாடம் எல்லாம் பிடிக்காது
பகல் இரவு தெரியாது
பாதை பாத்து நடக்காது
பட்ட பின்பு தெளிவது
பாதி வயது தொலைப்பது
-----------------------------------------------------நாகேந்திர பாரதி

புதன், 22 டிசம்பர், 2010

புகை வண்டி நிலையம்

புகை வண்டி நிலையம்
-------------------------------------------
பள்ளிக் கூட்டத்திற்கு
சித்திரக்கதை, ஐஸ்க்ரீம்
கல்லூரிக் கூட்டத்திற்கு
காதல் கதை, கூல் டிரிங்
குடும்பக் கூட்டத்திற்கு
வார இதழ், வடைகாபி
வயதான கூட்டத்திற்கு
தினசரியும் மாத்திரையும்
எல்லாப் பருவத்திற்கும்
ஏற்றபடி கொடுத்து விட்டு
எப்போதும் புகைத்தபடி
புகை வண்டி நிலையம்
----------------------------------------------நாகேந்திர பாரதி

 

செவ்வாய், 21 டிசம்பர், 2010

வெங்காயப் பெருங்காயம்

வெங்காயப் பெருங்காயம்
-----------------------------------------------
'என்ன பெரிய வெங்காயம்'
என்ற பெரியார் வெங்காயம்
ஏற்படுத்தும் பெருங்காயம்
அடுப்படியில் வலிக்கிறது
வரும்படியைக் கழிக்கிறது
உரிக்கும்போது மட்டும் அல்ல
உச்சரிக்கும் போது கூட
உச்சத்தில் விலையோடு
கண்ணீரை வரவழைக்கும் 
வெங்காயப் பெருங்காயம்
---------------------------------------------------நாகேந்திர பாரதி

திங்கள், 20 டிசம்பர், 2010

படையெடுப்பு

படையெடுப்பு
--------------------------
வெயில் காலத்தில்
வீட்டை விட்டுப் போனவர்கள்
குளிரிலும் மழையிலும்
கூட்டமாய்    வருவார்கள்
பகலில் ஒளிந்திருந்து
இரவினில் படையெடுப்பு
அடித்தாலும் ரத்தம்
கடித்தாலும் ரத்தம்
கொசுவுக்குக் கொடுத்து விட்டு
கோடைக்குக் காத்திருப்போம்
-----------------------------------------------------நாகேந்திர பாரதி

ஞாயிறு, 19 டிசம்பர், 2010

பழைய சோறு

பழைய சோறு
-----------------------------
காட்டில் கிடைக்கும்
கோவக்காய் வதக்கி
ஊறப் போட்ட
மிளகாயைப் பிதுக்கி
நேத்து வடிச்ச
பழைய சோற்றோடு
சட்டிக் கலயத்தில்
விட்டுக் குடிக்க
பசிக்கு விருந்து
நோய்க்கு மருந்து
________________________________நாகேந்திர பாரதி

சனி, 18 டிசம்பர், 2010

போக்கு வரத்து

போக்கு வரத்து
---------------------------
பொருளாதார நிபுணர்கள்
ஐந்து பேர் மேடையில்
கலந்துரை யாடிட
ஐம்பது பேர் அரங்கில்
சாலைகளின் சீரமைப்பு
போக்குவரத்து பிரச்னை
அலசி ஆராய்ந்திட்டு
அவரவர் கார்களில்
சாலைகளை அடைத்து
போக்குவரத்தைத் தடுத்து
-----------------------------------------------நாகேந்திர பாரதி

சேமிப்புச் சிந்தனை

சேமிப்புச் சிந்தனை
-----------------------------------
செலவைக் குறையுங்கள்
சேமிப்பை வளருங்கள்
ஒரு ரூபாய் சேர்ந்து
ஒரு கோடி ஆகும்
நாட்டுக்கும் வீட்டுக்கும்
நன்மைகள் சேரும்
சேமிப்புச் சிந்தனை
மாநாடு முடிந்தது
மொத்தச் செலவு
பத்தே லட்சம்
---------------------------------------------------நாகேந்திர பாரதி

கோயில் திருவிழா

கோயில் திருவிழா
--------------------------------
சவ்வு மிட்டாய்க் கடிகாரம்
கட்டிக் கொண்டு
பொட்டிக் கடை வளையல்
போட்டுக் கொண்டு
சீனிச்சேவு காராச்சேவு
தின்று கொண்டு
யானை போட்ட சாணியை
மிதித்துக் கொண்டு
ஓடிப்போகும் ஒரே நாளில்
கோயில் திருவிழா
----------------------------------நாகேந்திர பாரதி

வியாழன், 16 டிசம்பர், 2010

அபிநய தேவி

அபிநய தேவி
--------------------------
'இதய வீணை தூங்கும் போது'
எரிச்சல் காட்டும் இதழ்கள்
'காவேரி ஓரம் கதை' க்கு
கலங்கி வாடும் கண்கள்
'காதல் சிறகை காற்றினில் விரிக்கும்'
கருப்பு மேகக் கூந்தல்
'தனிமையிலே இனிமை காண'
முடியாத முக பாவம்
அந்தக் கால அபிநய தேவிக்கு
இந்தக் காலத்திலும் ரசிகர்கள்
---------------------------------------------------------நாகேந்திர பாரதி

இசைஸ்ரீ ஜெயஸ்ரீ

இசைஸ்ரீ  ஜெயஸ்ரீ
--------------------------------
சரிகம பதநி
சரணம் இவரிடம்
ஆரோஹணம் அவரோஹணம்
அடங்கும் இவரிடம்
குரலில் குயில்
குழைவில்  இளமை
எந்த  ஸ்தாயி யிலும்
ஏராள இனிமை   
எம் எஸ் எஸ்ஸின்
பக்தி  வாரிசு
இனி இந்த இசைஸ்ரீ
சென்னை ஜெயஸ்ரீ
------------------------------------------நாகேந்திர பாரதி

அவரவர் நிறம்

அவரவர் நிறம்
-----------------------------
காய்ச்சலா இருந்துச்சு
கருப்பு மாத்திரை சாப்பிட்டேன்
தலை சுத்தா இருந்துச்சு
வெள்ளை மாத்திரை சாப்பிட்டேன்
உடம்பு வலியா இருந்துச்சு
சிவப்பு மாத்திரை சாப்பிட்டேன்
ஒண்ணுமே சரியாகலை
உங்க கிட்டே வந்துட்டேன்
வேறு கலர் தர்றேன்
எடு முதல்லே பீஸை
--------------------------------------------------------நாகேந்திர பாரதி

புதன், 15 டிசம்பர், 2010

மழைக் கோலம்

மழைக் கோலம்
-------------------------
மழைக் காலம் வந்துட்டா
மனுஷர் சமத்து
சகதி அடிக்காத
செருப்பு போட்டுக்குவார்
மடக்கு குடையை
மறக்காம எடுத்துக்குவார்
திரும்பி வருவார்
தொப்பலா , திட்டா
செருப்பு வாரு
அறுந்து போச்சாம்
குடைக் கம்பி
வளைஞ்சி போச்சாம்
--------------------------------------------நாகேந்திர பாரதி

பெரியவர் சாப்பாடு

பெரியவர் சாப்பாடு
------------------------------------
பன்னிரண்டு மணிக்கே
பசிக்க ஆரம்பித்து விடும்
பெரியவர் அவருக்கு
ஒரு மணி வரை
மனைவியும்   மருமகளும்
தொலைக் காட்சி சீரியலில்
இரண்டு மணிக்கு
ஏனோ தானோ
சமையல் முடியும்
'சாப்பிட வாங்க'
குரலுக்கு ஓடுவார்
-----------------------------------------------------நாகேந்திர பாரதி

செவ்வாய், 14 டிசம்பர், 2010

குட்டிச் சுவர்

குட்டிச் சுவர்
----------------------------
ஒரு காலத்தில்
ஏதோ ஒரு வீட்டின்
ஒரு பக்கச் சுவராக
இருந்த போது
பட்ட எண்ணைக் கறைகளையும்
கீறிய சித்திரங்களையும்
பத்திரமாய்க் காத்துக்கொண்டு
மழைக்குப் பயந்து கொண்டு
தனியாக நிற்கிறது
அந்த குட்டிச் சுவர்
----------------------------------------நாகேந்திர பாரதி

திங்கள், 13 டிசம்பர், 2010

துரோகச் செயல்

துரோகச் செயல்
------------------------
வளர்த்த கடா
காதிலே முட்டியது
பேட்டரி போடுவது நாம்
முள்ளைத் திருப்புவது நாம்
கீயைக் கொடுப்பது நாம்
இருந்தும் காலையிலே
கிர்ரென்று அடித்து
காதைத் துளைக்கிறதே
தலையில்   தட்டுவதைத்   தவிர
வேறு வழி தெரியவில்லை
-------------------------------------------நாகேந்திர பாரதி

சனி, 11 டிசம்பர், 2010

நீர்ச் சலனம்

நீர்ச் சலனம்
----------------------
கண்மாய்நீர்   மேற்பரப்பில்
சுழற்றிவிட்ட சில்லுக் கல்
உருவாக்கும் வட்டங்கள்
வளர்ந்து விரிந்து
கரைந்து மறைவது போல்
பள்ளிப் பருவமும்
கல்லூரிப் பருவமும்
கல்யாணப் பருவமும்
கடந்து முடிந்து
முதுமைப் பருவத்தில்
நின்று போன நீர்ச் சலனம்
---------------------------------------------நாகேந்திர பாரதி

வெள்ளி, 10 டிசம்பர், 2010

கல்லூரி விடுமுறை

கல்லூரி விடுமுறை
---------------------------------
பஸ் நகரும் போது
கண்கள் மல்க
டாட்டா காண்பிக்கும் அம்மா
கொஞ்ச தூரம் ஓடி வந்து
டாட்டா சொல்லும் தங்கை
வேகம் பிடிக்கும் பஸ்ஸோடு
பின்னே ஓடும் மரங்கள் போலே
பின்னால் ஓட மாட்டோமா
 என்று ஏங்கும் மனது
இனி அடுத்து எப்போது வரும்
கல்லூரி விடுமுறை
--------------------------------------------நாகேந்திர பாரதி

வியாழன், 9 டிசம்பர், 2010

கரிசல் கவலை

கரிசல் கவலை
--------------------------------
காஞ்சும்   கெடுக்குது
பேஞ்சும் கெடுக்குது
ஒரு தண்ணி பத்தாமே
சாவியாப்   போகுது
மழைத்தண்ணி   வெள்ளமாய்
வெள்ளாமை சாகுது
மானம் பாத்த
கரிசல் காட்டில்
காலம் பூரா
கவலையில் விவசாயி
--------------------------------------------நாகேந்திர பாரதி

புதன், 8 டிசம்பர், 2010

இனிக்கும் கண்ணீர்

இனிக்கும்   கண்ணீர்
-------------------------------------
காம்ப்ளெக்ஸ் தியேட்டர் இன்டர்வெல்லில்
கோன் ஐஸும் பாப் கார்னும்
பையனுக்கு வாங்கும் போது
டூரிங் டாக்கீஸ் இடைவேளையில்
முறுக்கும் கடலை மிட்டாயும்
வாங்கித் தந்த அப்பாவும்
கடித்துத் தந்த அண்ணனும்
கண்களில் நிறைந்து
இனிப்பாக வடிவார்கள்
-------------------------------------------------நாகேந்திர பாரதி

செவ்வாய், 7 டிசம்பர், 2010

வீட்டுக் கோலம்

வீட்டுக் கோலம்
--------------------------------
இருபத்தோரு புள்ளி வைத்து
இழுத்து விட்ட கோலங்களில்
கிளி வந்து கீச்சிடும்
முயல் வந்து விளையாடும்
மீன் குஞ்சு நீந்தும்
அன்னமும் நடை போடும்
போட்டு விட்டுப் போனவளின்
வீட்டுக்குள் குடி மகனோ
புலியாக உறுமுவான்
சிங்கமாகச் சீறுவான்
--------------------------------------------------------நாகேந்திர பாரதி

திங்கள், 6 டிசம்பர், 2010

சந்தேக ஞாபகங்கள்

சந்தேக ஞாபகங்கள்
------------------------------------
சாமி கும்பிடும் போது
செருப்பு ஞாபகம்
பஸ்சில் போகும் போது
சில்லறை ஞாபகம்
வெளியூர் போகும் போது
பூட்டு ஞாபகம்
கண்மாய்க் குளியலின் போது
வேட்டி ஞாபகம்
படுக்கப் போகும் போது
சைக்கிள் ஞாபகம்
------------------------------------------நாகேந்திர பாரதி

ஞாயிறு, 5 டிசம்பர், 2010

ஊருணி உடைப்பு

ஊருணி உடைப்பு
-----------------------------------
ஊருணி உடைப்பெடுத்து
ஊரெல்லாம் வெள்ளம்
பாத்திர பண்டமெல்லாம்
தண்ணி வந்து அள்ளும்
மச்சு வீட்டுத் தட்டோட்டில்
மக்களெல்லாம் தஞ்சம்
சாதி இல்லை மதம் இல்லை
சமபந்திச் சாப்பாடு
தண்ணீர் வடிந்த பின்னே
தன் சாதி தன் மதம்
----------------------------------------------நாகேந்திர பாரதி

வியாழன், 2 டிசம்பர், 2010

பாப்பா உலகம்

பாப்பா உலகம்
---------------------------
விளையாட்டு, தூக்கம்
விரலைச் சூம்பல்
பசித்து அழுகை
பாலைப் பருகல்
சிரித்துக் குலுங்கல்
சிணுங்கி உதைத்தல்
குப்பாறப் பார்த்தல்
மல்லாந்து அழுதல்
பாப்பா உலகில்
தொடரும் வேலைகள்
-------------------------------------------------------நாகேந்திர பாரதி

தொடர்வதில் துன்பம்

தொடர்வதில் துன்பம்
-----------------------------------------
அவள் என்ன
செய்வாள் பாவம்
பார்த்தது பிடித்ததால்
பேச விட்டாள்
பேசுவது பிடித்ததால்
தொடவும் விட்டாள்
தொடுவது பிடித்ததால்
தொடர விட்டாள்
தொடர்வது துன்பமாய்
தூரம் விட்டாள்
---------------------------------------நாகேந்திர பாரதி

கண்ணோடு சேர்ந்த காதல்

கண்ணோடு சேர்ந்த காதல்
-----------------------------------------------
பூவோடு சேர்ந்த
நார் ஆக்கினாள்
கூந்தலோடு சேர்த்து
நேர் ஆக்கினாள்
கையோடு சேர்ந்த
வளை ஆக்கினாள்
காலோடு சேர்ந்த
கொலுசு ஆக்கினாள்
கண்ணோடு சேர்த்து
காதல் ஆக்கினாள்
-----------------------------------------------நாகேந்திர பாரதி

காதல் ஒரு தொடர்கதை

காதல் ஒரு தொடர்கதை
----------------------------------------------
முகத்தில் ஒரு
முன்னுரை உண்டு
சிரித்தால் அதில்
சேதி உண்டு
பேசினால் ஒரு
பின்னுரை உண்டு
தொட்டால் அது
தொடர்வது உண்டு
தொடர்ந்தால் அதில்
காதல் உண்டு
-------------------------------------நாகேந்திர பாரதி

கொடுத்து வைத்தவர்கள்

கொடுத்து   வைத்தவர்கள்
-------------------------------------------
காதலிப்பவர்கள் கொடுத்து வைத்தவர்கள்
அவர்களுக்கு
சிரிக்கவும் தெரிகிறது
அழவும் தெரிகிறது
சேரவும் தெரிகிறது
பிரியவும் தெரிகிறது
மலரவும் தெரிகிறது
உலரவும் தெரிகிறது
இருக்கவும் தெரிகிறது
இறக்கவும் தெரிகிறது
காதலிப்பவர்கள் கொடுத்து வைத்தவர்கள்
------------------------------------------------------------------------நாகேந்திர பாரதி

காதல் பாதை

காதல் பாதை
--------------------
நிற்பாள் நடப்பாள்
நெஞ்சம் இழுப்பாள்
பார்ப்பாள் முறைப்பாள்
பைத்தியம் ஆக்குவாள்
அழுவாள் சிரிப்பாள்
அடிமை ஆக்குவாள்
பேசுவாள் பிரிவாள்
பித்தன் ஆக்குவாள்
மணப்பாள் மறப்பாள்
மரணம் தருவாள்
---------------------------------------------------------நாகேந்திர பாரதி

வெள்ளி, 26 நவம்பர், 2010

மனிதரின் நிறங்கள்

மனிதரின் நிறங்கள்
-----------------------------------
காலிடுக்கில் பைகளை அமுக்கிக் கொண்டு
வெறித்த பார்வையுடன் ஒருவர்
ஜன்னலோரம்    சாய்ந்து கொண்டு
தூங்கும் பாவனையில் ஒருவர்
கைகளை அகல விரித்துக் கொண்டு
சீட்டை ஆக்ரமித்துக் கொண்டு ஒருவர்
இவர்களில் யாரிடம்  கேட்பது
வயதான பெற்றோருக்காக
மேல் இரண்டு பெர்த்தை 
மாற்றிக் கொள்ள முடியுமா என்று
----------------------------------------------------------------------நாகேந்திர பாரதி

வியாழன், 25 நவம்பர், 2010

ரத்த சரித்திரம்

ரத்த சரித்திரம் 
-------------------------------
தண்ணீரைக் குடித்தால்
ரத்தம் தரம் ஆகும்
சுருக்கமாய்ச் சாப்பிட்டால்
ரத்தம் சுறுசுறுப் பாகும்
வேகமாய் நடந்தால்
ரத்தம் விருத்தி ஆகும்
அமைதியாய் அமர்ந்தால்
ரத்தம் அன்பு ஆகும்
செலவே இல்லாத
ஆரோக்கிய   வழி
தெரிந்தும் செய்யாத
உடலில்   வலி
-----------------------------------நாகேந்திர பாரதி

புதன், 24 நவம்பர், 2010

வாய்ப் பாடு

வாய்ப் பாடு
------------------------
எத்தனை பாடங்கள்
படித்தோம் பள்ளியில்
ஆங்கிலம் தமிழ்
அறிவியல்   கணிதம்
வரலாறு புவியியல்
வணிகம் என்று
கேள்விகளும் மறந்தன
பதில்களும் மறந்தன
வாழ்க்கைப் பாடத்தில்
வாய்தான் வெல்லுது
------------------------------------------------------நாகேந்திர பாரதி

செவ்வாய், 23 நவம்பர், 2010

தமிழ் ஆசிரியர்

தமிழ் ஆசிரியர்
---------------------------
முப்பது  வருடத்துக்கு
முன்பு பார்த்தது
ஆரம்பப் பள்ளி
தமிழ் ஆசிரியர்
வேட்டி சட்டைதான்
வெண்ணீறு நெற்றிதான்
தமிழ் வெள்ளம்தான்
தலை நிமிர்ந்த நடைதான்
கூனல் முதுகோடு
பொக்கை வாயோடு
இப்போது பார்க்கும்போது
என்னமோ செய்கிறது
---------------------------------------------நாகேந்திர பாரதி

திங்கள், 22 நவம்பர், 2010

காதல் கணக்கு

காதல் கணக்கு
-------------------------
காதல் தோல்வியாம்
கடவுளைத் திட்டுவார்
தாடி வளர்ப்பார்
போதையில் மூழ்குவார்
பாதையில் கிடப்பார்
நண்பனும் இருப்பான்
நடத்திப்   போவான்
விசாரித்துப்  பார்த்ததில்
ஒன்பதாம் காதலாம்
ஒருதலைக் காதலாம்
---------------------------------------------நாகேந்திர பாரதி

ஞாயிறு, 21 நவம்பர், 2010

மனக் கணக்கு

மனக் கணக்கு
-------------------------
பழைய சோறும்
பட்ட மிளகாயுமா
பச்சைத்   தண்ணியும்
வரக்    காப்பியுமா
குடிசை வீடும்
களிமண் தரையுமா
எல்லாம்   இருப்பது
வெளியில் தானே
மனசு நினைத்தால்
மகிழ்ச்சி உள்ளே
---------------------------------------------நாகேந்திர பாரதி

சனி, 20 நவம்பர், 2010

பங்குச் சந்தைக் காதல்

பங்குச் சந்தைக் காதல்
------------------------------------------
சிரிப்பில் ஆரம்பித்து
அழுகையில் முடிவதால்
ஒரு நாள் ஏறுவதால்
மறுநாள் இறங்குவதால்
நினைத்து நினைத்து
தூக்கம் போவதால்
விட்டுப் பிரிந்தாலும்
விடாமல் வதைப்பதால் 
பங்குச் சந்தையும்
காதலும் ஒன்றே
-------------------------------------------நாகேந்திர பாரதி

வெள்ளி, 19 நவம்பர், 2010

சமையல் சவால்

சமையல் சவால்
--------------------------
பெரிசாக சமையல் பத்தி
பேச வந்துட்டாங்க
தண்ணியிலே அரிசி போட்டு
கொதிக்க வச்சா சாதம்
உப்பு புளி மிளகாயோடு
பருப்பு சேத்தா சாம்பார்
மசாலாவைத் தடவி விட்டு
வேக வச்சா வெஞ்சனம்
செஞ்சு பாத்தோம் சமையல்
களியாச்சு சாதம்
கருப்பாச்சு சாம்பார்
கரிஞ்சு போச்சு காய்கறி
----------------------------------------------------------நாகேந்திர பாரதி

இறந்து போனவர்கள்

இறந்து போனவர்கள்
----------------------------------------
அவர்   இறந்து விட்டாராம்
இவர் சொன்னார்
கேட்க மறந்து போச்சு
வயதாகி இறந்தாரா
நோய் வாய்ப்பட்டா
காரணம் தேவையில்லை
தெரியாத சில பேரில்
ஒருவர் இறந்து விட்டார்
இன்னொரு நாளில்
இன்னொருவர் இறக்கலாம்
வேறொருவர் சொல்லலாம்
----------------------------------------------------நாகேந்திர பாரதி

வியாழன், 18 நவம்பர், 2010

நடுநிசி நிழல்கள்

நடுநிசி நிழல்கள்
----------------------------
அதிகாலை ஐந்து மணிக்கே
சில பேர் எழுந்து   விடுகிறார்கள்
நடக்கிறார்கள், ஓடுகிறார்கள்
குளிக்கிறார்கள், பாடுகிறார்கள்
கோலம் போடுகிறார்கள்
சமையல் செய்கிறார்கள்
பேப்பர் படிக்கிறார்கள்
காபி குடிக்கிறார்கள்
நமக்கென்னமோ இவர்கள் 
நடுநிசி நிழல்கள்
-----------------------------------------------நாகேந்திர பாரதி

அனாதைக் கேள்விகள்

அனாதைக் கேள்விகள்
------------------------------------------
ஞாயிற்றுக் கிழமை காலை
ஸ்டேஷனில்  கூட்டமே இல்லை
என்னையும் அவர்களையும் தவிர
அந்தக் குழந்தையின்
கேள்வியோ கேள்விகள்
அம்மா தலை ஆட்டுகிறார்
அப்பா புத்தகம் படிக்கிறார்
கேள்விகட்கு பதிலில்லை
அவை எல்லாம் அனாதைகளாய்
பிளாட்பாரத்தில் அலைகின்றன
----------------------------------------------------நாகேந்திர பாரதி

புதன், 17 நவம்பர், 2010

இருளும் ஒளியும்

இருளும் ஒளியும்
-------------------------------
மரங்களின் சலசலப்பு
தண்ணீரின் கலகலப்பு
பூக்களின் பளபளப்பு
பூச்சிகளின் முணுமுணுப்பு
கல்லும் முள்ளும்
கலந்து குத்தும்
நடுக்கும் குளிரில்
நடந்து பார்த்தால்
பிடிக்கும் காட்டின்
இருளும் ஒளியும்
------------------------------------------------நாகேந்திர பாரதி

செவ்வாய், 16 நவம்பர், 2010

ஞாயிற்றுக் கிழமைகள்

ஞாயிற்றுக் கிழமைகள்
--------------------------------------
ஞாயிறு வந்தெழுப்பும்
ஞாயிற்றுக் கிழமைகள்
வேண்டாத குளியல்
விருப்பத் தேநீர்
சோபாவில் தோய்ந்து
டிவியை மேய்ந்து
மதியம் வந்தால்
மட்டனும் சிக்கனும்
மாலையில் சலிப்பு
மறு நாள் திங்கள்
------------------------------------நாகேந்திர பாரதி
 

பிரிவில் இன்பம்

பிரிவில் இன்பம்
--------------------------------
எத்தனை வருடங்கள்
எவ்வளவு கண்ணீர்
உறக்கமில்லா இரவுகள்
உணர்ச்சியில்லா நாட்கள்
மறுபடியும் ரோஜா
காட்டியது முகத்தை
அதே வாசம்
அதே நேசம்
பிரிந்து கூடுவதில்
பேரின்பம் உண்டு
-------------------------------------------நாகேந்திர பாரதி

ஞாயிறு, 14 நவம்பர், 2010

இசையின் இயக்கம்

இசையின் இயக்கம்
----------------------------------
எலும்பிலும் நரம்பிலும்
இறங்கிப்   பாயும்
இதயமும் மூளையும்
இளகச் செய்யும்
சிரிக்கவும் வைக்கும்
அழவும்  வைக்கும்
உணர்வின் உச்சியில்
ஏற்றி வைக்கும்
இறைவனைப் போலவே
இசையும் இயக்கும்
------------------------------------------நாகேந்திர பாரதி

உள்ளே வெளியே

உள்ளே வெளியே
------------------------------
பசி வாய்கள்
ஓட்டலின் உள்ளே
பசிக் கரங்கள்
ஓட்டலின் வெளியே
தங்கக் காணிக்கை
கடவுளின் காலடியில்
சில்லறைக் காசுகள்
பிச்சைக் காரனுக்கு
உள்ளே சுயநலம்
வெளியே பொதுநலம்
-----------------------------------------------------நாகேந்திர பாரதி

சனி, 13 நவம்பர், 2010

நேரங் காலம்

நேரங்  காலம்
----------------------
உனக்கு மட்டும் இல்லை
அடிக்கு அடி தோல்வி
இரவில் வர எண்ணும்
சூரியனுக்கும் தோல்வி
கோடையில் மலர எண்ணும்
செடிகளுக்கும் தோல்வி
மழையில் பறக்க எண்ணும்
பறவைகட்கும் தோல்வி
நேரம் வரும் பார்த்திரு
காலை வரும் காத்திரு
---------------------------------------------------நாகேந்திர பாரதி

மரக் கதவு

மரக் கதவு
----------------------
மரக் கதவில் தொத்திக் கொண்டு
முன்னும் பின்னும் ஆட்டம்
'கதவை ஆட்டாதே, சண்டை வரும்'
அம்மா குரலில் அதட்டல்
முதுகில் அடிக்கும் அப்பா
கட்டிக் கொள்ளும் அம்மா
சண்டை வரத்தான் செய்தது
அம்மாவுக்கும் அப்பாவுக்கும்
கதவு மட்டும் ஜாலியாக
ஆடிக் கொண்டு இருந்தது
-----------------------------------------------------------நாகேந்திர பாரதி

வெள்ளி, 12 நவம்பர், 2010

கண்ணீரே ஆழம்

கண்ணீரே ஆழம்
---------------------------
சொல்லாத காதலில்
சுவைக்கும் தருணங்கள்
பார்வையே போதும் 
பேச்சு வெகு தூரம்
புன்னகை ஒரு முறை
கனவினில் பல முறை
பிரிந்து பின் கூடினால்
பேதங்கள் ஓடிடும்
சிரிப்பெல்லாம்    ஓரம்
கண்ணீரே   ஆழம்
---------------------------------------நாகேந்திர பாரதி

பின்னோட்டம்

பின்னோட்டம்
----------------------
அது ஒரு காலம்
அவை சில இடங்கள்
பழைய சாமான்களின்
மச்சு ஓர அறைகள்
மாடியைத் தொட்டிடும்
மாமரக் கிளைகள்
வவ்வால் புழுக்கை
வழுக்கும் கோபுரம்
இப்போது விளையாடும்
இன்பம் எவர்க்கோ
---------------------------------------------- நாகேந்திர பாரதி

ஆத்ம அணுக்கள்

ஆத்ம அணுக்கள்
-----------------------------------
உயிரின் அணுக்கள்
ஒன்றாய்க் கூடி
உடலாய் மாறி
உள்ளே அமரும்
மனதின் அணுக்கள்
அனுபவம் திரட்டி
உள்ளே மலரும்
ஆத்ம அணுக்கள்
அறிவாய் ஆகி
உள்ளே ஒளிரும்
-----------------------------------------------------நாகேந்திர பாரதி

வியாழன், 11 நவம்பர், 2010

சுதந்திர வாசம்

சுதந்திர வாசம்
-----------------------
கண்ணாடிக் கதவின் பின்
கண் கவர் பட்சணங்கள்
காக்கிச் சட்டைக் காவலாளி
மீசையும் குறுந்தடியும்
வாடிக்கை யாளர்களை
வரவேற்க வழி திறக்க
இனிப்பு வாசமெல்லாம்
வெளியேறும் இயல்பாக
சுதந்திர சுவாசத்தில்
வயதான பிச்சைக்காரன்
----------------------------------------------------நாகேந்திர பாரதி

புதன், 10 நவம்பர், 2010

பொருந்தாத புத்திமதி

பொருந்தாத புத்திமதி
----------------------------------------
'மறந்து விடு
மகிழ்ச்சியாய்  இரு'
எப்படி மறப்பது
அழுதா, உறங்கியா
எங்கே மறப்பது
கடற்கரையிலா, பூங்காவிலா
எதை மறப்பது
இதழ்களையா, கண்களையா
என்ன மறப்பது
காதலையா, வாழ்க்கையையா
யாரை மறப்பது
உன்னையா, என்னையா
----------------------------------------நாகேந்திர பாரதி

செவ்வாய், 9 நவம்பர், 2010

இலையுதிர் காலம்

இலையுதிர் காலம்
----------------------------------
முற்றிய விரல்களில்
தெறிக்கும் நரம்புகள்
உதிரும் இலைகளாய்
உணரும் நடுக்கம்
உலர்ந்த உதடுகளில்
ஒட்டியும் ஒட்டாத
தேநீர் கோப்பையில்
ததும்பும் சோகம்
கால ஓட்டத்தில்
கரைந்த உறவுகள்
-----------------------------------------நாகேந்திர பாரதி

வெள்ளி, 5 நவம்பர், 2010

தீப வலி

தீப வலி
-----------------
பட்டாசு வெடிக்கும் போதும்
மத்தாப்பு தெறிக்கும் போதும்
தீக்குச்சி உரசும் போதும்
நெருப்பு பறக்கும் போதும்
காகிதம் விரித்து வைத்து
மருந்தை உருட்டி வைத்து
உருவம் பலவும் செய்து
உலர்த்தி உறையும் போட்ட
விரல்கள் இடுக்கில் வந்த
வீக்கம் வலியாய்க் குத்தும்
----------------------------------------------------நாகேந்திர பாரதி

புதன், 3 நவம்பர், 2010

ஆளில்லா ரயில்வே கேட்

ஆளில்லா ரயில்வே கேட்
--------------------------------------------
நாளுக்கு ஒரு முறை
நிற்கும் பேசஞ்சர் வண்டி

நிற்பதற்கு முன்பே ஏறி

புறப்பட்ட பின்பு குதிக்கும்
நிலக்கடலை  , முறுக்கு
தேநீர் வாண்டுகள்

ஏக்கப் பெருமூச்சு விட்டு
ரெயில் கிளம்பும்போது
மறுநாளுக்காய்   காத்திருக்கும்
ஆளில்லா ரெயில்வே கேட்
--------------------------------------------------------நாகேந்திர பாரதி

செவ்வாய், 2 நவம்பர், 2010

பயித்தியக் காரி

பயித்தியக்  காரி
--------------------------
எதோ ஒரு வரவேற்பில்
எதிரும் புதிருமாய்
சந்தித்த போது
தாடியை முறைத்து விட்டு
எரிச்சல் முகத்தோடு
ஒதுங்கிப் போனாள்
கண்ணில் ததும்பிய
ஈரத்தை மட்டும்
ஒதுக்க   முடியாத
பயித்தியக் காரி
---------------------------------நாகேந்திர பாரதி

குப்பை மண்ணு

குப்பை மண்ணு
-------------------------------
கண்ணு படக்
கூடா தென்றும்
கருப்பு அண்டக்
கூடா தென்றும்
'மண்ணு' என்று
பேரு வைப்பார்
'குப்பை' என்று
பேரு வைப்பார்
குப்பை மேடு
வளர்ந்த பின்பு
கோபுரமாய்
ஆன பின்பு
குப்பையாக மண்ணாக
பெற்றோரை மதித்திடுவார்
--------------------------------நாகேந்திர பாரதி

இயற்கையில் நிறைந்தவர்

இயற்கையில் நிறைந்தவர்
--------------------------------------------------
நிலவினில் தெரிவது
அப்பத்தா முகம்
மலையினில் தெறிப்பது
அம்மாச்சி முகம்
மேகத்தில் ஒளிவது
மாமாவின் முகம்
காற்றினில் நெளிவது
அப்பாவின் முகம்
இறந்தவர் என்றும்
மறைந்தவர் அல்லர்
இயற்கையில் கலந்து
நிறைந்தவர் ஆவர்
-------------------------------------------நாகேந்திர பாரதி

ஞாயிறு, 24 அக்டோபர், 2010

சித்தம் போக்கு

சித்தம் போக்கு
---------------------------
சித்தம் போக்கை
சிவம் போக்காய் மாற்றி
தத்தம் மதத்தின்
தன்மை பறை சாற்றி
எத்தனை முனிவர்
எத்தனை பாடல்
இருந்தும் உலகின்
இயற்கையில் செயற்கை
இருப்பதால் தானோ
இன்னமும் சித்தர்
வருகிறார் வாழ்கிறார்
--------------------------------------நாகேந்திர பாரதி

போன தலைமுறை

போன தலைமுறை
-----------------------------------
தொலைக் காட்சி பார்த்ததில்லை
தொலை பேசி கேட்டதில்லை
வருடத்துக்கு ஒருமுறை
திருவிழா தெருக்கூத்து
வயக்காட்டு வேலை பல
வாய்க்கால் மீன் குழம்பு
அயல் வீட்டுப் புரணியும்
அடுப்படியும் பொழுதுபோக்கு
வயதாகி நோய்ப்பட்டு
பாயப் படுக்கை படுத்திருந்து
புருஷனுக்கு முன்போ
பின்போ போன உயிர்
-------------------------------------------------நாகேந்திர பாரதி

சனி, 23 அக்டோபர், 2010

வழித் தடங்கள்

வழித் தடங்கள்
--------------------------
குளிரூட்டிய அறையின்
கண்ணாடிக்கு வெளியே
தலையில் துண்டோடு
காலில் செருப்பின்றி
வேக நடையோடு
விரைபவர் பார்த்து
கண்கள் பனிக்கும்
வழித் தடங்கள் என்றும்
அடியோடு அழிவதில்லை 
ஆழத்தில் ஒளிந்திருக்கும்
-----------------------------------------------------நாகேந்திர பாரதி

வியாழன், 21 அக்டோபர், 2010

தொடரும் 'போதும்'

தொடரும் 'போதும்'
----------------------------------
பார்த்துக் கொண்டு
இருந்தாலே போதும்
பேசிக் கொண்டு
இருந்தாலே போதும்
கேட்டுக் கொண்டு
இருந்தாலே போதும்
தொட்டுக் கொண்டு
இருந்தாலே போதும்
தொடர்ந்து கொண்டு
இருந்தாலே போதும்
------------------------------------------------நாகேந்திர பாரதி

புதன், 20 அக்டோபர், 2010

மண்ணு வாழ்க்கை

மண்ணு வாழ்க்கை
----------------------------------
மண்ணு வயலில்
உழுது அறுத்து
மண்ணு பானையில்
பொங்கி உண்டு
மண்ணு சாமியை
விழுந்து வணங்கி
மண்ணு குடிசையில்
படுத்து புரண்டு
மண்ணு குடத்தை
உடைத்துப் போவார்
------------------------------நாகேந்திர பாரதி

செவ்வாய், 19 அக்டோபர், 2010

வாசக எழுத்தாளன்

வாசக எழுத்தாளன்
-------------------------------------
வாசகனாக இருப்பதில் ஒரு
வசதி இருக்கிறது
எல்லா எழுத்தாளரையும்
ஏளனம் செய்யலாம்
இவரை விட நன்றாக
எழுதுவேன் எனலாம்
எழுதும் போது தான்
எங்கோ இடிக்கிறது
என்ன சொல்வார்களோ என்று
பயமாக   இருக்கிறது
----------------------------------------நாகேந்திர பாரதி

திங்கள், 18 அக்டோபர், 2010

மணல் கண்கள்

மணல் கண்கள்
------------------------------
வீடு கட்டக்
கொட்டிய மணல்
ஏறி விளையாட
காலெல்லாம் மணல்
மணல் குறைந்து
தரையில் ததும்ப
கிச்சு கிச்சு தாம்பாளம்
கையெல்லாம் மணல்
கட்டிடம் முடிய
மணலும் மறைய
விளையாட்டை இழந்து
கண்ணெல்லாம் மணல்
----------------------------------------நாகேந்திர பாரதி

ஞாயிறு, 17 அக்டோபர், 2010

லிபர்டி போனது

லிபர்டி போனது
----------------------------
நியூ யார்க்கிற்கு   லிபர்டி சிலை
கோடம்பாக்கத்திற்கு லிபர்டி தியேட்டர்
ஆட்டோவிடம் சொல்ல
அடையாளச் சின்னம்
பஸ் நிறுத்தத்திற்கு
பல வருடப் பெயர்
பழைய படம் பார்க்க
பழைய தியேட்டர்
தட்டிக்கு உள்ளே
தலை நீட்டி அழுகிறது
------------------------------------------------நாகேந்திர பாரதி

கன்னா பின்னா கனவு

கன்னா பின்னா கனவு
---------------------------------------
குருக்கள் மாத்திரை  கொடுக்கிறார்
கோவில் ஆஸ்பத்திரி ஆகிறது
மரத்தில் ஏறி வந்து
தரையை அடைதல்
கண்மாயில் முங்கி
எழுந்தால் கடல்
குருவி கத்தி விட்டு
புலியாக மாறுகிறது
கன்னா பின்னா கனவு முடிகிறது
காலை விடிகிறது
------------------------------------------------------நாகேந்திர பாரதி

வெள்ளி, 15 அக்டோபர், 2010

கிராமத்து விருந்து

கிராமத்து விருந்து
-----------------------------------
வயக்காட்டில் வெளையாடும்
வெள்ளாட்டுக் குட்டிகளும்
குப்பை மேட்டைக் கிளறும்
கோழிக் குஞ்சுகளும்
கண்மாயில் துள்ளும்
கெண்டை மீன்களும்
விருந்தாளி வந்தால்
வேறிடம் சேரும்
வெத்தலை பாக்கோடு
வயிற்றிலே வேகும்
---------------------------------------நாகேந்திர பாரதி

காத்திருக்கும் காலம்

காத்திருக்கும் காலம்
----------------------------------
கதவுகள் திறந்து மூடும்
மனிதர்கள் உள்ளே வெளியே
சன்னல்கள் திறந்து மூடும்
வெளிச்சம் உள்ளே வெளியே
கோடை, வசந்தம்
குளிர், மழை
பகல், இரவு,
சூரியன், சந்திரன்
காத்திருக்கும் காலம்
காதலன், காதலி
-----------------------------------------------நாகேந்திர பாரதி

வியாழன், 14 அக்டோபர், 2010

மனைவி தாசன்

மனைவி தாசன்
-------------------------
அகமும் புறமும்
அறிந்த காரணத்தால்
அடுப்படி காதல்படி
அழகாய்ப்   படிப்பதால்
வரும்படிக் குள்ளே
வாழ்க்கை நடத்துவதால்
உறவின் நட்பின்
ஒற்றுமை காப்பதால் 
அழுதால் அழுது
சிரித்தால் சிரிப்பதால் 
மனைவியின் தாசனாய்
இருப்பதில் மகிழ்ச்சியே
-----------------------------------------------------------நாகேந்திர பாரதி

முதலும் முடிவும்

முதலும் முடிவும்
---------------------------------
பார்வையில் காதலைச்
சுட்டிக் காட்டி
பழக்கத்தில் பண்பினைத்
தொட்டுக் காட்டி
சிரிப்பினில் உள்ளத்தைக்
கட்டிப் போட்டு
அழுகையில்   உயிரினைச்   
 சுட்டுப் போட்டு
பிரிகையில் கண்ணீரில்
விட்டுப் போனாள்
-------------------------------------------நாகேந்திர பாரதி

திங்கள், 11 அக்டோபர், 2010

நதியின் பயணம்

நதியின் பயணம்
-------------------------------
கல்லும் மண்ணும்
கலந்து இறங்கி 
ஆற்றுப் படித்துறையில்
அலம்பும் நீராகி
கோவில் படித்துறையில்
கும்பிடும் நீராகி
கடலில் கலந்து
உப்பு நீராகி
உயரப் பறக்கும்
நதியின் பயணம்
-------------------------------------------------

ஞாயிறு, 10 அக்டோபர், 2010

மதம் தாண்டிய உள்ளம்

மதம் தாண்டிய உள்ளம்
------------------------------------------------
அப்துல் கலாமின்
அறிவு வெள்ளம்
எரிக் கிளாப்டனின்
இசை வெள்ளம்
தேசிகாச் சாரியாரின்
யோக வெள்ளம்
முத்தமிழ்க் கலைஞரின்
தமிழ் வெள்ளம்
மதம் தாண்டிய
மனித உள்ளம்
---------------------------------------நாகேந்திர பாரதி

வெள்ளி, 8 அக்டோபர், 2010

காதலும் கண்வலியும்

காதலும் கண்வலியும்
----------------------------------------
எப்போ வருமென்று
எவருக்கும் தெரியாது
வந்த பின்னாலே
வலிப்பது நிற்காது
கண்கள் இருக்கும்
காரணத்தால் வருவது
பார்த்த உடனேயே
பற்றிக் கொள்வது
காதலும் கண் வலியும்
கஷ்டப் படுத்துவது
-----------------------------------------------நாகேந்திர பாரதி

காதல் மறக்கட்டும்

காதல் மறக்கட்டும்
----------------------------------
உன்னைப் பிரிந்ததனால்
உலகை விட்டு விட்டேன்
என்னை   மறந்து விடு
ஏக்கம் இறக்கி விடு
குடும்பம் அழைக்கிறது
குழந்தை   அணைக்கிறது
கடமை நடக்கட்டும்
காதல் மறக்கட்டும்
என்றேனும் ஓர் நாள்
இயற்கை அழைத்து வரும்
அப்போது சேரலாம்
அது வரை காத்திருப்பேன்
-----------------------------------------------------------நாகேந்திர பாரதி

புதன், 6 அக்டோபர், 2010

மழைக் கோலம்

மழைக் கோலம்
-----------------------------
எந்தச் செருப்புப் போட்டாலும்
பேண்ட்டிலே   பொட்டு
எந்தக் குடை பிடித்தாலும்
சட்டையில்   கொட்டு 
எந்த ஓரம் ஒதுங்கினாலும்
சகதி நீர் பட்டு
எந்தப் பஸ்ஸில் ஏறினாலும்
இருக்கையில் சொட்டு
மழைக் கோலத்தில் வந்தாலே
மனைவியிடம்   திட்டு
----------------------------------------------------------நாகேந்திர பாரதி

பாப்பாப் பூ

பாப்பாப் பூ
---------------------
பஞ்சு உடலும்
பிஞ்சு விரலும்
குஞ்சு வாயும்
குறும்புச் சிரிப்பும் 
உதைக்கும் காலும்
உருளும் தலையும்
வீசும் கையும்
விக்கலும் தும்மலும்
பாப்பாப் பூவின்
பருவ வளர்ச்சி
-----------------------------------------------நாகேந்திர பாரதி

காதல் கணக்கு

காதல் கணக்கு
-------------------------------
அழகிய டீச்சரிடம்
ஆரம்பக் காதல்
அரட்டை பெண்ணிடம்
அடுத்த காதல்
பேசிப் பழகிப்
பிறந்த காதல்
பிரிந்து அழுது
பிசைந்த காதல்
மறந்து மணந்து
மனைவி காதல்
------------------------------------------நாகேந்திர பாரதி

செவ்வாய், 5 அக்டோபர், 2010

வேறு வேறு உலகம்

வேறு வேறு உலகம்
-------------------------------------
கன மழை பெய்து
கல்லூரி மூடினா சந்தோஷம்
கலாட்டா நடந்து
கல்லூரி மூடினா சந்தோஷம்
மாணவர் தேர்தல்
கல்லூரி மூடினா சந்தோஷம்
மறு தேதி இன்றி
கல்லூரி   மூடினா சந்தோஷம்
வந்தால் சம்பளம்
வராட்ட கெடையாது சந்தோஷம்
--------------------------------------------------நாகேந்திர பாரதி

திங்கள், 4 அக்டோபர், 2010

விளையாட்டுக் கோபம்

விளையாட்டுக் கோபம்
--------------------------------------------
கோலிக் குண்டு  விளையாட்டு
கிடையாதாம்
கிட்டிப் புள்ளு விளையாட்டு
கிடையாதாம்
ஆடு புலி ஆட்டம்
கிடையாதாம்
பல்லாங்  குழி கூடக் 
கிடையாதாம்
காமன் வெல்த் போட்டியிலே
கலந்துக்கலை
------------------------------------------நாகேந்திர பாரதி,

ஞாயிறு, 3 அக்டோபர், 2010

பால்வெளி உலகம்

பால்வெளி உலகம்
-------------------------------------
நடிகர் படத்திற்கு
பால் அபிஷேகம்
கடவுள் படத்திற்கு
பால் அபிஷேகம்
அரசியல்வாதி    படத்திற்கு
பால் அபிஷேகம்
சாமியார் படத்திற்கு
பால் அபிஷேகம்
பால் வெளி உலகில்
பாழ் வெளி வீடுகளில் 
பசியோடு பிஞ்சுகள்
------------------------------------------நாகேந்திர பாரதி

சனி, 2 அக்டோபர், 2010

மின் வண்டி உறவு

மின் வண்டி உறவு
-----------------------------------
ஓர சீட்டு கிடைக்கலைன்னா
'உம'முன்னு இருக்கும்
பேசப் பேச மாறும்
பிரச்னையும் ஆகும்
அரசியலும் சினிமாவும்
அலசி ஆராயும்
சண்டையும் வரும்
சமாதானமும் வரும்
இறங்கிப் போகும்போது
என்னமோ மாதிரி இருக்கும்
-----------------------------------------------------நாகேந்திர பாரதி

வெள்ளி, 1 அக்டோபர், 2010

எல்லாம் இருக்கிறது

எல்லாம் இருக்கிறது
-----------------------------------------
பார்த்த விழிக்
கண்ணீர் இருக்கிறது
கேட்ட மொழிக்
காதல் இருக்கிறது
தொட்ட விரல்
சுகமும் இருக்கிறது
பட்ட மூச்சுக்
காற்றும் இருக்கிறது
விட்டுப் போன
வேதனையும் இருக்கிறது
---------------------------------------------நாகேந்திர பாரதி

மாறாத கிராமம்

மாறாத கிராமம் 
----------------------------------
நம்ம ஊரு கண்மாய்
நாறிப் போயித் தொறுக்கும்
வானம் பாத்த வயலு
வறண்டு போயிக் கிடக்கும்
முளைக் கொட்டுத் திண்ணை
முனை முறிஞ்சி சறுக்கும்
திண்ணைப் பேச்சு அரசியல்
தெரு முழுக்க நடக்கும்
திரும்பும் போது ஏனோ
மனசு கெடந்து கனக்கும்
---------------------------------------------------------நாகேந்திர பாரதி

புதன், 29 செப்டம்பர், 2010

எந்திர அவசரம்

எந்திர அவசரம்
-------------------------
முன்னால் போகும் வண்டி
வழி விடுவதில்லை
பின்னால் வரும் வண்டி
ஒலி குறைப்பதில்லை
என்னதான் அழுத்தினாலும்
எந்திர அவசரம்
இருபது மணி நேரத்தை
பத்து மணி நேரத்தில்
பார்க்க முடிவதில்லை
------------------------------------------------நாகேந்திர பாரதி

செவ்வாய், 28 செப்டம்பர், 2010

உலக தினங்கள்

உலக தினங்கள்
-----------------------------
செப்டம்பர்  இருபத்தாறு
உலக இருதய தினம்
செப்டம்பர் இருபத்தேழு
உலக சுற்றுலா தினம்
செப்டம்பர் இருபத்தெட்டு
உலக வெறிநாய் தினம்
ஒவ்வொரு நாளும்
உறைக்கிற தினம்
ஒவ்வொரு இரவும்
மறக்கிற மனம்
----------------------------------------------------------

திங்கள், 27 செப்டம்பர், 2010

மின்சாரக் கனவு

மின்சாரக் கனவு
----------------------------
நறுக்கிவிட்ட மரப்பட்டை
உயரத்தில் அடித்து வைத்து
நடுவினிலே ஒயர் வைத்து
மூடிவிட்டு திருகி விட்டு
வீட்டோர சிமெண்டு கம்ப
மின்சார வயர் இழுத்து
திண்ணைச் சுவர் பெட்டியிலே
திணித்து விட்டு உயர்த்தி விட
இருட்டுக்குள்  வெளிச்சம் வந்த
வீட்டுக்குள் வியந்ததெல்லாம்
மின்சாரம் போகின்ற
பொழுதினிலே நினைவு வரும்
-------------------------------------------------------------நாகேந்திர பாரதி

ஞாயிறு, 26 செப்டம்பர், 2010

க்யூவின் காலம்

க்யூவின் காலம்
--------------------------
பள்ளியில் இருப்பது
பத்தே பேர்தாண்டா
படிக்கச் சேத்துவிடு
பாசாக்கி விட்டுறேன்
வாத்தியார் சொல்லுக்காய்
சேர்த்து விட்ட பிள்ளை
வரிசையில் நிற்கிறான்
வாரிசைச் சேர்க்க
கூப்பிட்ட காலம் போய்
க்யூவின் காலம் ஆச்சு
-----------------------------------------------------நாகேந்திர பாரதி

சனி, 25 செப்டம்பர், 2010

முதுமை அமைதி

முதுமை அமைதி
--------------------------------
கோவில் சுற்றுப்
பிரகார நடை
கோவில்  கர்ப்பக்
கிரகத் தியானம்
கோவில் திருமடப்
பிரசாத உணவு
கோவில் கோபுர
வாசல் தூக்கம்
கோவில் கொடுக்கும்
முதுமை அமைதி
---------------------------------------நாகேந்திர பாரதி

இருபிறவித் திருநங்கையர்

இருபிறவித்  திருநங்கையர் 
-------------------------------------------
ஒரு நங்கை இரு நங்கை
உயரத்தில் இருக்கின்றார்
பல நங்கை பணத்திற்காய் 
பாதையிலே நிற்கின்றார்
திருநங்கை ஆக்கிவிட்டு
தெருவினிலே நிறுத்திவிட்டு
இருபிறவி ஆக்கிவிட்ட
இரக்கமில்லா இறைவா
மறுபிறவி வந்தால் தான்
மணக்குமா இவர் வாழ்வு
----------------------------------------நாகேந்திர பாரதி

வியாழன், 23 செப்டம்பர், 2010

வேதனை மொட்டு

வேதனை மொட்டு
----------------------------------------
சொல்ல நினைத்து
சொல்லாமல் விட்டது
விட்ட காதலின்
வேதனை சுட்டது
சுட்ட வாழ்க்கையில்
சூழ்நிலை கெட்டது
கெட்டுத் திரும்பி
கிளையும் விட்டது
விட்ட மொட்டிலும்
வேதனை முட்டுது
----------------------------------------------நாகேந்திர பாரதி

புதன், 22 செப்டம்பர், 2010

மடி தேடும் நேரம்

மடி தேடும் நேரம்
------------------------------------
மலமும் ஜலமும்
மகவுக்கு எடுத்து
வளமும் வாழ்வும்
வாரிக் கொடுத்து
குலமும் தழைக்க
குடும்பம் ஆக்கி
மலமும் ஜலமும்
ஆகும் நேரம்
மகவின்   மடியை
மனமும் தேடும்
----------------------------------------------நாகேந்திர பாரதி

வியாழன், 16 செப்டம்பர், 2010

உறவும் பிரிவும்

உறவும் பிரிவும்
---------------------------------
அப்பா அம்மா
ஆன பின்தான்
அப்பா அம்மா
உறவு புரியும்
தாத்தா பாட்டி
ஆன பின்தான்
தாத்தா பாட்டி
உறவு புரியும்
உறவு புரிவதற்குள்
உயிர்கள் பறந்து விடும்
--------------------------------------------நாகேந்திர பாரதி 

சிலை மனிதர்கள்

சிலை மனிதர்கள்
-------------------------------------
மறைந்த நாளில்  பிறந்த நாளில்
மாலை மரியாதை
மறந்த நாட்கள் மற்ற நாட்கள்
மழையும் வெயில் வாதை
வாழும் போது முன்னாலே
வாய்க்கு வந்த பேச்சு
போகும் போது பின்னாலே
பூச் சொரிய லாச்சு
இருக்கும் போது ஏசுவது
இறந்த பிறகு பூஜிப்பது
-------------------------------------------------நாகேந்திர பாரதி

வெள்ளி, 10 செப்டம்பர், 2010

நேரமும் தூரமும்

நேரமும் தூரமும்
-----------------------------------
பட்டணத்துச் சாலையில்
பத்துக் கிலோ மீட்டர்
நெரிசலில் காரில்
நேரம் ஒரு மணி
ஒத்தையடிப் பாதையில்
ஓங்கி நடந்தாலும்
ஒரு மணி நேரம்
ஒரே தூரம்
காத்தும் சுத்தம்
காசும் மிச்சம்
---------------------------------------நாகேந்திர பாரதி

புதன், 8 செப்டம்பர், 2010

புகைப்படப் பாட்டி

புகைப்படப் பாட்டி
---------------------------
இருக்கின்ற காலத்தில்
எரிந்து விழுந்து விட்டு
போன பிறகு
பொண்டாட்டி படத்திற்கு
பூஜை போடுகிற
புருஷன் முகத்தின்
வேதனை விம்மலை
வேடிக்கை பார்த்தபடி
புன் சிரிப்போடு
புகைப்படத்தில்  பாட்டி
-----------------------------------------------------நாகேந்திர பாரதி

வெள்ளி, 3 செப்டம்பர், 2010

வயலும் வாழ்வும்

வயலும் வாழ்வும்
--------------------------------
தூக்குச் சட்டியில் சோறும்
தோளில் தொங்கும் பையுமாய்
அரை மணி நடந்து
அடுத்த ஊரில் படித்து
பத்தாம் கிளாஸ் முடித்து
பர்ஸ்ட்     கிளாஸ் வாங்கி
மேலே படிச்சு ஒண்ணும்
கிழிக்க வேணாமின்னு
வயல் தண்ணியிலே உழறப்போ  
வாத்தியார் முகம் தெரியுது 
-------------------------------------------------------நாகேந்திர பாரதி

வியாழன், 2 செப்டம்பர், 2010

வீட்டுக்குள் விநியோகம்

வீட்டுக்குள் விநியோகம்
----------------------------------------------
வீணாய்ப் போகும் தானியம்
விநியோகம் ஏழைகட்கு
உச்ச நீதிமன்ற உத்தரவு
உற்சாகம் எல்லோர்க்கும் 
வீட்டுக்குள் பிரிஜ்ஜுக்குள்
வீணாகும் தின்பண்டம் 
அடைத்து வைத்த காரணத்தால்
அழுகிப் போகும் பழங்கள்
கொறிக்கத் தேடும் பெரிசுகட்கு
கொடுத்து விட்டால் புண்ணியமே
-----------------------------------------------------நாகேந்திர பாரதி

செவ்வாய், 31 ஆகஸ்ட், 2010

சாலைப் பொழுது

சாலைப் பொழுது
--------------------------------
வாகனங்களும் மனிதர்களும்
வருவதால் போவதால் வரும்
வலிகளைப் பொறுத்துக் கொண்டு
வெயிலும் மழையும் விழுந்து
வாட்டுவதால் வரும்
இடைஞ்சல்களைத் தாங்கிக் கொண்டு
அந்த நீண்ட சாலை
ஆலமரத்தின் நிழல் தன் மேல்
சுருங்கியும் விரிந்தும் விழுவதை
வேடிக்கை பார்த்துக் கொண்டு
பொழுதைப்  போக்குகிறது
--------------------------------------------------------நாகேந்திர பாரதி

திங்கள், 30 ஆகஸ்ட், 2010

விட்டுச் சென்றாள்

விட்டுச் சென்றாள்
---------------------------------
சோலையிலே தன் சுகந்தத்தை
விட்டுச் சென்றாள்
கடற்கரையில் தன் காலடியை
விட்டுச் சென்றாள்
மேகத்தை தன் வீடாக
ஆக்கிச் சென்றாள்
மின்னலுக்குள் மின்னலாக
மறைந்து சென்றாள்
காதலனை ஏன் கண்ணீரில்
விட்டுச் சென்றாள்
---------------------------------------------------நாகேந்திர பாரதி

ஞாயிறு, 29 ஆகஸ்ட், 2010

குடும்ப விலக்கு

குடும்ப விலக்கு
---------------------------------
அனாதை ஆசிரமத்தில்
அரை மணி நேரம்
முதியோர் இல்லத்தில்
முக்கால் மணி நேரம்
விலங்கு நலக் கூட்டத்தில்
விரிவான பாடம்
புகைப்படமும் பேச்சும்
போகும் பத்திரிகைக்கு
குடும்பத்தை விலக்கிட்ட
குடும்ப விளக்குக்கு
விடியும் வரை காத்திருப்பார்
வீட்டிலே  பிள்ளைகள்
--------------------------------------------------நாகேந்திர பாரதி

சனி, 28 ஆகஸ்ட், 2010

வீட்டுச் சிறை

வீட்டுச் சிறை
-----------------------
இந்தப் பக்கத் தெருவிலே
இசக்கி அம்மன் தீமிதி
அந்தப் பக்கத் தெருவிலே
அரசியல் கட்சி  மேடை
எதிர்ப் பக்கத் தெருவிலே
ஈபீக்காக  குழி தோண்டி
அடுத்த தெரு நண்பனை
அர்ஜெண்டாய்ப் பார்க்கணும்
வீட்டுச் சிறை யிருந்து
விரயம் போன் பில்லு
--------------------------------------------------நாகேந்திர பாரதி

வலி போன வழி

வலி போன வழி
--------------------------------
தோள் வலி தாங்காமல்
டாக்டரிடம் போனால்
எக்ஸ்ரே ஸ்கேன்
எல்லாம் எடுத்து
கையில் கரண்ட் வைத்து
கழுத்தை இழுத்து விட்டு
அஞ்சே நாளில்
தெரியவில்லை தோள் வலி
கையிலும்  கழுத்திலும்
அதை விட அதிக வலி
-------------------------------------------நாகேந்திர பாரதி

வியாழன், 19 ஆகஸ்ட், 2010

கொண்டாட வேண்டியவர்கள்

கொண்டாட வேண்டியவர்கள்
-----------------------------------------------------
சாப்பாடு போட்டா
'சாமி' ன்னு கும்புடுறாங்க
படிக்க உதவினா
'பாரி'  ன்னு  புகழறாங்க
கோயிலுக்குக் கொடுத்தா
'கொடை வள்ளல்'ங்கிறாங்க
அரசாங்க வருமானத்திற்கு
அள்ளிக் கொடுக்கறோம்
'குடி'மக்களான எங்களை
கொண்டாட வேண்டாமா
----------------------------------------------------நாகேந்திர பாரதி

வெள்ளி, 13 ஆகஸ்ட், 2010

மழை மயக்கம்

மழை மயக்கம்
------------------------------
மரங்களுக்குத் தெரியும்
மேகத்தின் நேசம்
காற்றுக்குத் தெரியும்
மழையின் வாசம்
பூங்காவை விட்டு
நீங்குவதாய் இருந்தோம்
இயற்கையின் காதல்
இழுத்துப் போட்டது
மழையில் நனைந்து
மயங்கி நின்றோம்
---------------------------------------------நாகேந்திர பாரதி

மௌனப் பேச்சு

மௌனப் பேச்சு
------------------------
வண்டி காலியாக இருந்தது
இல்லை- முழுவதும் நிறைந்து
அவள் இல்லாத வெறுமை
பார்வை இல்லா வெறுமை
முறுவல் இல்லா வெறுமை
விடுப்பில் இருப்பாளோ
வந்து விடுவாள் நாளை
வரா விட்டால் ..
மௌனப் பேச்சு
ஏமாற்றி  விடாது
--------------------------------------நாகேந்திர பாரதி

இரக்கமில்லா இரவு

இரக்கமில்லா இரவு
------------------------------------
இருட்டாகவும் இருந்தது
இரைச்சலாகவும் இருந்தது
பறவை களும்
பாதி   பாதி தூக்கத்தில்
கனவுகளும் அரைகுறையாய்
கலைந்து போயின
நல்ல  தூக்கம் சொக்க
விடிந்து போனது
இன்னும் கொஞ்ச நேரம்
இருந்திருக் கலாம்
இரக்கமில்லா  இரவு
--------------------------------------------நாகேந்திர பாரதி

வியாழன், 12 ஆகஸ்ட், 2010

கால்பந்து ஓட்டம்

கால்பந்து ஓட்டம்
--------------------------------
அடித்து விரட்டி
ஓடும் பயணம்
தடுத்து வாங்கி
நெஞ்சில் நடனம் 
தலையில் துள்ளி
தாவும் நளினம்
இடித்து பிடித்து
வாங்கும் கடிதம்
கொடுத்து வாங்கி
போடும் கோல்கள்
--------------------------------------------நாகேந்திர பாரதி

புதன், 11 ஆகஸ்ட், 2010

காம்பஸ் காதல்

காம்பஸ் காதல்
-------------------------------------
பத்து வருடம் கழித்து
பள்ளிக் கூடத்துக்குள்
எட்டாவது வகுப்பின்
ஏழாவது பெஞ்சில்
காம்பஸால் கீறிய 
பெயரின் இடுக்கில்
சேர்ந்திருந்த அழுக்கை
துடைத்து விட்டுப் போனான்
அவளையே தொட்டதாய்
ஒரு நிமிடம் உணர்ந்து
-----------------------------------------------நாகேந்திர பாரதி

செவ்வாய், 10 ஆகஸ்ட், 2010

வாடகை சைக்கிள்

வாடகை   சைக்கிள்
--------------------------------------
முட்டுக் காலில்
தோல் பிய்யும்
சைக்கிள் செயின்
கழன்று   விழும்
நேரே ஓடி
கல்லில் முட்டும்
முள்ளுக் குத்தி
டயர் பஞ்சர்
முடிந்து போகும்
வாடகை நேரம்
-------------------------------------------நாகேந்திர பாரதி

வரவும் செலவும்

வரவும் செலவும்
--------------------------------
காலையில் கண்மாய்
பகலெல்லாம் வயல்
மாலையில் கள்ளு
இரவினில் மனைவி
வயதாகி வாந்தி
வாரத்துக்கு ஊசி 
திண்ணையில் படுக்கை
தினசரி புலம்பல்
மூச்சு நின்றதும்
மூங்கிலில்  பயணம்
--------------------------------------------நாகேந்திர பாரதி

ஞாயிறு, 8 ஆகஸ்ட், 2010

எந்திரக் காதல்

எந்திரக் காதல்
-------------------------
எண்ணை தேய்த்துக் குளிக்கச் சொன்ன
இன்லேன்ட் லெட்டர்கள்
கண்ணீரில் குளிப்பதாய்ச்  சொன்ன
கவர்க் காகிதங்கள்
வேதனையை வெளிப்படுத்திய 
வெறும் கார்டுகள்
கையெழுத்திலும் கடிதத்திலும்
கலந்திருந்த காதல்
எஸ்எம்எஸ்ஸிலும்  ஈமெயிலிலும்
எந்திரமாய்ப் போனது
-----------------------------------------------------------நாகேந்திர பாரதி

வியாழன், 5 ஆகஸ்ட், 2010

குடும்பத் தலைவி

குடும்பத் தலைவி
----------------------------------
வீட்டைப் பெருக்கி
துணிகள் துவைத்து
பூஜை முடித்து
சமையல் செய்து
குழந்தையைப் பேணி
கணவருக்கு உதவி
பெற்றோரைக் கவனித்து
வீட்டில் இருக்கும்
குடும்பத் தலைவி
'வேலை இல்லாதவள்'
------------------------------------------------------நாகேந்திர பாரதி
 

புதன், 4 ஆகஸ்ட், 2010

உயிர்த் தொண்டன்

உயிர்த் தொண்டன்
-----------------------------------
இடித்துப் பிடித்துக் கொண்டு
சிரித்துக் கொண்டு இருந்தார்கள்
இளைய தலைவர்களும்
மூத்த தலைவர்களும்
கட் அவுட் காகிதத்தில்
இரங்கல் கூட்டமாம்
உயிர்த் தொண்டனுக்கு
-----------------------------------------------நாகேந்திர பாரதி

கடந்த காலம்

கடந்த காலம்  - (தினத் தந்தி - குடும்ப மலர் - 22/08/2010)
-----------------------------
பள்ளிக்கூடம் போன பின்புதான்
விளையாட்டின் அருமை தெரிகிறது
கல்லூரி போன பின்புதான்
பள்ளிக்கூட அருமை தெரிகிறது
வேலைக்குப் போன பின்புதான்
படிப்பின் அருமை தெரிகிறது
ஓய்வு பெற்ற பின்புதான்
வேலையின் அருமை தெரிகிறது
மரணப் படுக்கை யில்தான்
வாழ்க்கையின் அருமை தெரிகிறது
-------------------------------------------------------------------நாகேந்திர பாரதி

செவ்வாய், 3 ஆகஸ்ட், 2010

இரவுப் பேருந்து

இரவுப் பேருந்து
------------------------------
பாதி இரவுப் பயணத்தில்
படம் முடிந்து போகும்
குத்துப் பாட்டு இசை வந்து
சத்தம் போட்டு நிறுத்தும்
காபிக்கும் கக்கூசுக்கும்
கால் மணி கிடைக்கும்
தொடரும் ஓட்டத்தில்
தலைகள் ஆடும்
வீடு வந்து சேர்ந்தாலும்
விடாது தூக்கம்
-----------------------------------------நாகேந்திர பாரதி

ஞாயிறு, 1 ஆகஸ்ட், 2010

எல்லாம் அவன் செயல்

எல்லாம் அவன் செயல்
------------------------------------------
சாமி நம்பிக்கையில் ஒரு
சவுகரியம் இருக்கிறது
வானம் பொய்த்தால் அவனை
வைது   தீர்க்கலாம்
நோயில் விழுந்தால் அவனை
நொந்து திட்டலாம்
பணம் பத்தாவிட்டால் அவனே
பார்த்துக் கொள்வான்
சரணா கதியில் ஒரு
சந்தோசம் இருக்கிறது
---------------------------------------------------நாகேந்திர பாரதி

சனி, 31 ஜூலை, 2010

தண்ணீர் வலி

தண்ணீர் வலி
---------------------------
ஊருணியில்  இருந்து சுமந்து வர
அரை மணி ஆனது
அடுத்த  தெரு அடிபைப்பில்  அடித்து வர
கால் மணி ஆனது
வீடெதிரே வந்த குழாயில் பிடித்து வர
அஞ்சு நிமிஷம் ஆனது
இப்போது சமையல் கட்டுக்குள்ளேயே
திறந்தவுடன் தண்ணீர்
மற்ற வேலைகளில் மூழ்கி விடுவதால்
ஊருணிக்  குடம் ஒன்று நிரம்பி வழியும்
அரை மணி நேரமாய்
----------------------------------------------------------- நாகேந்திர பாரதி

வெள்ளி, 30 ஜூலை, 2010

கலையும் கலையும்

கலையும் கலையும்
-----------------------------------
தெரு ஓவியத்தின் மீது
வீசப்படும் காசுகளால்
உருக் குலையும்
ஓவியத்தின் அழகு
முச்சந்தி சிலையின் மீது
உட்காரும் காகத்தால்
எச்சில் படும்
சிலையின் அழகு
வரையாமல் செதுக்காமல்
இருந்திருக் கலாம்
பசி மட்டும் இல்லையென்றால்
------------------------------------------------------நாகேந்திர பாரதி

வியாழன், 29 ஜூலை, 2010

சாதி வேலி

சாதி வேலி
---------------------
இரவு அவளின் முக வெளிச்சத்திற்கு
ஏங்கிக் கிடக்கிறது
ஆறு அவள் ஆதரவுப் பார்வையில்
அடங்கி ஓடுகிறது
பறவைகள் அவள் உள்ள அழகைப்
பாடித் திரிகின்றன
மரங்கள் அவளைப் பார்த்த மகிழ்ச்சியில்
ஆடித் தீர்க்கின்றன
அவளோ பயத்தோடு சாதி வேலியைத்
தாண்டி ஓடிக் கொண்டு
----------------------------------------------------------------நாகேந்திர பாரதி

வைகைப் பாலங்கள்

வைகைப் பாலங்கள்
--------------------------------------
அந்தக் காலக் கீழ்ப்பாலம்
அமுங்கியிருக்கும் தண்ணீரில்
பழுப்பு மண்டபமும்
பாதி மூழ்கியிருக்கும்
புதிய பாலம் வந்து
பழைய மேம்பாலத்தின்
பவிசைக் குறைத்திருக்கும்
வைகையும் சற்றே
வாடிக் கிடக்கிறது
பாலத்தில் புரண்ட
காலம் போய் விட்டதே
----------------------------------------------------நாகேந்திர பாரதி

செவ்வாய், 27 ஜூலை, 2010

பயிருக்குப் பணமென்று பேர்

பயிருக்குப் பணமென்று பேர்
-------------------------------------------------
நெளிகின்ற நெற் கதிரும்
நிமிர்கின்ற கம்பங் கதிரும்
குழைகின்ற கேப்பைக் கதிரும்
குத்துகின்ற சோளக் கதிரும்
முளைக்கின்ற காலத்தில்
மூணு தண்ணீ பார்த்திருக்கும்
விளைகின்ற காலத்தில்
வெயில் வந்து காத்திருக்கும்
உழைக்கின்ற உழவனுக்கு
ஊதியமும் ஒளிந்திருக்கும்
--------------------------------------------------நாகேந்திர பாரதி

திங்கள், 26 ஜூலை, 2010

கடியோ கடி

கடியோ கடி
----------------------
காலை நேரத்தில்
மனைவி கடி வாங்கி
அலுவலக நேரத்தில்
அதிகாரி கடி வாங்கி
மாலை நேரத்தில்
நண்பர் கடி வாங்கி 
கடின வாழ்வில்
களைத்துப் படுக்க
இரவு நேரத்தில்
கொசுவின் கடி
----------------------------------------நாகேந்திர பாரதி

ஞாயிறு, 25 ஜூலை, 2010

என்ன தெரியும்

என்ன தெரியும்
-------------------------------
என்ன வென்று தெரியும்
ஏன் என்று தெரியும்
எப்படி என்று தெரியும்
யார் என்று தெரியும்
எல்லாம் தெரிந்ததனால்
பேசவும் தெரியும்
பேசாமல் இருந்திருந்தால்
என்னென்ன தெரியும்
பேசாவிட்டால் தெரியும்
பேசாததும் தெரியும்
-------------------------------------------------------நாகேந்திர பாரதி

ஏய்க்கும் பேர்

ஏய்க்கும் பேர்
-----------------------------
நாலு பக்கம் கடைத் தெரு
நடுவினில் மணிக் கூண்டு
பக்கத்தில் தெப்பக் குளம்
படியெல்லாம் பாசிகள்
சோப்புப் போடக் கூடாது
கோயில் குளம் அது
உயர உயரப் படிகள்
ஏறி வந்து பார்த்தால்
எந்த ஊர்  இது
பேர் மட்டும் ஏய்க்கிறது
---------------------------------------------------நாகேந்திர பாரதி

எங்கே போனார்கள்

எங்கே போனார்கள்
----------------------------------------
இங்கே தானே இருந்தார்கள்
அரிசியில் கல் எடுத்துக் கொண்டு
பல்லாங்குழி ஆடிக் கொண்டு
திண்ணையில் உட்கார்ந்து கொண்டு
தொடர்ந்து பேசிக் கொண்டு
அவ்வப்போது அழுது கொண்டு
அடுப்படியில் இருந்து கொண்டு
கொல்லைக்குப் போய்க் கொண்டு
எங்கே போனார்கள்
இறந்து போனவர்கள்
----------------------------------------------நாகேந்திர பாரதி

சனி, 24 ஜூலை, 2010

பார்த்த ஞாபகம் இல்லையோ

பார்த்த ஞாபகம் இல்லையோ
---------------------------------------------------
பழைய படத்தைப் பார்க்க
பழைய ஊருக்குப் போகணும்
திருட்டு விசிடி விட்டுட்டு
தியேட்டர் போயிப் பாக்கணும்
அழுக்குச் சீட்டுலே உட்கார்ந்து 
மூட்டைக்  கடி வாங்கணும்
பழுப்புக் கலர்த் திரையிலே
கருப்பு வெள்ளை ஓடணும்
காத்து வாங்கிப் பாக்கணும்
கண்ணு கலங்கிப் பாக்கணும்
-------------------------------------------------------நாகேந்திர பாரதி

வெள்ளி, 23 ஜூலை, 2010

காதல் கவிதை

காதல் கவிதை
------------------------------
கண்களால் தொழுவது
காதல் பல்லவி
கைகளால் தொடுவது
காதல் அனுபல்லவி
கால்களில் விழுவது
காதல் சரணம்
உடலால் இணைவது
காதல் பாடல்
உள்ளத்தால் உருகுவது
காதல் கவிதை
----------------------------நாகேந்திர பாரதி

வியாழன், 22 ஜூலை, 2010

ரெயில் பயணங்களில்

ரெயில் பயணங்களில் - (தேவி - 8/9/2010)
--------------------------------------------
காத்திருப்புப் பட்டியலில் இருந்து
இருக்கைப் பட்டியலுக்கு மாறி
இருக்கைப் பட்டியலில் இருந்து
படுக்கைப் பட்டியலுக்கு மாறியபின்
ஓரத்தில் மேலே
ஒட்டிய படுக்கையில்
கோபத்தோடு ஏறி
சோகத்தோடு படுத்தான்
இருக்கையாவது கிடைக்காதா என்று
ஏங்கிக் கிடந்தவன்
--------------------------------------------- நாகேந்திர பாரதி

புதன், 21 ஜூலை, 2010

நாதஸ்வரக் காதல்

நாதஸ்வரக் காதல்
------------------------------
படபடப் பேச்சில்
பாதி மயங்கி
பண்பு நடத்தையில்
மீதி மயங்கி
பொறுப்பு வலியைப்
பகிரத் துடிக்கும்
புதுமைப் பெண்ணின்
காதல் வாழ்க
நாதமும் ஸ்வரமும்
சீக்கிரம் சேர்க
----------------------------------------------நாகேந்திர பாரதி

செவ்வாய், 20 ஜூலை, 2010

ஒரு நல்லவனின் வருத்தம்

ஒரு நல்லவனின் வருத்தம்
----------------------------------------------------
குமார் ரெம்ப நல்லவன். இதை அவனே பல முறை சொல்லியிருக்கிறான்.
தினசரி கோவிலுக்குப் போவான். அவன் போகிற நேரம் பிரசாதம் கொடுப்பார்கள். அதற்காக சுண்டலுக்காகத் தான் அவன் கோவிலுக்குப் போகிறான் என்று சொல்ல முடியாது.

அலுவலகத்தில் கடைசியாகக் கிளம்புவது அவன்தான். வேலையில் ரெம்ப சோம்பேறி என்று சிலர் சொல்வதையும் நம்பக் கூடாது. அவனது நேரம் பாரா உழைப்பைப் பாராட்ட வேண்டும் என்று அவன் விரும்புகிறான்.

விளையாட்டில் மிகவும் ஆர்வம் உள்ளவன். தொலைக் காட்சியில் விளையாட்டு நிகழ்ச்சிகளை விரும்பிப் பார்க்கிறானே  , அழுகை சீரியல்களின் இடைவேளைகளில்.

மனைவி சொல்லை மீறுவதே கிடையாது. அவள் பேசிக் கொண்டு இருக்கும் போதே நழுவி விடுவான். கேட்டால்தானே மீறுவதற்கு.

குழந்தைகளிடம் பாசம் அதிகம். வாங்கி வரும் நொறுக்குத் தீனிகளை அவர்களிடம் அப்படியே கொடுத்து விடுவான். எல்லோரும் சேர்ந்து சாப்பிடும் போது அவனது கை அளவுக்கும் வேகத்திற்கும் முக்கால் வாசி பலகாரம் அவன் வாய்க்குள் போவதை எப்படி தவிர்க்க முடியும்.

நண்பர்களுக்காக உயிரையும் கொடுப்பான். அவன் உயிர் மேல் அவர்களுக்கு விருப்பம் இல்லாததால் கொடுப்பதில்லை.  மற்றபடி அவர்களிடம் வாங்கிய கடனையும் திருப்பிக் கொடுப்பதில்லை. நண்பர்கள் அவனை மறக்காமல் இருக்கவேண்டும் என்பதற்காக.

ஊருக்கு நல்லது செய்வதில் முதல் ஆள் அவன்தான். ஒருமுறை அவன் காலில் குத்திய முள்ளைப் பிடுங்கி தூரத்தில் எறிந்தவன், ரோட்டில் கிடந்த முள்ளை மக்கள் நலத்திற்காக எடுத்து வீசியதை அடிக்கடி சொல்லி பெருமைப் பட்டுக் கொள்வான்  .

மொத்தத்தில் குமார் ஒரு முழுமையான நல்லவன். இது உங்களுக்குப் புரிகிறது. எல்லோருக்கும் ஏன் தெரிய வில்லை என்பதுதான் அவன் வருத்தம்.
--------------------------------------------------------------------------------------------------------நாகேந்திர பாரதி

கிராமத் திணை

கிராமத் திணை
---------------------------
புளிய மரப் பிசாசு
பயத்தைக் கொடுக்கும்
ஆல மர ஆடு புலி
பணத்தைக் கொடுக்கும்
வேப்ப மர அம்மன்
வினையைத் தீர்க்கும்
அரச மரப் பிள்ளையார்
வாரிசு கொடுக்கும்
மரமும் மரத்தோடு
இயைந்த கிராமமும்
------------------------------------------நாகேந்திர பாரதி

ஞாயிறு, 18 ஜூலை, 2010

தண்ணி கருத்திருச்சு

தண்ணி கருத்திருச்சு
--------------------------------------------
தூரத்துக் கண்மாயில் 
தோண்டிய  கிணற்றில்
வாளி போட்டு
காத்துக் கிடந்து
சொட்டுச் சொட்டாய்
ஊறின   நீரை
மொண்டு வர்றப்போ
இருட்டிப் போகும்
வானம் பூமி
வீடு எல்லாம்
-----------------------------------------------நாகேந்திர பாரதி

புதர்க் கருவை

புதர்க் கருவை
------------------------------
கொஞ்சம் தண்ணீரில்
கொழுத்து வளரும்
பக்கத்துக்கு நஞ்சையைப்
பாழாக்கும்   புஞ்சையாய்
தொட்டால் குத்தும்
வெட்டினால் வளரும்
கரியாக்கிப் பொசுக்கி
நசுக்கினால் போகும்
புதர்க் கருவையும்
பொருந்தா உறவும்
-----------------------------------------நாகேந்திர பாரதி

வெள்ளி, 16 ஜூலை, 2010

ஏட்டுச் சுரைக்காய்

ஏட்டுச் சுரைக்காய்
--------------------------------------
புரிந்த பாடத்தை
புரட்டிப் படிக்கும்
புரியாத பாடத்தை
உருப்போட்டு  அமுக்கும்
பரீட்சைக்கு போகையிலே
பயம் வந்து நடுக்கும்
படித்த பாடமெல்லாம்
மறந்தார்ப்  போல் இருக்கும்
கேள்வித்தாள் கிடைத்தவுடன்
கிடுகிடுன்னு கக்கும்
-----------------------------------------------நாகேந்திர பாரதி

குறள் கவிஞர் கூட்டம்

குறள் கவிஞர் கூட்டம்
--------------------------------------
ஒண்ணே முக்கால் அடிக்குள்ளே
சொன்ன கருத்தெல்லாம்
அறம் பொருள் இன்பமென்று
அடக்கி வைத்த தெல்லாம்
அப்பொழுதும் இப்பொழுதும்
எப்பொழுதும் நிற்கும்
திருக் குறள்   பூக்களையே
திரும்பவுமே விரிக்கும்
கவிஞர்கள் கூட்டத்தின்
கடைக் கோடி நீளும்
--------------------------------------------நாகேந்திர பாரதி

வியாழன், 15 ஜூலை, 2010

திண்ணை வீடு

திண்ணை வீடு
------------------------------
அந்த வீட்டுக்கு அடையாளமே அந்த திண்ணைதான். 'திண்ணை வீடு' என்றுதான் அந்த வீட்டுக்கே பேர்.
ஓரமாக உசந்த வேப்ப மரம் குளிர் காற்றை வீச , போக வரும் எல்லோரும் அந்த திண்ணையில் இளைப்பாறிச் செல்வது வழக்கம்.
கீரைக் காரியும், கருவாட்டுக் கூடைக் காரனும் அவ்வப்போது இறக்கி வைத்த காய்கறி, கவிச்சி நாத்தம் அங்கேயே ஒட்டிக் கொண்டு உட்கார்பவர்களின் பசியைக் கொஞ்சம் ஏற்றி விடும்.
மத்தியான நேரத்தில் வந்து படுக்கும் பாட்டிக்கு சுகமான தூக்கம் வரும். ராத்திரியில்    வீட்டுக்குள் கிடைக்காத தூக்கத்தை சரி செய்து கொள்வாள் அங்கே.
எப்போதாவது டவுனில் இருந்து வரும் பேரன் பேத்தியோடு விளையாட ஆடு புலி ஆட்டம் வரைந்த சாக்பீஸ் அடையாளமும் அழியாமல் இருக்கிறது.
மாசம்  ஒரு முறை சாணி போட்டு மொழுகும் போதுதான் அது போகும்  .
அந்த பச்சைச் சாணி மணம் பாட்டிக்கு ரெம்பவே பிடிக்கும்  .
பாட்டன் காலத்து பசுமை நினைவுகள் அந்த பச்சை மணத்தோடு ஒட்டி வருகின்றதோ என்னவோ.
ஒரு நாள் இப்படியே இருந்த பாட்டி இறந்து போனாள். அந்த திண்ணையில்  படுத்தபடியே.
இப்போது பெரும்பாலும் அந்த திண்ணையில் யாரும் உட்கார்வதோ படுப்பதோ  இல்லை.
'பெருசு அங்கேயே இருக்குது' என்ற ஒரு பீதியை யாரோ கிளப்பி விட்டு விட்டார்கள்.
வேப்ப மரம் மட்டும் அதன் குளிர்ந்த காற்றை திண்ணைக்கும், பாட்டிக்கும் வீசிக் கொண்டு இருக்கிறது.
---------------------------------------------------------------நாகேந்திர பாரதி

சுதந்திரக் கோலம்

சுதந்திரக் கோலம்
------------------------------------
தேசீயக் கொடி ஏற்றியதும்
தெரு முழுக்கப் பாடியதும்
பள்ளிக்  கூடம் ஓடியதும்
பளிங்கு மிட்டாய் கடித்ததும்
ஆகஸ்ட் பதினைந்தின்
அடையாளம் அப்போது
புதுப் படப் போட்டிகளும்
புண்ணாக்குப் பாட்டுக்களும்
நடிப்பவர் பேட்டிகளும்
நாள் முழுக்க இப்போது
----------------------------------------------நாகேந்திர பாரதி

புதன், 14 ஜூலை, 2010

பொதுச் சொத்து

பொதுச் சொத்து
-------------------------------
வானம் உண்டு
பூமி உண்டு
வண்ணம் உண்டு
வாசம் உண்டு
கடலும் உண்டு
ஆறும் உண்டு
காற்று உண்டு
மூச்சு உண்டு
இன்னும் என்ன
வேண்டும் இங்கே
---------------------------------------நாகேந்திர பாரதி

செவ்வாய், 13 ஜூலை, 2010

மேகக் கோபம்

மேகக் கோபம்
--------------------------
ஊத்தி  அடிச்ச மழையிலே
உடைஞ்சு போச்சு கண்மாய்
மண்ணு வெட்டிக் கொடுக்க
பொண்டு கூட்டம் சுமக்க
போட்டு அமுக்கி ஏத்தி
கரையை உசத்தி ஆச்சு
மனுசச் சண்டை பாத்து
மேகக் கூட்டம் துப்ப
ஒடிச்சுக் கிடந்த ஊரு
ஒண்ணா கூடிப் போச்சு
--------------------------------------------------------நாகேந்திர பாரதி

திங்கள், 12 ஜூலை, 2010

காதல் தீ

காதல் தீ
------------------
காதலுக்கு மறுபெயர்  
கண்ணீரா - இங்கே
காத்திருக்கும் ஏக்கத்தில்
வெந்நீரா - இது
பேதலிக்கும் மனத்தின்
பெரும் சுமையா - அதை
ஆதரிக்கத் தேடுகின்ற
அருகாமையா - அந்த
அணைப்புக்கு ஏங்குகின்ற
அடிமைத் தீயா
-------------------------------------நாகேந்திர பாரதி

அம்மா நாட்கள்

அம்மா நாட்கள்
----------------------------
முட்டிய நாளும்
பிறந்த நாளும்
குப்பாந்த நாளும்
தவழ்ந்த நாளும்
நடந்த நாளும்
ஓடிய நாளும்
பேசிய நாளும்
பிரிந்த நாளும்
அம்மாவுக்கு மட்டும்
எப்போதும் மறக்காது
--------------------------------------------நாகேந்திர பாரதி

ஞாயிறு, 11 ஜூலை, 2010

ஆசையும் பாசமும்

ஆசையும் பாசமும்
----------------------------------
ஓடிப் பிடித்ததும்
ஒளிந்து பிடித்ததும்
அடித்து அழுததும்
அன்பில் அழுததும்
படித்து முடித்ததும்
பணத்தைப் பார்த்ததும்
கணவன் மனைவி
காதல் சேர்ந்ததும்
பாசம் போனது
ஆசை ஆனது
-------------------------------------நாகேந்திர பாரதி

சனி, 10 ஜூலை, 2010

காணாமல் போன கடைகள்

காணாமல் போன கடைகள்
------------------------------------------------
அங்கங்கே டப்பாக்கள்
சாக்குப்பை திறக்கப்பட்டு
உள்ளிருந்து எடுத்திட்ட
உளுந்து, புளி, மிளகாயை
உருண்டாயும் கூம்பாயும்
உருவாக்கும் பேப்பரிலே
தொங்கும் சணல் பந்தின்
நூலுருவிக் கட்டுகின்ற
காட்சி போனதிப்போ
கண்காட்சி ஆனதிப்போ
-----------------------------------------------நாகேந்திர பாரதி

வெள்ளி, 9 ஜூலை, 2010

ஞாயிற்றுக் கிழமைகள்

ஞாயிற்றுக்   கிழமைகள்
-----------------------------------------
ஞாயிற்றுக்  கிழமைகள்
சிலருக்கு
அதிகம் உண்பதற்கும்
அதிகம் உறங்குவதற்கும்  
சிலருக்கு
சினிமா  போவதற்கும்
வெளியே  சுற்றுவதற்கும்
சிலருக்கு
கோயிலுக்கு  , சர்ச்சுக்கு
மசூதிக்கு  செல்வதற்கு  
சிலருக்கு
எப்போதும்  போலவே
நொந்து  கிடப்பதற்கு
நோயிலோ , பசியிலோ
காதலிலோ
-------------------------------------நாகேந்திர  பாரதி

வியாழன், 8 ஜூலை, 2010

வேலை வரும் வேளை

வேலை வரும் வேளை
--------------------------------------
படித்ததற்கு  வேலையென்றால்
வேலை இல்லை
வேலைக்காகப் படித்திருந்தால்
வேலை உண்டு
ஒரே வேலை என்றிருந்தால்
வேலை இல்லை
வேறு வேலை கற்றிருந்தால்
வேலை உண்டு
வேலை வரக் காத்திருந்தால்
 வேலை இல்லை
வேலை  ஒன்றைச்  செய்திருந்தால் 
வேலை உண்டு
--------------------------------------------------- நாகேந்திர பாரதி

புதன், 7 ஜூலை, 2010

கரைந்து போன வருடங்கள்

கரைந்து போன வருடங்கள்
--------------------------------------------
பத்தடிக்கு பத்தடி அறையில்
பத்துப் பேர்  படுத்திருந்த விடுதி
புதனும் சனியும் கறிச் சோறுக்கு  
புரட்டி எடுத்த பசி வயிறு
ஞாயிறு மாலை தியேட்டருக்கு
நடந்து போன ஞாபகங்கள்
பரீட்சை விடுப்பில் மட்டுமே
பாடப் புத்தகத்துக்கு  பயந்தது
கால ஓட்டத்தில் வேகமாய்
கரைந்து போன வருடங்கள்
-------------------------------------------------------நாகேந்திர பாரதி

செவ்வாய், 6 ஜூலை, 2010

பூவுக்குள் பூகம்பம்

பூவுக்குள் பூகம்பம்
-----------------------------------
'அப்பா அது வேணும்' என்று கெஞ்சும் பிள்ளையிடம்
முறைப்புப் பார்வை வைக்கும் அப்பாக்கள்
'அம்மா வலிக்குது' என்று அழும் குழந்தையின்
கையிழுத்து  விரைகின்ற அம்மாக்கள்
வீட்டுப் பாடம் எழுதாத காரணத்தைக் கேட்காமல்
விரல் நோக அடிக்கின்ற ஆசிரியர்கள்
சிறுபிள்ளை என்றெல்லாம் சிந்தித்துப் பார்க்காமல்
பெரும் வேலை வாங்குகின்ற வியாபாரிகள்
பூவுக்குள் புதைந்துள்ள பூகம்பம் வளர்ந்து
வயதாகி வெடிக்கையிலே வன்முறைகள்
------------------------------------------------------------------------------நாகேந்திர பாரதி

ஞாயிறு, 4 ஜூலை, 2010

ஆசைக்கு அன்பில்லை

ஆசைக்கு அன்பில்லை
------------------------------------
கலசத்துள் தங்கமாம்
கைப்பறிக்கக் கூட்டமாம்
கர்ப்பக் கிரகத்தில்
கடவுள் தனிமையிலாம்
கல்லுக்குள்  பிளாட்டினமாம்
கடப்பாரை மனிதர்களாம் 
காலத்தில் விதையின்றி
பூமித்தாய் கலங்குவதாம்
ஆசைக்கு அலைவதனால்
அன்புக்கு இடமில்லையாம்
-------------------------------------------------------நாகேந்திர பாரதி

சனி, 3 ஜூலை, 2010

நேரமும் பாரமும்

நேரமும் பாரமும்
----------------------------------
ஓடிக் கொண்டிருக்கும் போது
உள்ளே ஒதுங்கும்
நிற்கும்  போது
நினைவைத் தட்டும்
உட்காரும் போது
உள்ளே குத்தும்
படுக்கும் போது
பாடாய்ப் படுத்தும்
மறுபடி ஓடும்   போது
மறக்கப்  பார்க்கும் 
--------------------------------------நாகேந்திர பாரதி

வெள்ளி, 2 ஜூலை, 2010

வாசல் மணி

வாசல் மணி
-------------------------------
சாதிக்கும் மதத்துக்கும்
சண்டையெல்லாம் நின்னாச்சு
வரப்புக்கும் வாய்க்காலுக்கும்
வரிஞ்சதெல்லாம் ஓய்ஞ்சாச்சு     
தண்ணிக்கும் குடத்துக்கும்
தகராறு முடிஞ்சாச்சு 
அரிசிக்கும் பருப்புக்கும்
அலைஞ்சதெல்லாம் தொலைஞ்சாச்சு  
வாசல் மணி அடிச்சவுடன்
வந்த கனா போயாச்சு
--------------------------------------------------நாகேந்திர பாரதி

வியாழன், 1 ஜூலை, 2010

கரி அடுப்பு

கரி அடுப்பு
----------------
ஓலையும் விறகும்    வெச்சு
ஊதி ஊதி அடுப்பெரியும் 
சதுர அடுப்பு பக்கம்
சக்களத்தி வட்டடுப்பு 
இட்டிலியும் சோறும்
இங்கே வேகையிலே
பழைய கொழம்பு
பக்கத்தில் சூடாகும்
கரியும் புகையும்
கலந்தா தனி ருசி தான்
-------------------------------------------------------------நாகேந்திர பாரதி

புதன், 30 ஜூன், 2010

காதல் மேகம்

காதல் மேகம்
---------------------------
வேதனை விம்மலில்
வெடித்துச் சிதறிய
காதல் தோல்வியின்
கண்ணீர்க் கூட்டமா
வெள்ளை உடையில்
எல்லாம் மறைத்து
குளிரும் போது
கொட்டித் தீர்க்குமா
மேகக் கூட்டமா
காதல் மூட்டமா
-------------------------------------நாகேந்திர பாரதி

திங்கள், 28 ஜூன், 2010

உதிரும் மண்

உதிரும் மண்
------------------------------
மராமத்து பார்க்கும்
மண்ணு வீட்டின்
மரச் சட்டத்தில்
மறைந்து இருந்தன
காது குடையும்
கோழி இறகு
வாரு பிஞ்ச
ரப்பர் செருப்பு
பாட்டி நினைப்பை
உதிர்த்துக் கொண்டு
--------------------------------------------நாகேந்திர பாரதி

பொறி வாயில்

பொறி வாயில்
-------------------------
மெய்யா இது
மேனி அள்ளுதே
வாயா இது
வார்த்தை துள்ளுதே
கண்ணா இது
காதல் சொல்லுதே
மூக்கா இது  
மோகம் கொல்லுதே
செவியா இது
சேட்டை கிள்ளுதே
காதலா  இது
காமம் தள்ளுதே
----------------------------------நாகேந்திர பாரதி

ஞாயிறு, 27 ஜூன், 2010

செம்மொழி மாநாடு

செம்மொழி மாநாடு
-------------------------------
இருபதாயிரம் ஆண்டா
எம்மொழிக்கும் தாயா
இயல் இசை நாடகமா 
இலக்கணமும் இலக்கியமுமா  
பழமையும் புதுமையுமா
பண்பாட்டின் ஆரம்பமா
பகலும் இரவுமா
பாசமும் காதலுமா
உணரவைத்த தமிழே
உன் புகழ்   ஓங்குக
-------------------------------------------நாகேந்திர பாரதி

வியாழன், 24 ஜூன், 2010

கண்மாய்க்கரைக் கதை

கண்மாய்க்கரைக்  கதை
--------------------------------------
நடுவிலே தண்ணீர் வைத்து
நாலு புறம் காத்து நிற்கும் 
சகதியாய் வழுக்கி விட்டு
சமத்தாக சிரித்து வைக்கும்
தண்ணீரும் வற்றிப் போனால்
தனியாக வாடி நிற்கும்
கல்லாய் மண்ணாய் மாறி
காலிலே குத்தி வைக்கும்
இருந்தால்தான் சிரிப்பெல்லாம்
இல்லையென்றால் வெறுப்புத்தான்
------------------------------------------------------------------நாகேந்திர பாரதி

புதன், 23 ஜூன், 2010

வானம் பார்த்த வயிறு

வானம் பார்த்த வயிறு
-------------------------------------------
விதையை முளைக்க   விடாம
காஞ்சு கெடுக்கும்
களையை எடுக்க விடாம
பேஞ்சு கெடுக்கும்
காயைப் பழுக்க விடாம
காஞ்சு கெடுக்கும்
கதிரை அறுக்க விடாம
பேஞ்சு கெடுக்கும்
வானம் பாத்த வயிற்றோடு
வறுமையிலே விவசாயி
-----------------------------------------------------நாகேந்திர பாரதி

செவ்வாய், 22 ஜூன், 2010

உயர் தனிச் செம்மொழி

உயர் தனிச் செம்மொழி
----------------------------------------------
புறத்திற்கும் அகத்திற்கும்
இலக்கியம் கண்டு
பொருளுக்கும் புதிதாக
இலக்கணம் கண்டு
புதுமைக்கும் பழமைக்கும்
பாலம் கண்டு
உயர் தனிச் செம்மொழியாய் 
உயரம் கண்டு
வாழ்கின்ற தமிழ்த்தாயே
வணக்கம் வணக்கம்
-----------------------------------------------நாகேந்திர பாரதி

நன்றிக் கடன்

நன்றிக் கடன்
-----------------------
அம்மாக்கள் வளர்த்த உடல்
அப்பாக்கள் வளர்த்த உயிர்
காதலிகள் வளர்த்த மனம்
குழந்தைகள் வளர்த்த ஆத்மா
நண்பர்கள் வளர்த்த வாழ்க்கை
நமக்கென்று என்ன இங்கே
-------------------------------------------------நாகேந்திர பாரதி

சனி, 19 ஜூன், 2010

கோயில் சுற்றுலா

கோயில் சுற்றுலா -       நன்றி - தேவி (18/08/2010)
-----------------------------------------------------------------------
ஒவ்வொரு சன்னிதியிலும்
ஒரு நிமிடம் நின்று
பழமும் காயும்
சாமிக்குப் படைத்து
விபூதி குங்குமம்
விரலாலே இட்டு
வேண்டிய தற்கெல்லாம்
விண்ணப்பம் வைத்து
கும்பிட்டு முடிந்தது
கோயில் சுற்றுலா
-----------------------------------------நாகேந்திர பாரதி

வெள்ளி, 18 ஜூன், 2010

முடியாத காதல்

முடியாத காதல்
----------------------------
பார்த்துக் கொண்டே இருக்க விரும்புவதால்
காதல் குருடாய் இருக்க முடியாது
கேட்டுக் கொண்டே இருக்க விரும்புவதால்
காதல் செவிடாய் இருக்க முடியாது
பேசிக் கொண்டே இருக்க விரும்புவதால்
காதல் ஊமையாய் இருக்க முடியாது
தொட்டுக் கொண்டே இருக்க விரும்புவதால்
காதல் ஜடமாய் இருக்க முடியாது
நினைத்துக் கொண்டே இருக்க விரும்புவதால்
காதல் கல்யாணத்தில் முடியாது
----------------------------------------------------------------நாகேந்திர பாரதி

வியாழன், 17 ஜூன், 2010

திறப்பு விழா

திறப்பு விழா
-----------------------
வத்தல் நோட்டு
வளுவளு அட்டை
தொங்கு பயணம்
துடிக்கும் ரத்தம்
கதவோர பெஞ்சு
காணாம 'கட்' டு   
மரத்தடி ஓரம்
மன்மத நேரம்
காலேஜ் திறந்தாச்சு
வீட்டை மறந்தாச்சு
-------------------------------------------நாகேந்திர பாரதி

ஞாயிறு, 13 ஜூன், 2010

ஒரு நாள் பசி

ஒரு நாள் பசி
--------------------------
குழந்தைத் தொழிலாளர்
எதிர்ப்பு நாளன்று
உண்ணா விரதம்
இருந்து முடித்த
இளைஞர் கூட்டத்தின்
இரவுச் சாப்பாட்டுக்கு
இட்டிலி,  வடை
சாம்பார்ப் பொட்டலங்களைக்
கட்டிக் கொண்டிருந்தார்கள்
எட்டு வயது சிறுவர்கள்
----------------------------------------------நாகேந்திர பாரதி

சனி, 12 ஜூன், 2010

கடற் பறவை

கடற்  பறவை
-------------------------
கிழக்கில் இருந்து
மேற்கு நோக்கி
சிறகில் வேகம்
சிந்தையில் சோகம்
கறுப்புக் கடலின்
அமில எண்ணையில்
துடித்துக் கிடக்கும்
துணையைத் தேடி
தூரப் பறக்கும்
ஈரப் பறவை
--------------------------

என்னமோ மாதிரி

என்னமோ மாதிரி
--------------------------------
வெயில்லே வெளையாடி
மழையிலே நனைஞ்சு
கண்டதையும் தின்னு
காடு மேடு அலைஞ்சு
காதல்லே தோத்து
வேலை பல பாத்து
புள்ளை குட்டி பெத்து
'பெரிசு'ன்னு ஆனப்பறம்
உக்காந்து யோசிச்சா
ஒரு மாதிரிதான் இருக்கும்
----------------------------------------------------நாகேந்திர பாரதி

வியாழன், 10 ஜூன், 2010

உயிரின் விலை

உயிரின் விலை
----------------------------
இருபத்து நாலு  ஆண்டு
ஆனால் என்ன
இருபது ஆயிரம்  உயிர்
போனால் என்ன
உயிரின் விலையை
உரசிப் பார்க்கும்
சாவுக்குப் பொறுப்பை
விட்டுப் பிடிக்கும் 
சட்டம் தன
கடமையைச் செய்யும்
----------------------------------------------- நாகேந்திர பாரதி

புதன், 9 ஜூன், 2010

வலி வரும் வழி

வலி   வரும் வழி
--------------------------
வயித்து  வலி வர்றப்போ
முதுகு வலியே பரவாயில்லை
முதுகு வலி வர்றப்போ
தலை வலியே பரவாயில்லை
தலை  வலி வர்றப்போ
கால் வலியே பரவாயில்லை
கால் வலி வர்றப்போ
கை வலியே பரவாயில்லை
ஒரு வலியும் இல்லாதப்போ
ஏன் வலியே வரலை
----------------------------------------நாகேந்திர பாரதி

சனி, 5 ஜூன், 2010

சுதந்திரப் பறவைகள்

சுதந்திரப் பறவைகள்
---------------------------------------
எங்க ஊரு கண்மாயிலே
ஏகப்பட்ட பறவைக் கூட்டம்
நாடு விட்டு நாடு வந்து
நம்ம வீட்டு நண்டைத் திங்க
சிறுசும் பெருசுமா
சிவப்பும் வெளுப்புமா
கழுத்து நீண்டதும்
காலு நீண்டதும்
போட்டாக்காரன் இல்லாத
சந்தோசம் பொறுக்கலே
---------------------------------------------- நாகேந்திர பாரதி

வெள்ளி, 4 ஜூன், 2010

மண் வாசம்

மண் வாசம்
----------------------------
அம்பது வருஷத்துக்கு
முந்தின வாசம்
பூப்போல மண்ணு
காத்திலே பறக்கும்
சிறுசுக கால் எத்தி
சிரிச்சு விளையாடும்
மாட்டுக் குளம்பும்
வண்டித் தடமுமாய்
இருந்த காலம் போய்
எரியுது தார் ரோடு
-----------------------------------------நாகேந்திர பாரதி

வியாழன், 3 ஜூன், 2010

விடுமுறைக் காய்ச்சல்

விடுமுறைக்  காய்ச்சல்
---------------------------------------
வெளியூர் எல்லாம்
சுத்தி யாச்சு
வேணுங்கிற சினிமா
பாத் தாச்சு
விதவித சாப்பாடு
சாப்பிட் டாச்சு
விளையாட் டெல்லாம்
ஆடி யாச்சு
விடுமுறை முடிஞ்சுது
காய்ச்சல் ஆச்சு
------------------------------------------நாகேந்திர பாரதி

புதன், 2 ஜூன், 2010

மக்கள் கணக்கு

மக்கள் கணக்கு
----------------------------
அம்மா, அப்பா
அப்பத்தா, தாத்தா
பேத்தி, பாட்டி
பேரன் ரெண்டு
தம்பி, தங்கை
தானும் மனைவியும்
கணக்கு எல்லாம்
கரெக்டாக் கொடுத்தாச்சு
இலவசமா ஏதாச்சும்
எறக்கப்  போறாங்களா
---------------------------------------------------நாகேந்திர பாரதி

திங்கள், 31 மே, 2010

வரவு செலவு

வரவு செலவு 
--------------------------
பொருள் செலவு
சோர்வு வரவு மதுவால்
இருள் செலவு
சோர்வு வரவு மாதுவால்
அருள் செலவு
சோர்வு வரவு சூதால்
குரல்    செலவு
சோர்வு வரவு வாதால்
கூட்டிக் கழித்தும்
குறையா வரவு சோர்வே
-------------------------------------------------நாகேந்திர பாரதி

வெள்ளி, 28 மே, 2010

காத்து வாக்கில்

காத்து வாக்கில்
------------------------------
வேப்ப மரக்
காத்தில் குளிர்ந்து
விசிறி மட்டைக்
காத்தில் வேர்த்து
மொட்டை மாடிக்
காத்தில் நடந்து
மின் விசிறிக்
காத்தில் கிடந்து
காலா காலமாய்க்
காத்துக்கு ஏங்குவோம்
----------------------------------------நாகேந்திர பாரதி

அதுவும் இதுவும்

அதுவும் இதுவும்
-----------------------------------
அது என்ன
அப்படி ஒரு பார்வை
அது என்ன
அப்படி ஒரு பேச்சு
அது என்ன
அப்படி ஒரு கோபம்
அது என்ன
அப்படி ஒரு சிணுங்கல்
இது என்ன
இப்படி ஒரு கண்ணீர்
------------------------------------------------------நாகேந்திர பாரதி

வியாழன், 27 மே, 2010

நலம் தானா

நலம் தானா
------------------------
என் அம்மா நலத்தைக்
கேட்டாய்
என் அப்பா நலத்தைக்
கேட்டாய்
என் தம்பி நலத்தைக்
கேட்டாய்
என் தங்கை நலத்தைக்
கேட்டாய்
என் துணையின் நலத்தைக்
கேட்டாய்
என் குழந்தைகள் நலத்தைக்
கேட்டாய்
---------------------------------------------நாகேந்திர பாரதி

பாத்தி கட்டும் பார்வை

பாத்தி கட்டும் பார்வை
----------------------------------------------
முதல் பார்வை
மூட்டும் அன்பு
அடுத்த பார்வை
அனல் காதல்
முதல் பேச்சு
முணு முணுப்பு
அடுத்த பேச்சு
ஆர வாரம் 
பார்வையும் பேச்சும்
பாத்தி கட்டும்
---------------------------------------------------நாகேந்திர பாரதி

புதன், 26 மே, 2010

திசை மாறிய பயணங்கள்

திசை மாறிய பயணங்கள்      (பாக்யா  வார இதழ் - 25/06/2010)
-------------------------------------------
நாம் போக விரும்பிய பஸ்
கூட்டம் இல்லாமல்
ஐந்தே  நிமிடங்களில்
எதிர் திசையில்
நாம் போக வேண்டிய பஸ்
தொங்கும் கூட்டத்தோடு
அரை மணிக்கு அப்புறம்
நம் திசையில்
போக வேண்டிய திசையும்
மாறிப் போய் விட்டதா
வாழ்க்கையைப் போல
------------------------------------------------நாகேந்திர பாரதி

வியாழன், 20 மே, 2010

ஈரும் பேனும்

ஈரும் பேனும்
-----------------------
பெரிசுக்கு தலை அரிச்சா
பேத்திக்கு அழைப்பு வரும்
சீப்பாலே அழுத்தி
சிக்கெடுத்தா ஒரு சத்தம்
ஈருவளி இழுத்து
நெரிச்சா ஒரு சத்தம்
நடுவகிடு அமுக்கி
நசுக்கினா ஒரு சத்தம்
ஈரும் பேனும் பாக்க
இல்லை பாட்டி இப்போ
-----------------------------------------------------நாகேந்திர பாரதி

புதன், 19 மே, 2010

பழைய படகு

பழைய படகு
--------------------------
மழையில் ஆடும்
மனசுப் படகு
பழைய வீட்டுத்
திண்ணையைத் தேடும்
பழைய சோத்துப்
பானையைப் பாடும்
பழைய சொந்தக்
கூட்டத்தில் கூடும்
பழைய நெனைப்பில்
ஆடும் ஓடும்
---------------------------------------நாகேந்திர பாரதி

வெள்ளி, 14 மே, 2010

கருவக் காட்டுக் கதை

கருவக்  காட்டுக்  கதை
-----------------------------------------
காத்தாடி சுத்த
முள்ளைக் கொடுக்கும்
காத்தாடக் கொஞ்சம்
 நிழலும் கொடுக்கும்
ஒதுங்கி உட்கார
மறைவைக் கொடுக்கும்
உருவி விளையாட
பூவும் கொடுக்கும்
காஞ்சு போனதும்
கரியைக் கொடுக்கும்
---------------------------------------நாகேந்திர பாரதி

புதன், 12 மே, 2010

தயார் ஆன தாயார்

தயார் ஆன தாயார்
------------------------------
இட்லி, புளி சாதம்
கட்டி ஆச்சு
தண்ணி, காபிக்கு
பாட்டில் ஆச்சு
வெயிலோ, மழையோ
குடையும் ஆச்சு
அஞ்சு மணிக்கு
அலாரம் ஆச்சு
எல்கேஜி க்யூவுக்கு 
தயார் ஆச்சு
--------------------------------------நாகேந்திர பாரதி

 

உயிர் வழி

உயிர் வழி
------------------
தொட்டிலில் தொடங்கி
தரையினில் தவழ்ந்து
கட்டிலில் மயங்கி
காட்டினில் உறங்கி
சுட்டிடும் நெருப்பில்
சுருங்கிய உடலில்
ஒட்டியே இருந்து
ஓடிய உயிரே
வந்தது எவ்வழி
போனது எங்கே
------------------------------------------நாகேந்திர பாரதி

திங்கள், 10 மே, 2010

கரை தாண்டிய கடல்

கரை தாண்டிய கடல்
--------------------------------------
கடலுக்குள் பூகம்பம்
கரையெங்கும்  சடலங்கள்
உடலுக்கும் உயிருக்கும்
அலைகின்ற ஆன்மாக்கள்
கடலுக்குள் நுழைந்திட்டு
கரைகின்ற தருணங்கள்
சுடருக்கு இருட்டான
சுனாமி சூறாவளி
இடருக்கு அழிவுண்டா
இருட்டுக்கு ஒளியுண்டா
-----------------------------------------------------நாகேந்திர பாரதி

சனி, 8 மே, 2010

தீர்க்க முடியாத கடன்

தீர்க்க  முடியாத  கடன்
-------------------------------------
சீரான சிறு வயிறு
செங்குத்தாய் ஏறி வரும்
நேரான நடை கொஞ்சம்
நெளிந்தபடி மாறி வரும்
நீரான கூட்டுக்குள்
வேரான உடல் வளர்ப்பாள்  
பாராளும் உயிர் ஒன்றை
பத்திரமாய்க் காத்திடுவாள்
போறாது ஒரு ஜென்மம்
பெற்றவளின் கடன் தீர்க்க
------------------------------------------------நாகேந்திர பாரதி

வியாழன், 6 மே, 2010

எல்லாம் தெரிஞ்ச ஏகாம்பரேச்வரி

எல்லாம் தெரிஞ்ச ஏகாம்பரேச்வரி
---------------------------------------------------------
சமையல் தெரியுமாம்
சங்கீதம் தெரியுமாம்
நடனம் தெரியுமாம்
நட்டுவாங்கம் தெரியுமாம்
பின்னல் தெரியுமாம்
பேசத் தெரியுமாம்
மருத்துவம் தெரியுமாம்
மண்ணாங்கட்டி தெரியுமாம்
படிச்சுத் தெரியுமாம்
பண்ணத் தெரியாதாம்
-----------------------------------------------நாகேந்திர பாரதி

புதன், 5 மே, 2010

மறுத்து விட்ட காலம்

மறுத்து  விட்ட காலம்
------------------------------------------
'விளையாட வாப்பா ' என்ற போது
விரட்டி அனுப்பினாய்
விளையாட நினைக்கும் போது பிள்ளை
வேலைக்குச் சென்று விட்டான்
'கடைக்குப் போகணுங்க' என்ற போது
கத்தி அனுப்பினாய்
கடைக்குப் போக நினைக்கும் போது மனைவி
கால் வலியில் படுத்து விட்டாள்
'பணம் அனுப்புடா' என்ற போது
பதுங்கி ஒதுங்கினாய்
பணம் அனுப்ப நினைக்கும் போது அய்யா
பாடையிலே போய் விட்டார்
'வாடா அரட்டைக்கு' என்ற போது
வலிந்து விலக்கினாய்
அரட்டை அடிக்க  நினைக்கும் போது நண்பர்
அயலூர் வாசி ஆகி விட்டார்
அவர்கள் உன்னை நினைத்த போது
நீ அவர்களை மறுத்தாய்
அவர்களை நீ நினைக்கும் போது
காலம் உன்னை மறுத்து விட்டது
---------------------------------------------------------------------------நாகேந்திர பாரதி


 

ஞாயிறு, 2 மே, 2010

சாக்கு போக்குகள்

சாக்கு போக்குகள்
----------------------------------
மீனைக் கேட்டவர்க்கு
மீனைக் கொடுத்தாராம்
கருவாடு கேட்டவர்க்கு
கருவாடு கொடுத்தாராம்
அவனவன் விருப்பத்திற்கு
அழுகியதும் கொடுத்தாராம்
பாத்து வாங்குவது
பாமரன் பாடாம்
சம்பாதிக்கும் முறையில்
சாக்கு போக்குகள்
-----------------------------------------------------நாகேந்திர பாரதி

சனி, 1 மே, 2010

தன் கூட்டம் தான் கூட்டம்

தன் கூட்டம்  தான் கூட்டம்
----------------------------------------------------
கோயிலுக்குப் போனால்
கொள்ளாத கூட்டமாம்
திரைப்படம் போனால்
தெருவெல்லாம் கூட்டமாம்
கடைத்தெரு போனால்
கசகச கூட்டமாம்
கடற்கரை போனால்
கசமுசா கூட்டமாம்
தன குடும்பம் போவதால்
தான் கூட்டம்     ஆவதாம்
---------------------------------------------------------நாகேந்திர பாரதி

புதன், 28 ஏப்ரல், 2010

கோட்டுப் போட்ட குரங்குகள்

கோட்டுப் போட்ட குரங்குகள்
--------------------------------------------------
பரிணாம வளர்ச்சி
பாதியிலே நின்றிருந்தால்
வேட்டி  பேண்டோடு
சில குரங்குகள்
சேலை சுரிதாரில்
சில குரங்குகள்
கோட்டு சூட்டோடு
சில குரங்குகள்
வாலை மட்டும்
வளைத்து ஒளித்துக் கொண்டு
----------------------------------------------------நாகேந்திர பாரதி

வெள்ளி, 23 ஏப்ரல், 2010

ஆகையினால் காதல் வேண்டாம்

ஆகையினால்  காதல் வேண்டாம்
--------------------------------------------------------
காதலிச்சா பதவி
காணாம போகுது
காதலிச்ச சில பேர்
கைதும் ஆகுது
காதலிக்க மாட்டேன்னு
கண்டிப்பாய்ச் சொன்னா
நக்கலாய்ச் சிரிக்கறான்
ஆருயிர் நண்பன்
'உன்னைக் காதலிக்க
ஒருத்தியும் இல்லையேடா  '
----------------------------------------------நாகேந்திர பாரதி

திங்கள், 19 ஏப்ரல், 2010

சொப்பன வீட்டில் மகிழ்ந்து

சொப்பன வீட்டில் மகிழ்ந்து
---------------------------------------
வீடு மேலே வீடு கட்டி
வீதி எல்லாம் நிறைஞ்சாச்சு
தனி வீடு வேணும்னா
தாம்பரத்தைத் தாண்டணும்
ஆபீஸ் வரணும்னா
அம்பதே கிலோ மீட்டர்
ஆஸ்பத்திரி பள்ளிக்கூடம்
அடுத்த மாவட்டம்
சொந்த ஊருக் காரை வீடு
சொப்பனத்தில் சொக்குது
------------------------------------------------நாகேந்திர பாரதி

வெள்ளி, 16 ஏப்ரல், 2010

மறக்க முடியுமா

மறக்க முடியுமா
----------------------------------
பார்த்த முகங்கள்
மறந்து போகுது
கேட்ட குரல்கள்
மறந்து போகுது
வாழ்ந்த ஊர்கள்
மறந்து போகுது
வளர்ந்த இடங்கள்
மறந்து போகுது
தொலைக்காட்சி  தொடர் மட்டும்
மறக்கலே கிழவிக்கு
------------------------------------------------நாகேந்திர பாரதி

கல்யாண மண்டபம்

கல்யாண மண்டபம்
------------------------------------------
மாப்பிள்ளை வீட்டுக்
கல்யாண அழைப்பு
பொண்ணு சொந்தமாய்ப்
போய் இருந்தாங்க
அலங்காரம், கூட்டம்
அட்ட காசம்
விருந்துச்   சாப்பாடு
வெகு ஜோர்
மண்டபம் மட்டும்தான்
மாறிப் போயிட்டாங்க 
----------------------------------------நாகேந்திர பாரதி

வியாழன், 15 ஏப்ரல், 2010

பாவ அழுக்கு

பாவ அழுக்கு
------------------------
ஒரு வருஷ விரதம்
ஒரு வேளைச் சாப்பாடு
செருப்பில்லாக் கால்கள்
ஜெபம் செய்யும் வாய்
நாலு முழ வேஷ்டி
நடந்தே எங்கேயும் 
கடலில் சென்று குளிக்க
காணாமல் போனது என்ன
பாவம் போனதோ என்னவோ
அழுக்கு போனது உண்மை
---------------------------------------------------------நாகேந்திர பாரதி

புதன், 14 ஏப்ரல், 2010

ஓட்டல் சாப்பாடு

ஓட்டல் சாப்பாடு
------------------------------
சோடா உப்பு போட்டதாலே
சோறு ரெம்ப இறங்கலே
காரம் அதிகம் ஆனதாலே
காய்கறிகள் முடியலே
மோரு எல்லாம் தண்ணியாகி
நீரு சாதம் குடிக்கலே
அவ்வளவு  பேர் சாப்பிட்டும்
அளவெதுவும் குறையலே
இருநூறு  ரூபாய்க்கு
எம்புட்டும் சாப்பிடலாமாம்
------------------------------------------நாகேந்திர பாரதி

செவ்வாய், 13 ஏப்ரல், 2010

விடுதியும் வீடும்

விடுதியும் வீடும்
----------------------------------
பத்துக்குப் பத்தில்
படுக்கை ஐவருக்கு
அலமாரிப் பொந்துகளும்
ஐந்தாகப் பங்கீடு
மொத்த விடுதிக்கும்
மூன்றே குளியலறை
பக்கத்துக் காடும்
கண்மாயும் கழிவறை
விடுதி விடுமுறையில் 
வீடு அரண்மனை
--------------------------------நாகேந்திர பாரதி

ஞாயிறு, 11 ஏப்ரல், 2010

போயே போச்சு

போயே  போச்சு
--------------------------
ஈயம் பித்தாளைக்கு
பேரீச்சம் பழம்
நெல்லைப் போட்டு
கீரைக் கட்டு
திண்ணை மேலே
தாயக் கட்டம்
சாயந்தரம் வரும்
மீன் சைக்கிள்
பெருசுக ளோடே
போயே போச்சு
--------------------------------------நாகேந்திர பாரதி

சொந்தக் காலம்

சொந்தக் காலம்
-------------------------------
ஒரு  துளி மழைக்கு
ஒதுங்குவோம் தெரு ஓரம்
மழைக்காலம் ரெம்ப மோசம்
ஒரு துளி வேர்வைக்கு
உஸ் என்று அயர்வோம்
வெயில் காலம் ரெம்ப மோசம்
மார்கழி காலையில்
போர்வையில் முடங்குவோம்
குளிர் காலம் ரெம்ப மோசம்
எந்தக் காலம் தான்
சொந்தக் காலம்
---------------------------------------------நாகேந்திர பாரதி

சனி, 10 ஏப்ரல், 2010

முற்பகல் செய்யின் ....

முற்பகல் செய்யின் ....
-------------------------------------
'செங்கல்பட்டு பக்கத்துலே
பங்களா வீடு வருது
ஆபீசும் அங்கே போறோம்
அப்பப்ப சென்னை வாறோம் '
முடிவெடுத்த பையனிடம்
அடிமனதைச் சொல்லவில்லை
இறந்து போன அப்பாவின்
மறந்து போன வாக்கியங்கள்
'எதிரெதிரே பாத்துக்கலாம்
மதுரை விட்டுப் போகணுமா'
----------------------------------------நாகேந்திர பாரதி

வெள்ளி, 9 ஏப்ரல், 2010

புழுதிப் பயணம்

புழுதிப்  பயணம்
-----------------------------
கால் தடத்தில் உருவான
ஒத்தையடிப் பாதையின்
ஓரத்தில் கருவ மரங்கள்
கான்கிரீட்டில் உருவான
மெட்ரோ ரோட்டோரம்
மெர்குரி கம்பங்கள்
கார் ஹாரனிலும்
மாட்டு வண்டியின்
மணியோசை கேட்கிறது
மறக்க முடியாத
மண் புழுதிப்   பயணங்கள்
---------------------------------------------நாகேந்திர பாரதி
ஆரம்பமும் முடிவும்
-----------------------------------------
ஆரம்ப காலத்தில்
அழுகையும் சிரிப்பும்தான்
அறிந்த தெல்லாமே
வலியும் அமைதியும்தான்
போகப் போகத்தான்
புதிது புதிதாக
புரியாத தெல்லாமே
புரிந்த பின்புதான்
புரிந்த தெல்லாமே
புரியாமல் போனது
----------------------------------------நாகேந்திர பாரதி

வியாழன், 8 ஏப்ரல், 2010

மரமும் மனிதனும்

மரமும் மனிதனும்
---------------------------------
மரமாக நிற்பதில்
மகிழ்ச்சி இருக்கிறது
பூத்துக் கொண்டு
காய்த்துக் கொண்டு
பழுத்துக் கொண்டு
குலுங்கிக் கொண்டு
ஒவ்வொரு பருவத்திலும்
ஒவ்வொரு விதமாக  
கோடரி விழாதவரை
கொம்பு சாயாதவரை
------------------------------------------நாகேந்திர பாரதி

புதன், 7 ஏப்ரல், 2010

உலக சுகாதாரம்

உலக சுகாதாரம்
----------------------------
சாக்கடையில் குளித்து
சொறி சிரங்கு
வேக்காட்டில் கிடந்து
காய்ச்சல் சூடு
பாடாவதி உணவால்
வாந்தி பேதி
காலாவதி மருந்தால்
காலன் வீடு
உலக சுகாதாரம்
ஓங்கி வளர்க
---------------------------------நாகேந்திர பாரதி

திங்கள், 5 ஏப்ரல், 2010

நீர்த்துப் போன நீர்

நீர்த்துப் போன நீர்
---------------------------------
மழையில் இருந்து
மணமாய், மலர்ச்சியாய்
போகும் வழியில்
புண்பட்டுப் போய்
சாக்கடைக் கழிவு
சாவின் அழிவு
கறுத்துப் போய்
கலங்கிப் போய்
கடலை நோக்கி
முடிவை நோக்கி
------------------------------------------நாகேந்திர பாரதி

சனி, 3 ஏப்ரல், 2010

சுற்றுப் பிரகாரம்

சுற்றுப்  பிரகாரம்
---------------------------------
சிற்பிக்குப் பிடித்துச்
செதுக்கிய சிலைகள்
இரண்டு தலைகள்
ஒரு உடம்பு
வாய்க்குள் உருளும்
வட்டக் கல்
அரிசிக் கல்லில்
அனுமான் உருவம்
பிரகார மூலையில்
பேசாமல் இருக்கும்
------------------------------------------நாகேந்திர பாரதி

வெள்ளி, 2 ஏப்ரல், 2010

அப்பத்தா

அப்பத்தா
-------------------
'பொய்யாட்டம் ஆடி
பசுவெல்லாம் அள்ளிட்டே'
'பொன்னியின் செல்வனை
வாசிச்சுக் காமிப்பா'
'துண்டைப் போடுப்பா  
நானே துவைச்சுறேன்'
'திரும்பி வர்றப்போ
இருப்பேனோ, மாட்டேனோ'
எரித்த இடத்தில்
எங்கேயோ அப்பத்தா
-----------------------------------------நாகேந்திர பாரதி

அப்பா

அப்பா
---------------
'கம்பரிச்ச நுங்கை
இன்னும் ரெண்டு குடி'
'செகண்ட் ஷோ சினிமா
சேந்து போகலாமா'
'உன் பழைய சட்டைய
நான் போட்டுக்கவா'
'சனியும் புதனும்
எண்ணை தேய்த்துக் குளி'
வார்த்தையில்லா  உதட்டின் மேல்
வாய்க்கரிசி
--------------------------------------------நாகேந்திர பாரதி

'

வியாழன், 1 ஏப்ரல், 2010

முட்டாள் தினங்கள்

முட்டாள் தினங்கள்
--------------------------------
புளியங்  கொட்டை சூடு
புற முதுகு இங்க்      
வலிய வந்த வாழ்த்து
வருந்த வைத்த விபத்து
ஒரு நாள் முட்டாளாகி
வழிந்தது அப்போது
போதையில் புதைந்து
புகையினில் எரிந்து
எப்போதும் முட்டாளாய்
இருப்பது  இப்போது
-------------------------------------------நாகேந்திர பாரதி

புதன், 31 மார்ச், 2010

தின்பண்ட காலம்

தின்பண்ட காலம்
----------------------------
நுங்கும் கிழங்கும்
மொங்கிய காலம்
முறுக்கும&