செவ்வாய், 16 அக்டோபர், 2018

வாட்ஸ்அப் வாழ்க்கை -நகைச்சுவைக் கட்டுரை


வாட்ஸ்அப் வாழ்க்கை -நகைச்சுவைக் கட்டுரை
----------------------------------------
இந்த வாட்ஸ் அப் உலகத்தை மூணாப் பிரிக்கலாங்க. சொந்தக்காரங்க உலகம், நண்பர்கள் உலகம், ஆபிஸ் உலகம்னு.
இந்த சொந்தக்காரங்க உலகத்திலே குழந்தைங்க போட்டோ , வீடியோ போட்டுக்கிட்டு இருப்பாங்க.  அவங்க பெண் குழந்தையோட டான்ஸ் வீடியோ . அது பாதி இறங்கிக்கிட்டு இருக்கிறப்போவே பதில் வந்திடும் . . ' பிரமாதமா ஆடுற, வருங்காலத்தில் பத்மா மாதிரி வருவா'.
அதே மாதிரி பசங்க கராத்தே வீடியோ வரும். அதுவும் இறங்க ஆரம்பிச்ச உடனேயே பதில் போட்டுடுவாங்க. ' சூப்பர் , வருங்கால ஜாக்கி சான் '.  பாக்கணும்கிற அவசியமே இல்லை. பதில் தான் முக்கியம். அனுப்புனவங்களும் சந்தோசம் ஆயிடுவாங்க.
அதே மாதிரி நம்ம கவிதை , கட்டுரை, லிங்க் அனுப்பினா, பட்டுன்னு பதில் வந்திடும். ' அருமை' ன்னு. ' என்ன அருமை'ன்னு கேட்டா உடனே , ஆப் லைனிலே போயிடுவாங்க. படிச்சிருந்தாத்தானே  பதில் போடுவாங்க.
இதே மாதிரி வயசான சில பேரு எல்லாத்துக்கும் ' சூப்பர்' ன்னு  ஒரே பதில் தான் தான்.
'என் பொண்ணு பர்ஸ்ட் கிளாஸ்லே பாஸ் பண்ணிட்டா ' - 'சூப்பர்'
'என் பையன் கராத்தேயிலே பிளாக் பெல்ட் '- 'சூப்பர் '
'எங்க பெரிய தாத்தா இறந்து போயிட்டாரு ' - ' சூப்பர்'
என்ன இது.. எங்க தாத்தா மேலே இவருக்கு என்ன பகைன்னு விசாரித்த பிறகு தெரிய வந்தது . அவரு போன் மெமோரியிலே 'சூப்பர்'ன்னு ஸ்டோர் பண்ணி வச்சிருக்காரு. எதையும் படிக்கிறதே இல்ல. எல்லாத்துக்கும்  மெமரி பேஸ்ட் தான்.

இப்படிப் போகுது சொந்தக்காரங்க வாட்ஸ் அப் உலகம். ஆபிஸ் நண்பர்கள் உலகம். அது தனி உலகம். 'ப்ரோக்ராம் சந்தேகம், வேலை வாய்ப்புன்னு ' ஓடிக்கிட்டு இருக்கும்.
'இப்' புக்கு பிறகு இருக்கிற புள்ளியை எடுத்துடு. ப்ரோக்ராம் ஒர்க் ஆகும் '
'செர்வெரை டௌன் பண்ணி பூட் பண்ணு, ஒர்க் ஆகும் ' - இப்படி ஒரு பக்கம்.
மறு பக்கம், ஏதாவது வேலை பத்தி போஸ்ட் ஆகிட்டா, உடனே ரெஸ்யூமை அப்டேட் பண்ணுறது. ' சி பிளஸ் பிளஸ் அஞ்சு வருஷம், டி பிளஸ் பிளஸ் ஏழு வருஷம் , பிளஸ் பிளஸ் 10  வருஷம்’னு அடிச்சு விடுறது. மொத்தம் கூட்டுனா , அவங்க வயசை விட அதிகமாக வந்துடும்.
ஹெச் ஆருக்கு தெரியாதா, நம்ம பசங்க லட்சணம். வேலையை யாருக்காவது கொடுத்துட்டுதான் , சைட்டிலே போஸ்ட் பண்ணுவாங்க. உடனே பதில் போட்டுடுவாங்க . 'சாரி , வேகன்ஸி பில் அப் ஆயிடுதுன்னு'


ஆபிஸ் நண்பர்கள் உலகம் இப்படின்னா, வேற நண்பர்கள் உலகம் வேற மாதிரி. இதையும் மூணா பிரிக்கலாம்.  காதல் உலகம் , ஆன்மீக உலகம், அரசியல் உலகம்.
காதல் உலகத்திலே, முதல் நாள் காதலிச்சு அடுத்த நாள் கல்யாணம் பண்ணி அதுக்கு அடுத்த நாளே விவாக ரத்து அப்ளை பண்ணிடுவாங்க. ரெம்ப வேகமான உலகம்.

ஆன்மீக உலகத்திலே அனுப்புவாங்க அட்வைஸ். ' என்ன வந்தாலும், அப்படியே ஏத்துக்கணும். அப்பத்தான் நம்ம ஆன்மா விரிவடையும் ' நம்மளும் அப்படியே ஏத்துக்கிட்டு என்ன வந்தாலும், நம்ம டைனிங் டேபிள் மேலே என்ன வந்தாலும் இட்டிலி, தோசை , பூரின்னு எல்லாத்தையும் ஏத்துக்கிட்டு சாப்பிட்டுடுவோம். நம்ம ஆன்மா இல்லே  இடுப்பு தான் விரிவடைஞ்சுக்கிட்டே போகும்.
  
இந்த அரசியல் உலகத்திலே, ஒரே அடி தடி தான்.. எழுத்திலே தான். அந்த தலைவர் சரி இல்லே, இவன் சரி இல்லேன்னு , ஒரே திட்டுதான். . நம்ம சும்மா இருந்தாலும், வம்புக்கு இழுப்பாங்க. ' நீங்க என்ன நினைக்கிறீங்க. ' ' நாம ஒண்ணும் நினைக்கலேன்னா நமக்கு திட்டு. '  ' உனக்கு ஆரோக்கிய அரசியல் தெரியலை, நீ ஒரு கூமுட்டை' ன்னு சொல்லிடுவாங்க. நமக்கும் கோபம் வந்துடும். அது எப்படி கூமுட்டைன்னு சொல்லலாம். ஒரு கோழி முட்டை , வாத்து முட்டைன்னு சொல்லி இருந்தாலாவது புரிஞ்சிருக்கும். அது என்ன கூமுட்டை. நம்ம கோபமா , வர்ற மெசேஜ் எல்லாமே அப்புறம் படிச்சுக்கலாம்னு மெமரி யிலே ஏத்திடுவோம். இதிலே நம்ம போன் மெமரி காலி ஆகி, எல்லா மெஸ்ஸஜும் காணாம போயிடும். 'ரெம்ப நல்லது' ன்னு பார்த்தா, நம்ம போன் காண்டாக்ட் லிஸ்டும் அவுட்டு.

'யாரு போன் பண்ணுறாங்க . தெரியலே '
எடுத்து ' ஹல்லோ, யாரு ' ன்னு கேட்டதும் அவ்வளவுதான்.
' என்ன, நான் யாரா, குரலை மறந்தாச்சா, அவ்வளவு தூரம் ஆகிப் போச்சா '  ன்னு கேட்டு போனை கட் பண்ணிட்டாங்க. . யாருன்னு தலை  முடியை பிச்சுக்கிறேன். யாரா  இருக்குங்க  .
 ------------------------------------நாகேந்திர பாரதி



வெள்ளி, 28 செப்டம்பர், 2018

இருப்பும் இயக்கமும்

இருப்பும் இயக்கமும்
-------------------------------------
தான் என்று இருப்பது
உடலின் இயக்கம்

தனது என்று இருப்பது
மனதின் இயக்கம்

தன்னால் என்று இருப்பது
அறிவின் இயக்கம்

அறிவு என்று இருப்பது
ஆன்மாவின் இயக்கம்

ஆன்மா என்று இருப்பது
ஆதியின் இயக்கம்
--------------------------------------------நாகேந்திர பாரதி
Humor in Business - Poetry Book

வெள்ளி, 14 செப்டம்பர், 2018

நிழல் நடமாட்டம்

நிழல் நடமாட்டம்
--------------------------------
சுருங்கியும் விரிந்தும்
நம்மோடு சேர்ந்து
நடமாடும் நிழல்கள்

வெயிலிலும் மழையிலும்
தரையில் அடிபட்டு
வேதனைக் குரலில்
வெம்பும் நிழல்கள்

ஓடவும் முடியாமல்
ஒளியவும் முடியாமல்
நிழல்களின் நடமாட்டம்
---------------------------------------- நாகேந்திர பாரதி
Humor in Business - Poetry Book

புதன், 29 ஆகஸ்ட், 2018

ஞாபகம் இருந்தால் .

ஞாபகம் இருந்தால் ..
----------------------------------------
ஞாபகம் இருந்தால்
வந்து விடுவார்

முதுகைப் பார்த்து
நடந்தது ஞாபகம் இருந்தால்

விரலைப் பிடித்து
முத்தமிட்டது ஞாபகம் இருந்தால்

மடியில் படுத்து
அழுதது ஞாபகம் இருந்தால்

ஞாபகம் இருந்தால்
வந்து விடுவார்
--------------------------------நாகேந்திர பாரதி
Humor in Business - Poetry Book

வெள்ளி, 24 ஆகஸ்ட், 2018

மொழிப் பற்று

மொழிப் பற்று
-------------------------
ஆங்கிலமும் வேண்டாம்
அயல் மொழிகள் வேண்டாம்

வட மொழியும் வேண்டாம்
தென் மொழிகள் வேண்டாம்

தமிழொன்றே போதுமென்று
தன்முனைப்பில் முடிவெடுத்தால்

தன்னிறைவு பெற்றுவிட்ட
தமிழகத்தை உருவாக்க

என்னவிங்கு செய்கின்றோம்
எழுதுகிறோம் பேசுகிறோம்

நலமும் வளமுமாய்
தமிழர்கள்  எல்லோரும்

வாழ்கின்ற நாளொன்று
வருகின்ற வழி தேடி

திரைகடல் ஓடுவோம்
திரவியம் தேடுவோம்

எம்மொழியும் கற்று விட்டு
இனிதெங்கள் தமிழ் என்போம்

ஒன்றான உலகத்தில்
ஓங்கிய தமிழாவோம்

---------------------------------------நாகேந்திர பாரதி
Humor in Business - Poetry Book

புதன், 8 ஆகஸ்ட், 2018

முத்தமிழ்க் கலைஞர்

முத்தமிழ்க் கலைஞர்
--------------------------------------
கடிதமும் கதையும்
இயலாய்ப்  பூக்கும்

கவிதையும் பாடலும்
இசையைச் சேர்க்கும்

கூத்தும் திரையும்
நாடகம் ஆக்கும்

இயலிசை நாடக
முத்தமிழ்க் கலைஞர்

தமிழர்  நினைவில்
தமிழாய்  வாழ்வார்
----------------------------------நாகேந்திர பாரதி
 Humor in Business - Poetry Book

திங்கள், 6 ஆகஸ்ட், 2018

முகமூடி மனிதர்கள்

முகமூடி மனிதர்கள்
-------------------------------------
அகமும் முகமும்
ஒன்றாம் குழந்தைக்கு

சிரித்த முகத்துக்குள்
சினத்தை ஒளிப்பதும்

அமைதி முகத்துக்குள்
ஆணவம் மறைப்பதும்

வளர்ந்த பின்னாலே
வாங்கிக் கொண்டவை

அகத்தின் அழகு
முகத்தில் தெரியட்டும்
---------------------------------நாகேந்திர பாரதி
Humor in Business - Poetry Book

வெள்ளி, 27 ஜூலை, 2018

காலக் கணக்கு

காலக் கணக்கு
-------------------------
ஒரு கூட்டுத் தேன் சேர்க்க
எத்தனை பூக்கள்
எத்தனை காலம்
தேனீக்கட்கு

ஒரு புற்று மண் சேர்க்க
எத்தனை ஓட்டம்
எத்தனை காலம்
எறும்புகட்கு

பணமும் புகழும்
பதவியும் சேர்க்க
எத்தனை அவசரம்
மனிதர்கட்கு
-------------------------------நாகேந்திர பாரதி
Humor in Business - Poetry Book

வியாழன், 26 ஜூலை, 2018

நேர்முறை நிகழ்வு

நேர்முறை நிகழ்வு
----------------------------------
முடியுமா என்றால் முடியாது
முடியும் என்றால் முடிந்து விடும்

நடக்குமா என்றால் நடக்காது
நடக்கும் என்றால் நடந்து விடும்

கிடைக்குமா என்றால் கிடைக்காது
கிடைக்கும் என்றால் கிடைத்து விடும்

சந்தேகப் பட்டு விட்டால்
எதிர் மறை எண்ணம்

நம்பிக்கை வைத்து விட்டால்
நேர் முறை நிகழ்வு
----------------------------------------நாகேந்திர பாரதி
Humor in Business - Poetry Book

செவ்வாய், 24 ஜூலை, 2018

விடுதலை மனிதர்

விடுதலை மனிதர்
------------------------------
கூட்டை விட்டு வந்து விட்ட
வண்ணப் பூச்சி அழகு

ஓட்டை விட்டு வந்து விட்ட
கோழிக்  குஞ்சு அழகு

கோபம் விட்டு
பயத்தை விட்டு

பொறாமை விட்டு
பேராசை விட்டு

இன்னும் பல தீமைகளைச்
சேர்த்து வைத்த செயற்கைக் கூட்டை

உடைத்து விட்டு வெளியே வந்த
மனிதர் எல்லாம் அழகு
----------------------------------நாகேந்திர பாரதி
Humor in Business - Poetry Book

வியாழன், 19 ஜூலை, 2018

முரட்டு மீசைகள்

முரட்டு  மீசைகள்
-----------------------------------------
அவர்களுக்காக வைத்திருக்கிறார்களா
நமக்காக வைத்திருக்கிறார்களா

அவர்களுக்கு மட்டுமே
தெரிந்த ரகசியம்

கருப்பு மீசையோ வெள்ளை மீசையோ
கருப்பும் வெளுப்பும் கலந்த மீசையோ

முறுக்கு மீசையோ தொங்கு மீசையோ
எல்லாமே தடித்த மீசைகள்

முகங்கள்  மறந்து போனாலும்
மறக்க முடியாத முரட்டு மீசைகள்
----------------------------------------------நாகேந்திர பாரதி
Humor in Business - Poetry Book

திங்கள், 9 ஜூலை, 2018

கடலும் கரையும்

கடலும் கரையும்
----------------------------
கரையைத் தொட்டுப் பார்க்கும்
ஆசை நோக்கத்தில்

இருப்பைச் சுட்டிக் காட்டும்
இதயத்  தாகம்

நுரையை எட்டித் தள்ளும்
உரிமைத் தாக்கத்தில்

கரையைத் தழுவப் பார்க்கும்
இளமை வேகம்

கடலும் கரையும் பாடும்
காதல் ராகம்
--------------------------------------நாகேந்திர பாரதி
Humor in Business - Poetry Book

சனி, 7 ஜூலை, 2018

கோயில் வாழ்க்கை

கோயில் வாழ்க்கை
-------------------------------------
கர்ப்பக் கிரகத்தில்
ஆரம்பிக்கும் வாழ்க்கை

உட் பிரகாரத்தில்
ஓடி விளையாடி

வெளிப் பிரகாரத்தில்
வேலை பார்த்து

தெப்பக்குள மண்டபத்தில்
ஓய்வு எடுத்து

கண்மாய்க்கரை சுடுகாட்டில்
அடங்கிப் போகும்
-------------------------------நாகேந்திர பாரதி
Humor in Business - Poetry Book

வியாழன், 5 ஜூலை, 2018

வீட்டுச் சாப்பாடு

வீட்டுச் சாப்பாடு
------------------------------
கொல்லையில் மேயும்
கோழியும் வாத்தும்

விருந்தாளி வந்தால்
விருந்தாய் மாறிடும்

தொழுவத்தில் கட்டிய
பசுவின் பாலும்

தயிராய் மோராய்
நெய்யாய்   மாறிடும்

முற்றத்தில் தொங்கும்
புடலையும் பாகையும்

சோற்றுக்கு ஏற்ற
கறியாய்  மாறிடும்

விஞ்ஞான உலகம்
ஆனதன்   பின்னே

வீட்டுக்கு உள்ளே
மனிதர்கள் மட்டும்
----------------------------------------நாகேந்திர பாரதி
Humor in Business - Poetry Book

புதன், 4 ஜூலை, 2018

விவசாயி கனவு

விவசாயி கனவு
-----------------------------
வானம் பார்த்ததும்
வயலை உழுததும்

விதை விதைத்ததும்
நாத்து நட்டதும்

களை எடுத்ததும்
மருந்து அடித்ததும்

தண்ணீர்   பாய்ச்சியதும்
தடவிக் கொடுத்ததும்

கதிர் அறுத்ததும்
அடித்துத் தூத்தியதும்

படப்பு போட்டதும்
பயறு சாப்பிட்டதும்

நெல் அவித்ததும்
காயப் போட்டதும்

வண்டி ஏற்றியதும்
அரைத்து முடித்ததும்

தவிடும் உமியும்
குவித்து எடுத்ததும்

அரிசி பொங்கியதும்
அம்மன் கும்பிட்டதும்

வீட்டுச் செலவுக்கு
விற்று வாங்கியதும்

கல்யாணம் நடத்தியதும்
திருவிழா கண்டதும்

காலம் ஓடியதும்
வானம் பொய்த்ததும்

குடிக்கும் நீருக்கே
அலையாய் அலைந்ததும்

களைத்து ஓய்ந்ததும்
விற்று விலகியதும்

கிராமம் விட்டு
நகரம் வந்ததும்

கான்கிரீட் கட்டிடத்தில்
காவலுக்கு அமர்ந்ததும்

ரேஷன் அரிசிக்கு
கியூவில் நின்றதும்

மஞ்சப் பையிலே
வாங்கி வந்ததும்

பொங்கிச் சாப்பிட்டு
புரண்டு படுத்ததும்

கனவில்  வந்திடும்
கிராமக் காட்சியில்

நெல்லுப் பயிரும்
சேர்ந்து அழுதிடும்
----------------------------------நாகேந்திர பாரதி
Humor in Business - Poetry Book






செவ்வாய், 3 ஜூலை, 2018

வீட்டுத் திண்ணை

வீட்டுத் திண்ணை
------------------------------------
நெல்லு மூட்டையை
இறக்கி வைத்த திண்ணை

காய்கறிக் காரியிடம்
பேரம் பேசிய திண்ணை

ஊர்கோலச் சாமிக்குக்
காத்திருந்த திண்ணை

தீபாவளிப் பட்டாசு
பரப்பி வைத்த திண்ணை

கோலக்  கலர்ப் பொடி
கொட்டியிருந்த திண்ணை

ஊர்ப் புரணியெல்லாம்
அளந்து விட்ட  திண்ணை

திண்ணை இருக்கிறது
தெருவும் இருக்கிறது

பேசிச் சிரித்த
பெரியவர்கள் இல்லை
---------------------------------------நாகேந்திர பாரதி
http://www.nagendrabharathi.com

திங்கள், 2 ஜூலை, 2018

சோறும் சுவையும்

சோறும் சுவையும்
---------------------------------
சாணியைப் போட்டுவிட்டு
நகர்கின்ற மாடுகள்

கூரையில் ஒட்டிக்கொண்டு
காய்கின்ற வரட்டி

பிய்ந்தபடி அடுப்புக்குள்
மூட்டுகின்ற நெருப்பு

மண்பானை பொங்கி
வழிகின்ற கஞ்சி

மண்ணும் மாடுமாய்
மணக்கின்ற சோறு
-------------------------------நாகேந்திர பாரதி
http://www.nagendrabharathi.com


ஞாயிறு, 1 ஜூலை, 2018

கண்ணீரும் கதை சொல்லும்

கண்ணீரும் கதை சொல்லும்
-------------------------------------------------
காத்திருந்த கதை சொல்லும்  - காதல்
பூத்திருந்த கதை சொல்லும்

பார்த்திருந்த கதை சொல்லும் - காதல்
படித்திருந்த கதை சொல்லும்

சேர்த்திருந்த கதை சொல்லும் - காதல்
செழித்திருந்த கதை சொல்லும்

நேற்றிருந்த கதை சொல்லும் - காதல்
இன்றிருக்கும் கதை சொல்லும்

கடந்திருந்த கதை சொல்லும் - காதல்
கண்ணீரும் கதை சொல்லும்
---------------------------------------------------நாகேந்திர பாரதி
http://www.nagendrabharathi.com

திங்கள், 25 ஜூன், 2018

பொன்னான நேரம்

பொன்னான நேரம்
--------------------------------------
காதலிக்குக் காத்திருக்கும்
நேரத்தை விட

காஃபிக்குக் காத்திருக்கும்
நேரம் - பொன்னான நேரம்

திங்கட்கிழமை பூத்திருக்கும்
நேரத்தை விட

வெள்ளிக்கிழமை சேர்த்திருக்கும்
நேரம் - பொன்னான நேரம்

பொன்னாவதும் புண்ணாவதும்
மனம் மயங்கும் நேரம்
-------------------------------------------------நாகேந்திர பாரதி 
http://www.nagendrabharathi.com

புதன், 20 ஜூன், 2018

இளமை இறைவன்

இளமை இறைவன்
--------------------------------
கோயில் பிரகாரத்தில்
கூடி விளையாடியோரும்

கோயில் குளத்திலே
குதித்து நீச்சல் அடித்தோரும்

கோயில் தேர் வடத்தை
குதூகலமாய் இழுத்தோரும்

காலத்தின் ஓட்டத்தால்
மண்டபத்தில் களைத்திருக்க

எப்போதும் இளமையோடு
உற்சவர் புறப்பாடு
------------------------------------------நாகேந்திர பாரதி
http://www.nagendrabharathi.com

வெள்ளி, 15 ஜூன், 2018

குழந்தை மனம்

குழந்தை மனம்
-------------------------------
அடம் பிடித்து
அழுவதற்கும்

சொன்ன பேச்சை
மறுப்பதற்கும்

பசி பசி என்று
கேட்பதற்கும்

ஓடிக் கொண்டே
இருப்பதற்கும்

காரணம் புரிவதற்கு
குழந்தையாக  வேண்டும்
---------------------------------நாகேந்திர பாரதி
http://www.nagendrabharathi.com

சனி, 9 ஜூன், 2018

முரண் நலன்

முரண் நலன்
--------------------
முன்னுக்குப் பின்
முரணும் நலன்தானே

முன்னாலே சொன்னது
உலகம் தட்டையென்று

பின்னாலே வந்தது
உலகம் உருண்டையென்று

முன்னுக்குப் பின்
முரணாகச் சொன்னாலும்

முன்னுக்கு வந்தால்
முரணும் நலன்தானே
-------------------------------------------நாகேந்திர பாரதி
 http://www.nagendrabharathi.com

செவ்வாய், 29 மே, 2018

இப்படியும் அப்படியும்

இப்படியும் அப்படியும்
-----------------------------------
இப்படித்தான் வர வேண்டுமென்று
அப்போதும் நினைத்ததுதான்

இப்படியும் அப்படியுமாய்
இருந்தாகி விட்ட பின்பும்

இப்படித்தான் வர வேண்டுமென்று
இப்போதும் நினைப்பதுதான்

இப்படியும் அப்படியுமாய்
இப்போதும் இருந்து விட்டால்

இப்படித்தான் வர வேண்டுமென்பது
எப்படித்தான் நடக்குமோ
------------------------------------------------நாகேந்திர பாரதி
http://www.nagendrabharathi.com

திங்கள், 28 மே, 2018

ஐம்பூத ஆட்டம்

ஐம்பூத ஆட்டம்
-------------------------------
உடலை மண்ணென்று
உணர்ந்து கொண்டு

உயிரை விண்ணென்று
உணர்ந்து கொண்டு

இரத்தம் நீரென்று
உணர்ந்து கொண்டு

சூட்டை நெருப்பென்று
உணர்ந்து கொண்டு

மூச்சைக் காற்றென்று
உணர்ந்து கொண்டு

முதல்வன் இறையென்று
உணர்ந்து கொள்வோம்
-------------------------------------நாகேந்திர பாரதி
http://www.nagendrabharathi.com

புதன், 23 மே, 2018

விதையும் செடியும்

விதையும் செடியும்
----------------------------------
பழைய நினைவுகள்
புதைந்து  போகலாம்

மண்ணில் கலந்து
மக்கிப் போகலாம்

காற்று வீசும்போது
தூசி பறக்கலாம்

மழை பெய்யும்போது
முளைத்து வரலாம்

பழைய விதையின்
புதிய செடியாக
--------------------------------------நாகேந்திர பாரதி
http://www.nagendrabharathi.com

செவ்வாய், 22 மே, 2018

கண்மாய்க் கரை

கண்மாய்க் கரை
------------------------------------
கண்மாயைப் பற்றிக்
கவிதை எழுதச் சொன்னார் நண்பர்

முன்பு போல் இல்லை
கண்மாயும் கரையும்

சகதி இருந்திருந்தால்
வழுக்கி விழுந்திருக்கலாம்

தண்ணீர் இருந்திருந்தால்
முங்கி எழுந்திருக்கலாம்

மரங்கள் அடர்ந்திருந்தால்
தேனடையைத் தேடியிருக்கலாம்

கட்டாந் தரையாகக்
கிடக்கின்ற  கண்மாயைப்

பார்க்காமலே இருந்திருக்கலாம்
பழைய நினைவுகளோடு
-----------------------------------------------நாகேந்திர பாரதி
http://www.nagendrabharathi.com

திங்கள், 21 மே, 2018

நீச்சல் குளம்

நீச்சல் குளம்
--------------------------
சின்ன மீன்களோடு சேர்ந்து கொண்டு
பெரிய மீன்கள் துள்ளிக் குதிக்கும்

வெளியேற்றும் தண்ணீரில்
சிக்கித் தவிக்கும் சின்ன மீன்கள்

பொறுமைக்கும் எல்லை உண்டாம்
புத்திசாலி சின்ன மீன்கள்

ஒன்றாகச் சேர்ந்து கொண்டு
ஓடி ஆடும் இங்கும் அங்கும்

போக வரப் பாதை இன்றி
வெளியேறும் பெரிய மீன்கள்
----------------------------------------------------நாகேந்திர பாரதி
http://www.nagendrabharathi.com

சனி, 19 மே, 2018

கசங்கிய துணிகள்

கசங்கிய துணிகள்
-------------------------------
இங்கும் அங்கும்
இழுத்துப் போகும் குழந்தைகளும்

இதையும் அதையும்
போட்டுப் பார்க்கும் இளையோர்களும்

எடுத்துக் போட்டே
களைத்துப் போகும் பணியாளர்களும்

இடத்தை தேடி
அமரப் பார்க்கும் முதியோர்களும்

காசும் கார்டும்
கணக்குப் பார்க்கும் காசாளர்களும்

கலைத்துப்  போட்ட
துணிகள் போலே கசங்கிப் போவார்
-------------------------------------------நாகேந்திர பாரதி
http://www.nagendrabharathi.com

வெள்ளி, 18 மே, 2018

உடைந்து போன உருவங்கள்

உடைந்து போன உருவங்கள்
----------------------------------------------------
சிலர் மண்டிய தாடியோடு
சிலர் மழித்த முகத்தோடு

சிலர் உடல் உப்பிப் போய்
சிலர் ஒல்லிக் குச்சியாக

பள்ளிப் பருவத்திலும்
கல்லூரிப் பருவத்திலும்

பழகிய உருவங்கள்
படங்களில் மட்டுமே

உடைந்து போனது
உருவங்கள் மட்டுமா
-----------------------------------------நாகேந்திர பாரதி
http://www.nagendrabharathi.com

புதன், 16 மே, 2018

குவாலிடி மேனேஜர் - நகைச்சுவைக் கட்டுரை


குவாலிடி மேனேஜர் - நகைச்சுவைக் கட்டுரை 
------------------------------------------------------------------------------------------------------------------
நம்ம நண்பர் குவாலிட்டி விஷயத்திலே ரெம்பவே உஷார் பார்ட்டிங்க. எதையுமே ஒரு தடவைக்கு ரெண்டு தடவை இல்லே பத்து தடவையாவது சரி பார்த்துட்டுதான் வாங்குவாருங்க.

இவர் மனைவிக்கு நகை வாங்க போனா கூடவே ஒரு அப்ரைஸரையும் கூட்டிட்டு போவாரு. அவர் பார்த்து ஓகே சொன்னாதான் அந்தக் கடையிலே நகை வாங்கலாம். இல்லேன்னா அடுத்த கடை. ஒரு ஜோடி தோடு வாங்க எத்தனை கடை இப்படி நடக்கிறது. வெறுத்துப் போன இவரு சம்சாரம் இப்பல்லாம்  தனியாவே நகைக்கடைக்கு போக ஆரம்பிச்சுட்டாங்க. வேற என்னங்க பண்றது .

மளிகைக்கடைக்கு போனா , அங்கே பருப்பு , புளி , அரிசின்னு ஒவ்வொண்ணுக்கும் ஆயிரம் குறை சொல்லி அந்தக் கடைக்காரரை ஒரு வழி பண்ணிடுவாரு. இவரு சொல்றதை கேட்டு வந்திருக்கிற வாடிக்கையாளர்களும் நடையைக் கட்டுறாங்க. இப்பல்லாம், இவரு வந்தா கடைக்கார பையனே இவரை உள்ளே விடுறதில்லைங்க.

எலக்ட்ரானிக் கடையிலே வேற மாதிரி. ஒரு ஹெட் போன் வாங்கப் போனா அதிலே இருக்கிற ஒவ்வொரு பார்ட்டையும் பிரிச்சு போட்டு விளக்கம் சொல்லணும், அது தவிர கேட்டலாக் புத்தகம் முழுக்க படிச்சுக் காட்டணும் இவருக்கு. விளங்குமா .
  
வெளிக் கடைகளே இந்தப் பாடு படுதுன்னா, இவரு வேலை பார்க்கிற ஆபீஸ் எப்படி இருக்கும். இதிலே இவரு அந்த சாப்ட்வேர் கம்பெனியில் குவாலிட்டி மேனேஜர் வேற. இவர் கிட்ட வர்ற சாப்ட்வேர் கோட் எல்லாம் டெஸ்ட் முடிஞ்சு கஸ்டமர் கிட்டே போனதா சரித்திரமே இல்லைங்க. எல்லாம் டெவெலப்மெண்ட் டீமுக்கே திரும்பிடும். இதனாலே அந்தக் கம்பெனியோட   விற்பனை அளவும் லாபமும்  குறைஞ்சுக்கிட்டே போக ஆரம்பிச்சிடுச்சு .

காரணத்தை ஆராய்ச்சி பண்ணின  கம்பெனி தலைவரு கண்டு பிடிச்சாருங்க. நம்ம நண்பர் கம்பெனிக்கு வந்த நாள்லே இருந்து எந்த சாப்ட்வேரும் கம்பெனியை விட்டு கஸ்டமர் கிட்டே போகவே இல்லை. அப்புறம் என்னாச்சு. நம்ம நண்பரை கம்பெனியை விட்டு தூக்கிட்டாங்க. இப்ப வேற வேலை தேடி அலைஞ்சுக்கிட்டு இருக்காருங்க.

ஹலோ, உங்களுக்கு தெரிஞ்ச ஏதாவது கம்பெனியில் இவருக்கு வேலை கிடைக்குமாங்க. என்னங்க. ஓடாதீங்க. நில்லுங்க.
-------------------------------------------------------------------------------நாகேந்திர பாரதி

செவ்வாய், 15 மே, 2018

காற்றில் காகிதம்

காற்றில் காகிதம்
------------------------------
இந்த மரக்கிளையில்
ஒட்டிக் கொண்டது காகிதம்

மடித்துக் கிடந்த
காப்பித்தூள் நினைப்போடு

கட்டிக் கிடந்த
மூட்டையின் நினைப்போடு

அமுங்கிக் கிடந்த
புத்தகப்பை நினைப்போடு

அச்சடித்து வெளிவந்த
அழகின் நினைப்போடு

கூழாய்ப் பிசைந்த
ஆலையின் நினைப்போடு

ஓங்கி வளர்ந்திருந்த
ஊட்டி மர நினைப்போடு

இந்த மரக்கிளையில்
ஒட்டிக்கொண்டது காகிதம்
------------------------------------------------நாகேந்திர பாரதி
http://www.nagendrabharathi.com

வியாழன், 10 மே, 2018

இறை வெளி

இறை வெளி
-----------------------
உள்ளும் வெளியுமாய்
ஓடிக் கொண்டிருப்பது

நீரும் நெருப்புமாய்
ஆடிக் கொண்டிருப்பது

காற்றும் உயிருமாய்
கலந்து கொண்டிருப்பது

விண்ணும் மண்ணுமாய்
விளங்கிக் கொண்டிருப்பது

நானும் நீயுமாய்
நடந்து கொண்டிருப்பது
----------------------------------------நாகேந்திர பாரதி
http://www.nagendrabharathi.com

ஞாயிறு, 6 மே, 2018

உறவின் பிரிவு

உறவின் பிரிவு
-------------------------
அக்கறையாய்ப் பேசும்
அன்புப் பேச்சில்
அறிவின் ஆழமிருக்கும்

எப்போதாவது நிகழும்
அபூர்வச் சிரிப்பில்
ஆயிரம் அழகிருக்கும்

கண்ணாடிக்கு உள்ளிருந்து
பாசம் மட்டும் அல்ல
கோபமும் எட்டிப் பார்க்கும்

மரியாதை கொடுப்பதில்
மாற்றுக் குறைந்தாலோ
மவுனம் தொடர் ஆகும்

ஒவ்வொரு புது வருடமும்
அவர் தரும் டைரியில் தான்
ஆரம்பம் ஆகும்

இனி வரும் வருடங்களில்
அந்த டைரிகளும் இல்லை
அவரும் இல்லை
-----------------------------------------நாகேந்திர பாரதி
 http://www.nagendrabharathi.com

புதன், 11 ஏப்ரல், 2018

இறை உணர்வு

இறை உணர்வு
--------------------------
உயிரும் மனதை
உணரும் பொழுது

மனமும் அறிவாய்
மாறும் பொழுது

அறிவும் பரமும்
சேரும் பொழுது

இயக்கம் இருப்பாய்த்
தெரியும் பொழுது

இறையும் நாமும்
இணையும் பொழுது
--------------------------------------நாகேந்திர பாரதி
http://www.nagendrabharathi.com

சனி, 24 மார்ச், 2018

நொடிப் பொழுது

நொடிப் பொழுது
-----------------------------
பொங்குகின்ற பாலுக்கும்
நொடிப் பொழுதே

புலருகின்ற காலைக்கும்
நொடிப் பொழுதே

மலருகின்ற மொட்டுக்கும்
நொடிப் பொழுதே

மயங்குகின்ற காதலுக்கும்
நொடிப் பொழுதே

நொடிப் பொழுதில்
நேருவதே இயற்கை

படிப் படியாய்ச்
சேருவதே வாழ்க்கை
----------------------------------நாகேந்திர பாரதி
http://www.nagendrabharathi.com

திங்கள், 19 மார்ச், 2018

பேர் தெரியாப் பெரியவர்கள்

பேர் தெரியாப் பெரியவர்கள்
--------------------------------------------------
தொப்பியோடும் பூட்ஸோடும்
போலீஸ் உடுப்போடும்
ஏட்டுத் தாத்தா

அம்மன் சாமி தெரு உலாவில்
முன்னாடி நடந்து வரும்
பேஷ்கார் தாத்தா

மதுரைக்கும் சிவகங்கைக்கும்
கிரிமினல் கேஸ் கட்டோடு
வக்கீல் தாத்தா

கனத்த சிரிப்போடும்
கலகலப்புக் குரலோடும்
மீசைக்காரத் தாத்தா

நெல்லு வண்டி ஏத்தி
பக்கத்தூரு சந்தை போகும்
நெல்லுத் தாத்தா

சிக்கல் ஊரில் இருந்து
விடுமுறைக்கு வருவதனால்
சிக்கல் தாத்தா

கையை வீசி வீசி
வேகமாக நடப்பதால்
கைவீச்சுத் தாத்தா

கணக்கு வழக்கைக்
கணக்காகப் பார்ப்பதால்
கணக்குத் தாத்தா

சிரிக்கப் பேசி
விளையாட்டுத் தோழனாய்
காமெடித்  தாத்தா

அடையாளப் பட்டத்தால்
தாத்தாக்கள்  தெரிந்தாலும்
பேர் மட்டும் தெரியாது
------------------------------------------நாகேந்திர பாரதி
http://www.nagendrabharathi.com

சனி, 17 மார்ச், 2018

கால எந்திரம்

கால எந்திரம்
-------------------------
பின்னாலே ஓடிப்
போகலாம் என்றால்

செய்த சிலதைச்
செய்யாமல்  விடலாம்

செய்யாத சிலதைச்
செய்து விடலாம்

முன்னாலே ஓடி
வந்து பார்த்தால்

முதலில் இருந்ததே
நன்றாக இருக்கலாம்
-------------------------------நாகேந்திர பாரதி 
http://www.nagendrabharathi.com

செவ்வாய், 6 மார்ச், 2018

கோயில் மணியோசை

கோயில் மணியோசை
-------------------------------------------
உச்சிக்கால பூஜையை
உச்சரிக்கும் மணியோசை

மாடப் புறாக்களை
இடம் பெயரச் செய்யும்

படுத்திருந்த முதியோரை
நடை பயிலச் செய்யும்

மூடி மூடிக் காண்பித்த
பிரசாதத் தட்டுக்கள்

பெரிய தீப ஆராதனை
முடிந்தவுடன் திறக்கும்

முதியோர் வாய் ஒலிக்கும்
பிரசாத ஓசையினைக்

கேட்டபடி அடங்கும்
கோயில் மணியோசை
------------------------------------நாகேந்திர பாரதி
http://www.nagendrabharathi.com

திங்கள், 5 மார்ச், 2018

சப்தத்தின் அர்த்தங்கள்

சப்தத்தின் அர்த்தங்கள்
-------------------------------------------
வயக்காட்டு வெளியில்
தவளைகள் சப்தம்

வாசற் புறத்தில்
காக்கைகள் சப்தம்

மரத்தின் கிளைகளில்
கிளிகளின் சப்தம்

கோபுர வாசலில்
புறாக்கள் சப்தம்

சப்தத்தின் அர்த்தங்கள்
புரியா விட்டாலும்

உள்ளுக்குள் எழுப்பும்
உணர்ச்சிகள் வேறு
-------------------------------------நாகேந்திர பாரதி
http://www.nagendrabharathi.com

ஞாயிறு, 4 மார்ச், 2018

பாரம்பரியம்

பாரம்பரியம்
-----------------------------
இட்டிலியும் சோறும்
பாரம்பரியம்

சட்டினியும் குழம்பும்
பாரம்பரியம்

வேட்டியும் சட்டையும்
பாரம்பரியம்

பாவாடை தாவணியும்
பாரம்பரியம்

உணவிலும் உடையிலும்
பாரம்பரியம்

மாறினாலே மாறிவிடும்
பாரம்பரியம்
-------------------------------------நாகேந்திர பாரதி
http://www.nagendrabharathi.com

சனி, 3 மார்ச், 2018

வேர்வைக் கோலங்கள்

வேர்வைக் கோலங்கள்
----------------------------------------------
சமையல் செய்யும்போது
வேர்க்கிறது

வெயிலில் அலையும்போது
வேர்க்கிறது

உடற்பயிற்சி செய்யும்போது
வேர்க்கிறது

வேர்ப்பது என்னமோ
நல்லதுதான்

துடைப்பது மட்டும்தான்
கஷ்டம்
--------------------------------நாகேந்திர பாரதி
http://www.nagendrabharathi.com

வெள்ளி, 2 மார்ச், 2018

தெப்பக் குளம்

தெப்பக் குளம்
-------------------------
ஒரு காலத்தில்
ஓடியதாம் தெப்பம்

இப்போது வெறும் குளம்
தண்ணீரும் இல்லை

வரிசை வரிசையாக
வண்ணக் குடங்கள்

ஓரத்துக் கிணற்றில்
ஊறும் நீருக்காக

காத்திருந்து கழிகிறது
பகலும் இரவும்
---------------------------------------நாகேந்திர பாரதி
http://www.nagendrabharathi.com

ஞாயிறு, 25 பிப்ரவரி, 2018

கீத்துக் கொட்டகை

கீத்துக் கொட்டகை
------------------------------------
மண்ணு ரோட்டில் நடந்து போய்
தார் ரோட்டில் பஸ் பிடித்து

பக்கத்து டவுனில் இறங்கி
பன்னும் டீயும் சாப்பிட்டு

கீத்துக் கொட்டகை கியூவில் நின்று
சிவப்புச் சீட்டை வாங்கிக் கொண்டு

பாதி கிழித்த சீட்டோடு
மண்ணைக் குவித்து உட்கார

அழுக்குத் திரையில் வெளிச்சம் பாயும்
மனத் திரையில் படம் ஓடும்
----------------------------------------------நாகேந்திர பாரதி
http://www.nagendrabharathi.com

வெள்ளி, 23 பிப்ரவரி, 2018

மாறிப் போன மண்டபம்

மாறிப் போன மண்டபம்
---------------------------------------
உச்சியில் ஓடிக்கொண்டிருக்கும்
காகங்கள், புறாக்கள்

வாசற்  குளப் படிக்கட்டுகளை
முட்டிப் பார்க்கும் மீன்கள்

பக்கத்துப் பள்ளிக்கூட
மதிய உணவுப் பருக்கைகள்

தொலைந்து போன உறவுகளை
அசை போட்டபடி முதியவர்கள்

அத்தனைக்கும் வீடாக
மாறிப் போன மண்டபம்
--------------------------------------------நாகேந்திர பாரதி 
http://www.nagendrabharathi.com 

வியாழன், 15 பிப்ரவரி, 2018

கிராமத்தை விட்டு ..


கிராமத்தை விட்டு ..
--------------------------------------
தாவிக் குதிக்க வழியின்றி
காய்ந்த சகதிக்குள் தவளைகள்

மேய்ச்சல் நிலத்தைக் காணாமல்
வீடு திரும்பும் ஆடுகள்

மரத்தில் பழுத்த இலைகளை
தூற்றிச் செல்லும் காற்று

குடிசை ஓலை ஓட்டைகளை
அடைக்கப் பார்க்கும் வெயில்

வெறித்துக் கிடக்கும் வானத்தோடு
கிராமத்தையும் விட்டு விட்டு ..
---------------------------------------------நாகேந்திர பாரதி 
http://www.nagendrabharathi.com

புதன், 14 பிப்ரவரி, 2018

காதலர் தினம்

காதலர் தினம்
-------------------------
பார்க்கும் பொழுதெல்லாம்
பரவசம் பற்றிக் கொண்டால்

கேட்கும் பொழுதெல்லாம்
கிளர்ச்சியும் தொற்றிக் கொண்டால்

தொடும் பொழுதெல்லாம்
தொலைந்தே போய் விட்டால்

எல்லா நாட்களும்
காதலர் நாட்கள் தான்

இருவர் மனங்களும்
ஒன்றில் ஒன்று தான்
----------------------------------------நாகேந்திர பாரதி
http://www.nagendrabharathi.com

ஞாயிறு, 11 பிப்ரவரி, 2018

பறவைப் பார்வை

பறவைப் பார்வை
----------------------------
மாடியில் இருந்து பார்க்கும் போது
வேறு மாதிரி தெரிகிறது

மனிதர்கள் குச்சி குச்சிகளாக
நடந்து கொண்டு இருக்கிறார்கள்

மரங்கள் முட்டி மோதிக் கொண்டு
மேலே வர முயற்சிக்கின்றன

தரை மட்டும் எப்போதும் போல
கீழேயே இருக்கிறது

ஆகாயமும் எப்போதும் போல
மேலேயே இருக்கிறது

இடையில் இருப்பவைகள் தான்
வேறு மாதிரி தெரிகின்றன
---------------------------------------நாகேந்திர பாரதி
http://www.nagendrabharathi.com

திங்கள், 5 பிப்ரவரி, 2018

குளிர் கோலம்

குளிர் கோலம்
-----------------------
விசிறிகளுக்கு விடுமுறை
வியாதிகளுக்கு பலமுறை

கொசுக்களுக்கு உற்சாகம்
கூடுதலாய் ரத்த தானம்

போர்வைகளின்  புறப்பாடு
பஜனைகளின் வழிபாடு

சீக்கிரமாய்த் திரும்புகின்ற
பறவைகளின் சிணுங்கல் ஒலி

காற்றுக்குள் குளிர் வைத்து
கடவுளின் விளையாட்டு
-------------------------------------நாகேந்திர பாரதி
http://www.nagendrabharathi.com

வெள்ளி, 26 ஜனவரி, 2018

மருந்தே உணவு

மருந்தே உணவு
---------------------------
இருக்கிற வியாதிகட்கு
எடுக்கிற மாத்திரைகள்

இல்லாத வியாதிகட்கு
தடுக்கிற மாத்திரைகள்

மருந்தும் மாத்திரையும்
ஆராய்ச்சி பண்ணியதால்

மருத்துவத் துறையிலே
பட்டமும் பார்த்தாச்சு

மருந்தே உணவாகும்
கஷ்டமும் சேர்த்தாச்சு
--------------------------------நாகேந்திர  பாரதி
http://www.nagendrabharathi.com 

ஞாயிறு, 14 ஜனவரி, 2018

பொங்கலோ பொங்கல் - நகைச்சுவைக் கட்டுரை

         பொங்கலோ பொங்கல் - நகைச்சுவைக் கட்டுரை 
  -----------------------------------------------------------------------------------------------------
'தேங்காயை நல்லா தட்டிப் பார்த்து வாங்குனீங்களோ ' கேட்டாள் மனைவி. 'முட்டிப் பாக்காததுதான் பாக்கி . ரெம்ப தடவை தட்டிப் பார்த்தாச்சு . இன்னும் கொஞ்ச நேரம் தட்டி யிருந்தா தேங்காய் ரெண்டா   உடைஞ்சிருக்கும் ' என்றோம் .

'இந்த நக்கலுக்கு ஒண்ணும் குறைச்சல் இல்லே. பொங்கலுக்கு பச்சரிசியோடு சேர்த்து பாசிப்  பருப்பு வாங்கி வரச் சொன்னா, சாம்பாருக்கு துவரம்  பருப்பு வாங்கிட்டு வந்திருக்கீங்க. கடைக்கார அண்ணாச்சி கிட்டே கொடுத்திருந்தா அவரே ஒழுங்கா எடுத்துக் கொடுத்திருப்பார் இல்லே' என்றாள்.

'இல்லே லிஸ்ட் பெருசா இருக்கே, நாமளும்  கொஞ்சம் ஹெல்ப் பண்ணலாம்னுதான் நானும் ஒண்ணு ரெண்டு  ஐட்டம் எடுத்தேன்
''அந்த ரெண்டாவது ஐட்டம்தான் வெல்லமா. தெரியுது. பாகு வெல்லம் போட்டிருந்தேன் .அச்சு வெல்லம்   வாங்கிட்டு வந்திருக்கீங்க. பாகு வெல்லம்தான் இனிப்பு கொஞ்சம் தூக்கலா இருக்கும்   '

நாம் மனசுக்குள் நினைத்துக் கொண்டோம் ' எந்த வெல்லம் போட்டா என்ன .சக்கரை வியாதி உள்ள நமக்கு கிடைக்கப் போவது என்னமோ கொஞ்சூண்டு பொங்கல் '
'என்ன சொன்னீங்க'
மனசோட பேசறதா நினைச்சுக்கிட்டு வாயை விட்டுட்டோமோ .
'அது ஒண்ணும் இல்லீம்மா.  மத்த சாமான்லாம் கரெக்ட்டா இருக்குதா'

' இது என்னங்க. ஒட்டடைக்குச்சி    மாதிரி. இதுதான் கரும்பா. கொஞ்சம் கட்டையா பாத்து வாங்கிருக்கக் கூடாது '  
'இல்லேம்மா , இப்ப கரும்பு விளைச்சல் சரி இல்லையாம். எல்லா கரும்பும்  இப்படித்தான் வருதாம் '.
'ஏதாவது விவசாயி பிரச்சினையை டிவியில் அரை குறையாக கேட்டுட்டு அடிச்சு விடுறது. பக்கத்து வீட்டிலே வாங்கி வந்திருக்கிற கரும்பைத்தான் நான் பார்த்துட்டேனே. ஒழுங்கா பார்த்து வாங்கணும்' என்று அலுத்துக் கொண்டாள்.

அவர் கூட அவர் மனைவியும் சேர்ந்து போயி வாங்கிட்டு வந்ததை இப்ப இவ கிட்டே சொல்லிக்கிட்டு இருக்க முடியுமா . நாம 'தனி ஒருவனா' ரெண்டு தோளிலேயும் ரெண்டு கட்டைப் பைகளை சுமந்துக்கிட்டு கையிலே இந்த கரும்பு வில்லை - இல்லை - கரும்புக் குச்சிகளை புடிச்சுக்கிட்டு ரோட்டிலே டிராபிக்கில்  நடந்து வர்றதை பாத்தவங்களுக்கு தெரியும் நம்ம பாவம்னு. சரி அதை விடுங்க.

இன்னமும் லிஸ்ட் அர்ச்சனை முடியலே. 'பச்சைப் பனங்கிழங்கு வாங்கிட்டு வரச் சொன்ன, அவிச்ச கிழங்கை வாங்கிட்டு வந்திருக்கீங்க.'
'இல்லேம்மா, பாவம், உனக்கு காலையிலே இருந்து ரெம்ப வேலை. உனக்கு இந்த அவிக்கிற சிரமத்தைக் குறைக்கலாம்னுதான். '

'ஆஹாஹா  , ரெம்பத்தான் சிரமத்தைக் குறைக்கிற கரிசனம். சாயந்திரம் வெளியிலே போயிட்டு வரக் கொஞ்சம் லேட்டானா பாலைக் காய்ச்சி ஒரு காபி போட்டுக் குடிக்கத் தெரியாது. நம்ம வந்ததும் காபி க்கு  லேட்டாயிடுச்சுன்னு முறைக்கிறது. ரெம்பத்தான் சிரமத்தைக் குறைக்கிறாங்களாம். '

'அது சரி . இது என்னங்க. பச்சை மொச்சை எண்ணிப் பாத்தா இருபது தான் இருக்கும் போலிருக்கு. '
'அது வந்து எல்லாக் காயும் கொஞ்சமா வாங்கிட்டு வரச் சொன்னியாஅதுதான் இதுதான் நூறு கிராம் ... ' என்று இழுத்தோம்.

'அவியலுக்கு பச்சை மொச்சைதான்  ஜாஸ்தி போடணும். அரைக் கிலோவாவது வாங்கி வந்திருக்கணும். எல்லாம் எழுதிக் கொடுக்கணுமா . தனக்குன்னு ..... ' என்று ஏதோ சொல்ல வந்தவள் நிறுத்திக் கொண்டாள்.
அந்த மரியாதை இருக்கட்டும் என்று மனதிற்குள் நினைத்துக் கொண்டோம்.

'என்னங்க இது. இஞ்சி கிழங்கு இருக்குது. மஞ்சள் கிழங்கை காணோம். அதுதானே , பொங்கல் பானையை சுத்திக் கட்ட வேணும்' என்றாள் .
'இல்லே  , இதுவும் மஞ்சளாய்த்தானே இருக்கு...' என்ற படி இஞ்சி தின்ற ஏதோ மாதிரி இழுத்து  நிறுத்தினோம்.

'சரி சரி மாத்த வேண்டியது , வாங்க வேண்டியது  எல்லாம் இன்னொரு லிஸ்ட் போட்டுக் கொடு ' என்று வாங்கிக் கொண்டு இன்னொரு நடை அண்ணாச்சி கடைக்கு நடந்தோம். இந்த முறை ஞாபகமாக அவர் மேல் இரக்கப் படாமல் எல்லா ஐட்டம்களையும் அவரையே எடுத்துக் கொடுக்க வைத்தோம்.

வீட்டுக்கு வந்து கொஞ்ச நேரம் ஆச்சு. 'வாங்க வாங்க . பொங்கல் பொங்கப் போகுதுன்னு ' அடுப்படியில் இருந்து சத்தம். நாமும் அவசர அவசரமா போயி நிக்கிறோம். தண்ணீர் பொங்கி வர்ற மாதிரி வர்றது . போயிடுது . இப்படி நம்மளை கால் கடுக்க கால் மணி நேரம் நிக்க வச்சப்புறம் ஒரு வழியா ஒரு ஓரமா  நுரை பொங்கி வழியுற மாதிரி தெரிஞ்சதும் ' பொங்கலோ பொங்கல் 'ன்னு அவசரமா கோஷமிட்டுட்டு  வந்து காலாற உட்கார்றோம்.

அப்புறம் 'பூஜைக்கு தேங்காய் உடைக்க வாங்க ' ன்னு அழைப்புஇதிலேயாவது நமக்கு முதல் மரியாதை கிடைக்குது ன்னு சந்தோசப்பட்டுக்கிட்டு  போயி, தேங்காய் உடைச்சு, சூடம் காண்பிச்சு சாமி கும்பிட்டு , காலிலே விழற மனைவியை  தொட்டு தூக்கி குங்குமம் வச்சு ' வாழ்க வளமுடன்' ன்னு சொல்றோம். ஏதோ ஒரு நிமிட சந்தோசம். இதுக்குத்தானே ரெண்டு தடவை கை கடுக்க பைகள் சுமந்து , கால் கடுக்க படியேறி வந்தோம் .

அப்புறம் வர்றது தாங்க ஆன்டி- கிளைமாக்ஸ் .. சாப்பிட உட்கார்ற நம்ம தட்டிலே வந்து விழறது. ஒரு டீ ஸ்பூன் சக்கரைப் பொங்கலும், ஊறுகாய் மாதிரி தொட்டுக்கிறதுக்கு   ஒரு துண்டு சக்கரை வள்ளிக் கிழங்கும். அப்புறம் வழக்கமான கைக்குத்தல் அரிசி சோறும் கொஞ்சம் காய்கறியும்இந்த சக்கரை வியாதிக்காரங்களுக்கு இதுதாங்க ' பொங்கலோ பொங்கல்   '
-----------------------------------------------------------------------------நாகேந்திர பாரதி