செவ்வாய், 19 ஜனவரி, 2016

வித்துவான் வேகராகன்

வித்துவான் வேகராகன்
------------------------------------------------------------------------
நம்ம வித்துவான் வேகராகன் இப்பதான் கொஞ்சம் ப்ரீயா இருக்கான்ஒரு மாசமா இந்த சபாவிலே கச்சேரி, அந்த சபாவிலே கச்சேரி ன்னு ஓடிக்கிட்டே இருந்தான்.

                போன வருஷம் ஒரு சபாவிலே கூட கச்சேரி கிடைக்காதவன்  இந்த வருஷம் எப்படி இத்தனை சபாவிலே பாடுறான்னு விசாரித்துப் பார்த்ததிலே தெரிய வந்தது . இந்த வருஷம் பிரபல வித்வான்கள்  பலர் வெள்ள சேதத்துக்கு அனுதாபம் தெரிவிச்சு பாடாததாலே இவனுக்கு அடிச்சது சான்ஸ்.

என்ன ஒரு பிரச்சினை. இந்த சங்கீத விமர்சகர்கள் எல்லாம் இவன் கச்சேரிகளைக் கேட்டு கிழி கிழி ன்னு கிழிச்சதிலே   அடுத்த வருஷம் ஒரு சபாவிலே யாவது இவனைக் கூப்பிடுவாங்களாங்கிறது  சந்தேகம் தான். அது தவிர இவன் சபாக்கள்ளே அடிச்ச கூத்து இருக்கே.

வேற என்னங்க. கச்சேரிக்கு நடுவிலே இண்டர்வல் விட்டுட்டு சபா காண்டீன்லே போயி முதல் ஆளா உட்கார்ந்து ஓசியிலே ஸ்வீட்,    காரம், காப்பி சாப்பிட்டு வர்றது. அப்புறம் பாடுற சங்கதியிலே எல்லாம் ஒரே ஏப்பம்   தான்.   

முன்னாலே பாடினது மட்டும் என்ன வாழ்ந்துச்சுன்னு கேட்கிறீங்களா. அதுவும் சரிதான். வித்தியாசமா பாடுறேன் பேர்வழின்னு சொல்லிட்டு கல்யாணி ராகத்துக்கு நடுவிலே  கால பைரவியை சாரி பைரவி ராகத்தை கலந்து அடிக்கிறது. கேட்டா ராக மாலிகையாம்அதுக்கு கண்றாவி மாலிகையின்னு ஒரு விமர்சகர் பேரே வைச்சுட்டார்.

அப்புறம் தனி ஆவர்த்தனத்துக்கு பெருந்தன்மையா நேரம் கொடுக்கிறேன் பேர்வழின்னு பாதி நேரம் சும்மாவே உட்கார்ந்து வெத்தலையைக் குதப்பிக்கிட்டு தப்புத் தாளம் போட்டுக்கிட்டு இருக்கிறது.

கடைசியிலே மங்களம் பாடுறப்போ இவன் அடிக்கற கூத்து இருக்கே . ஈவ்  டீசிங்  எல்லாம்  ஒண்ணும்  இல்லைங்க , மங்களம்னு யாரும் இல்லைங்க, இவன்தான் கச்சேரியை முடிக்க  மங்கலம் பாடுறப்போ பாட்டையும் நடனத்தையும் கலந்து செய்யிறேன்னு சொல்லிப்புட்டு எந்திரிச்சு   டான்ஸ் ஆடுறது.

இவன் டார்ச்சர் தாங்க முடியாம சில சபாக்கள்ளே ஏற்கனவே புக் பண்ணியிருந்த தையும் கேன்சல் பண்ணிட்டாங்க. இவன் பாட்டைக் கேட்காத சில சபாக்கள்   தான் மாட்டிக்கிட்டு முழிச்சுச்சு .

சீசன் முடிஞ்சாச்சு . இப்ப 'வித்துவான் வேகராகன்' 'கத்துவான் சோகராகன்' ன்னா ஆகிப் போயி உட்கார்ந்து இருக்கான்.
--------------------------------------------------------------நாகேந்திர பாரதி


6 கருத்துகள்: