வியாழன், 31 டிசம்பர், 2009

நம்ம விதி இப்படி

நம்ம விதி இப்படி

---------------------------

நம்ம போகும்போது தான்

சிவப்பு சிக்னல் விழுது

நம்ம சாப்பிடும்போது தான்

அரிசிக் கல்லு மாட்டுது

நம்ம படிக்கிறப்போ தான்

நல்லா தூக்கம் வருது

நம்ம பரீட்சையப்போ தான்

எல்லாக் கேள்வியும் கஷ்டம்

அது என்னமோ தெரியலை

நம்ம விதி இப்படி

------------------------------நாகேந்திர பாரதி

புதன், 30 டிசம்பர், 2009

கொத்துப் புரோட்டா

கொத்துப் புரோட்டா
--------------------------
சுழற்றி வீசும் சத்தம்
கும்மி அடிக்கும் சத்தம்
கொத்தி கிளறும் சத்தம்
காதுக்கு சுவை சேர்க்கும்
மணக்கும் புரோட்டா, கறி
இலையிலே வந்தமர
நாசிக்கும் நாவுக்கும்
நல்ல சுவை சேர்க்கும்
கொத்து புரோட்டா ஒரு
பத்து உள்ளே போகும்
---------------------------------நாகேந்திர பாரதி

திங்கள், 28 டிசம்பர், 2009

இப்படியும் ஒரு பெண்

இப்படியும் ஒரு பெண்

-------------------------------

கோயிலுக்குப் போக வேண்டும்

கோலம் போடத் தெரிய வேண்டும்

ராமஜெயம் எழுத வேண்டும்

ராகத்தோடு பாட வேண்டும்

பட்டுச் சேலை உடுத்த வேண்டும்

படிப்பறிவு இருக்க வேண்டும்

மென்மையாகப் பேச வேண்டும்

பெண்மையாக நளினம் வேண்டும்

இப்படியொரு பெண் இருக்கிறார்

எங்க வீட்டு பாட்டி

ஞாயிறு, 27 டிசம்பர், 2009

சிங்கப்பூர் பையன்

சிங்கப்பூர் பையன்
--------------------------
பனியன் ஜட்டி கிடக்கட்டும்
நான் துவச்சிப் போடறேன்
சாப்பிட்ட பிறகு கொஞ்சம்
தூங்கிட்டுப போப்பா
என்னடா தம்பி இப்படி
இளைச்சிப் போயிட்டே
பிரியத்துக்கு மறுபேராய்
இருந்த பெரியம்மா
செத்துப் போனப்ப பையன்
சிங்கப்பூரில் இருந்தான்
-------------------------நாகேந்திர பாரதி

இப்படி, அப்படி

இப்படி, அப்படி
--------------------------
சிலருக்கு வயதான பின்
தேஜஸ் சேர்கிறது
சிலருக்கு வயதான பின்
நரைதிரை ஆகிறது
சிலர் பேச்சில்
அமைதி கூடுகிறது
சிலர் பேச்சில்
ஆணவம் ஆடுகிறது
சிலர் இப்படி
சிலர் அப்படி
-----------------------நாகேந்திர பாரதி

தெரு நாய்கள்

தெரு நாய்கள்
----------------------------

எத்தனை நாய்களைப்

பார்த்திருக்கிறோம்

சில நாய்கள் ஒல்லியாய்

சில நாய்கள் குண்டாய்

சிலவற்றைப் பார்த்து பயந்து

சிலவற்றை அடித்து விரட்டி

சிலதிடம் கடி வாங்கி

சிலதிடம் கல் ஓங்கி

சிலவற்றைக் காணோம்

சிலது திரியுது தெருவில்

-----------------------நாகேந்திர பாரதி

சனி, 26 டிசம்பர், 2009

ராக ஆலாபனை

ராக ஆலாபனை

---------------------------

கல்யாணி ராகம்

சுதா பாடிக் கேக்கணும்

பைரவி ராகம்

சௌம்யா பாடிக் கேக்கணும்

ஏன் ஓய் மத்தவங்க

பாடினா கேக்க முடியாதா

பத்திரிகையிலே படிச்சதை

சொல்றே னய்யா

எந்த ராகமும் யாரும் பாடி

நான் கேட்டதில்லே

---------------------------------நாகேந்திர பாரதி

வெள்ளி, 25 டிசம்பர், 2009

இன்று போய் நாளை வா

இன்று போய் நாளை வா
----------------------------
மாத்திரைச் சீட்டைப் பார்த்த
மருந்துக் கடைக்காரர் சொன்னார்
ம்ம் சுகர் இருக்கு போலிருக்கு
பலே பிபியும் இருக்கு
கொலஸ்ட்ராலும் இருக்கே
ரொம்ப மோசமா இருக்கு
கவனமா இருங்க சார்
இந்த மாத்திரை எல்லாம்
இப்போ ஸ்டாக் இல்லை
நாளைக்கு வாங்க
-------------------------------நாகேந்திர பாரதி

வியாழன், 24 டிசம்பர், 2009

வாராந்தர மீட்டிங்

வாராந்தர மீட்டிங்

---------------------------

குறைகளை எல்லாம்

அரைகுறையாய்க் கேட்டு விட்டு

சுய புராணம் பாடிவிட்டு

வேலை செய்யச் சொல்லிவிட்டு

காப்பி சாப்பிட்டு விட்டு

கெண்டகி சிக்கனை

மனைவிக்கு வாங்க

அவசரமாய்ப் புறப்படுவார்

ஆபீஸ் மேனேஜர்

அஞ்சு மணிக்கே

----------------------------நாகேந்திர பாரதி



புதன், 23 டிசம்பர், 2009

மார்கழியின் காலை

மார்கழியின் காலை
--------------------------
தெருவெங்கும் பஜனை வரும்
திருப்பாவைப் பாட்டு வரும்
வாசலிலே கோலம் வரும்
பூசணிப்பூ நடுவில் வரும்
இளையோர்க்குக் காதல் வரும்
முதியோர்க்கும் இளமை வரும்
குளிருக்கு வேளை வரும்
கோயிலுக்குக் கூட்டம் வரும்
மார்கழியின் காலை வரும்
மனமெங்கும் சோலை வரும்
----------------------------------------நாகேந்திர பாரதி

செவ்வாய், 22 டிசம்பர், 2009

கண்ணீர்க் காதல்

கண்ணீர்க் காதல்
----------------------
வருஷம் ஓடுது
வயசும் கூடுது
கல்யாணம் ஆகுது
கடமை ஏறுது
பணமும் சேருது
பாதை தேறுது
புகழும் கூடுது
கூட்டம் சேருது
கண்ணீர் ஊறுது
காதல் வாழுது
-------------------------------------நாகேந்திர பாரதி

ஞாயிறு, 20 டிசம்பர், 2009

காணாமல் போன காலம்

காணாமல் போன காலம்
---------------------------
வருஷா வருஷம்
வந்து போறாங்கதான்
சிரிச்சிப் பேசி
இருந்து போறாங்கதான்
பணமும் உதவியும்
பண்ணிப் போறாங்கதான்
என்னதான் இருந்தாலும்
என்னமோ ஏங்குது
கதை சொன்ன காலம்
காணாமல் போயிருச்சே
---------------------------------------நாகேந்திர பாரதி

சனி, 19 டிசம்பர், 2009

குடி கெடுக்கும்

குடி கெடுக்கும்
------------------
போதையை ஏற்றி வைக்கும்
பாதையை மாற்றி வைக்கும்
மனைவியை அடிக்க வைக்கும்
மக்களைத் துடிக்க வைக்கும்
பணத்தைப் பறக்க வைக்கும்
குணத்தை மறக்க வைக்கும்
ரத்தத்தை மாற்றி வைக்கும்
பித்தத்தை ஏற்றி வைக்கும்
குடியைச் சிறுக்க வைக்கும்
குடும்பத்தை வெறுக்க வைக்கும்
--------------------------------------------நாகேந்திர பாரதி

வெள்ளி, 18 டிசம்பர், 2009

விடலைப் பருவம்

விடலைப் பருவம்
-----------------------
படுத்தவுடன் தூங்கும்
அடித்தவுடன் எழும்
பசியாக எடுக்கும்
பாடாகப் படுத்தும்
வெயிலிலே ஓடும்
மழையிலே ஆடும்
கலையார்வம் பிடிக்கும்
காதலிக்கத் துடிக்கும்
விடலைப் பருவம்
விறுவிறு பருவம்
-------------------------------நாகேந்திர பாரதி

வியாழன், 17 டிசம்பர், 2009

கண்மாய்க் குளியல்

கண்மாய்க் குளியல்
-------------------------
கனமழைக்கு மறுநாள்
கண்மாய்க் குளியல்
பச்சைக் குட்டை
பால்வெள்ளை ஆயிடுச்சு
ஆற அமர
அழுக்குத் தேச்சு
துவச்சி முடிச்சு
துணியைக் கட்டி
எழுந்து போறச்ச
'எம்புட்டுத் தண்ணீ''
-------------------------------நாகேந்திர பாரதி

திங்கள், 14 டிசம்பர், 2009

ஓர சீட்டு ஆசை

ஓர சீட்டு ஆசை
----------------------
தொங்கிக் கொண்டு போகும்போது
உள்ளே போக ஆசை
உள்ளே போன பின்பு
உரசாமல் நிற்க ஆசை
உரசாமல் நின்ற பின்பு
உட்கார்ந்து போக ஆசை
உட்கார்ந்து போகும் போது
ஓர சீட்டு ஆசை
ஓர சீட்டு கிடைத்த பின்பு
வாந்தி வரும் ஓசை
------------------------------------நாகேந்திர பாரதி

சனி, 12 டிசம்பர், 2009

அது காதல்

அது காதல்
----------------
அவன் கால் இடித்து
தோல் பிய்ய
அவள் கண் இடுக்கில்
நீர் கொள்வாள்
அவள் காய்ச்சலினால்
சோர் வடைய
அவன் மாத்திரையை
ஊட்டி டுவான்
துன்பத்தில் துணை இருக்கும்
தூய்மைக்குப் பேர் காதல்
---------------------------------------- நாகேந்திர பாரதி

வியாழன், 10 டிசம்பர், 2009

ரெண்டும் கெட்டான்

ரெண்டும் கெட்டான்

-----------------------

பார்வையில் பிரியம்

பேச்சில் விஷமம்

வராவிட்டால் விசாரிப்பு

வந்தால் புறக்கணிப்பு

கூட்டத்தில் அரட்டை

தனியாக மௌனம்

இங்கிட்டும் போகாம

அங்கிட்டும் போகாம

ரெண்டும் கெட்டானாய்

என்னடி பாசாங்கு

---------------------------------------------நாகேந்திர பாரதி

புதன், 9 டிசம்பர், 2009

கிராம நெனைப்பு

கிராம நெனைப்பு
--------------------
கண்மாய் மேட்டு
களிமண் சறுக்கு
வைக்கோல் படப்பில்
படுத்த அரிப்பு
கழலும் சைக்கிள்
செயினின் பிசுக்கு
ஊறப் போட்ட
மிளகா உறைப்பு
கிண்டிப் பாக்க
கிராம நெனைப்பு
-----------------------------------நாகேந்திர பாரதி

செவ்வாய், 8 டிசம்பர், 2009

மீன் குழம்பு

மீன் குழம்பு
--------------
வெங்காயம் புளியோடு
வெந்தயம் மிளகோடு
மசாலா மணத்தோடு
வாளைமீன் கொதிக்க
பக்கத்தில் வஞ்சிரம்
எண்ணையில் மிதக்க
சோற்றோடு சேர்த்து
சுவைக்க சொர்க்கம்
மறுநாள் தோசைக்கும்
மண்டிக் குழம்பு
-------------------------------நாகேந்திர பாரதி

ஞாயிறு, 6 டிசம்பர், 2009

கோபுரக் காதல்

கோபுரக் காதல்
--------------------
கோபுர இருட்டு
படிக் கட்டுக்கள்
முதல் இரண்டில்
வௌவால் புழுக்கை
அடுத்த இரண்டில்
கரிக் கீறல்கள்
கடைசி மூன்றில்
காதல் கதைகள்
கடவுள் தான்
காப்பாற்ற வேண்டும்
-----------------------------------நாகேந்திர பாரதி

வெள்ளி, 4 டிசம்பர், 2009

காத்துக் கிடக்கும்

காத்துக் கிடக்கும்

--------------------------

சில பொருட்கள்

சில இடங்களில்

சில நினைவுகளோடு

அப்பத்தா காது குடைந்த

கோழி இறகு

கூரை இடுக்கில்

தாத்தா போட்ட

பொடி டப்பா

மாடக் குழியில்

காத்துக் கிடக்கும்

-----------------------------நாகேந்திர பாரதி

வியாழன், 3 டிசம்பர், 2009

மழைக் காலம்

மழைக் காலம்
----------------------

கொட்டும் மழையில்

குளித்துக் கொண்டே

கிராம கிரிக்கெட்

கிட்டி விளையாட்டு

தியேட்டர் வாசல்

வரிசைப் பயணம்

படியில் தொங்கி

பஸ்ஸில் கல்லூரி

காய்ச்சலும் இல்லை

தும்மலும் இல்லை

--------------------------------------நாகேந்திர பாரதி

செவ்வாய், 1 டிசம்பர், 2009

கனவு முகங்கள்

கனவு முகங்கள்
----------------------
எங்கோ பிறந்து
எங்கோ வளர்ந்து
எங்கோ முடியும்
வழியில் யார் யாரோ
சுற்றமும் நட்பும்
தொடர்ந்து வந்தாலும்
நடுவில் பிரிந்தவை
எத்தனை முகங்கள்
கனவில் வரும்
சில முகங்கள்
--------------------------------------நாகேந்திர பாரதி

கடற்கரைக் கண்ணீர்

கடற்கரைக் கண்ணீர்
-----------------------------
சமாதியும் உண்டு- இறைவன்
சந்நிதியும் உண்டு
சுத்தக் காற்றும் உண்டு- காதல்
ஜோடிகளும் உண்டு
பஜ்ஜி வடைகள் உண்டு - பட்டம்
பறக்கும் வானம் உண்டு
குதிரை ஓட்டம் உண்டு - குழந்தை
ஆடும் ஆட்டம் உண்டு
என்ன உண்டு என்ன - சுனாமி
இழைத்த கண்ணீர் உண்டு
--------------------------------------நாகேந்திர பாரதி

சனி, 28 நவம்பர், 2009

ஏறு, ஏறு

ஏறு, ஏறு

----------------

கூட இருந்து

குழி பறிப்பார் சிலர்

தூர இருந்து

குறி பார்ப்பார் சிலர்

முன்னால் விழுந்து

காலை வாருவார் சிலர்

பின்னால் இருந்து

பற்ற வைப்பார் சிலர்

எல்லோர் எரிய

ஏறு மேலே ஏறு

---------------------------------நாகேந்திர பாரதி

வியாழன், 26 நவம்பர், 2009

காலக் கோலம்

காலக் கோலம்

----------------------

கண்மாய் பெருக்கெடுத்து

கரையெல்லாம் உடைப்பெடுத்து

வீட்டுக்குள் வந்த தண்ணி

வடிவதற்கு காத்திருப்பது

ஒரு காலம்

கண்மாய் சகதியாகி

காஞ்சு கருப்பாகி

ஊருணி கிணறு

ஊறுவதற்கு காத்திருப்பது

ஒரு காலம்

-----------------------------நாகேந்திர பாரதி

புதன், 25 நவம்பர், 2009

சிறுக்கி முகம்

சிறுக்கி முகம்

---------------------

ஆளைப் பாத்து மயங்கி

பேச்சைக் கேட்டு கிறங்கி

தொட்டுப் பேசித் தொடங்கி

தூரப் போக வெதும்பி

வேலை விட்டு விலகி

போதைக் குள்ளே முழுகி

உடலும் மனமும் ஒடுங்கி

போற காலம் வந்தும்

சிறுக்கி முகம் மறக்கலே

சிரிச்ச சிரிப்பு மறையலே

-------------------------நாகேந்திர பாரதி

செவ்வாய், 24 நவம்பர், 2009

பள்ளிப் பருவம்

பள்ளிப் பருவம்

--------------------------

முழங்கைச் சிராய்ப்போடு

புழுதிக் காலோடு

வயிறெல்லாம் பசியோடு

பரீட்சைப் பயத்தோடு

பள்ளிப் பருவம்

----------------------------------நாகேந்திர பாரதி

திங்கள், 23 நவம்பர், 2009

இருட்டு

இருட்டு
---------------
தினத்துக்கும் அலைந்ததாலே
தொலைந்திட்ட மனிதத்தை
மனத்துக்குள் வெளிச்சம் காட்டி
மறுபடி பிறக்க வைக்கும்
இருட்டுக்கு ஒளி உண்டு
-------------------------------------நாகேந்திர பாரதி

திங்கள், 26 அக்டோபர், 2009

வெயில் மயக்கம்

வெயில் மயக்கம்
-----------------------
பத்து மணி வெயிலும்
ரெண்டு மணி வெயிலும்
மயக்க சுகம் தான்
பள்ளிக்கூடக் காலத்தில்
விளையாட்டு மயக்கம்
கல்லூரிக் காலத்தில்
சினிமா மயக்கம்
காதல் காலத்தில்
பஸ் ஸ்டாண்ட் மயக்கம்
இப்போது நடந்தால்
வயதான மயக்கம்
-----------------------------------------நாகேந்திர பாரதி
------------------------------------------------------------------------------------

சனி, 24 அக்டோபர், 2009

காலம் கடந்த காதல்

காலம் கடந்த காதல்

--------------------------

கால்களின் தளர்ச்சியை
நடை சொல்கிறது

கண்களின் வறட்சியை

பார்வை சொல்கிறது

இதழ்களின் மிரட்சியை

வார்த்தை சொல்கிறது

உருவத்தின் முதுமையை

காலம் சொல்கிறது

உள்ளத்தின் இளமையை

காதல் சொல்கிறது

-----------------------------நாகேந்திர பாரதி

-------------------------------------------------------------

வியாழன், 22 அக்டோபர், 2009

இன்னொரு பெரியார்

இன்னொரு பெரியார்
-----------------------------
சாதி மதச் சண்டை
ஓய வில்லை
சனிப் பெயர்ச்சிக் கூட்டம்
குறைய வில்லை
முப்பது சத விகிதம்
முடிய வில்லை
குழந்தைப் பருவ வேலை
குறைய வில்லை
இன்னொரு பெரியார்
எப்போது பிறப்பார்
-------------------------- நாகேந்திர பாரதி
---------------------------------------------------------------------------

வியாழன், 8 அக்டோபர், 2009

பறவைகள் சில

பறவைகள் சில

-------------------------

இருட்டிய பின்பும்

பறவைகள் சில

இங்கும் அங்கும்

பறந்து கொண்டு

கூடு இல்லையா?

குடும்பம் இல்லையா?

கோபம் வந்ததா?

குழந்தைத் தனமா?

இளமைத் திமிரா?

எதுவும் புரியவில்லை

-----------------------------நாகேந்திர பாரதி

திங்கள், 5 அக்டோபர், 2009

பிச்சைக்காரன்

பிச்சைக்காரன்

---------------------

வெறித்த பார்வையில் ஏதோ

வேதனை தெறிக்கும் உள்ளே

சொரியும் தாடிக்குள் ஏதோ

சோகம் தூங்கும் உள்ளே

தளர்ச்சி நடையில் ஏதோ

தாக்கம் தெரியும் உள்ளே

பசியின் களைப்பில் ஏதோ

பாடம் ஓடும் உள்ளே

யார் பெற்ற பிள்ளை இவன்

எப்படி ஆனான் இப்படி

------------------------------------------நாகேந்திர பாரதி

திங்கள், 28 செப்டம்பர், 2009

காலக் கோலங்கள்

காலக் கோலங்கள்
----------------------------
மாறி வரும் காலங்கள்
போடுகின்ற கோலங்கள்
நூலாக இறங்கிப் பின்
பந்தாகத் தாக்கும் மழை
காலையிலும் வேர்க்க வைத்து
மாலை வரை சுடும் சூரியன்
தூக்கத்தை நீட்டி விட்டு
போர்வைக்குள் இறங்கும் குளிர்
கோடை, மழை, குளிர் என்று
கூட்டி விடும் வயதொன்று
-----------------------------------நாகேந்திர பாரதி
---------------------------------------------------------

சனி, 19 செப்டம்பர், 2009

நெருப்பு

நெருப்பு

--------------

காட்டை எரிக்கும்போது கங்கு

மனத்தை அரிக்கும்போது காதல்

வயிற்றை வாட்டும்போது பசி

நெஞ்சில் மூட்டம் போட்டால் வஞ்சம்

வார்த்தை சுடும்போது கோபம்

பயத்தை ஊதி விட்டால் கவலை

நெருப்பில் நீரை விட்டால் போதும்

நினைப்பை அடங்கவிட்டால் ஆகும்

-----------------------------------------------நாகேந்திர பாரதி

-------------------------------------------------------------------

ஒத்தையடிப் பாதை

ஒத்தையடிப் பாதை

----------------------

அந்த இடத்தில் அதே

ஒத்தையடிப் பாதை

ஆனால் உருவாக்கிய

கால்களும் தடங்களும் வேறு

கோணல் மாணல்கள்

சற்று வித்தியாசமாய்

சுற்றுச் செடி கொடிகளும்

வேறு விதமாய்

சுமைகளும் வண்டித் தடங்களும்

அதே சோக அழுத்தத்தோடு

------------------------------------------நாகேந்திர பாரதி

------------------------------------------------------------------

புதன், 2 செப்டம்பர், 2009

கர்ப்பக் கிரகம்

கர்ப்பக் கிரகம்

----------------

கோயில் கர்ப்பக் கிரகத்துக்குள்

மறுபடி கருவறை வாசம்

நெய் மணத்தோடு

தீப ஒளியோடு

மணி ஓசையோடு

பக்திப் பரவசத்தோடு

இறை தரிசனத்தோடு

மோனத் தவமிருந்து

திரும்பி வரும்போது

மறுபடியும் பிறப்பு

----------------------------நாகேந்திர பாரதி

புதன், 19 ஆகஸ்ட், 2009

சாகாத காதல்

சாகாத காதல்
-----------------
அது ஒரு அம்பது
வருஷத்துக்கு முந்தி
அவள் பாடல் புத்தகத்துக்கு
அட்டை போட்டுக் கொடுத்தது
அவள் பாவடை தாவணிக்கு ஏத்த
பூப் பறிச்சுக் கொடுத்தது
அவள் பொட்டு வண்டியிலே
போறதைப் பாத்து அழுதது
இது ஒரு அஞ்சு
நிமிஷத்துக்கு முந்தி
அவன் செத்துப் போனது
----------------------------நாகேந்திர பாரதி
-----------------------------------------------------

முதுமை உலகம்

முதுமை உலகம்

-----------------------------

அமுக்க வரும் உறக்கத்திற்கு

அலறும் மனம்

வலிக்க வரும் நோய்களுக்கு

மருந்துக் கூட்டம்

பேச வரும் வார்த்தைகளில்

எரிச்சல் ஏக்கம்

படுக்கை அறை தனிமையிலே

பழமை ஓடும்

முடிந்து விட்ட வாழ்க்கையிலே

முதுமை உலகம்

-----------------------நாகேந்திர பாரதி

------------------------------------------

திங்கள், 17 ஆகஸ்ட், 2009

அந்தச் சாலை

அந்தச் சாலை
-------------------
நீளமாக வெறுமையாக
ஏதோ சிந்தனையில்
அந்தச் சாலை
வெறும் மண்ணாக இருந்து
கல்லாய் மாறி
தாரில் இறுகி
எத்தனை பஸ்கள்
எத்தனை லாரிகள்
எத்தனை கால்கள்
மிதிபட்டு மிதிபட்டு
அடிபட்டு அடிபட்டு
வலிபட்டு வலிபட்டு
எல்லாவற்றையும் தாங்கிக் கொண்டு
எதற்கும் கவலைப்படாமல்
அந்தச் சாலை
------------------------------நாகேந்திர பாரதி
-----------------------------------------------------------

சனி, 15 ஆகஸ்ட், 2009

விளையாட்டுப் பருவம்

விளையாட்டுப் பருவம்

-------------------------------

கொடுக்காப்புளி மர நிழலில்

கோலிக் குண்டு விளையாட்டு

கோயில் பிரகார வாகனங்களில்

ஒளிந்து பிடித்து விளையாட்டு

ஈர மண்ணில் குழி தோண்டி

கிட்டிப் புள் விளையாட்டு

பள்ளிக்கூட மைதானத்தில்

வாலிபால் விளையாட்டு

விளையாட்டாய் கழிந்து போன

பள்ளிக்கூடப் பருவம்

--------------------------------------நாகேந்திர பாரதி

------------------------------------------------------------------

வெள்ளி, 14 ஆகஸ்ட், 2009

கிராமக் காலம்

கிராமக் காலம்
--------------------
அது ஒரு காலம்
கிராமக் காலம்
ஆகாயத்தை ரசித்துக் கொண்டு
கண்மாயில் குளித்துக் கொண்டு
கோயிலுக்குப் போய்க் கொண்டு
சைக்கிளில் சுற்றிக் கொண்டு
தெருப் புழுதி ஏற்றிக் கொண்டு
திட்டுக்கள் வாங்கிக் கொண்டு
இளமைக் காலம்
இன்பக் கோலம்
--------------------------நாகேந்திர பாரதி
--------------------------------------------------

வியாழன், 13 ஆகஸ்ட், 2009

காதல் அகராதி

காதல் அகராதி
-----------------------
யார் என்றால்
அவர் என்று பொருள்
என்ன என்றால்
தெரியும் என்று பொருள்
எப்போது என்றால்
இப்போது என்று பொருள்
ஏன் என்றால்
தயார் என்று பொருள்
காதல் அகராதியில்
வினோத அர்த்தங்கள்
---------------------------------நாகேந்திர பாரதி

புதன், 1 ஜூலை, 2009

ஒண்ணும் ஒண்ணும் சைபர்

ஒண்ணும் ஒண்ணும் சைபர்

------------------------------------

ஒண்ணாம் நம்பராய்

இருந்தாலே கஷ்டம்தான்

ஓங்கிப் பேசியே

பழக்கம் ஆயிடும்

என்ன சொன்னாலும்

எதுத்துப் பேசணும்

எவனா இருந்தாலும்

சொன்னதைக் கேக்கணும்

ஒண்ணும் ஒண்ணும் சேந்தா

சைபர் தான்

----------------------------------நாகேந்திர பாரதி

---------------------------------------------------------------------------

செவ்வாய், 30 ஜூன், 2009

மனிதனே இறைவன்

மனிதனே இறைவன்

------------------------

மனக் கிரகத்திற்கு

மதிப்பு கொடுங்கள்

வெளிக் கிரகத்தை

விட்டுத் தள்ளுங்கள்

உங்களுள் ஒளிரும்

கடவுளை உணருங்கள்

வெளிக் கடவுளுக்குள்

வெளிச்சம் தேடாதீர்

எல்லா மனிதரும்

இறைவனாய் உணருங்கள்

---------------------------------------நாகேந்திர பாரதி

-------------------------------------------------------------

ஞாயிறு, 28 ஜூன், 2009

தூக்க மருந்து

தூக்க மருந்து

-----------------

துக்கத்தை உறைய வைத்து

துயரத்தைக் குறைய வைக்கும்

துரோகத்தை மறக்க வைத்து

பழிப்படலம் முடித்து வைக்கும்

சித்தெறும்பு நேரத்தை

புலிப்பாய்ச்சல் பாய வைக்கும்

மருந்தாகத் தாயாக

மாறுகின்ற தூக்கத்தின்

துணை கொண்டு வாழ்ந்திருந்து

தொடங்கிடுக புது வாழ்வு

--------------------------------நாகேந்திர பாரதி

---------------------------------------------------------------------

அப்பாவி இரவு

அப்பாவி இரவு

-------------------

இரவின் குரல்

சில சமயம் அபாயமாய்

ரெயில்வே ஸ்டேஷனில் இருந்து

போலீஸ் ஸ்டேஷன் போய்

திரும்பி நடந்து

திகைத்து அடங்கி

பகலின் குரலுக்குள்

தொலைந்து போகும்

அப்பாவிக்குள் பாவியாய்

இரவின் குரல்

---------------------------நாகேந்திர பாரதி

------------------------------------------------

நீர்க் கம்பிகள்

நீர்க் கம்பிகள்
-------------------
சன்னல் கம்பிகளைச் சுற்றும்
நீர்க் கம்பிகள்
குளிரில் நடுங்கும் புறா ஒன்று
சன்னலோரம் ஒதுங்கும்
கார் தெறிக்கும் சேறு ஒட்ட
உதறும் சிறகை
சன்னல் வழி வடிந்து
வீட்டுக்குள் நுழையும் கம்பியாக
புது மழை மணத்தோடு
விட்டு வைப்பான் அப்படியே
----------------------------------நாகேந்திர பாரதி
--------------------------------------------------------------------

காதல் பிச்சை

காதல் பிச்சை
----------------
கோயில் வாசலில்
ஒரு பிச்சைக்காரன்
தாடியோடு, தட்டோடு, காரணத்தோடு
கோபுரத்தில் ஒளி வெள்ளம்
நாதசுர மேள ஓசை
அம்மன், சாமி புறப்பாடு
கூட வரும் ஜோடிகளில்
சிலர் போடும் சில்லறைகள்
எழுப்பும் சப்தத்தில் அடங்கும்
அவளின் விம்மல் ஒலி
-----------------------------------நாகேந்திர பாரதி
--------------------------------------------------------------------

செவ்வாய், 23 ஜூன், 2009

உணர்ச்சிக் கோலம்

உணர்ச்சிக் கோலம்

------------------------

அது ஒரு காலம்

அப்பாவின் விரலைப் பற்றிக்கொண்டு

படித்துக்கொண்டு

பாடிக் கொண்டு



இது ஒரு காலம்

இனிய இளைஞனோடு

காதலித்துக் கொண்டு

கல்யாணம் செய்து கொண்டு



ஒவ்வொரு காலமும் ஒரு

உணர்ச்சிக் கோலம்

---------------------------நாகேந்திர பாரதி

-----------------------------------------------------------

வியாழன், 18 ஜூன், 2009

போலி மனிதர்கள்

போலி மனிதர்கள்

--------------------------

சிரிப்புக்குள் விஷம் வைத்து செலவழிப்பார்

சில்லறைக்கு மட்டுமே வரவு வைப்பார்

கறுப்புக்குள் பணமாக குவித்து வைப்பார்

கடவுளுக்கும் கொஞ்சூண்டு கொடுத்து வைப்பார்

போகவர உறைத்தாலும் பொருட் படுத்தார்

போன்சாய் மரமாக வெட்டிக் கொள்வார்

பருப்புக்கும் அரிசிக்கும் அலைக் கழிவோர்

நெருப்புக்குள் சினமாக நிமிர்ந்து விட்டால்

அறுப்புக்குக் களையாக ஆய் விடுவார்

அங்கங்கே மிதிபட்டு அழிந்திடுவார்

--------------------------------நாகேந்திர பாரதி

செவ்வாய், 16 ஜூன், 2009

அறுபது வயதில் யோசனை

அறுபது வயதில் யோசனை
----------------------------------
அவரும் கட்டிலுமாய் அறுபது வயதில் யோசனை
மறுபடியும் முப்பது வயது வந்தால்
மகனின் பள்ளிப் பையைத் தூக்கிச் செல்ல வேண்டும்
மகளின் தலையில் பூ வைத்துப் பின்னி விட வேண்டும்
மறுபடியும் நாற்பது வயது வந்தால்
மகனின் இளமைக் கிளர்ச்சிகளைப் புரிந்து கொள்ள வேண்டும்
மகளின் கல்லூரித் தேர்வுக்கு கூடச் செல்ல வேண்டும்
மறுபடியும் அம்பது வயது வந்தால்
மனைவியின் முதுமையைப் புரிந்து நடக்க வேண்டும்
மக்களின் மனமறிந்து மணம் முடிக்க வேண்டும்
மறுபடியும் அறுபது வயது வரும்போது
அவரும் குடும்பமுமாய், கட்டில் மட்டும் தனியாக
--------------------------------------நாகேந்திர பாரதி
--------------------------------------------------------------------

வெள்ளி, 12 ஜூன், 2009

என்னமோ ஒழுங்கு

என்னமோ ஒழுங்கு

----------------------------

என்னமோ ஒழுங்கு இருக்குது இயற்கையிலே

பலா மரத்திலே பாகற்காய் காய்க்கிறதில்லே

முல்லைச் செடியிலே கள்ளிப்பூ பூப்பதில்லே

மனுசன்லே மட்டும் ஏன் இப்படி

ஒருநாள் முல்லைப் பூவாய்ச் சிரிப்பு

மறுநாள் பாகற்க் காய்க் கசப்பு

என்னமோ இம்சை இருக்குது மனுசன்லே

பூவும் இலையும் காயும் செடியும்

மனசு இல்லாம இருக்குமோ என்னமோ

மனுஷனுக்கு மட்டும் மனசு படுத்துது

----------------------------------------நாகேந்திர பாரதி

வியாழன், 11 ஜூன், 2009

ஒண்ணு கெடக்க ஒண்ணு

ஒண்ணு கெடக்க ஒண்ணு

------------------------------------------

ஒண்ணு கெடக்க ஒண்ணு நெனைக்காதீங்க

என்ன பெரிசா நமக்கு வந்துடுங்க

முன்ன பின்ன கொஞ்சம் யோசிச்சுக்குங்க

என்ன ஏது என்று கேட்டுக்குங்க

தின்னு கின்னு வயித்தைக் கெடுக்காதீங்க

கண்ணு காது மூக்கைக் கவனிச்சுக்குங்க

இன்னும் உடம்பும் மனசும் ஒண்ணாக்குங்க

சொன்ன சொல்லில் கவனம் வச்சுக்குங்க

எண்ண எண்ண எல்லாம் கூடிடுங்க

வண்ண வண்ண வாழ்க்கை வாழ்ந்திடுங்க

--------------------------------------------நாகேந்திர பாரதி

-------------------------------------------------------------

செவ்வாய், 9 ஜூன், 2009

நீங்களும் கவிஞர்தான்

நீங்களும் கவிஞர்தான்

--------------------------------

ஒண்ணும் பெரிசா இல்லை கவிதையில்

நின்னு யோசிச்சா நீங்களும் கவிஞர்தான்

எல்லா உயிரையும் ஒண்ணா நெனங்க

நல்லா பாருங்க நல்லா கேளுங்க

வயதான மேகமும் வானத்து நீலமும்

வயக்காட்டு வரப்பும் வரிசைப் பனையும்

கண்மாய்க் கரையும் கலங்கல் தண்ணியும்

பெண்மை அழகும் பிறப்பும் இறப்பும்

உங்களில் கவிஞனை உசுப்பித் தட்டிடும்

கண்ணுக்குள் நீரைக் கசக்கி விட்டிடும்

நின்னு யோசிச்சா நீங்களும் கவிஞர்தான்

---------------------------------------நாகேந்திர பாரதி

--------------------------------------------------------------------

திங்கள், 8 ஜூன், 2009

ஆல மரம் ஒன்று

ஆல மரம் ஒன்று

---------------------------

வேரைப் பூமிக்குள் விட்டுக் கொண்டு

விழுதால் தரையைத் தொட்டுக் கொண்டு

ஆகாயம் நோக்கி சிரித்துக் கொண்டு

அகலமாய்க் கிளைகளை விரித்துக் கொண்டு

இலைகளும் பூக்களும் தாங்கிக் கொண்டு

வெயிலையும் மழையையும் வாங்கிக் கொண்டு

வருவார் போவாரைப் பார்த்துக் கொண்டு

நிற்போரை நிழலால் போர்த்திக் கொண்டு

என்னமோ எண்ணம் ஒன்று கொண்டு

ஆலமரம் ஒன்று நின்று கொண்டு

-------------------------நாகேந்திர பாரதி

---------------------------------------------------------

செவ்வாய், 2 ஜூன், 2009

இரவுத் திருட்டு

இரவுத் திருட்டு
---------------------
கருப்பு மட்டும் அதன் நிறம் இல்லை
திருட்டும் கூட இரவின் நிறம்தான்
உலகைத் திருடி உருட்டிப் போடும்
ஒருபக்கம் மட்டும் சூரியனுக்கு விற்கும்
நிலவைத் திருடி எடுத்துக் கொள்ளும்
நட்சத் திரங்களையும் துணைக்குத் திருடும்
மனிதர் திருட்டுக்கு உடந்தை ஆகும்
மனத்தின் திருட்டுக்கும் காதல் சேர்க்கும்
கவலையைத் திருடி கழித்துப் போகும்
களைப்பைத் திருடி தூங்கச் செய்யும்
----------------------------------நாகேந்திர பாரதி

திங்கள், 1 ஜூன், 2009

வந்து விடு கண்ணே

வந்து விடு கண்ணே
-----------------------------
வந்து விடு கண்ணே வந்து விடு
இல்லை எனில் என்னை மறந்து விடு
பின் தொடர்ந்த நாட்கள் நடந்த பின்னே
பார்த்திருந்த நேரம் கடந்த பின்னே
பேசியதும் சிரித்ததும் முடிந்த பின்னே
இன்னுமென்ன வாழ்க்கை எனக்கு இங்கே
சொல்லு வதற்காகச் சொல்லி விட்டேன்
காலம் என்னைக் கடந்து சென்று விடும்
காதல் என்ற வார்த்தை மறந்து விடும்
என்னுயிரும் எங்கோ பறந்து விடும்
------------------------------------------நாகேந்திர பாரதி

அற்ப சந்தோஷம்

அற்ப சந்தோஷம்

------------------------

கோயிலைச் சுற்றி வரும் போது ஒரு குரல்

'ராமசாமியா, எப்பிடியிருக்கே'

இடுக்கிய கண்களுக்குள் இரண்டாய்த்

தெரிந்தவன் சுப்பிரமணி

கோலி விளையாட்டில் முக்குட்டைப் பெயர்த்தவன்

காதலித்த பெண்ணைத் தாலிகட்டிப் போனவன்

பதவி உயர்வினைத் தட்டிப் பறித்தவன்

வாயெல்லாம் பல்லோடு சிரித்த முகத்தவன்

இப்போது பொக்கை வாயாய்

எனக்கு இன்னமும் இரண்டு பல் இருக்கிறது

சந்தோஷத்தோடு 'வாடா' என்றேன்'

-------------------------------நாகேந்திர பாரதி

----------------------------------------------------------

போதையின் பாதை

போதையின் பாதை
----------------------------
போதையின் பாதையில் போகிற பேதை
கோதையின் நினைப்பினில் குழைகிற வாதை
கண்களின் கொக்கியில் மாட்டிய நேரம்
பெண்ணவள் பார்வையில் பிழிந்ததன் சாரம்
வார்த்தையே இன்றி வளர்ந்திட்ட தாகம்
போர்த்திய பார்வையில் பூத்திட்ட மோகம்
எதிரிலே இருந்தால் எண்ணமே இன்பம்
கதியெனக் கிடக்கும் காதலே துன்பம்
பிரிந்தனள் மறந்தனள் பெண்ணவள் துறந்தனள்
சரிந்தவன் மதுவினில் சகலமும் மறந்தனன்
-------------------------------------------நாகேந்திர பாரதி
--------------------------------------------------------------------------

சமையல் சந்தோஷம்

சமையல் சந்தோஷம்

---------------------------

பாத்திரம் கழுவ வேண்டாமென்றால்

சமையலும் கூட ஒரு சந்தோஷம்

காய்கறிக் கடைக்குத் துணையோடு
சேர்ந்து செல்வது சந்தோஷம்

ஒடித்தும் பிடித்தும் வளைத்தும்
வாங்கும் வாகும் சந்தோஷம்

காயை வெட்டிப் போடும்போது

கேட்கும் சப்தம் சந்தோஷம்

வறுவல் பொறியல் செய்யும்போது

வாயில் போடும் சந்தோஷம்

எண்ணை தாளித்து இறக்கும்போது

வாசம் பிடிக்கும் சந்தோஷம்

சோறும் குழம்பும் காய்கறியும்

கலக்கும் காலம் சந்தோஷம்

நன்றாய் இருக்கு நாவிற்கென்று

பிடித்தவர் சொன்னால் சந்தோஷம்

பழைய குழம்பைச் சுட வைத்து

மறுநாள் சாப்பிட சந்தோஷம்

சொந்த பந்தம் எல்லாமே

சேர்ந்து சுவைப்பது சந்தோஷம்

----------------------------------------------நாகேந்திர பாரதி

-----------------------------------------------------------------------------

அதனதன் போக்கு

அதனதன் போக்கு

------------------------

கண்மாய்க் கரைச் சகதியில்

தன் போக்கில் கொடி நீட்டி

மண்டிக் கிடக்கும் தாவரம்

ஊர்க் கோடிச் சாவடியில்

கழனித் தண்ணி குடித்து விட்டு

அசை போட்டுக் கிடக்கும் எருமை

காற்றுக்கு மட்டும் அசைந்து கொண்டு

பூப் பூத்து இலை உதிர்த்து

நெட்டையாய் நிற்கும் மரம்

சுற்றிக் கரை சூழ்ந்திருக்க

அடியில் மீன்கள் ஆடியிருக்க

தண்ணியும் தானுமாய்க் குளம்

மக்களும் ஊர்திகளும் மிதித்தோட

வளைந்து நெளிந்து நீண்டு

மல்லாந்து கிடக்கும் மண் வீதி

மண்ணும் செங்கல்லும் கலந்து கட்டி

மனிதர்களை உள்ளடக்கி

மூச்சும் பேச்சுமின்றி வீடுகள்

பிறந்து வளர்ந்து சிரித்து

இன்பம் துன்பம் பார்த்து

ஏதோ நினைப்பில் மக்கள்

-----------------------------------------நாகேந்திர பாரதி

வெள்ளி, 29 மே, 2009

மண்டபத்தின் அழுகை

மண்டபத்தின் அழுகை
-----------------------------
இந்த மண்டபத்திற்கும் ஒரு இறந்த காலம் உண்டு
அப்போது கரிக் கிறுக்கல்களும் சாணிச் சறுக்கல்களும் இல்லை
சுத்தமான சுவர்கள் சுற்றிலும் பூக்கூட்டம்
வந்து போனவர்களில் ஒரு காதல் ஜோடியும் உண்டு
அவர்களின் வாடிக்கை நேரம் அதிகாலை ஐந்து மணி
ஊர் விடிவதற்கு ஒரு மணி முன்பு
அவர்கள் பேசியதை விட அழுததே அதிகம்
காதலர்கள் ஜெயிப்பது கதைகளில் தானோ
வழக்கமான பிரிவுதான் வாலிபமும் கடந்தது
மறுபடியும் வந்தார்கள் சடலங்களாய் சாணி நடுவே
மண்டபம் மட்டும் தெரிந்து அழுகிறது
------------------------------------நாகேந்திர பாரதி
---------------------------------------------------------------

எப்படியாவது சண்டை

எப்படியாவது சண்டை

-------------------------------

எப்படியாவது சண்டை போட வேண்டும் எங்களுக்கு

மதங்களுக்கு இடையே சண்டை

ஒரே மதமென்றால் உட்சாதிகளுக்கு இடையே சண்டை

ஒரே சாதியென்றால் ஊர்களுக்கு இடையே சண்டை

ஒரே ஊரென்றால் தெருக்களுக்கு இடையே சண்டை

ஒரே தெருவென்றால் வீடுகளுக்கு இடையே சண்டை

ஒரே வீடென்றால் உறவுகளுக்கு இடையே சண்டை

மதக் கலவரத்தில் தொடங்கி

மாமிமருமகள் நிலவரம் வரை

எப்படியாவது சண்டை போட வேண்டும் எங்களுக்கு

---------------------------------------------------நாகேந்திர பாரதி

----------------------------------------------------------------------

பழக் கடை அம்மா

பழக் கடை அம்மா
-----------------------
அந்தப் பழக் கடைக்கே அடையாளம் அந்த அம்மாதான்
வெட்டி வைத்த பழத்திற்கு ஈ மொய்க்கா ஈர வலை
தர்பூசணி ஆகட்டும் பப்பாளி ஆகட்டும்
தட்டிப் பார்த்தே தரத்தை சொல்லி விடும்
கையாலே எடை போட்டு காசைக் கேட்டு விடும்
தூக்க மாட்டாமல் உடம்பைத் தூக்கி வரும்
சிரிப்பும் பொட்டும் எப்பவும் பெரிசு
நேத்து போஸ்டரிலும் பொட்டும் சிரிப்புமாய்
முந்தா நாளு முடிஞ்சு போச்சாம்
எந்தப் பழமுமே இனிப்பதில்லை இப்போது
--------------------------------------நாகேந்திர பாரதி
-----------------------------------------------------------------------

புதன், 27 மே, 2009

சொல்லும் பொருளும்

சொல்லும் பொருளும்
--------------------------------------
சொல் புதிது பொருள் புதிது சொல்லிவிட்டுப் போனார்
சொல்லில் மட்டும் தங்கிலிஷ் தங்கியது
பொருளில் ஒன்றும் புதிதாகக் காணோம்
அந்தக் காலக் குதிரை ஆட்டோவை முந்தி விடும்
ஜெட் ஏர்வேய்ஸ்தான் புஷ்பக விமானம்
கிங் பிஷெரும் 'கள்'ளாக இருந்தது
சின்ன வீடும் 'அகத்'துத் துறைதான்
கடாரம் கொண்டவன் கண்டமும் கொள்வான்
காதலில் தோற்றவர் அன்றும் இன்றும்
கம்ப்யூட்டர் பெண்கள் குந்தவையின் மறுபக்கம்
வந்தியத் தேவன்தான் வரக் காணாம்
-------------------------நாகேந்திர பாரதி
---------------------------------------------------------------------------------

இருந்து என்ன சாதிச்சே

இருந்து என்ன சாதிச்சே

---------------------------------

வேலையிலே ஒழைச்சியா வேர்வையை வெதச்சியா

பார்வையிலே கனிஞ்சியா பண்போடு நடந்தியா

மனைவிக்கு சமைச்சியா மகனுக்கு துவச்சியா

நட்புக்கு மதிச்சியா நாளுக்கும் மகிழ்ச்சியா

இயற்கையை ரசிச்சியா இன்பத்தை புரிஞ்சியா

கர்வத்தைக் கலைஞ்சியா கண்ணீரைச் சொரிஞ்சியா

பெருசுகளைப் பாத்தியா பேசிச் சிரிச்சியா

எசைபாட்டு எடுத்தியா இரங்கற்பா தொடுத்தியா

கூடிப்பேசி வாழ்ந்தியா கூட்டுறவாய் இருந்தியா

இதக் கூடச் செய்யாம இருந்து என்ன சாதிச்சே

-----------------------------------நாகேந்திர பாரதி

------------------------------------------------------------------------

திங்கள், 25 மே, 2009

ஆசை வட்டம்

ஆசை வட்டம்
------------------
நடந்து போகும் போது சைக்கிளில் போக ஆசை
சைக்கிளில் போகும் போது ஸ்கூட்டரில் போக ஆசை
ஸ்கூட்டரில் போகும் போது பைக்கில் போக ஆசை
பைக்கில் போகும் போது காரில் போக ஆசை
காரில் போகும் போது லிமோவில் போக ஆசை
லிமோவில் போகும் போது ஹெலிகாப்டரில் போக ஆசை
ஹெலிகாப்டரில் போகும் போது சார்ட்டரில் போக ஆசை
சார்ட்டரில்போகும் போது விண்ணில் பறக்க ஆசை
விண்ணில் பறக்கும் போது மண்ணில் நடக்க ஆசை
நடந்து போகும் போது சைக்கிளில் போக ஆசை
----------------------------------------------நாகேந்திர பாரதி
------------------------------------------------------------------------------

சனி, 23 மே, 2009

சேலை எடுக்கும் வேலை

சேலை எடுக்கும் வேலை

------------------------------------

சேலை எடுக்கச் சேர்ந்து போனவர்களுக்குத் தெரியும்

சொன்ன கடைக்குப் போகாமல் சென்னைக் கடையெல்லாம் சுற்றுவார்கள்

ஒரு சேலை எடுக்கப்போய் ஒன்பது சேலை எடுப்பார்கள்

சொந்தக்காரர்களுக்கு எடுக்கப் போய் சொந்தமாகவும் எடுப்பார்கள்

ஒரு மணி நேரத்தில் முடிக்கப் போய் ஒரு நாளாய் ஆக்குவார்கள்

ஆயிரம் ரூபாய்க்கு எடுக்கப் போய் ஐயாயிரம் ரூபாய்க்கு தூக்குவார்கள்

அடுத்தவர் எடுக்கும் சேலையை ஆசைப் பார்வை பார்ப்பார்கள்

எல்லாச் சேலையும் எடுத்த பின்பு எதுவும் சரியில்லை என்பார்கள்

வீட்டுக்கு வந்து சேர்ந்த பின்பு மறுநாள் மாற்றப் போவார்கள்

சேலை எடுக்கச் சோர்ந்து போனவர்களுக்குப் புரியும்

----------------------------------------------நாகேந்திர பாரதி

---------------------------------------------------------------------------------

வெள்ளி, 22 மே, 2009

சும்மா இருப்பது எப்படி

சும்மா இருப்பது எப்படி
--------------------------------
சும்மா இருப்பது சுகமென்று சொன்னார்கள்
சும்மா இருந்து பார்த்தால் தெரியும்
சும்மா இருந்தால் சாப்பிடுவது எப்படி
சும்மா இருந்தால் தண்ணியும் கிடையாது
சும்மா இருந்தால் நடப்பதும் கூடாது
சும்மா எப்படி பேசாமல் இருப்பது
சும்மா சிரித்தால் பைத்தியம் என்பார்கள்
சும்மா எங்காவது போவது எதற்கு
சும்மா ஏதாவது சொல்லி விட்டார்கள்
சும்மா இருந்து பார்த்தால் தெரியும்
--------------------------------------நாகேந்திர பாரதி
-------------------------------------------------------------------------------------

வியாழன், 21 மே, 2009

கூடு விட்டுக் கூடு

கூடு விட்டுக் கூடு
----------------------
வாடகை வீடு மாறுவது கூடு விட்டுக் கூடு
பரணைக் காலி செய்ய பெருச்சாளி முறைக்கும்
பழைய தொலைந்த புத்தகம் கிழிந்த முகம் காட்டும்
எத்தனை பல்பு முதலில் இருந்ததென்ற எண்ணிக்கை
அடித்த ஆணிகளை எடுப்பதா விடுப்பதா
ரேஷன் கார்டுக்கு சரண்டர் சர்டிபிகேட்
கட்டவேண்டிய பில்கள் பாக்கி உள்ளதா
கொடுத்த அட்வான்ஸ் உடனே கிடைக்குமா
சொல்ல வேண்டியது யார் யாருக்கு
புது வீட்டு ஓனருக்கு புன்னகை முகம்
-------------------------- நாகேந்திர பாரதி
---------------------------------------------------

புதன், 20 மே, 2009

நடக்கும்போது நடக்கிறது

நடக்கும்போது நடக்கிறது

-------------------------------------

நடந்து போகையிலே என்னென்னமோ நடக்கிறது

செருப்பு போடாவிட்டால் தரை சுடுகிறது

புதுச் செருப்பு போடும்போது விரலைக் கடிக்கிறது

மழைக் காலத்தில் சகதி அடிக்கிறது

வேக வண்டிகளால் தண்ணீ அபிஷேகம்

ஓரமாகப் போனால் கல்லும் மண்ணும்

நடுவே போனால் தார்க்கல் ஒட்டுகிறது

அவசரமாக ஓடும்போது செருப்பு பிய்கிறது

நிதானமாகப் போனாலும் யாரோ திட்டுகிறார்கள்

கார் ஒன்று வாங்கி விடலாம் பணம்தான் வேண்டும்

--------------------------------------நாகேந்திர பாரதி

------------------------------------------------------------------------------

செவ்வாய், 19 மே, 2009

போரடிக்காத போரடிப்பு

போரடிக்காத போரடிப்பு
-------------------------------
ஒப்படி முடிந்தவுடன் தலைச் சுமையாய் நெற் கதிர்கள்
ஓடிவந்து இறக்கியதும் கட்டாகச் சேர்ந்து விடும்
ஓங்கி அடிக்கையிலே உதிரும் நெல் மணிகள்
கும்பலாகக் கூடும்போது கூடி வரும் பறவையெல்லாம்
வைக்கோல் போரெல்லாம் தனியாக மேடையாகும்
தானிய பண்ட மாற்றி நிலக்கடலை மொச்சை வரும்
கொறித்தபடி வைக்கோலில் சாயும்போது உடல் அரிக்கும்
இருந்தாலும் மேலேறி உட்கார்ந்தால் சுகமேதான்
பறக்கின்ற நெற் தூசி முகமெல்லாம் படர்ந்து விடும்
போரடிக்கா போரடித்து நெல் மூடை சேர்ந்து விடும்
--------------------------------------------- நாகேந்திர பாரதி
--------------------------------------------------------------------------

திங்கள், 18 மே, 2009

உயிரின் தரிசனம்

உயிரின் தரிசனம்
--------------------------
மெல்ல மெல்ல மேலே போ
மனிதர்கள் வீடுகள் சுருங்கி புள்ளிகளாய்
இன்னும் மேலே நகரமே கொடி
அதற்கும் மேலே அருகே மேகங்கள்
கீழே நிறங்களாய் நீரோட்டமும் நிலங்களும்
கண்டங்கள் சேர்ந்த காட்சி அருமை
இது என்ன பந்துகள் பூமியா சந்திரனா
எத்தனை கோலங்கள் இன்னும் மேலே
விண்ணே வெளிச்சம் வெளிச்சம் வெளிச்சம்
உள்ளே உள்ளே உயிரின் தரிசனம்
-----------------------------------------நாகேந்திர பாரதி
---------------------------------------------------------------------------------

சனி, 16 மே, 2009

ஓர சீட்டு உல்லாசம்

ஓர சீட்டு உல்லாசம்

-------------------------

ஓர சீட்டில் உட்கார

இடம் கிடைத்தால்

இன்பமும் உண்டு

துன்பமும் உண்டு

பச்சை மரங்களின்

ஓரமும் உண்டு

எச்சில் காகத்தின்

ஈரமும் உண்டு

வேகக் காற்றின்

'பளிச்'சும் உண்டு

வெத்திலைச் சீவலின்

'புளிச்'சும் உண்டு

சாரல் தூறலின்

சுகமும் உண்டு

வீறும் மழையின்

வேகமும் உண்டு

ஓரத்தை பிடிக்க

ஓடிப் போகாமல்

இருந்த இடத்தில்

இருந்தால் சுகமே

-----------------------------நாகேந்திர பாரதி

-------------------------------------------------------------------

வெள்ளி, 15 மே, 2009

சொக்க வைத்த சுசீலா

சொக்க வைத்த சுசீலா

----------------------------

உச்சரித்த 'கள்' ளினிலே

உள்ளிருக்கும் கள்ளின் போதை

வாயசைக்கும் நடிகை உன்

வார்த்தையினால் அழகாவாள்

தாய்மொழியாய் இல்லெனினும்

தமிழுக்குள் பால் குடித்தாய்

கண்ணதாசன் வாலியின்

கவிதைக்குத் தேன் கொடுத்தாய்

வானொலியின் வாய் அருகே

காதுகளைக் கட்டி வைத்தாய்

தேன் குரலைக் கேட்கையிலே

பசி தாகம் ஓட்டி வைத்தாய்

தனியாகப் பாடுகையில்

தாய்மைக் குரல் கொடுத்தாய்
சேர்ந்து பாடுகையில்
செல்லக் குரல் தொடுத்தாய்

உன் குரலைக் கேட்டு

வளர்ந்ததனால் தானோ

இன்னமும் காதல்

செய்து கொண்டு இருக்கின்றோம்

--------------------------------நாகேந்திர பாரதி

------------------------------------------------------------------

செவ்வாய், 12 மே, 2009

கோபுர தரிசனம்

கோபுர தரிசனம்
------------------
வவ்வால் புழுக்கை
மெத்தைப் படிக்கட்டு
இருட்டு ஏற்றத்தில்
இடிக்கும் கற்கள்
ஒவ்வொரு நிலையிலும்
கரிக்கட்டிக் காவியங்கள்
ஏழாம் நிலையிலே
ஏறினால் உச்சி
பக்கத்தில் அடிக்கும்
படபட புறாக்கள்
உத்தர கோசமங்கை
ஊரின் தரிசனம்
கண்மாய் கருவை
காரை வீடுகள்
கோபுர உச்சியில்
மனிதன் எறும்பு
குவலய உச்சியில்
இன்னமும் சிறிசு
இறங்கிய பின்னே
ஏற்றத் தாழ்வு
---------------------------------நாகேந்திர பாரதி
--------------------------------------------------------------------------------

சனி, 9 மே, 2009

பாதகத் தீ

பாதகத் தீ
---------------
சிரிச்சு சிரிச்சு
சொக்க வெச்சே
பாத்து பாத்து
பதற வெச்சே
தொட்டு தொட்டு
துடிக்க வச்சே
தூரப் போனா
துவள வெச்சே
கோயில் சினிமா
கூட வந்தே
தேரு திருவிழா
தேடி வந்தே
கடலை பொரியும்
வாங்கி வந்தே
குழம்பும் சோறும்
ஊட்டி விட்டே
படிப்பும் பணமும்
பாத்த பின்னே
பறந்து போனே
பாதகத் தீ
--------------------------நாகேந்திர பாரதி
----------------------------------------------------------------------

வெள்ளி, 8 மே, 2009

கிராம நாட்கள்

கிராம நாட்கள்

-----------------

வாசல் திண்ணை

வெயில் நேரத் தூக்கத்திற்கும்

இரவு நேரத்து புரணிக்கும்
ஏற்ற மேடை

ஓரமாய் நிற்கும்

வேப்ப மரத்தடியில்

எப்போதும் ஒரு நாய்

ஏக்கத்தோடு பார்க்கும்

கூரையும் ஓடுமான வீட்டுக்குள்

நுழைந்து திரும்பினால்

சட்டி பானைகளுக்குநடுவில்
சாணி மெழுகிய தரை

ஓரமாய் நிமிர்த்து வைத்திருக்கும்

ஈசிச் சேரை இழுத்துப் போட்டு

கட்டையைச் சொருகிச் சாய்ந்தால்

காலிடுக்கில் இடிக்கும்

சுவரைப் பிளந்த

களிமண் சன்னலின் வெளியே

வயலும் பனை மரமும்

ஓவியமாய்த் தெரியும்

காலை நேர பழைய சோறும்

மாலை நேர மீன் குழம்பும்

இடையே வயக்காட்டு வேலையுமாய்

கிராமம் ஒரு சுவர்க்கம்

--------------------------------------நாகேந்திர பாரதி

----------------------------------------------------------------------------

செவ்வாய், 5 மே, 2009

ஆகாயமும் அவனும்

ஆகாயமும் அவனும்


------------------------


மேகங்கள் எங்கோ

போகின்றன

பறவைகள் எங்கோ

பறக்கின்றன

சில நேரம் மழை

கொட்டுகிறது

சில நேரம் வெயில்

வாட்டுகிறது

பகலில் சூரியன்

இரவில் சந்திரன்

வெளிச்சம் வருகிறது

இருட்டும் வருகிறது

கண் சிமிட்டும்

பல நட்சத்திரங்கள்

ஏதாவது நிகழ்ச்சிகள்

அரங்கேற்றம் அங்கே

ஆகாயம் பாட்டுக்கு

இயங்கிக் கொண்டு மேலே

அவன் பாட்டுக்கு

பிச்சை எடுத்துக் கொண்டு கீழே

-------------------------------நாகேந்திர பாரதி


------------------------------------------------------------------

திங்கள், 4 மே, 2009

ஞாபகம்

ஞாபகம்
--------------
மீனோடு சேர்த்து
கண்மாய் ஞாபகம்
பூவோடு சேர்த்து
குளம் ஞாபகம்
பிரம்போடு சேர்த்து
வாத்தியார் ஞாபகம்
உணவோடு சேர்த்து
அம்மாச்சி ஞாபகம்
கல்லூரியோடு சேர்த்து
தாத்தா ஞாபகம்
காப்பியோடு சேர்த்து
நண்பன் ஞாபகம்
இரவோடு சேர்த்து
உறக்கம் ஞாபகம்
இளமையோடு சேர்த்து
காதல் ஞாபகம்
காதலோடு சேர்த்து
உன் ஞாபகம்
உன்னோடு சேர்த்து
என் ஞாபகம்
----------------------நாகேந்திர பாரதி
----------------------------------------------------------------

ஞாயிறு, 3 மே, 2009

போக வேண்டும்

போக வேண்டும்
---------------------
அம்மா காய்கறி வாங்கி
வரச் சொன்னாள்
எனக்கு காதலியைப் பார்க்கப்
போக வேண்டும்
அப்பா வேலை தேடித்
பார்க்கச் சொன்னார்
எனக்கு அவளைத் தேடிச்
செல்ல வேண்டும்
தங்கை புத்தகம் வாங்கி
வரச் சொன்னாள்
எனக்கு பாடம் படிக்கப்
போக வேண்டும்
தம்பி கடலைமிட்டாய் வாங்கி
வரச் சொன்னான்
எனக்கு காதல்மிட்டாய் சாப்பிடப்
போக வேண்டும்
எல்லோரும் ஏதேதோ வாங்கி
வரச் சொல்கிறார்கள்
எனக்கு வாங்க வேண்டியதை
வாங்க போக வேண்டும்
-------------------------------------நாகேந்திர பாரதி
---------------------------------------------------------------------------

சனி, 2 மே, 2009

மதுரை மணம்

மதுரை மணம்

----------------

ஆடி சித்திரை மாசி

ஆவணி வெளி வீதிகள்

மாரட் வடம் போக்கி

மஹால் மஞ்சனத் தெருக்கள்

கோயிலைச் சுற்றி வீதிகள்

குறுக்கும் நெடுக்கும் தெருக்கள்

மார்கெட் சகதி வழுக்கும்

மல்லிகைப் பூவு மணக்கும்

ஆரிய பவனும் உண்டு

அசைவ விலாஸும் உண்டு

இட்டிலி சட்டினி ஏழு

கொத்துப் புரோட்டா கறி

கோயில் விழாவும் உண்டு

கொட்டகை சினிமாவும் உண்டு

எம்ஜியார் வெறியரும் உண்டு

சிவாஜி ரசிகரும் உண்டு

வேர்வை உழைப்பும் உண்டு

வெட்டி பந்தாவும் உண்டு

கோபக் கிறுக்கும் உண்டு

கும்பிடும் குணமும் உண்டு

----------------------------நாகேந்திர பாரதி

---------------------------------------------------------------------------

வெள்ளி, 1 மே, 2009

மறுபடி எப்போது

மறுபடி எப்போது
--------------------
சைக்கிள் சீட்டில்
உட்கார வைத்து
லேசாகப் பிடித்தபடி
கூடவே ஓடி வந்தவன்
குளத்துப் படியில்
குப்புறப் படுத்து
நீச்சல் அடிக்க
கால்களை தாங்கிப் பிடித்தவன்
சொரசொர மரத்தின்
கிளைகளில் ஏறி
கவட்டையில் அமர
பாதத்தை உந்தி விட்டவன்
பாடம் மறந்து
பரிதவித்த போது
வாய்ப்பாட்டை எல்லாம்
ஒப்பிக்கச் சொல்லி கேட்டவன்
அதோ போகிறான்
மூங்கிலில் படுத்து
மறுபடி நாங்கள்
பிறக்கப் போவது எப்போது
------------------------------நாகேந்திர பாரதி
-------------------------------------------------------------------------------

வியாழன், 30 ஏப்ரல், 2009

திரும்பிய உயிர்

திரும்பிய உயிர்

-------------------

இடிச் சத்தம்

காதைப் பிளந்தது

தலை எங்கோ

போய் இடித்தது

வாயில் ஊறிய

எச்சில் கசந்தது

இருட்டு ரோட்டில்

எங்கோ பயணம்

திடீர் வெளிச்சம்

தின்று முடித்தது

அதல பாதாளத்தில்

விழுந்த அதிர்ச்சி

கருப்பு நிசப்தத்தில்

கரைவது போல

எங்கோ ஒரு

மின்மினிப் பூச்சி

கசகச வென்று

கண்கள் சுரந்தன

லேசான ஒளியில்

மனைவியின் முகம்

-------------------------------------நாகேந்திர பாரதி

------------------------------------------------------------------------------

புதன், 29 ஏப்ரல், 2009

காதல் இதயம்

காதல் இதயம்

------------------

அடிக்கடி மூச்சு

வாங்குகிறதா

அலைஅலையாய்

உள்ளே ஓடுகிறதா

மேல்கீழ் ஏறி

இறங்குகிறதா

மேனியில் வேர்வை

ஊறுகிறதா

பஞ்சாய் கண்கள்
அடைக்கிறதா

பயமும் பொங்கி
வருகிறதா

இரத்த வெப்பம்
உணர்கிறதா

ஏதோ மாதிரி

இருக்கிறதா

வயதில் வந்தால்

காதல் நோய்

வயதாகி வந்தால்

இதய நோய்

---------------------------நாகேந்திர பாரதி

--------------------------------------------------------------------------------

நல்ல நேரம்

நல்ல நேரம்
---------------
விரலைப் பற்றிக் கொண்டு
வருபவள்
விரலில் நிச்சய மோதிர
நேரம்
பாடம் படித்துக் கொண்டு
இருப்பவள்
பாடம் மாறப் போகும்
நேரம்
வேலை பார்த்துக் கொண்டு
இருப்பவள்
வேளை கூடப் போகும்
நேரம்
ஒருத்தி உலகம் என்று
இருப்பவள்
ஒருத்தி ஒருவன் ஆகும்
நேரம்
தாயின் மடியில் மகிழ்ந்து
இருப்பவள்
தாயாய்த் தானும் ஆகும்
நேரம்
-------------------------------------நாகேந்திர பாரதி
----------------------------------------------------------------------

செவ்வாய், 28 ஏப்ரல், 2009

கருவாயன் கல்யாணம்

கருவாயன் கல்யாணம்
-----------------------------
கண்மாயின் மீன் குஞ்சு
காலிடுக்கைக் கடிக்கும்
கருவமரத் தேன்கூடு
இனிப்போடு கொட்டும்
புளியமரம் பார்த்தாலே
நாக்கு பொத்துப் போகும்
பொங்கலிடும் போதெல்லாம்
புகை மூட்டம் மூடும்
பஞ்சாயத்து ரேடியோ
பகலெல்லாம் பாடும்
பருவத்துக் கிளர்ச்சிகளை
சினிமாவும் கூட்டும்
ஊர்கூடி குலவையிட
நாதசுரம் ஊதும்
உன்மத்த இளவட்டம்
கம்பெடுத்து சுத்தும்
கருவாடும் கறிமீனும்
கார சார மாகும்
கருவாயன் கருவாச்சி
கல்யாணம் கூடும்
-------------------------------நாகேந்திர பாரதி
---------------------------------------------------------------------------------

ஞாயிறு, 26 ஏப்ரல், 2009

கூலி விரல்கள்

கூலி விரல்கள்
---------------------
தீக்குச்சிகளாய்
சில விரல்கள்
பீச்சு சுண்டலாய்
சில விரல்கள்
பால் பாக்கெட்டாய்
சில விரல்கள்
காபி டீயாய்
சில விரல்கள்
கடைப் பொட்டலமாய்
சில விரல்கள்
சேற்று வயலாய்
சில விரல்கள்
சேலை மடிப்பாய்
சில விரல்கள்
பேப்பர் பத்திரிக்கையாய்
சில விரல்கள்
பிச்சைப் பாத்திரமாய்
சில விரல்கள்
கூலி விரல்கள்
குழந்தை விரல்கள்
---------------------------நாகேந்திர பாரதி
-------------------------------------------------------

சனி, 25 ஏப்ரல், 2009

தனித் தனிப் பருவம்

தனித் தனிப் பருவம்
------------------------
தான் படித்தது
முதல் பருவம்
பிள்ளைகள் படித்தது
அடுத்த பருவம்
தான் வேலை செய்தது
முதல் பருவம்
பிள்ளைகள் வேலை செய்தது
அடுத்த பருவம்
தனக்கு குடும்பமானது
முதல் பருவம்
பிள்ளைகளுக்கு குடும்பமானது
அடுத்த பருவம்
தான் தளர்ந்தது
முதல் பருவம்
பிள்ளைகள் தளர்ந்தது
அடுத்த பருவம்
தண்ட வாளங்கள்
சேருவ தில்லை
விட்டுக் கொடுத்து
விரும்புதல் நன்று
---------------------------------------நாகேந்திர பாரதி
----------------------------------------------------------------------

வெள்ளி, 24 ஏப்ரல், 2009

பசியும் ருசியும்

பசியும் ருசியும்

------------------

ருசியில் சில பேர்

பசியில் பல பேர்

சாம்பார் ரசம்

சாதத்தில் மணம்

பழைய சோறின்

புளிப்பு வாசம்

காயும் கிழங்கும்

வறுவல் பொரியல்

ஊறுகாய் பார்த்தால்

ஊறும் எச்சில்

பழங்களின் சாறைப்

பருகித் திளைக்கும்

தண்ணீர் குடித்து

தாகம் தணிக்கும்

சில்வர் பிளேட்டில்

அறுசுவை உணவு

உள்ளங் கையில்

ஒருசுவைச் சோறு

உண்ண சில பேர்

உழைக்க பல பேர்

------------------------- நாகேந்திர பாரதி

-------------------------------------------------------------------

-------------------------------------------------------------------------

வியாழன், 23 ஏப்ரல், 2009

உங்கள் மதிப்பு

உங்கள் மதிப்பு
-----------------
உங்கள் மதிப்பை
உறைத்துப் பார்க்க
உறவினர் நண்பரிடம்
கடன் கேளுங்கள்
இந்த மாதம்
மருத்துவச் செலவு
திடீர் என்று
திருவிழாச் செலவு
கல்லூரி பீசுக்கு
கடைசித் தேதி
இன்னும் ஒருவருக்கு
இப்பத்தான் கொடுத்தேன்
போன மாதம்
வந்து இருக்கலாம்
அடுத்த மாதம்
முயற்சி செய்கிறேன்
கடனை மறுக்கும்
சாக்குப் போக்கில்
உங்கள் மதிப்பின்
உண்மை புரியும்
----------------------- நாகேந்திர பாரதி
----------------------------------------------------------------------------------

புதன், 22 ஏப்ரல், 2009

வீட்டின் ஓசை

வீட்டின் ஓசை

----------------

ஒவ்வொரு வீட்டிற்கும்

ஒரு ஓசை உண்டு

படுக்கையை சுருட்டும் போதும்

பாத்திரம் கழுவும் போதும்

கும்மித் துவைக்கும் போதும்

குளித்து முடிக்கும் போதும்

சட்டினி அரைக்கும் போதும்

இட்டிலி வேகும் போதும்

கார் கிளம்பும் போதும்

கதவைச் சாத்தும் போதும்

டிவி அலறும் போதும்

குழந்தை அழும் போதும்

பிரார்த்தனை செய்யும் போதும்

பெரியவர் பாடும் போதும்

இரவுச் சிரிப்பின் போதும்

இன்பப் பேச்சின் போதும்

உள் வாங்கிய சத்தத்தை

ஒத்திகை பார்த்திருக்கும்

ஒவ்வொரு வீட்டிற்கும்

ஒரு ஓசை உண்டு

------------------------- நாகேந்திர பாரதி

--------------------------------------------------------------------

திங்கள், 20 ஏப்ரல், 2009

இன்பப் பயணம்

இன்பப் பயணம்

---------------------

ஒவ்வொரு பயணத்திலும்

ஏதோ ஒரு நோக்கம்

ஆபீஸ் பயணத்தில்

அட்டவணை வேலைகள்

கோயில் பயணத்தில்

கோரிக்கைப் பட்டியல்

திருவிழாப் பயணத்தில்

தேரடித் தரிசனம்

சுற்றுலாப் பயணத்தில்

சுற்றுப் புறங்கள்

ஊஞ்சல் பயணத்தில்

உல்லாசத் தலைசுற்றல்

வண்டிப் பயணத்தில்

வைக்கோலின் உரசல்

ரெயில் பயணத்தில்

உட்கார ஓரசீட்டு

விமானப் பயணத்தில்

வெண்மேக வேடிக்கை

இறுதிப் பயணத்தில்

எண்ணங்களே இல்லாமல்

-------------- நாகேந்திர பாரதி

-------------------------------------------------------

சனி, 18 ஏப்ரல், 2009

கிராமத்துக் கிளிஞ்சல்கள்

கிராமத்துக் கிளிஞ்சல்கள்
---------------------------------
கண்மாய் அழிந்த போது
பிடித்த கலர் மீன்கள்
தோலூதித் தங்கம் மின்ன
துடித்த நெருப்புப் பொறிகள்
தோளில் தொங்கிக் கிடந்த
பச்சைக் குத்தாலத் துண்டுகள்
கோயில் கோபுர மாடத்தில்
குடியிருந்த புறாச் சப்தங்கள்
வாசல் சாண மணத்தோடு
வழி அடைத்த கோலங்கள்
மழைக் காலத்தில் பறித்த
கோலி விளையாட்டுச் சிறு குழிகள்
பள்ளி தொடங்கும் நேரம்
பாடிய பக்திப் பாடல்கள்
வெயிலும் மழையும் உறைக்காத
விளையாட்டுப் பருவங்கள்
பஸ்ஸிலும் ரயிலிலும் ஏறி
பராக்குப் பார்த்த பயணங்கள்
கிராமத்துக் கிளிஞ்சல்களாய்
உள்ளே தூங்கும் முத்துக்கள்
-------------------------- நாகேந்திர பாரதி
-----------------------------------------------------------------------------


வியாழன், 16 ஏப்ரல், 2009

உட் சூடு

உட் சூடு

----------

வெளிச் சூட்டை விட

உட் சூட்டில்

அபாயம் அதிகம்

ஜாதிச் சூட்டில்

தேர்தலில் அபாயம்

மதச் சூட்டில்

கலவர அபாயம்

காமச் சூட்டில்

கற்பில் அபாயம்

கோபச் சூட்டில்

வார்த்தை அபாயம்

இளமைச் சூட்டில்

ஏளன அபாயம்

முதுமைச் சூட்டில்

எரிச்சல் அபாயம்

செயற்கைக் குளிரில்

வெளிச்சூடு விரட்டுவோர்

இயற்கைப் பண்பால்

உட் சூட்டை விரட்டினால்

கோடை மாறும்

குற்றாலம் ஆகும்

------------------------------- நாகேந்திர பாரதி

-----------------------------------------------------------------------------------------

புதன், 15 ஏப்ரல், 2009

என்னதான் பேசினோம்

என்னதான் பேசினோம்
--------------------------------
விடுதி அறைக்குள்ளே
அடித்த அரட்டை
எட்டு மணி வரை
இருந்தபடி பேச்சு
பன்னிரண்டு மணி வரை
படுத்தபடி பேச்சு
காலை குளியலில்
கண்மாயில் பேச்சு
இட்லி வாயோடு
மெஸ்ஸிலே பேச்சு
கையில் நோட்டோடு
கல்லூரிப் பேச்சு
மதிய இடைவேளை
மரத்தடிப் பேச்சு
சாயந்தரம் ஆனாலே
சாலையோரப் பேச்சு
என்னென்ன பேச்சு
ஏதேதோ பேச்சு
எவ்வளவோ பேசினோம்
என்னதான் பேசினோம்
----------------------- நாகேந்திர பாரதி
---------------------------------------------------------------------------------

செவ்வாய், 14 ஏப்ரல், 2009

பாவமாக இருக்கிறது

பாவமாக இருக்கிறது

--------------------------

அப்பாவை பார்க்கும்போது

பாவமாக இருக்கிறது

பாசமாக இல்லை

பள்ளிக்கூடம் போகும்போது

கூட வந்திருக்கலாம்

சினிமாவுக்குப் போகும்போது

கூட வந்திருக்கலாம்

விளையாடப் போகும்போது

கூட வந்திருக்கலாம்

பரீட்சையில் தோற்றபோது

ஆறுதல் சொல்லியிருக்கலாம்

காய்ச்சலில் கிடந்தபோது

ஆறுதல் சொல்லியிருக்கலாம்

காதலில் தோற்றபோது

ஆறுதல் சொல்லியிருக்கலாம்

ஆபீஸ் ஆபீஸ் என்று

அலைந்து திரிந்து விட்டு

காசு பணம் மட்டும்

வீட்டுக்குக் கொடுத்துவிட்டு

அறுபது வயதாகி

வீட்டில் படுத்திருக்கும்

அப்பாவை பார்க்கும்போது
பாவமாக இருக்கிறது
பாசமாக இல்லை

------------------------ நாகேந்திர பாரதி

-------------------------------------------------------------------------------

திங்கள், 13 ஏப்ரல், 2009

பொழுது போகிறது

பொழுது போகிறது
-----------------------
ஒவ்வொரு பருவத்திலும் பொழுது
எப்படியோ போகிறது
கடலை மிட்டாய் வாங்க
கடைக்குப் போன பொழுது
பரீட்சைக்கு படித்துக்கொண்டு
பயந்து இருந்த பொழுது
எவளையோ நினைத்துக் கொண்டு
ஏங்கிக் கிடந்த பொழுது
வேலை பார்க்கப் போய்
கற்றுக் கொண்ட பொழுது
விளையாட்டு அரட்டை என்று
நண்பருடன் திரிந்த பொழுது
குடும்பம் குழந்தை என்று
கூடி வாழ்ந்த பொழுது
ரத்தம் வற்றிப் போய்
மருந்தில் வாழும் பொழுது
போனதை நினைத்துப் பார்த்து
புலம்பிக் கிடக்கும் பொழுது
பொழுது போதாது மாறி
பொழுது போகாத பொழுது
-------------------- நாகேந்திர பாரதி
-----------------------------------------------------------------------------------

ஞாயிறு, 12 ஏப்ரல், 2009

பொறுக்காத சூடு



பொறுக்காத சூடு
- ( கல்கி - 8-8-2004)
--------------------------------------------------
அதிகாலைக் குளியலுக்கு
சுடுதண்ணீர் கேட்டவளே


புதிதான சீர்உடையை
தேய் சூட்டில் போட்டவளே

கொதிக்கின்ற இட்டிலியை
விரல் வேகப் பிட்டவளே


ஆடிவெள்ளி அம்மனுக்கு
சூடத்தீ தொட்டவளே

பொறுக்கின்ற சூடெல்லாம்
சுகமென்று சொல்லிட்டாய்


கன்னத்தில் முத்தமிட்டு
கண்ணடித்து கையசைத்தாய்


காத்திருக்கும் சூடொன்று
தெரியாமல் புறப்பட்டாய்


விறகுக் கட்டையாக
வீடு வந்து சேர்ந்திட்டாய்

ஆவி போகையிலே
அம்மாவை அழைத்தாயா

கூவிக் குரல் கொடுத்து
கூப்பிட்டுக் களைத்தாயா

பாவி என் மேலே

பாழ் நெருப்பு பாயாதா



தாவி மேல் வந்து
தங்கத்தை பார்ப்பேனா

---------------- நாகேந்திர பாரதி
--------------------------------------------------------------------------------------------










வேம்பின் கசப்பு

வேம்பின் கசப்பு (பாக்யா - ஜூலை 2 -2004)
------------------------------------------------------
ஆட்டுக்காலால் நசுங்கவிருந்த
என்னைக் காப்பாற்றினாய்
மண்ணை குழைத்துப் பிடித்து
என்னை நிமிர்த்தி விட்டாய்
வீட்டுப் பாத்திரம் கழுவிய நீரை
எனக்குப் பாய்ச்சச் சொன்னாய்
இளந்தளிராய் முளைத்து வந்த
என் பச்சை இலைகளைப் பார்த்து பரவசப்பட்டாய்
என் குழந்தை பருவம்
அத்தோடு முடிந்தது
நான் வளர வளர
என் குச்சிகளை ஒடித்து பல் துலக்கினாய்
பசுந்தளிரைப் பறித்து
ஆட்டுக்குட்டிக்குக் கொடுத்தாய்
அம்மை போட்ட உன் பிள்ளைக்கு
என் இலையால் உயிர் கொடுத்தாய்
ஒரு நாள் என் நிழலில் நாற்காலி போட்டு
என்னை விலை பேசினாய்
இன்று என் கிளைகளில்
கோடரி விழுவதை பார்த்துக் கொண்டு
நிற்கிறாய் மரமாக
--------------------- நாகேந்திர பாரதி -
----------------------------------------------------------------------------------------

விழாப் பசி

விழாப் பசி
--------------
பாய்ந்து பாய்ந்து
கால் மடக்கி
கை சுழற்றும் சிலம்ப மகன்

மாற்றி மாற்றி
மான் கொம்பின்
விரல் வீச்சில் வேக மகள்

துள்ளித் துள்ளி
ஆடும் கரகம்
தலை நழுவாக் கலைத் தாய்

அடித்து அடித்து
தாரை அதிர
தப்பாட்டத் தந்தை

வருடா வருடம்
வருமானம் வந்தும்
வயிறு பசிப்பது தினசரி
---------------------------- நாகேந்திர பாரதி
------------------------------------------------------------------------------









இளமைத் தொல்லை

இளமைத் தொல்லை
-------------------------
காத்துக் காத்துக்
கனத்த கண்கள்
பார்த்துப் பார்த்துப்
பரவச மாகும்

கோர்த்துக் கோர்த்துக்
குமுறிய இதழ்கள்
பூத்துப் பூத்துப்
புன்னகை விரியும்

மதியம் மாலை
மறுநாள் காலை
பதியம் போட்டுப்
பரவும் கொள்ளை

எதுதான் எல்லை
இளமை தொல்லை
அதுதான் அன்பின்
இன்ப முல்லை

உள்ளம் ரெண்டும்
உணரும் வேலை
கள்ளம் இல்லாக்
காதல் சோலை

-------------- நாகேந்திர பாரதி
-----------------------------------------------------------------------------------

அவ்வளவு தானா

அவ்வளவு தானா
---------------------
வட்ட எருவை
வைக்கும் முன்பு
கிட்டப் பார்க்கக்
கிளரும் எண்ணம்

இந்த முகத்திற்கு
இறுதி நாளா
சொந்த உறவைச்
சுடும் நேரமா

தூக்கித் திரிந்த
தோள்கள் தொலைந்ததா
ஆக்கிக் கொடுத்த
கைகள் அவிந்ததா

பாக்கி இல்லையா
பாசம் இல்லையா
தேக்கித் தந்த
தென்றல் இல்லையா

அவ்வளவு தானா
அணைந்து போனதா
இவ்வளவு தானா
இழப்பே வாழ்வா

----------------- நாகேந்திர பாரதி
=================================